[munti]

Drejtues të universiteteve të Tiranës kërkojnë që në ligjin e ri të arsimit të lartë të vendoset kodi i etikës

Rektorët, kundër homologut të Durrësit për veshjet
"Nuk ka një rregullore që të ndalojë studentët të mbajnë simbole"
Riviera Dedaj
Rektorët e universiteteve në Tiranë janë shprehur pro mbajtjes së simboleve në shkollë. Përveç deklaratave, këtë e tregon më së miri liria që ekziston në universiteteve për mbajtjen e ferexhesë dhe të mjekrës. Këto dy simbole janë bërë objekt i debateve mes studentëve dhe pedagogëve. Në Universitetin e ri të Durrësit, rektori Agim Kukeli ka paralajmëruar studentët për përjashtim nëse nuk heqin simbolet. Ndërkohë, vendimi i tij është kundërshtuar nga rektori i Universitetit të Tiranës, Shezai Rrokaj. Ai thotë se nuk ka një rregullore apo një ligj të përbashkët që ta ndalojë mbajtjen e shamisë apo mjekrës për meshkujt në auditorë.

Në mënyrë që kjo histori të mos përsëritet më, ai propozon që të miratohet një kod etike dhe të përfshihet në ligjin e ri të arsimit të lartë. "Është e nevojshme që disa probleme që kanë të bëjnë me veshjen, sjelljen etj., të përfshihen në kodin e etikës", tha Rrokaj. Po të njëjtin mendim tha edhe rektori i Universitetit Politeknik, një nga kundërshtarët e hershëm të mbajtjes së simboleve në shkollë. Ai u shpreh se "unë, personalisht, nuk i paragjykoj studentët, por për të mirën e shkollës duhet të ketë një kod etike". Ka më shumë se tre vjet që rektori i Politeknikut është në një proces gjyqësor pikërisht për këtë çështje. Një student i këtij fakulteti ka më shumë se tre vjet që nuk është lejuar të hyjë në marrë diplomën për shkak se mban mjekër. "Ai është penguar për shkak të pamjes së jashtme jo të denjë për një student", tha Hoxha, ndërsa shtoi se zgjidhja e këtij problemi është miratimi i kodit të etikës.

Për studentët myslimanë që mbajnë simbole, për vajzat ferexheja dhe për djemtë mjekra është debatuar disa herë. Por kësaj radhe, debati mori rrugë institucionale, pasi u përfshinë drejtuesit. Para tri javësh një vajzë e vitit të parë të Fakultetit të Gjuhëve të Huaja bëri publik lajmin se rektori i universitetit, Agim Kukeli, e ka thirrur në zyrë dhe i ka kërkuar të vijë në shkollë pa shami, duke i lënë afat dy javë. E njëjta histori u përsërit një javë më parë në të njëjtin universitet, ku një djali që mbante mjekër iu kërkua ta hiqte atë.

Ky është i vetmi universitet që del hapur kundër simboleve. Ndërkohë, në të gjithë të tjerat, studentët besimtarë mund të mbajnë simbolet e tyre. Sipas rektorit të Universitetit të Tiranës, Shezai Rrokaj, ato nuk mund të ndalohen, pasi janë pjesë e realitetit shqiptar. "Në universitetin që unë drejtoj ka disa djem dhe vajza me shami apo me mjekër, por pavarësisht kësaj, ata janë qytetarë të denjë dhe respektojnë rregullat e shkollës", tha Rrokaj.

Gazeta Shqip
-------------