[Zero Cool]

Perandoria Osmane nuk na ka mbrojtur nga sllavët


Shkrimtari i njohur shqiptar, Ismail Kadare, ka folur rreth përpjekjeve të Turqisë për ndryshimin e teksteve të historisë së shqiptarëve. Ai ka thënë se nuk është e vërtetë teoria se Perandoria Osmane i ka mbrojtur shqiptarët nga sllavët.

Në një intervistë për Deutsche Welle, Kadare ka hedhur poshtë njërën prej teorive më të mëdha të mbrojtësve të ndryshimeve historike, atë se “pushtimi osman ka pasur diçka pozitive për kombin shqiptar, sepse e ka mbrojtur atë nga një rrezik më i madh që ishte rreziku sllav”. Sipas tij kjo është e gjitha krejtësisht e pavërtetë.

“Të gjithë popujt e Ballkanit pësuan një dramë të përbashkët dhe në këtë dramë nuk ka pse populli shqiptar të bëjë befas një përjashtim, sepse nuk ka pasur kurrfarë përjashtimi në fatin e tij. Populli shqiptar ka qenë më i ashpri kundër Perandorisë Osmane, për vet faktin se shqiptarët u bënë pengesë kryesore për depërtimin e Perandorisë Osmane deri në Itali".

“Sllavët vetë ishin për faqe të zezë, gjendja e tyre ishte më e defavorizuar se e shqiptarëve. Atëherë: nga cilët sllavë na mbrojti Perandoria Osmane? Si na mbrojtën ne turqit nga sllavët? Kjo është e pabesueshme, nga ana logjike, nga ana psikologjike. Për mua e gjitha është groteske, e paimagjinueshme, nga fillimi deri në fund“, ka deklaruar Kadare.