[euro]

Përfaqësuesja e Kosovës i gostitë mysafirët shqiptarë nga Maqedonia me 5 gola



Për nder të Ditës së Flamurit, në stadiumin e qytetit në Prishtinë u zhvillua ndeshja futbollistike ndërmjet Përfaqësueses A të Kosovës dhe asaj të futbollistëve shqiptarë nga Maqedonia

-Stadiumi i qytetit në Prishtinë, ishte vendtakim i Përfaqësueses A të Kosovës dhe asaj të shqiptarëve nga Maqedonia, në ndeshjen miqësore të organizuar për nder të Ditës së Flamurit.



Afro 3500 shikues kishin ardhur për ta përcjellur për së afërmi këtë takim.



Që në minutën e parë të ndeshjes, përfaqësuesja e Kosovës kalon në epërsi përmes Enis Fetahut, i cili shfrytëzon gabimin e portierit Zendeli, i cili nuk arrin të ndalë topin në një kohë.



Epërsinë në 2 me 0 e ngrit Malësor Gjonbalaj, 3 minuta më vonë.



Kjo epërsi ndikoi dukshëm në dinamikën e mëtutjeshme të lojës. Mysafirët nuk arrijnë të organizojnë ndonjë sulm që do të vlente të përmendej, përderisa në anën tjetër përfaqësuesja e Kosovës, krijon raste të mira shënimi, përmes Llumnicës, Munishit dhe Fetahut.



Enis Fetahu ishte autor i golit të tretë, të cilin e shënon nga një plan i dyshimtë për pozitë jashtë loje.



Golin e katërt dhe të fundit për 45 minutat e parë të ndeshjes e shënon Shpëtim Hasani, pas një krosimi të bukur të Ismet Munishit.



Në pjesëlojën e dytë, forcat ishin më të barazpeshuara, pasi që seleksionuesi i Kosovës Bylbyl Sokoli, frekson radhët e skuadrës së tij me futbollistë të rinj.



Në anën tjetër, edhe përzgjedhësi i mysafirëve Isa Rexhepi, nuk rri duarkryq, por mundohet që përmes ndërrimeve në lojtarëve dhe në taktikë, të ndryshojë diç në rrjedhën e lojës. Por as kjo nuk funksionoi.



Në pjesëlojën e dytë, futbollistët kosovarë shënojnë edhe një gol tjetër dhe kështu arrijnë kuotën e 5 golave.



Përfaqësuesja A e Kosovës – Përfaqësuesja e Shqiptarëve të Maqedonisë 5-0.