[Lona]

Zgjedhjet" e 17 nëntorit janë paradoksale dhe kundër historike!

Kristina Rasi

Kjo fushatë "zgjedhore" sa është paradoksale aq është kundër kombëtare dhe kundër historike për vetë faktin se këto parti politike i premtojnë elektoratit mrekullira pas 17 nëntorit, mrekullira që këto as teorikisht nuk janë të ndershme por, as praktikisht nuk janë dhe nuk munden me qenë të arritshme.


Partitë politike pa kurrfarë turpi po dalin edhe ketë vit si në fushatat e më hershme parazgjedhore dhe i premtojnë popullit të varfër shumë "dhurata" të ndryshme, si: "pavarësia do vjen së bashku me Krishtlindjet", "pavarësia veçse nuk ka hyrë ende brenda, se ajo po na pret tek dera" e gjepura të tjera; premtojnë rrymë për 24 orë, premtojnë ujë, sistem shëndetësor, zhvillim ekonomik dhe shumë e shumë premtime të tjera dhe duke "harruar" se këto premtime i kishin bërë edhe në zgjedhjet e kaluara dhe asnjërën nga këto premtime as nuk i kanë arritur por bile as nuk janë në realizim e sipër!
LDK-ja, me dekada i premtoi elektoratit të saj se do e sjellë pavarësinë nëse votojnë edhe kësaj radhe për të , por pas zgjedhjeve pacifistët dinakë i "harrojnë" premtimet dhe vazhdojnë bashkëpunimin me të huajt bashkëpunëtorë të tyre që punojnë nëndheshëm kundër kombit shqiptarë në përgjithësi. Kjo parti me zë të mekur vazhdon më tej premtimet bajate se: "do të kenë mirëqenie sociale nëse ata vinë prapë në pushtet, do të ketë rrymë 24 orë, do të ketë zhvillim ekonomik si dhe shumë gjëra të tjera që populli ndoshta veç në ëndërr mund t’i shoh këto premtime, sepse realisht as nuk janë bërë deri sot, as nuk do të bëhen nesër.
Edhe AAK-ja, e cila për t´i shpëtuar rënies nga pushteti pa shtet hyri në koalicion me LDK- në e "famshme" ky koalicion u tregua shumë i dëmshëm jo vetëm për këtë parti e dalë nga lufta por në veçanti u tregua katastrofale për Kosovën. Them kështu, sepse realisht parlamenti "kukull" në duar të UNMIK-ut, i Kosovës mbeti pa opozitë të mirëfilltë e cila do t´i mbronte interesat e popullit përballë pozitës.
Kujtoj këtu faktin kur AAK-ja, i premtonte elektoratit se në ditët e para të fillimit të punës së parlamentit do ta shpallim pavarësinë dhe shumë premtime të tjera të cilat i ka marrë era...
Fatkeqësia e popullit qe vërtetë, kur ky subjekt politik e mori ministrinë e energjetikës dhe pastaj e caktoi njërin nga ministrat e saj!
AKK-ja, me ministrin, Et´hem Çekun, apo "Et´hem Terrin" siç e quan populli me të drejtë, dihet fare mirë në çfarë gjendje e solli energjinë e Kosovës, populli e din fare mirë se çfarë ka vuajtur këtyre viteve të fundit dhe çfarë pasojash kishte në ekonomi, në shëndetësi dhe në të gjitha fushat e jetës...
Kurse, tani për çudi: kjo parti pa kurrfarë turpi sërish del tani para elektoratit dhe premton energji 24 orë!!!
A nuk është kjo paradoksale, thellësisht antinjerëzore dhe antikombëtare?!
Kurse, satelitja titiste "reformiste", partia ORA, në zgjedhjet e fundit premtoi se do bëjnë ndryshme thelbësore!!!
Bile, ajo doli me slloganin shterpë duke u çjerrë se kinse: "ka ardhur "Ora" për Kosovën"!
Dhe, me tej " nëse votoni për partinë reformiste "Ora", kjo parti të bëjë mrekullira" - mirëpo, gjatë këtyre viteve sa ishte në parlamentin "kukull" ajo bëri "mrekullira" për të zi, duke i inkurajuar serbët kolonialistë në kishën e Deçanit se : - do t´jua falim 800 h tokë në shërbim të kishës suaj!
Pastaj, bëri "mrekullira" në decentralizmin, gjegjësisht në ndarjen e Kosovës në enklava etj...
Kurse, tani del me premtime marramendëse tejet paradoksale se do i hapi si 40 mijë vende të reja pune!!! Premtimeve të Veton Surroit dhe partisë së tij, mund t´ju besojnë vetëm të infiltruarit e ish-LKJ-së dhe të mashtruarit pacifistë...
Shihni, çka premton më tej sharlatani cinik për elektoratin e tij kur thotë edhe marrëzira të tilla : "për vende të punës ka hise për çdo qytetarë në "pasuritë shtetërore"deri ne 5 mijë Euro, si psh. në Kek , Postë, Aeroport, etj, këto ide janë shumë të dëmshme për faktin se kjo na e rikujton kohën "famëshme" të Titos.
Kjo dredhi e tij kurrsesi nuk mund dhe as nuk duhet të arrihet, këto janë veçse premtime boshe...
Kurse, simotra e saj, partia e Bexhet Pacollit "AKR"-ja , po përpiqet me çdo kusht që të vjen në pushtet, me makinacione të "reja" politike.
B. Pacolli, nuk ka hyrë në politikë për të mirën e Kosovës.
Ai, është një biznesmen me elemente shumë të dyshimta politike dhe për ta zhvilluar më tej biznesin e tij ka hyrë në politikë.
Ai, edhe në afishet e partisë së tij pa dorashka shkruan: "Bexhet Pacolli dhe firma "Mapetex", që të lë të kuptosh se ky zotëri donë me çdo kusht t´ju ikë taksave tatimore si në Kosovë ashtu edhe në vendet e tjera, kinse për faktin që ai me firmën e ti "Mabetex" ka shpenzuar për fushatën zgjedhore.
Edhe disa deklarata të tija publike janë shumë paradoksale, se ky zotëri donë të "zgjedhë" problemet e Kosovës në bashkëpunim me Serbinë dhe me Rusinë, kështu sipas tij: " Kosova s’ka nevojë për bashkësinë ndërkombëtare, pra, nëse ai vjen në pushtet është me se e sigurt se Kosova do ta "gëzojë" një antonimi , kjo do të shpie pastaj drejt turbullirave të më tejshme politike.
Po, kësaj valleje të harlisur tani po vallëzon vërdallë, Hashim Thaçi PDK-ja e tij e "qeverisjes nën hije" tani po mundohen me çdo kusht që të marrin pushtetin dhe të dalin nga hija në Kosovë!
Në këtë fushat "zgjedhore" ata premtojnë pavarësi , por shi për këtë udhëheqësi i saj "vizionar" i pasluftës, nuk e di as ditën , as datën, as vitin se kur do të arrihet kjo "pavarësi" e dhunuar nga paketa e Ahtisarit!!!
Disa ditë pra se të niset për turneun "diplomatik", Hashim Thaçi me "trimat" e "GU" , elektoratit të tij i premtoi "pavarësi", kurse nga Berlini ata puthadorë të të huajve deklaruan: "ne, nuk do e shpallim pavarësinë, sepse, kështu duhet me qenë në koordinim me bashkësinë ndërkombëtare". Kështu, faktet po tregojnë se këta "politikanë" nuk janë në gjendje as për disa ditë t´ia mbajnë premtimin elektoratit të tyre.
Tani, Hashim Thaçi, premton rrugë të gjëra, premton kompjuterë në çdo shkollë, këto "zbulime" epokale të tij më mirë do të ishte të mos i bënte fare!!! Më mirë do të ishte që Thaçi të ishte më realist e të thoshte: "ne, do bëjmë përpjekje që në shkollat tona të sigurojmë ngrohjen për nxënësit, do të sigurojmë dritën, ujin etj..
Pse z. Thaçi nuk e bëri këtë infrastrukturë kur qe "opozitë" me "qeverisjen e tij të mirë"; po të ishte i interesuar do të "gjendeshin" mundësitë që po i "gjen" sot pasi do të bëhej kryeministër i Kosovës!!!
Shembull konkret e kemi z. Edi Ramën, dihet se tani PS është në opozitë, mirëpo, z. Edi Ramën kjo nuk e pengon ta bëjë Tiranën me një infrastrukturë të begatshme, me parqe e shkolla të mrekullueshme.
I dashur populli im i Kosovës Kreshnike!
Kësaj radhe tregohu vërtetë ashtu si je; i zgjuar dhe vizionar!
BOJKOTOJE këtë klasë politike se për këta të korruptuar e mashtrues nuk ia vlen të votohet !
Për këta "politikanë" që mendojnë vetëm për fatin e tyre e jo për popullin që u dha besimin, për këta që asnjë premtim të dhënë nuk e kanë realizuar, dhe hiq më pak se kaq - për fajin e tyre, Kosova tani është me e varfër se kurrë më parë më e pa dinjitet se kurrë më parë , më e pasigurt se kurrë më parë!
Sepse, fatin e saj sot me UNMIK-un, e nesër (siç po hidhet falli) me EUMIK-un, e kanë marrë e do ta marrin në duar të huajt.
Asgjë nuk mund të realizojnë këta mashtrues, derisa Kosova nuk udhëhiqet nga një klasë e sinqertë politike, e cila nuk e plagosë rëndë popullin e saj me turpe politike dhe korrupsion!
Duke i parë të gjitha këto dështime të tyre në të gjitha fushat e jetës konstatoj: populli i Kosovës kësaj radhe duhet t´i BOJKOTOJË plotësisht këto zgjedhje!
Vetëm në këtë mënyrë, ne paqësisht do të mund t’i ndalim në rrugën e tyre të pakrye "politikanët" apo më saktë tregtarët politikë të Kosovës.
Zvicër, 11.11.2007

/Botuar më: 11 Nov 2007/F.F.