[Albanian eX|PerT]

Ebu Xhehli, i cili qëndronte mënjanë mesxhidit, tha: "Gënjen, pasha Zotin, nuk do ta grisish." Zum'ah b. El-Esvedi i tha: "Ti gënjen, pasha Zotin! Ne as që kemi dashur që ajo kontratë të shkruhet ashtu në letër. Kjo është vepër e jote." Ebu-l-Buhturi briti: "Zum'ah e thotë të vërtetën. Ne nuk kemi dashur që kjo të shkruhet në letër e të nënshkru­het." Mut'am b. Adijji tha: "Ju jeni duke thënë të vërtetën, e kush flet ndryshe, ai gënjen. Kërkoj mbrojtje prej Zotit nga ajo (kontratë) dhe nga përmbajtja e saj." Hisham b. Amri foli diç ngjashëm. Ebu Xhehli tha: "Për këtë sigurisht jeni marrë vesh mbrëmë, dhe atë në ndonjë vend tjetër."
Ebu Talibi gjatë gjithë kohës rrinte ulur në fund të mesxhidit dhe shikonte se ç'po ndodhte. Këtu kishte ardhur sipas porosisë së Resu­lull-llahut a.s. sepse All-llahu xh.sh. e kishte informuar Resulin e vet për kontratën e shkruar në një copë letër e cila rrinte varur brenda Ka'bes dhe se All-llahu xh.sh. e ka dërguar një krimb që ta brente tërë atë që është shkruar në letër përveç emrit të All-llahut. Resulull-llahu a.s. për këtë e njoftoi xhaxhain e vet dhe ky erdhi në mesin e kurej­shitëve. Pasi që Ebu Talibi dëgjoi tërë bisedën u ngrit dhe u tregoi atyre se ç'kishte porositur Resulull-llahu a.s. nipi i tij. Nëse gënjen atëherë ndaj nesh veproni siç keni vepruar gjer më tani, por nëse e thotë të vërtetën, ndërpritni izolimin tonë dhe ndërpritni torturimin ndaj nesh. Kurejshitët thanë: "Ke folur drejtë."
Pas kësaj Ebu Xhehli filloi të konsultohet me popullin, kurse El-Mut'ami vajti ta sjellë copën e letrës - kontratën - për ta grisur. Por mbeti i shastisur kur pa se krimbi e kishte brejtur tërë tekstin përveç fjalëve: "Në emrin Tënd o All-llahu im" dhe emrin "All-llah" në vetë tekstin e kontratës.
Pas kësaj, u ndërpre izolimi dhe Resulull-llahu a.s. me shoqërinë e tij dolën nga kamp-përqëndrimi Esh-Shu'ab. Mushrikët patën argument të mrekullueshëm për pejgamberllëkun e Resulull-llahut a.s. në këtë shem­bull, por edhe më tutje mbetën të atillë siç i ka quajtur All-llahu xh.sh., dhe për ta ka thënë:
"Po, kur shohin ndonjë mrekulli, ata kthejnë kokën e thonë: "Kjo është magji e vazhdueshme!" (54,2).
Ata, me gjithë vërejtjen, nuk përfillën këtë ajet por edhe më tepër e përforcuan mosbesimin e vet.[1]

[1] Ne kemi mbledhur fragmente të ndara nga: Sahihu-l-Buhari, kaptina: vajtja e Resulull-llahut a.s. në Mekë: I/216 dhe kaptina: komploti i mushrikëve kundër Resulull-llahut a.s.: I/548; Zadu-l-Me'ad: II/46 - Ibni Hisham: I/350-351, 374-377; Rahmetun li-l-Alemin: I/69, 70; Muhtesar Siretu-r-Resul nga Nexhdi, f. 106-110; Muhtesar Siretu-r-Resul nga Abdul-Vehhabi, f. 68-73. Ekzistojnë disa mospajtime në këto vepra, por kemi marrë atë që është përafërsisht e njëjtë tek të gjithë