[Lona]

Tadiq: Pavarësia e Kosovës do të nxiste krizë në Serbi e hënë , 05 nëntor 2007
Serbia do të mund të futej në një periudhë krize, me mundësi të shpërthimit të dhunës, në rast se shqiptarët e Kosovës shpallin njëanshëm pavarësinë, ka thënë kryetari i Serbisë Boris Tadiq.
Një vendim i tillë i shqiptarëve të Kosovës “menjëherë do të sillte deri tek jostabiliteti", ka thënë Tadiq në një intervistë për agjencinë e lajmeve France Presse."Çdo gjë është e mundur. Shmangem nga mendimi për skenarët e mundshëm, por çdo gjë është e mundur, e madje edhe dhuna", ka shtuar ai.
France Presse përkujton që kosovarët në disa raste kanë paralajmëruar se do të shpallin njëanshëm pavarësinë, nëse dështon procesi mbi të ardhmen e Kosovës, i cili aktualisht udhëhiqet nga treshja ndërmjetësuese ndërkombëtare.Shpallja e njëanshme e pavarësisë "do të destabilizonte demokracinë serbe dhe të ardhmen e vendit", ka thënë Tadiq duke aluduar në krizën eventuale qeveritare serbe të cilën do të mund ta shfrytëzonin ultranacionalistët të cilët në Serbi ende kanë ndikim.Shpallja e njëanshme e pavarësisë "do të mund, siç pritet, që menjëherë të nxit jostabilitet në ato vende që kanë probleme të ngjashme", ka thënë Tadiq dhe ka shtuar që “ka shumë (raste) Kosova në botë". "Disa vlerësojnë që është më i rëndësishëm stabiliteti i dy milionë shqiptarëve në Kosovë, sesa stabiliteti i dhjetë milion serbëve", ka thënë presidenti serb duke tërhequr vëmendjen që shtetet të cilat eventualisht njohin pavarësinë e Kosovës do të mund të prisnin ndryshim radikal të marrëdhënieve me Serbinë.