[euro]

Kinezi 18 vjeçar ka nënshkruar kontratë me Manchester United, në vlerë prej 5 milionë eurove
Futbollisti i kombëtares kineze, Dong Fangzhu, që nga dita e djeshme edhe zyrtarisht është anëtar i skuadrës kampione të Anglisë, Mançester Junajtid. Klubi i deritashëm i sulmuesit 18-vjeçar kinez, Dalian Shajd, ka bërë të ditur se transferi i Dong Fangzhus në “Old Traford” u ka kushtuar anglezëve 5 milionë euro.

Menaxheri i përgjithshëm i këtij klubi kinez, Lin Lefeng, ka pohuar se kontrata është nënshkruar të shtunën. “Mançester Junajtid ka paguar 5 milionë euro dhe Dong Fangzhu do të udhëtojë në Angli në përputhje me vendimin e klubit të tij të ri”, ka pohuar Lefeng. Megjithatë ai nuk ka vërtetuar faktin se a është përmbushur edhe pjesa e dytë e marrëveshjes, sipas të cilës, klubi nga “Old Trafordi” do të dërgojë trajnerë në Kinë, të cilët do të punonin me grupmoshat e reja. Lefeng ka shtuar se edhe tre apo katër futbollistë të skuadrës Dalian Shajd janë në vëmendjen e klubeve evropiane. Në mesin e tyre është edhe kapiteni i kombëtares olimpike të Kinës, Feng Hsiaoting, i cili është në provë njëjavëshe në Nant. Ndërkohë në Ligën Premiere tashmë luajnë dy futbollistë kinez, kurse në provë janë edhe dy futbollistë tjerë. Mesfushori Li Tie është titullar tek skuadra e Evertonit, kurse futbollisti i krahut, Sun Xhihaj, është njëri nga lojtarët më të mirë të Mançester Sitit. Potenciali komercial i angazhimit të futbollistëve kinezë është i madh. Dy ndeshjet e Evertonit dhe Mançester Sitit në këtë edicion (më 8 dhe 1 janar) në transmetimet e drejtpërdrejta në Kinë, i kanë përcjellë më shumë se 100 milionë njerëz, që është shikueshmëria më e madhe në historinë e ndonjë ndeshjeje të Ligës Premiere. Ndërkohë duke pasur parasysh popullaritetin e Mançester Junajtid në këtë pjesë të botës, atëherë llogaria e transferimit të Dong Fangzhus është plotësisht e qartë