[natyra]

Festivali i Estradave 1960-1990, sot i harruar
Festivali i Estradave ka qenë disa dekada. Artistët kujtojnë se ka filluar në vitin 1960 për të vijuar deri në vitin 1990. Festivali ka pasur edhe çmime, si aktori më i mirë, trupa më e mirë etj. Festivali zhvillohej në qytete të ndryshme të vendit dhe jo vetëm në Tiranë. “Jepeshin edhe medalje duke filluar që nga Lidhja e Shkrimtarëve, Ministria e Kulturës. Më kujtohet që në vitin 1988 çmimin e parë e mori Çobo Rrapushi i qytetit të Fierit, i lozur nga Luftra Paja etj. Ne si trupë e Tiranës kishim fat sepse kishim këngëtarët më të mëdhenj që kishte Shqipëria. Në atë kohë ne gjenim materiale të veçanta të shkëlqyera. Më të mirat kanë qenë Shkodra, Tirana dhe Fieri, por dhe Parodistët e Vlorës, dhe pati shumë konkurrencë sidomos pasqyrohej edhe në shfaqjet e Vitit të Ri në ato vite. Festivali i estradave është bërë edhe në Tropojë, Kukës, Peshkopi, Sarandë, Vlorë, Lushnje, etj”, tregon ish drejtori Sulejman Dibra. Në kujtimet e tij aktori i estradës Enver Bukri pohon se në të gjithë vendin bëheshin 16 trupa profesioniste, por trupës së kryeqytetit i thërrisnin edhe “estrada mëmë”. “Festivalet kanë materialet më të bukura në festivale që zhvilloheshin në atë kohë. Së bashku me trupën e Tiranës bëheshin 16 estrada profesioniste”, pohon aktori Enver Bukri. Artistët tregojnë se Festivali i Estradave ishte një nga evenimentet më të bukura të atyre viteve, i cili kishte jehonën e tij, ndërsa ishin me mijëra spektatorë që kërkonin të ishin pjesë e atyre ditëve në vendin ku zhvillohej festivali, i cili mblidhte aktorët më të mirë të humorit shqiptar ndër vite.

Kujtesë, në 60 vite Estradë
Në 2 maj 1952 është themeluar estrada e parë shqiptare, Estrada e Tiranës. Sot pas kaq vitesh është një mirënjohje të thellë për të gjithë ata artisë, të cilët krijuan Estradën. Pionierët e këtij e arti kanë qenë Artistja e Popullit Melpomeni Çobani, këngëtarja e njohur Anita Take, Artisti i Popullit Skënder Sallaku, i mirënjohuri Skënder Plasari etj. Shfaqja e parë që ka çelur aktivitetin e estradës është pikërisht shfaqja me titull “Estrada nr.1”, ku interpretuan Ramazan Zyberi, Melpomeni Çobani, Enver Dauti, Ana Kçira, Lin Ndoka, Tonin Konçi, Luçie Miloti, Hajrie Harapi, këngëtar, Xhana Xheluçi, dirigjent Zef Gruda, orkestrant Muharrem Xhediku,etj. Pas kësaj shfaqje u dhanë dhe shumë të tjera me titujt “Estrada nr.2”, “Estrada nr.3”, “Estrada nr.4” e më pas vijuan numrat. Ishin këta artistë që ecën të sigurt përpara duke i dhënë institucionit suksesin e vazhdueshëm. Populli e deshi aq shumë këtë art të ri sa shfaqjet ktheheshin në festa masive. E qeshura buronte nga tema e ditës, buronte nga fjala, mimika, plastika, kënga e kupleti, dialogu e monologu. Vite më pas, pjesë të Estradës së Tiranës u bënë aktorë të rinj si Vegim Xhani, Xhemal Myftiu, Kujtim Shehu, Enver Bukri, Vilson Gjoça, këngëtarë të talentuar ku spikasin zëra të mrekullueshëm si “Nderi i Kombit” si Vaçe Zela, Fitnete Rexha, Pavlina Nika, Pjetër Gjergji, Rudolf Stambolli e më pas Luan Zhegu, Ema Qazimi, Liljana Kondakçi, Kozma Dushi e Irma Libohova. Pjesë tjetër e kësaj estrade ishin dhe dirigjentët e orkestrantët Nesti Uçi, Kristo Kote e Alqi Kareco, libretistë e kompozitorë si Agim Prodani e Aleksandër Lalo, Kin Dushi, Aleksandër Banushi, Koço Devole e Tonin Miloti, regjisorë Besim Levoja, Mihal Luarasi, Bujar Kapexhiu, Rifat Poga etj. Gjatë viteve ’80 - ‘90, Estrada e Tiranës numëroi një trupë prej 65 vetash. Gjatë viteve ‘80 u dhanë mbi 320 shfaqje në vit ku spikatën, komeditë, vodevilët, recitalet e këngëve, koncertet në pallate sporti, stadiume etj. Ndërkohë gjatë një vitit jepeshin 80 shfaqje në fshatra, ndërmarrje e pika kufitare, reparte ushtarake, etj. Trupa u rinovua me aktorë të rinj të dalë nga “Akademia e Arteve të Bukura” sot “Universiteti i Arteve” si Vasillaq Vangjeli, Maxhide Pici, Kosta Kamberi, Besnik Kasa, Veli Rada, Agim Bajko, Shpresa Bërdëllima, Rabije Hyka, Rita Lati, Marjana Kondi, Xhevahir Zeneli e shumë të tjerë që erdhën pas viteve ‘90 si: Behar Mera, Pranvera Veizi e Met Bega. Estrada e Tiranës u nderua shpesh me çmime të para dhe të dyta, më pas nisi dhe bashkëpunimi me televizionin dhe trupat e rretheve, si një risi në aktivitetin artistik shqiptar. Rradhët e gjata të spektatorëve, autorizimet e pafundme për të siguruar një biletë, përbënin një tjetër realitet të bukur. Përgjatë një periudhe 50 vjeçare nga Estrada e Tiranës u dhanë mbi 250 premiera! Ndërkohë në 2 prill 2005 Estrada e Tiranës pushoi së ekzistuari si institucion dhe kaloi si një kompani teatrore. Nga Julia Vrapi