[sunshine]

Si e shihni ju një koalicion mes PDK-së dhe LDK-së?
Zgjedhjet po organizohen pikërisht për të bërë një koalicion të tillë të fuqishëm qeveritar, sepse përveç se e kanë Grupin Negociator, janë të interesuar për një qeveri të fortë që do të ketë më shumë legjitimitet formal për të nënshkruar marrëveshjen e ardhshme me Serbinë. Nuk janë të kënaqur me koalicionin aktual për shkak se po të dojë LDD-ja e Nexhat Dacit, do të mund t‘ia hiqte votëbesimin qeverisë së tanishme, dhe nuk janë të kënaqur me Agim Çekun, pasi që ai nuk është i fuqishëm në partinë e tij në AAK, ku realisht është vetëm një anëtar i thjeshtë. Prandaj e duan një koalicion LDK-PDK. Për t‘i ndihmuar kësaj është edhe dëshira e zjarrtë e Hashim Thaçit, që me çdo kusht të bëhet Kryeministër dhe ai e ka këtë dëshirë të kahmotshme, me gjasë sepse kur ishte Kryeministër në qeverinë e përkohshme të Kosovës në vitin 1999, qëndroi shumë shkurt dhe siç thotë populli, i ka mbetur ëmbël puna e Kryeministrit. Por faktorët e ndryshëm ndërkombëtarë do t‘ia shfrytëzojnë këtë dëshirë të zjarrtë të Hashim Thaçit për të marrë garancinë që ai do të jetë bashkëpunues në negociatat e mëtutjeshme me Serbinë e që do të duhet të kurorëzohen me një marrëveshje me të. Prandaj nuk mundet Hashim Thaçi edhe të bëhet Kryeministër edhe të refuzojë marrëveshjen me Serbinë. Këto të dyja shkojnë në paketë: kanë shkuar në paketë në kohën e Rambujesë, kur Thaçi e ka pranuar autonominë e Kosovës nën Serbi dhe çmilitarizimin e UÇK-së dhe atëherë e bënë Kryeministër, do të shkojnë në paketë edhe tash. Kështu që tani po e përsërisin të njëjtin model: kur është bërë njëherë suksesshëm (për ta) pse të mos e provojnë prapë? Ndërkohë, është Hashim Thaçi ai që po ua plotëson dëshirat faktorëve ndërkombëtarë, ndërkaq ata po ja menaxhojnë atij dëshirën duke ia lënë të paplotësuar. Nuk duhet të harrohet edhe ky fakt se qendra e numërimit të votave në Prishtinë do të jetë në duart e ndërkombëtareve dhe ajo do të jetë kuzhina ku do të gatuhet koalicioni i ardhshëm.

A e akuzoni ju Thaçin dhe liderë të tjerë për faktin që ju sot jeni një i burgosur politik?
Po, këta janë bashkëpjesëmarrës në burgosjen time, në vazhdimin e izolimit tim, për faktin se këta nuk duan të kenë asnjë zë të vërtetë opozitar në Kosovë dhe nuk duan që të jetë dikush që t‘i demaskojë të gjitha mashtrimet, vjedhjet dhe gënjeshtrat e vazhdueshme të tyre. Prandaj, bashkë me kreun e UNMIK-ut, edhe grupi negociator ka qenë drejtpërdrejt i angazhuar në izolimin tim, por edhe në sulme të vazhdueshme kundër Lëvizjes VETËVENDOSJE. Këta po të ishin të sigurt se do të bëhej pavarësia ashtu siç gënjejnë, do të më lironin mua që të më turpëronin para publikut. Por këta e dinë shumë mirë se koncepti i Lëvizjes VETËVENDOSJE është i vërtetë dhe i drejtë, se që të gjitha analizat tona dolën të sakta, prandaj nuk duan që unë të kem kontakt me popullin dhe të kontribuoj në organizimin e tij kundër tyre. Për një vit e gjysmë në Lëvizjen VETËVENDOSJE unë i kam pasur rreth 150 tubime nëpër fshatrat dhe qytetet e Kosovës. Dhe kjo ka qenë një armë shumë fuqishme e imja. Ata e kanë hetuar një gjë të tillë, dhe një ndër arsyet kryesore pse më mbajnë të izoluar është pikërisht kjo: të më ndajnë nga qytetarët, meqë këta vetë janë ndarë nga qytetarët, janë shkëputur. Unë nuk jam shkëputur asnjëherë prej qytetarëve dhe tani nëpërmjet mekanizmave të tyre gjyqësore e policore duan ta bëjnë këtë.



Çfarë do të bëjë Lëvizja VETËVENDOSJE më 10 dhjetor?
Lëvizja VETËVENDOSJE është shumë e fokusuar në fushatën kundër zgjedhjeve, kundër kësaj farse zgjedhore. Ne themi: Zgjedh përnjëmend! Pra, mos voto! Ne kërkojmë referendum për liri e jo votime për parti. Kjo që bëjmë tash është më e rëndësishme se çfarëdolloj demonstrate. Sepse nëse dalin 40% të njerëzve, këta do të gënjejnë, do të thonë se dolën 52% a 53%, mirëpo nëse ne do të mundemi ta mbajmë nën ¼, atëherë nuk do të mund të gënjejnë aq shumë.

Sondazhet parashikojnë se do të ketë rritje të pjesëmarrjes në votime, krahasuar me zgjedhjet e kaluara...
Sondazhet parashikojnë kështu në mënyrë që ta shkaktojnë rritjen. Sondazhet që po bëhen janë kryekëput të porositura. Që nga zgjedhjet e para, numri i votuesve është në rënie. Tash ka arsye si asnjëherë më parë që rënia të jetë jo vetëm e vazhdueshme, por edhe drastike.

Janë paralajmëruar disa protesta për 10 dhjetorin. A do të protestoni ju?
Që ne do të protestojmë e do të demonstrojmë së shpejti, kjo është e sigurt, mirëpo nuk duam ta lidhim me datën 10 dhjetor, pasi kjo do të thoshte se ne kemi ca iluzione për atë datë. Pra, thua se ne pritëm deri në këtë datë, nuk u bë e atëherë po protestojmë. Ne e dimë se s‘ka asgjë më 10 dhjetor. Tjetra është se treshja ndërkombëtare që po udhëheq procesin, para se t‘i skadojë afati kësaj gënjeshtre për 120 ditë negociata shtesë do ta shpikë një gënjeshtër të re, në mënyrë që populli të mos befasohet më 11 dhjetor. Pra, në stilin, një konferencë e madhe ndërkombëtare në shkurt apo mars të vitit të ardhshëm, apo një konferencë e madhe e donatorëve, natyrisht nëse jemi të durueshëm edhe pak, do t‘i paraprijë datës dhjetë dhjetor. Gjëra të tilla do të thonë. Këta nuk e lejojnë që t‘i skadojë afati gënjeshtrës së vjetër pa e shpikur gënjeshtrën e re.

Vetë Presidenti Bush ka thënë në Tiranë se një ditë do them mjaft është mjaft, Kosova është e pavarur. Nuk e besoni ju këtë?
Duhet t‘i dallojmë gjërat. Kur Shtetet e Bashkuara thonë pavarësi, ato mendojnë në pakon e Ahtisarit, që nuk është pavarësi. E dyta, kur Bushi thotë se do të vijë dita të thuhet mjaft është mjaft, ai megjithatë nuk po jep kurrfarë afati për këtë, pra s‘po thotë se kur do të ngjajë ajo ‘mjaft është mjaft‘. Dhe e treta, nuk duhet të harrojmë se Bushi e ka gënjyer disa herë popullin amerikan, andaj s‘duhet të befasohemi nëse e gënjen njëherë atë shqiptar.

30.10.2007