[Makresh]

Për Universitetin turk në Lipjan-100 milionë euro dhe 400 hektarë tokë

Lipjan, 17 maj – Ambasada e Turqisë në Prishtinë dhe Komuna e Lipjanit të martën kanë dalë me projekt të përbashkët për ndërtimin e një universiteti turk në këtë komunë. Me gjithë faktin se kostoja e ndërtimit të universitetit turk që parashihet të jetë në periferi të Lipjanit nuk dihet ende, mendohet se ai do të shkojë deri në 100 milionë euro. Kjo dhe ka qenë arsyeja që ambasadorja turke në Prishtinë, Songul Ozan, ka qëndruar të martën në Lipjan dhe njëherësh bashkë me kreun e Lipjanit, Shukri Buja, kanë inspektuar vendin ku parashihet të ngrihet universiteti.
“Në kuadër të projektit për ndërtimin e universitetit turk kam shprehur dëshirën ta shoh lokacionin që është rezervuar nga Komuna e Lipjanit për universitet dhe mu për këtë arsye jam këtu”, ka thënë ambasadorja Ozan. Ajo ka konfirmuar se themelimi i universitetit turk është një ide e kahershme e përbashkët mes Turqisë dhe Komunës së Lipjani.
“Shpresoj shumë qe me jetësimin e këtij projekti Turqia të japë kontributin e vet edhe në fushën e arsimit për faktin se shtetit turk ka vendosur që ta ndihmojë Kosovën edhe në këtë aspekt”, ka thënë Ozan.
Kryetari i Lipjanit, Shukri Buja, tha se “ne vizituam vendin ku do të ndërtohet universiteti, që është zonë kadastrale e Kraishtës dhe është afër me aeroportin”.
Për ndërtim të universitetit turk do të jepet edhe në pjesë e madhe e tokës të komunës së Lipjanit, rreth 400 hektarë.

PS: Mungon nje rubrik kushtuar Arsimit.