[Lona]

Bushi i kërkon Musharafit heqjen uniformën
Uashington, 8 nëntor - Presidenti Bush tha se kishte zhvilluar një bisedë të sinqertë me udhëheqësin pakistanez, gjeneralin Musharaf. Ai tha se i kishte kërkuar atij të jepte dorëheqjen nga posti i komandantit të ushtrisë dhe të caktonte zgjedhje sa më shpejt. "Gjenerali Musharaf duhet ta heqë uniformën. Nuk mund të jesh president dhe komandant i ushtrisë në të njëjtën kohë", tha presidenti Bush. Nënsekretari amerikan i shtetit, John Negroponte, deklaroi në Kongres se gjenerali Musharaf ishte një aleat shumë i rëndësishëm.

Vietnam: Së paku 82 persona vdesin nga vërshimet
e enjte , 08 nëntor 2007
Së paku 82 persona kanë vdekur në vërshimet të cilat gjatë dhjetë ditëve të fundit kanë goditur Vietnamin, derisa vazhdon të rritet frika nga pasojat që do të shkaktojë vikendin e radhës tajfuni "Peipah", kanë thënë zyrtarë të pushtetit vendas në kryeqytetin Hanoi.
Gjatë dy ditëve të fundit janë shënuar disa dhjetëra raste të vdekjes pasi që njerëzit kanë tentuar që vetvetiu të largohen nga rajonet e prekura nga vërshimet, por qeveria qendrore i ka tërhequr vëmendjen pushtetit lokal që të informojë popullatën lokale me rreziqet që bartin tentimet e tilla të largimit. Hanoi, gjithashtu ka informuar pushtetin lokal të pjesës bregdetare të vendit që të ndalojë daljen e peshkatarëve në det pasi që Vietnamit po i afrohet tajfuni "Peipah" i cili në Filipine veçmë ka marrë jetën e pesë njerëzve, njofton Reuters. Ky do të jetë tajfuni i gjashtë me radhë i cili vetëm këtë vit godet Vietnamin.

Zbulohet një planet i ri në një sistem të largët diellorLos Angjeles, 8 nëntor - Astronomët në Kaliforni kanë bërë të ditur se kanë konfirmuar ekzistencën e një planeti të ri që rrotullohet rreth një ylli të largët të ngjashëm me diellin, i cili quhet Kankri 55. Shkencëtarët thanë se ky është rasti i parë i zbuluar, ku pesë planete rrotullohen rreth një sistemi tjetër diellor. Ata mendojnë se planeti i ri është rreth 45 herë më i madh se Toka dhe orbita e tij zgjat 260 ditë. Sipas tyre, temperatura në planet mund të jetë e favorshme për kushte jete dhe ka mundësi që aty të ketë ujë. Ekspertët mendojnë se sistemi Kankri 55 është “i mbushur me planete”.

Duma pezullon Traktatin e forcave konvencionale në Evropë
e enjte , 08 nëntor 2007
Dhoma e ulët e parlamentit rus, Duma, votoi për të pezulluar një pakt të rëndësishëm i cili kufizon numrin e trupave dhe armët konvencionale në Evropë. Duma votoi njëzëri për ta pezulluar Traktatin. Anëtarët rus dhe ata të NATO-s e ripërtërinë Traktatin e forcave konvencionale në Evropë në vitin 1999, për të pasqyruar shpërbërjen e Bashkimit Sovjetik. Por, aleatët e NATO-s kanë refuzuar ta miratojnë atë derisa Rusia të tërheqë forcat e saj nga Gjeorgjia dhe Moldavia.Kremlini thotë se nuk ka lidhje mes Traktatit dhe dislokimit të trupave ruse në ato vende. Presidenti rus, Vladimir Putin, ka thënë se Traktati nuk përputhet më me realitetet ekzistuese ushtarake dhe politike në Evropë. Rusia është e zemëruar gjithashtu, për shkak të planeve amerikane për ndërtimin e një sistemi mbrojtjeje nga raketat në Evropën lindore. Putin pritet ta nënshkruajë ligjin, sapo të miratohet nga dhoma e lartë e parlamentit.