[Arb]

Tupanët të fillojnë mbi Dardaninë, më 26 maj

Nuk mund ta mendon dot Kosovën e pavarur, pa simbolet shtetërore të Dardanisë të propozuara nga presidenti Ibrahim Rugova. Ato i quan simbole që përfaqësojnë të gjithë ata që jetojnë në Kosovë.

Inxhinieri Adem Salihu, i lindur në Dibër, që për asnjë moment nuk i harron vitet e kaluara si inxhinier në gjigantin “Trepça”, ardhjen në këtë kohë në Kosovë, e përshkruan të një kënaqësie të veçantë. Familja Salihu janë të ftuarit e familjes Rugova në dasmën e djalit të tyre të madh, Mendimit.

Veprimtari i çështjes kombëtare, që për asnjë çast nuk e ka kursyer veten dhe familjen për çështjen e Kosovës, pjesëmarrjen në këtë ceremoni, e vlerëson si shumë specifike duke përcjell urimet për familjen Rugova.

“Për mua, kjo ka edhe një simbolikë e dytë, që kjo ceremoni e kremtes së festimit të fillojë bashkë me familjen Rugova. Tupanët të fillojnë mbi Dardaninë, më 26 maj”, shprehet Saliu.

Ndonëse Kosova gjendet në fazën përfundimtare të përcaktimit të statusit përfundimtar, simbolet shtetërore janë fokusi ditor i zhvillimeve politike.

Për z. Salihu dhe për bashkëshorten e tij, veprimtaren Rita, kjo është një çështje mjaft emocionale. Familja Saliu, me fanatizëm i mbron simbolet e Dardanisë, të propozuara nga Presidenti Rugova.

“Ne kemi qenë me fat dhe të privilegjuar që flamuri i Dardanisë, iu dorëzua bashkëshortes sime prej Presidentit historik Rugova. Në këtë aspekt, ne patëm mundësi që këtë flamur dhe këto simbole të shtetësisë së Kosovës, t’i prezantojmë në shumë mese në SHBA”, thekson Saliu.

Me rastin e ditës së flamurit që u organizua në shoqatën “Vatra”, e shoqja Rita e kishte shpaluar flamurin e Dardanisë, i cili, siç tha Saliu, u prit me një kënaqësi të pa përshkruar nga të pranishmit. Më pas, familja Saliu, këto simbole, i kishte dorëzuar në librarinë “Fan S. Noli”.

Pikërisht për këtë çështje, Saliu tha se është organizuar edhe një meshë speciale, ku morën pjesë një numër i madh i bashkatdhetarëve, ku kishte edhe amerikanë, ku simbolet e Dardanisë u pritën me ngrohtësi.

Simbolet e Dardanisë përfaqësojnë të gjithë popujt që jetojnë në Kosovë
Për simbolet e Dardanisë, Saliu thotë se janë krijuese të simboleve shtetërore të Kosovës. “Unë nuk mund të mendoj se mundet diçka tjetër të ndodh, e ato simbole të mos jenë simbole shtetërore të Kosovës.

Simbolet e Dardanisë përfaqësojnë të gjithë pjesëtarët që jetojnë në Kosovë dhe nëse përfaqësojnë pak më tepër shumicën nuk është ndonjë gabim. Tradita shqiptare është që të kujdesemi për të tjerët”, vlerëson ai.

Çifti Rita dhe Adem Saliu, njihen si veprimtarë të devotshëm për çështjen e Kosovës. Ata pa reshtur, për më se 15 vjet të qëndrimit në SHBA, tërë kohën ishin në shërbim të çështjes kombëtare.

“Veprimtaria jonë për çështjen e Kosovës, ka qenë e vazhdueshme, e përditshme, në çdo kohë, ku do që ka qenë e nevojshme të jemi. Jemi organizuar në forma të ndryshme nëpërmjet miqve tanë, senatorë të ndryshëm, me të cilët kemi kontakte të vazhdueshme.

Kontribut të shkëlqyeshëm për çështjen e Kosovës ka dhënë e gjithë mërgata në SHBA”, thotë Saliu, duke shtuar se çdo herë kur ka qenë në pyetje Kosova, nuk kemi kursyer asnjë ditë dhe asnjë send, kjo pasi e kemi ndier jo vetëm si obligim, por edhe detyrë.

Saliu: Të punosh për Kosovën, është detyrë e jo vetëm obligim

Fillimin e veprimtarisë për çështjen e Kosovës, Ademi e shpjegon me nostalgji të madhe. Ai e kujton vitin 1992, kur në Boston të SHBA-ve arrin presidentit historik i Kosovës, dr. Ibrahim Rugova. “Ai ka qenë një moment që ka lënë mbresë të thellë tek çdo person që ka qenë aty dhe jashtë. Mënyra e paraqitjes së çështjes së Kosovës, se me çfarë forme mundet dhe duhet çdo dashamirë ta bëjë, ka qenë aq e hapur dhe e pranueshme, sa që të jepte një shtytje pozitive për një angazhim edhe më tepër.

Agjenda jonë ka qenë gjithmonë, Kosova e pavarur dhe demokratike”, thotë me mburrje Ademi.

Arritjet e derikëtushme të Kosovës, Ademi i lidh me Presidentin Rugova. Në mënyrë të veçantë, ai çmon lidhjet dhe miqësinë që Presidenti Rugova ka krijuar me popullin amerikan. Mirëpo, këtu nuk harron dhe e çmon lartë kontributin edhe të veprimtarëve në SHBA, si Këshillin Shqiptaro-Amerikan, Ligën Amerikane, organizimet politike dhe partitë politike që veprojnë atje.

Populli i Kosovës, është krijuar nga Zoti që të ketë mik popullin amerikan

“Miqësia e krijuar nga Presidenti historik Rugova, është duke vazhduar me angazhim maksimal në mënyrë të organizuar dhe vetanake të veprimtarëve shqiptarë. Detyrë jona është që t’i pasurojmë kontaktet tona”, porosit ai.

Lidhjen e popullit të Kosovës, me popullin amerikan, Saliu e cilëson si lidhje të krijuar nga Zoti.

Inxhinieri që me profesionalizmin e tij, kontribuon në një ndër kompanitë më të famshme në SHBA, për asnjë moment nuk e fsheh nostalgjinë që ka për, siç e quan me ëndje, gjigantin “Trepça”. Herën e fundit, ai e kishte vizituar para dy viteve, ndërkohë që ka planifikuar që këtë herë t’ia bëjë edhe një vizitë.

Është një përjetim i veçantë kur të shikohet se mbi çka flenë Kosova

“Ndoshta nuk e di gjendjen e tërësishme, por e di që Trepça është një gjigant, është një pasuri e Kosovës, që do të siguroj një gjendje të mirë në të ardhmen. Pasuria e Kosovës është aty, konkretisht në minierat e Kishnicës dhe minierat e tjera. Është një përjetim i veçantë kur të shikohet se mbi çka flenë Kosova. Mirëpo, tani duhen bërë investime pak më serioze për rivitalizimin e përgjithshëm. Dëshira ime është që të shohë një progres të madh në këtë fushë”, shprehet ai me mallëngjim.

Besnik RAMADANAJ, IP