[munti]

DEKLARATE E MYFTINISE SHKODER

NDAL VENDIMEVE ANTIKUSHTETUESE DHE ANTI LIGJORE QE NDALOJNË

MBULESEN (SHAMINË) DHE MBAJTJEN E MJEKRËS NË AMBJENTET
ARSIMORE


Myftinia Shkodër, del sot në këtë deklaratë për shtyp, në
emër të komunitetit të myslimanëve të Qarkut Shkodër, për
të shprehur shqetësimin dhe indinjaten e tyre, lidhur me
vendimin e Rektoratit të universitetit të Durrësit
“Aleksander Moisiu”, të përfaqësuar nga rektori i tij, Agim
Kukeli, për përjashtimin e dy studentëve, Behije Hoxha për
mbajtje shamie në klasë dhe Julian Mebelli, për mbajtje
mjekre.

E drejta e lirisë së çdo besimi qoftë ai dhe të drejtave të
njeriut janë të sanksionuara në Kushtetuten e Republikës së
Shqipërisë, në Ligjet e Shtetit Shqiptar dhe në Ligjet
Ndërkombetare, dhe gjithsecili obligohet t’i ruaj ato.
Nuk ka dyshim, që vendimi i këtij rektori është
antikushtetues dhe antiligjor. Këtë e vërtetojnë edhe
prononcimet në media të juristëve, rektorëve dhe
specialistëve të legjislacionit shqiptar, si p.sh: z.
Kreshnik Spahiu, drejtues i Zyrës për Mbrojtjen e
Qytetarëve, Prefekti i Durrësit, z. Klodian Pajuni, Rektori
i universitetit të Tiranës, z. Shezai Rrokaj, etj.

Juristi Kreshnik Spahiu, në lidhje me vendimin për
përjashtimin e dy studentëve për arsyet e lartëpërmendeura,
shprehet duke thënë se: “Ky është një vendim i hapur
antikushtetues, e çdo veprim që nuk mbështetet në
Kushtetutë duhet të dënohet ashpër, në mënyrë që të mos
krijohen precedente që rrezikojnë sovranitetin e
Kushtetutës”. Këtë qëndrin, juristët e mbështesin në Nenin
24 të Kushtetutës ku thuhet qartë qe: “Secili është i lirë
të zgjedhë, ose të ndryshojë fenë ose bindjen, si dhe t’i
shfaqë ato individualisht ose kolektivisht në publik ose në
jetën private nëpërmjet kultit, arsimimit, praktikave ose
kryejes së riteve”, si dhe e mbeshtesin në Nenin 10 dhe 17
te saj.

Gjithashtu vendimet e universitetit të Durrësit, sic
shprehen juristët, bien në kundërshtim edhe me Nenin 18 të
Deklaratës Universale për të Drejtat e Njeriut, Nenin 9 të
Konventës Evropiane për të Drejtat e Njeriut, Nenin 26 të
Konventës Ndërkombëtare për të Drejtat Civile dhe Politike,
etj.

Përsa më sipër, në zbatim të Kushtetutës dhe të Ligjit, në
emer të myslimanëve të Qarkut Shkodër, i bëjmë thirrje
rektorit të këtij universiteti, z. Agim Kukeli të tërheqë
menjëherë vendimet e tij për përjashtimin e dy studentëve
myslimane, në mënyrë që të respektojë ndjenjat, simbolet
dhe lirinë e besimit të sanksionuara në Kushtetutë.
Mbështesim plotësisht të drejten e ligjshme të dy
studentëve përballë dhunës psikologjike dhe adminstrative
të rektorit, si dhe mbështesim fuqishëm qëndrimin e
Komunitetit Mysliman Shqiptar dhe të Myftnisë së Durrësit.

Së fundi, i bëjmë thirrje Presidentit të Republikës, z.
Alfred Moisiu, Kryeminstrit, z. Sali Berisha, Kryetares së
Kuvendit, znj. Jozefina Topalli, Ministrit të Arsimit, z.
Genc Pollo dhe institucioneve kopetente të denoncojnë
vendime të tilla provokuese, si dhe të mos heshtin, kur
ditën për diell shkelet Kushtetuta e Shqipërisë.

Myftinia e Shkodrës, siguron se do të angazhohet në media
nëpërmjet rrugëve ligjore dhe demokratike për të denoncuar
dhe dënuar veprime që cënojnë lirinë e besimit, tolerancën
dhe sigurinë.


Shkodër, më 30.10.2006

MYFTINIA SHKODER