[Albanam]

I nderuari musafir i këtij Forumi (Guest)!

Më fal për përgjigjen e vonuar, por shpresoj për mirëkuptim.
Rasti deshi që gati dy javë të mungoj nga vendlindja dhe të jem në udhëtim zyrtar disa mijëra kilometra larg. Ç’është e vërteta, unë akoma jam atje (apo këtu), por ja që gjeta rastin që për disa çaste të futem në faqen e forumit Dardania dhe të lexoj pyetjen tënde. Dhe vendosa që prej së largu të shkruaj një përgjigje të shkurtë.
Kokëdhembja është padyshim një nga sëmundjet më të shpeshta dhe më të mërzitshme që kaplon njeriun, veçanërisht ngase arsyet që sjellin deri te ajo janë të shumta. Dhe në këtë drejtim jo rrallë vie edhe deri te imunizimi i organizmit ndaj barërave dhe humbja e efektit të tyre për zbutjen e dhembjes. Shihet se kjo ka ndodhur edhe tek ju, ngase përdorimi gjithnjë e më i shpeshtë i barërave sjell deri te një gjendje e tillë.
Edhe pse ndoshta duket ikja nga përgjigjja këshillimi për hulumtimin e arsyes së këtyre dhembjeve, ngase siç keni thënë edhe vet arsyet nganjëherë mund të jenë të shumta, megjithatë, hapi i parë për të arritur ndonjë rezultat pozitiv është hulumtimi i shkaqeve që sjellin deri te kokëdhembja dhe angazhimi për eliminimin e faktorit etiologjik. Kurse kjo mund të bëhet me një analizë të mirëfilltë mjekësore, që nga anamneza e deri te inçizimet e nevojshme të trurit. Shtypja e lartë apo e ulët e gjakut, ndezja e sinusëve, qarkullimi i pamjaftueshëm i gjakut në tru, çrregullimet e dhëmbëve, shkurtpamësia, stresi, shqetësimi etj. etj., mund të jenë nga arsyet e kokëdhembjeve të mërzitshme.
Zgjidhje tjetër jashta barnave? Megjithatë ju preferoj që të kërkoni ndihmën mjekësore, e sa i përket zgjidhjeve tjera, kështu:

- Dy herë në ditë, në mëngjes dhe mbrëmje, futni këmbët, deri në nyje, në ujë të ftohtë, tre deri pesë minuta.

- Shtypni me forcë dy-tre minuta kokën në të dy anët, dy centimetra larg fundit të vetullës në pozicion prej 90 shkallë (në vendin ku zakonisht vendoset gishti tregues në kokë për të treguar mendjen).

- Mbuloni kokën me ndonjë leckë, ngase dikujt i ndihmon edhe ngrohja e kokës.

- Nëse kokëdhembja u shoqërohet me tugë, mos ngurroni të vjellni, ngase kjo mund t’ju lehtësojë.

Janë këto vetëm disa mendime që shpreha me këtë rast, e gjithsesi edhe ndokush tjetër mund të inkuadrohet në temë. Përvoja e dikujt mund të jetë interesante.

Për fund, ndoshta mund t’ju duket e pakuptueshme, por gjithsesi ju propozoj që, kur të përdorni barërat apo ndonjë nga metodat e lartëpërmendura, t’i drejtoheni me lutje Zotit për shërim të sëmundjes që keni. Në këtë drejtim, vendosni dorën e djathtë në vendin e dhimbjes dhe thuani këtë lutje:

“O Zot i njerëzve, largoje sëmundjen, shëro, ngase Ti je Shërues, nuk ka shërim tjetër pos shërimit Tënd, shërim pas të cilit nuk ka sëmundje”.

Me respekt,
Prej së largu,
Përshëndetje për ty dhe forumistët tjerë,
Albanam