[prishtinasi]

Telegrafi 09.02.2007.

Është bërë i njohur përmes një demonstrate. Vazhdon të protestojë gati dhjetë vite më vonë, ndërkohë që thotë se nuk ka pavarësi të Kosovës, pa protestuar për muaj të tërë. Albin Kurti, thotë se do të vazhdojë rrugën e tij, derisa qëllimi të mos jetë arritur.
Ai mohon tërë sistemin e vendit, ndërkohë që pas lirimit nga burgu i Nishit, pas luftës, i janë ofruar partitë e ndryshme politike për ta futur në radhët e veta, por Kurti nuk ka pranuar.
Ishte një nga liderët e protestës studentore të 1 tetorit të vitit 1997. Studenti i dalluar me flokët e gjata, siç mbahet mend në popull, kërkon vetëvendosje për popullin e Kosovës. Albini vazhdon të sillet si revolucionar në stilin e Ernesto Che Guevarës, ndonëse shumëkush thotë se ndonjëherë e tepron.
Planet e pakos nuk mund të zbatohen në terren
Telegrafi: Z. Kurti, thoni se pakoja nuk është pritur mirë, megjithëse ka pasur reagime pozitive. Çfarë kërkoni përmes protestës?
Albin Kurti: Në tubimet që kemi nëpër fshatra vërehet qartë se si është pritur pakoja e Martti Ahtisaarit. Populli ka besuar atë që ua kanë thënë politikanët, se koncesionet të cilat i janë dhënë Serbisë, janë çmim për pavarësi dhe në fund në këtë pako të Ahtisaarit, ishin përfshirë të gjitha ato koncesione, por jo edhe pavarësia. Ka një zhgënjim të madh që është kthyer në një indinjatë të madhe. Besoj se të gjithë do të marrin pjesë në demonstratën që kemi nesër, në orën 14:00. Jo të gjithë të pakënaqurit demonstrojnë dhe unë mendojë se ky është rezultat i një kategorie, që besojnë se nuk mund të kenë shumë ndikim. Ne do të dërgojmë një mesazh se nëse kanë gjetur disa politikanë dhe i dërgojnë në Vjenë për marrëveshje, ato nuk do të mund të realizohen në terren, sepse qytetarët nuk duan as decentralizimin, as Misionin Civil Ndërkombëtar, që e trashëgon UNMIK-un, as eksterritorialitetin, as kompensimin e shpenzimeve të Serbisë si borxhin e Kosovës. Ata duan lirinë, pavarësinë dhe sovranitetin. Serbia është armik i yni sepse ka të kaluar dhe plane kriminale. Nuk i kuptojë politikanët kur hezitojnë ta quajnë Serbinë si armik.
Telegrafi: A pritni të keni masivitet në këtë protestë?
Albin Kurti: Besojë së do të kemi aq sa në demonstratën e 28 nëntorit. Fakti që çështja e Kosovës është kurthuar në Këshillin e Sigurimit, e që paraqet një adresë planetare, fatkeqësisht po e bën qytetarin e Kosovës të ndjehet i vogël, i pafuqishëm. Por, ne besojmë se njeriu është i pafuqishëm vetëm kur është i vetëm, jo kur është i organizuar. Ky është mesazhi që ne mundohemi t’i japim qytetarëve përmes protestave.
Telegrafi: Mendon se Kosova është harruar nga bashkësia ndërkombëtare?
Albin Kurti: Nuk mendoj se është harruar, mirëpo çështja e Kosovës adresohet gabimisht në bashkësinë ndërkombëtare. Pra, lëvizja “Vetëvendosje” mendon se Kosovës nuk i mungon statusi, por popullit të Kosovës i mungon liria.
Rambujea dhe Ahtisaari
Telegrafi: Kush po e adreson gabimisht çështjen?
Albin Kurti: Është kompromisi që është bërë gjatë bombardimeve të NATO-së në vitin 1999 me Millosheviqin. Ahtisaari dhe Viktor Chernomirdin, kanë bërë një marrëveshje që ka paraqitur bazën dhe bërthamën e rezolutës 1244, e cila neve nuk na e pranon as vullnetin, as historinë as interesat, ndërkohë që Serbisë ia njeh integritetin territorial dhe sovranitetin, përkatësisht atëherë Jugosllavisë, tash Serbisë. Këtë gjë e ka bërë të mundur marrëveshja e Rambujesë, ku delegacioni kosovar e ka pranuar Jugosllavinë për shtet të vetin. Është origjina e problemit ajo që po i shkakton këto probleme edhe në të tashmen.

Telegrafi: Ahtisaari në këtë rast nuk është i favorshëm për negociator?
Albin Kurti: Qëndrimi im është kundër negociatave në parim, por edhe kundër negociatave në përmbajtje të tyre. Por, sërish edhe kur Serbia do ta pranonte vullnetin e Kosovës, sigurisht që kemi shumë për të biseduar me Serbinë, por vetëm kur ajo të heq dorë nga Kosova. Por, as atëherë nuk mendoj se Ahtisaari është njeri i përshtatshëm. Ahtisaari është ai që është konsideruar i përshtatshëm nga Millosheviqi në atë kohë dhe ka pranuar vetëm rusin Chernomirdin dhe Ahtisaarin. Ai (Ahtisaari), duke bërë rezolutën 1244 nuk ka qenë pozitiv.
Telegrafi: Keni deklaruar se pakoja është autonomi për Kosovën brenda Serbisë dhe autonomi për serbët, brenda Kosovës. Si e shpjegoni këtë?
Albin Kurti: Kjo është formulë serbe, të cilën e ka pranuar Ahtisaari. Pra, më shumë se autonomi më pak se pavarësi – ja pakoja. Dhe, autonomi brenda autonomisë, ja pakoja e Ahtisaarit. Autonomia e serbëve bëhet nëpërmes decentralizimit, duke qenë se komunat serbe do të kenë të drejtë të kenë lidhje horizontale ndërmjet vete dhe lidhje vertikale me Beogradin. Lidhja horizontale, i shndërron në një etnitet territorial, ndërkaq lidhja vertikale bënë që ky etnitet territorial të jetë vetë Serbia. Kjo është arsyeja pse pakoja e Ahtisaarit paraqet autonomi brenda autonomisë.
Telegrafi: A i përngjan kjo, në njëfarë forme, Bosnjës, përkatësisht Republikës Serbe?
Albin Kurti: I përngjan, por nuk është identike, në kuptimin që është më keq. Megjithatë, Bosnja është shtet ka flamurin e vet, ka ulësen në OKB e kështu me radhë, që Kosova nuk do të ketë.