[Peja-Boy]

Muriqi: "Më pëlqen të luftoj"


Në ditën e fundit të sparingut në Florida, konkurenti i titullit botëror në kategorinë gjysmë të rëndë Elvir Muriqi me gëzim nxjerr nga bagazhi i makinës së tij pajisjet e boksit derisa është duke kënduar "Ready or not" (I gatshëm apo jo).
Derisa e sheh këtë të duket sikur është duke u bërë gati për një lojë golfi dhe jo që do të shkëmbejë goditje në kokë dhe trup.
Kënga të cilën ai e këndon, një hit i vitit 1996, e tregn më së miri situatën në të cilën ai gjendet para duelit kundër ish-kampionit botëror Clinton Woods, që do të zhvillohet këtë të shtune më 14 shkurt në Jersey të Britanisë së Madhe. I gatshëm apo jo Muriqi do të ketë mbase rastin e fundit për titullin botëror në kategorinë gjysmë të rëndë.


"Ndjehem mirë për këtë ndeshje", thotë Muriqi (34-4-0) për duelin eliminator. "Është çmenduri. Boksierët marrin miliona dollarë për t'u përballur me këtë boksier, ndërsa po shkoj në vendin e tij për të boksuar gati falas. Kam pasur disa probleme me pasaportën dhe udhëtimin, por krahas kësaj stërvitjet kanë shkuar për mrekulli".


29-vjeçari shqiptar është në humor të mirë dhe këtë e tregon duke kënduar muzikën hip-hop që lëshohet në palestrën e Buddy McGirt. Në këtë ditë trajneri i tij nuk është me të. Mësohet se ka shkuar me pushime.


Sparing-partneri i zgjedhur për këtë ditë është Anthony Greenidge, një boksier 21-vjeçar i kategorisë së mesme nga Nju Jorku që ka një bilanc prej 13 fitoresh dhe vetëm 1 humbje në ringun profesionist. Greenidge po stërvitet edhe vetë për duelin e tij të radhës më 28 shkurt për të mbrojtur titullin e kampionit amerikan për peshën e mesme. Për gjashtë runde sparing, në dy prej tyre boksierët zhvillojnë një luftë të mirë, megjithëse është mjaft e qartë se Muriqi është më i fuqishëm dhe më me përvojë. "Kosova Kid" duket se kënaqet pa masë derisa bokson.
"Ishte mirë", thotë ai pas sparingut. "Djaloshi është i shpejtë. Po kontrolloja shumicën e rundeve. Ky është i kategorisë së mesme dhe ka kombinime të mira. Më ndihmon shumë pasi Clinton Woods nuk do të jetë kaq i shpejtë".


Muriqi tregon se ka zhvilluar sparing edhe me boksierët e kategorisë "cruiser" Ehinomen Ehikhamenor (13-3-0), Alfredo Escalera Jr (16-2-1) dhe Francisco Palacios (16-0-0) gjatë përgatitjeve të tij. Ai nuk përton madje që të tregojë të gjitha detajet për duelin e tij të radhës.
"Të gjithë e dimë se ai është i fortë, por mendoj se shpejtësia ime dhe të qenit më i ri do të bëjë diferencën. Unë nuk kam qenë kampion botëror ndonjëherë, ai ka qenë tre herë. Mendoj se kam aftësitë dhe karakterin e nevojshëm për të fituar duelin. Ai nuk duhet të turpërohet të të mundet nga unë".


Muriqi ka kaluar nëpër duart e disa trajnerëve gjatë karrierës së tij, para së gjithash të Teddy Atlas, i cili e ka stërvitur atë që të fitojë turneun "Golden Gloves" në Nju Jork në vitin 1998 si amator dhe në filimet e karrierës së tij si profesionist. Më pas ka punuar me Colin Morgan dhë së fundmi me Buddy McGirt, një ndër më të mirët të boksit në Amerikë. Muriqi tregon se përshtatja me të ka qenë pa probleme.
"Unë e njoh Buddy-n prej dhjetë vitesh dhe gjithnjë kemi pasur marrëdhënie të mirë. Më ka ndihmuar mjaft që të përmirësoj aftësitë e mia. Gjëra të vogla, por që kanë rëndësi të madhe. Ky njeri ia ka dalë mbanë edhe si boksier edhe si trajner", thotë Muriqi për trajnerin e tij të ri.
Në kampin e McGirt në Vero Beach të Floridas, Muriqi ka punuar që të arrijë maksimumin e kondicionit të tij fizik.


Në skenën e boksit në Nju Jork, aty ku ai bashkë me familjen jeton që prej vitit 1996, Muriqi ka boksuar gati në të gjitha mbrëmjet e organizuara duke filluar nga "Madison Square Garden" deri në "Park Central Hotel". Por ishte një duel me Antonio Tarver një vit e gjysmë më parë që e rriti reputacionin e tij në mesin e tifozëve të boksit. Muriqi humbi me vendim të ngushtë të gjyqtarëve, por ishte shumë dinjitoz në atë duel.


Krejt ndryshe ishte ndeshja e Woods me Tarver. Woods u mposht nga amerikani me lehtësi dhe me rezultat të thellë. Madje shumëkush i kërkoi anglezit që pas këtij dueli të tërhiqej nga boksi.
"Nuk dihet se si është përgatitur Woods për ndeshjen me Tarver. Nuk dihet se çfarë ka pasur në mendje. Ai tani do të boksojë në Angli dhe unë e konsideroj se është në maksimumin e tij", thotë Muriqi.


Për ironi Tarver është duke përdorur të njejtën palestër me Muriqin për t'u përgatitur për duelin e tij kundër Chad Dawson. Që prej duelit të tyre të fundit Muriqi ka shënuar edhe një fitore me nokaut ndaj Jameel Wilson dhe më pas ka pasur një pauzë të gjatë. Por ai nuk është i shqetësuar për këtë. "Nuk ka arsye për shqetësim. Ai nuk ka boksuar për 10 muaj, unë nuk kam boksuar për një vit. Ai është 36-vjeçar, unë 29. Ai ka zhvilluar shumë luftëra, unë vetëm një apo dy. Unë nuk kam pasur duele të forta si ai, por një ditë ai do të thotë se me kaq mjafton"


Është e pamundur që të mos vëresh besimin që Muriqi ka në vete, sikur ai të dijë diçka që po e mban të fshehtë. Askush nuk mund t'i thotë atij se nuk do të dalë fitimtar nga dueli me Woods. Dhe askush nuk provon t'ia thotë këtë.
Vetëbesimi i tij shihet në mënyrën sesi flet, sesi ecën.


"Nuk mendoj se ka ndonjë boksier të kategorisë gjysmë të rëndë në botë që mund të më mposhtë. Më janë dashur 8 vite që të fitoj qetësinë dhe profesionizmin që kam tani. Çdo situatë të vështië që kam në ndeshje apo sparing më pëlqen. Asnjëherë nuk them që nuk mund t'ia dal. Më pëlqen të luftoj".