[Lona]

Në sulmet ajrore izraelite brenda 24 orëve, vriten gjithsej 6 militantë palestinezë

Gaza, 29 nëntor – Katër pjesëtarë të lëvizjes palestineze militante, Hamas, janë vrarë sot (e enjte) në sulmet ajrore izraelite afër Kan Junisit në jug të Rripit të Gazës, njofton BBCVorld. Armata izraelite ka thënë se militantët janë vërejtur duke vënë mjete shpërthyese afër kufirit izraelit. Në sulmet ajrore izraelite brenda 24 orëve, janë vrarë gjithsej gjashtë militantë palestinezë.

Dorëzohen kryengritësit e barrikaduar në një hotel luksoz në Manila

Manila, 29 nëntor - Ushtarët renegatë, që janë barrikaduar në një hotel luksoz në Manila, janë dorëzuar pas një sulmi të trupave qeveritare filipinase, njofton BBCVorld. Kryengritësit, disa me duar lidhur, të ngritura lart, janë transferuar nga hoteli në një autobus policie. Lideri i kryengritësve, Sen Antonio Trillanes, ka thënë se kanë përfunduar aksionin e tyre për të shpëtuar jetën e civilëve dhe të gazetarëve brenda në hotel.

Në granatimet në Pakistan vriten të paktën 11 civilë

Mingora, Pakistan, 29 nëntor – Të paktën 11 civilë pakistanezë janë vrarë gjatë një granatimi të forcave ushtarake qeveritare kundër pozicioneve të militantëve të dyshimtë në veriperëndim të Luginës Suat, në fshatrat afër qytetit Mingora, kanë bërë të ditur zyrtarë vendorë, njofton BBCVorld. Ushtria thotë se nuk ka dijeni për viktima civile, por ka pranuar se janë përdorur granatimet.