[Zero Cool]

Nga 27 Nëntori, stema të reja të njësive të FSK-së

Me Dekret të Presidentes së Republikës së Kosovës, Atifete Jahjaga, sot, u bë promovimi i stemave të reja të njësive të Forcës së Sigurisë së Kosovës, si edhe promovimi i Kolonel Gezim Hazrollit në gradën Gjeneral brigade dhe emërimi i tij në detyrën e Zëvendës Komandanti të Forcave Tokësore të FSK-së.






Dekreti i nënshkruar nga Presidentja Jahjaga, sipas së cilit u promovuan stemat e reja të njësive të FSK-së është i bazuar në nenin 84 pika 12 e Kushtetutës së Republikës së Kosovës dhe neni 18 paragrafi 3 i Ligjit Nr. 03/L-046, për Forcën e Sigurisë së Kosovës dhe i bazuar në kërkesën e Ministrit të FSK-së Agim Çeku. Po sot u komunikua vendimi që 27 Nëntori, të jetë “Dita e Forcës së Sigurisë së Kosovës”, ditë prej së cilës do të fillojnë të përdoren stemat e reja të Forcës së Sigurisë së Kosovës.
Po ashtu në këtë ceremoni me dekret të Presidentes së Republikës së Kosovës Atifete Jahjaga, Kolonel Gëzim Hazrolli u promovua në gradën Gjeneral brigade dhe u emërua në detyrën e Zëvendës Komandantit të Komandës së Forcave Tokësore, me këtë emërim në strukturën e FSK-së u plotësua vendi vakant i zëvendës komandantit të KFT-së. Gjeneral brigade Gëzim Hazrolli që nga themelimi i FSK-së e deri ditën e promovimit gjeneral brigade, ishte në detyrën e Shefit të Shtabit të Komandës së Forcave Tokësore. Po ashtu, Gjeneral brigade Hazrolli, ka qenë oficer i lartë në Trupat Mbrojtëse të Kosovës.