[Albanam]

E nderuara Barbaroza!
Gjithsesi nuk dua të arsyetohem edhe një herë për mospraninë time më të shpeshtë te Forumi në përgjithësi dhe rubrika Shëndeti në veçanti. Por obligimet e përditshme e bëjnë të veten. Megjithatë, e pashë pyetjen tënde mbi AKNET, dhe gjeta pak kohë të lirë të përgjigjem shkurtimisht. Çdo plotësim nga dikush tjetër është i mirëseardhur.

Aknet vërtet mund të paraqesin problem për njerëzit nëse gjenden të pranishme në shumicë. Ato nuk paraqesin vetëm problem estetik, por edhe ngarkesë të madhe shpirtërore për personin e kapluar nga to. Dhe nuk janë të rralla madje as ndryshimet e personalitetit, të manifestuara me agresivitet dhe ngacmueshmëri, në njërën anë, apo depresion dhe tërheqje në vetmi, në anën tjetër.
Aknet nuk janë vetëm sëmundje e lëkurës. Studimet tregojnë se shkaktarët e tyre janë në tërë organizmin, madje edhe në faktorët trashëgues. Nëse të dy prindërit kanë akne, atëherë është pothuajse e sigurtë se edhe fëmijët do t’i kenë, madje në formë të theksuar. Edhe pse është pak e besueshme se ushqimi mund të ketë ndonjë lidhshmëri me sëmundjen, diku-diku mund të vërehet lidhshmëria me ushqimin e yndyrshëm, ëmbëlsirat etj.
Paraqitjes së sëmundjes poashtu i kontribuon edhe klima e nxehtë dhe me lagështi, ndërsa mendohet se moment më i rëndësishëm etiologjik është faktori hormonal. Puna e sforcuar e gjendrave me tajitje të brendshme ndikon në punën e gjendrave dhjamore. Për këtë arsye edhe aknet më së shpeshti paraqiten në moshën e pubertetit apo pak më herët. Zakonisht ato qëndrojnë deri në vitet e njëzeta, kur edhe vie te shërimi spontan i tyre, edhe pse ka raste kur ato janë të pranishme deri në moshën e vonshme.
Është e preferueshme që mjekimi i akneve të bëhet në konsultim me mjekun dermatolog, ngase ngacmimi eventual mekanik i tyre, si për shembull shtypja e tyre, mund të ketë për pasojë infektimin apo edhe lënien e shenjave të pahijshme.
Përndryshe, shërimi i akneve është lokal dhe përmes antibiotikëve. Në mënyrë lokale shfrytëzohen kreme dhe losione pa përmbajtje yndyrore. Shpesh efekt të madh shërues ka edhe qëndrimi në klimë të nxehtë dhe të thatë, i përcjellur me hidroterapi me ujë të detit. Ndërsa sa i përket antibiotikëve, preferohet marrja e anibiotikëve me spektër të gjerë nga rradhët e tetraciklinëve.
Nuk ka ndonjë njohuri se ushqimi ka efekt në paraqitjen e akneve, por nëse vërehet se sëmundja keqësohet pas ndonjë lloji të ushqimit, atëherë mirë është që ky ushqim të braktiset.
Në aspektin higjienik, është mirë që lëkura të lahet mëngjes e mbrëmje me ujë të ngrohtë dhe sapun për larjen e fëmijëve.

Me respekt,
Albanam