[Urata]

Personalitete të letrave shqipe vlerësojnë rolin e Dr. Ibrahim Rugovës

Tiranë, 24 Janar - Personalitete të artit dhe të kulturës shqiptare kanë vlerësuar për agjencitë e lajmeve të Shqipërisë - ATSH-në kontributin shumëplanësh të Presidentit të Kosovës, Dr. Ibrahim Rugova.
Kryetari i Akademisë së Shkencave të Shqipërisë, Prof.Dr. Ylli Popa, u shpreh se "Presidenti Rugova, përveçse ishte një politikan vizionar, ishte dhe një letrar i talentuar. Kjo ka bërë që për veprat e tij letrare, Ai të marrë titullin 'Doctor Honoris Causa', jo vetëm në Shqipëri, por edhe në vende të tjera të Europës".
"Vitin e kaluar në krye të një delegacioni të Akademisë sonë kam patur një takim të përzemërt me të, ku diskutuam për marrëdhëniet shkencore të ndërsjellta me Akademinë e Shkencës dhe Arteve të Kosovës, në fushat e shkencave të albanologjisë, gjuhësisë, historisë, etnokulturës, të ekspeditave të përbashkëta arkeologjike, si dhe për botimet e dypalëshe në kujtim të emrave të njohura si, Lasgush Poradeci, Dhimitër Pasko. Presidenti Rugova më krijoi përshtypjen e një njeriu shumë të komunikueshëm", vlerësoi akademiku Ylli Popa.
Shkrimtari dhe publicisti, Fatos Lubonja, u shpreh se "Rugova do të kujtohet, si intelektuali, profesori i letërsisë, i cili guxoi të vihet në krye të Lidhjes Demokratike të Kosovës, të sapokrijuar në një kohë të vështirë për shqiptarët e Kosovës. Padyshim mund të quhet 'Gandi i Kosovës', simbol i rrugës paqësore drejt fitores së Pavarësisë".
Duke e veçuar figurën e Rugovës, Lubonja tha se "Presidenti Rugova do të kujtohet si politikani që krijoi flamurin e Kosovës të ndryshëm nga ai i Shqipërisë, duke lëshuar me këtë mesazhin se ai kërkonte një shtet të ri kosovar dhe jo bashkimin e Kosovës me Shqipërinë, pa e qartësuar kurrë nëse kjo ishte një strategji e tij apo qëllimi i tij final i vërtetë".
Drejtori i Teatrit Kombëtar të Operës dhe Baletit, Zhani Ciko, vlerësoi ndihmesën e Dr. Ibrahim Rugovës në fushën e kulturës dhe arteve në Kosovë, si pjesë e domosdoshme për konfirmimin e identitetit kombëtar.
"Veprimtaria e tij është e prekshme dhe e ndjeshme në Kosovë, ku në sajë të kontributit të Tij, gjen njëherësh vlerat identifikuese të etnisë dhe trashëgimisë ndërkulturore", vlerësoi z.Zhani Ciko.
Shkrimtarja dhe përkthyesja Mira Meksi vlerësoi kontributin e tij në jetën shoqërore e politike. Sipas saj, "ideologjia politike e Rugovës në pacifizmin dhe pragmatizmin e saj është ndikuar thellësisht nga letërsia".
"Qëndrimet e tij politike, por sidomos deduksionet mbartin frymën e tolerancës, gjë që e frymëzon vetë Letërsia. Pasardhës të Presidentit Rugova do të ketë, por dishepuj që t'i tejçojnë idetë e tij politike si ai, mendoj se nuk ka", theksoi Mira Meksi.
Shezahi Rrokaj, rektor i Universitetit të Tiranës, e cilësoi figurën e Rugovës, si një nga figurat që radhitet në plejadën e kritikëve letrarë. "Me studimet e Tij, sidomos për autorët e vjetër, por edhe bashkëkohorë, ai u bë një nga lëvruesit më të mirë në fushën e tekstologjisë. Dr. Rugova dha në këtë fushë një ndihmesë të vyer jo vetëm për brezin e ri por dhe për kritikën letrare. Rugova ishte një kritik vizionar, gjë për të cilën kombi dhe ne duhet të jemi shumë mirënjohës", u shpreh z.Rrokaj.
Jorgo Bulo, gjuhëtar, cilësoi se "Ibrahim Rugova është protagonisti i historisë moderne të Kosovës. Dr. Rugova la një trashëgimi të çmuar shkencore sepse me studimet e Tij ndriçoi aspekte të zhvillimit kulturor të shqiptarëve. Z. Bulo veçoi në studimet e Dr. Rugovës, studimin fondamental për mendjen universale të Mesjetës Shqiptare, Pjetër Bogdani si dhe Doktoraturën për historinë e zhvillimit të kritikës shqiptare. "Kjo trashëgimi është një pasuri për brezat e rinj të studiuesve dhe në mënyrë të veçantë për metodën bashkëkohore që ka përdorur Dr. Rugova në studimet e Tij", u shpreh z. Bulo.
Seit Mancaku, gjuhëtar, u shpreh se Dr. Rugova ishte një studiues i rrallë i letërsisë dhe i kulturës shqiptare në përgjithësi. Ai ka botuar disa vepra me vlerë të veçantë, për kritikën letrare, historinë e letërsinë, filologjinë dhe kulturën shqiptare. Sipas z.Mancaku. kjo e bën Dr. Rugovën, një nga studiuesit e mirëfilltë shqiptarë në fushën e kritikës dhe kulturës shqiptare në përgjithësi. "Dr.Rugova do të mbetet një figurë akademike e shquar e letrave shqipe" cilësoi Mancaku.
Aktori Ndriçim Xhepa tha se "imazhi emocinal, profesional dhe shpirtëror që kam për këtë figurë është qetësia dhe qytetaria që duhet ta karakterizojë një udhëheqës. Më ka bërë përshtypje se në Kosovë, Dr. Rugovën e duan shumica e popullsisë për atë kompleksitet vlerash që ky njeri mbarti. Sipas Xhepës, "janë pikërisht këto vlera që do ta bëjnë atë të paharrueshëm".