[lirik]

Katër breza në luftë
BEQIR NEBIH MEHA
(1936-1999)
MEJREME MARAJ-BERISHA
Familja e Emin Latit nga Prekazi i Ulët i Drenicës, e njohur si familja
Mehaj, është një ndër familjet e rralla emblematike të popullit.
Katër breza të kësaj familjeje luftuan dhe qëndruan në katër
periudhat historike të robërisë së Kosovës - vitet 1913, vitet 1918-24,
13 maji 1981 dhe vitet e fundit të luftës çlirimtare. Më 2 shkurt të
vitit 1936, në Prekaz të Ulët të Drenicës, u lind Beqir Meha. Nën
ndikimin dhe frymëzimin atdhetar të babait, gjyshit dhe xhaxhait,
Mehmetit, Beqir Meha me disa bashkëveprimtarë kanë zhvilluar
veprimtari atdhetare. Më 14 prill të vitit 1959, së bashku me Bislim
Tahirin, Adem Aliun, Sherif Musliun, Istref Osmanin,
Muhamet Qerimin dhe Ramadan Zenelin, arrestohet dhe më pas
dënohet për veprimtari antijugosllave. Ai dërgohet për ta vuajtur
dënimin në burgun famëkeq të Goli Otokut. Pas vuajtjes së dënimit,
Beqiri, së bashku me të vëllain Tahirin, për të ndihmuar në ngritjen
e familjes kërkon punë në Maqedoni, në Mal të Zi e gjetkë.
Në prill të vitit 1980, Tahiri bie në konflikt me policinë e asaj kohe
dhe për disa muaj rresht jeton ilegalisht te miqtë dhe te shokët.
Demonstratat e rinisë studentore të marsit dhe të prillit të vitit 1981,
Tahir Nebih Mehës i dhanë zemër dhe forcë për të vepruar fuqishëm
kundër forcave okupatore. Data e rrethimit qe caktuar 13 maji, një
datë e njohur e sigurimit jugosllav, pasi forcat policore marrin urdhër
për veprim. Herët në mëngjesin e majit 1981, qindra pjesëtarë të njësive
speciale dhe të ushtrisë jugosllave kishin rrethuar një rreze
të gjerë veprimi rreth Kullës së Tahir Nebih Mehës. Familja e
Tahir Mehës u bë kala dhe nuk iu dorëzua forcave okupatore, që
kishin vrarë nxënës dhe studentë në Prishtinë dhe në disa qytete të
tjera të Kosovës. Në rrethim ndodhej edhe Beqir Meha, me të gjithë
anëtarët e familjes. Bien pas 20 orë luftimesh babë e bir, kurse anëtarë
të tjerë të familjes plagosen. Më 22 janar të vitit 1998, kur forcat
serbe rrethojnë dhe sulmojnë shtëpinë e Shaban Jasharit, Beqir
Meha me Emin Latin (i riu) pozicionohen për sulm kundër forcave
serbe. Beqiri me Eminin dhe Nagip Mehemetin ishin ndër të
parët që kishin arritur te Jasharajt. Më 27 shkurt të vitit 1998, më urdhër
të komandantit Adem Jashari, Beqiri niset në drejtimin Qirez,
Likoshan e Gllanasellë me mision të caktuar. Më 28 shkurt, forcat
policore serbe ndeshën në veturën e Musa Jasharit dhe fillon shkëmbimi
i zjarrit. Në drejtim të vendit ku u zhvilluan luftimet niset edhe
Beqiri me shokë. Në këto luftime vriten disa policë serbë, po në këtë
përleshje bie edhe luftëtari Rexhep Rexhepi. Ndërkohë, gjatë
luftimeve që u zhvilluan deri në orët e vona të natës, në altarin e
lirisë bie edhe Beqir Brahim Rexhepi, ndërsa plagosen Musa
Jashari, Sabit Lladrovci dhe Sabit Geci. Për shkak të humbjeve të
pësuara, forcat serbe masakrojnë 24 pjesëtarë të Qirezit dhe Likoshanit.
Prej marsit 1998 e deri më 25 mars 1999, Beqir Meha ka luftuar në
rajonin e Zonës Operative të Drenicës. Ai kishte autoritet të
pakontestueshëm si vëlla i Tahir Mehës dhe si bir i Nebih Mehës,
por edhe si bashkëluftëtar i ngushtë i Jasharajve. Meqë ishte
kalitur në burgje dhe ndër betejat e luftës, ai gjendej gjithnjë në
ballë. Në mars të vitit 1999, në kohën kur kishte filluar ofensiva e
dimrit në Drenicë, Beqir Meha bashkë me bashkëluftëtarë ndodhej
në fshatin Rakinicë. Aty takohet me njësitin e fshatit Oshlan, i
cili sapo kishte arritur me armatim nga Shqipëria. Duke qenë se
luftimet zhvilloheshin në të gjitha anët, Beqiri merr përsipër për t'i
ndihmuar ushtarët në drejtim të Oshlanit në Zonën Operative të
Shalës. Rreth orës 23:00, të natës së 25 marsit të vitit 1999, Beqir
Meha bie në pritë të forcave serbe. Pas një luftimi të ashpër ballë për
ballë me forcat e armikut, ai plagoset rëndë, duke kaluar nëpër
fshatin Qubrel të Drenicës. Plagët e Beqirit ishin vdekjeprurëse.
Ra atë ditë marsi për të mos vdekur kurr