[sherri]

Nis udhëtimi i flamurit gjigant

Për Aleancën Kuq e Zi ka filluar numërimi mbrapsht deri më 28 nëntor, Dita e Pavarësisë. Besnikë të asaj që kishin njoftuar, aktivistët e Aleancës shpalosën në Vlorë një flamur gjigant, që do të nisë rrugëtimin simbolik deri në Prishtinë.
Në një miting në Vlorë, qytetin e Pavarësisë, Kreshnik Spahiu vuri në dukje se Shqipëria e sotme dhe gjendja e shqiptarëve, kudo ku janë, të ndarë në disa shtete dhe në ngjyra partiake, nuk është ëndrra e Ismail Qemalit.
“Prej 20 vitesh na u premtua Shqipëria si gjithë Evropa, për 10 vite pritëm, ndryshuam 20 qeveri, ndryshuam 200 ministra, për 20 vite na u premtua Evropa dhe jemi të fundit në Evropë, nuk e kemi gjetur ende derën e saj. Për 20 vite në Kushtetutën e Shqipërisë u sanksionua bashkimi dhe plotësimi i aspiratës për bashkimin e shqiptarëve. Ku është ëndrra, detyrimi shtetror, detyrimi i gjithkujt për të plotësuar atë detyrim kushtetues?”, tha Spahiu.
Spahiu i ftoi shqiptarët, kudo ku janë, që të injorojnë flamujt e partive politike dhe të respektojnë flamurin kombëtar, duke vendosur nga një flamur në çdo dritare.
“Në këto 20 vite zgjodhëm flamuj të tjerë, të cilët mbollën urrejtje dhe që na kthyen më keq se 99 vite më parë. Ja disa vargje të Pashko Vasës qe kam dëshirë t'i them këtu: Shqiptarë, në 100 parti jeni përçarë/ca thonë janë turq, ca thonë janë grekë/ por sado të gënjeni more të mjerë/ kuq e zi ne jemi miliona herë", tha në fjalimin e tij Spahiu.
Aktivitetet e Aleancës Kuq e Zi për 99 vjetorin e Pavarësisë do të kulmojnë të hënën në Prishtinë, ku në bashkëpunim me Komunën dhe lëvizjen Vetëvendosja do të veshin kuq e zi kryeqytetin kosovar. /tch

URIME!