[Dilaver]

Dita e Pavarësisë. Të gjithë mblidhen në ambasadën e SHBA


Nano, Berishës: Karrigen time dhe tënde se ha as dreqi
Kryeministri: Kthehu, po ta bren miu karrigen

Darina Tanushi
[email protected]


230 vjetori i pavarësisë së Shteteve të Bashkuara të Amerikës, ka mbledhur bashkë të gjithë politikanët shqiptarë si në asnjë rast tjetër. Presidenti Alfred Moisiu, Kryeministri Sali Berisha, Kryetarja e Kuvendit, Jozefina Topalli, kyetari i PS-së, Edi Rama dhe ish-kryetari e ish-Kryeministri Fatos Nano, i kanë thënë “po” pa asnjë hezitim ftesës së ambasadores amerikane Marsi Ris, për të përkujtuar së bashku përvjetorin e pavarësisë së SHBA-së. Një shtrëngim duarsh shumë i ftohtë dhe me shkëmbime batutash ironike ka ndodhur mes Kryeministri Sali Berisha dhe ish-Kryeministrit socialist, Fatos Nano. Burimet pranë tij në festë bënë të ditur se Berisha i ka thënë paraardhësit të tij: “Ktheu se po ta bren miu karrigen”. Ndërsa Nano, i shquar për batutat e tij, mësohet të jetë shprehur sipas të njëjtave burime se: “Karrigen tënde dhe timen nuk e ha as dreqi”. Më pas takimi ka vijuar edhe mes zonjave të dy figurave më të spikatura të politikës shqiptare, Liri Berishës dhe Xhoana Nanos. Në fakt e para që nuk ka pasur hezitim të takojë ish-kreun socialist dhe njëkohësisht një nga deputetët më të “parregullt” të Kuvendit të Shqipërisë, ka qenë Kryetarja Jozefina Topalli. E nxitur më shumë nga batutat e fotoreporterëve të pranishëm, të cilët kanë vënë në “sedër” Kryetaren e Kuvendit, ajo është drejtuar drejt çiftit Nano dhe ka biseduar për pak momente. Nano ka qëndruar për disa momente nën shoqërinë e një prej këshilltarëve të tij, atë të Ekonomisë, Genc Ruli, i cili sot është ministër në qeverinë e drejtuar nga Berisha. Ruli e ka pyetur ish-shefin e tij fillimisht për shëndetin dhe më pas biseda ka vijuar edhe gjatë kohës kur ambasadorja amerikane ka mbajtur fjalën e rastit.