[BE LK]

Vazhdimi...


Nuk është turp për asnjë musliman që vendet Islame nuk e njohin pavarësinë e Kosovës. Këto shtete nuk drejtohen nga sheriati, nga vota e muslimanëve, nuk drejtohen nga Islami si identitet i përbashkët i shqiptarëve dhe i popullsive të këtyre vendeve. Islami ne nivel doktrinar nuk pengon pavarësinë dhe të drejtën e një populli për të jetuar i lire. Këto vende me politiken e tyre filo-amerikane, megjithëse miq më të hershëm dhe më jetikë për SHBA-në nuk pranojnë të njohin pavarësinë e "miqve" të rinj të superfuqisë. Sikurse çështja të ishte fetare dhe sikurse populli të ishte udhëheqës në këto shtete, Kosova do të njihej, por ashtu siç nuk njeh Faktori Ndërkombëtar bamirësi në të njëjtën mënyrë edhe këto shtete nuk drejtohen nga etika fetare dhe bamirësia. Duhet të turpërohen politikanë dhe “haxhilerë” të ndryshëm kosovarë që i bëjnë tauaf(1) interesave vetjake duke kërkuar (gjoja) vizë për në familjen Evropiane. Megjithë jargavitjet e tyre, Evropa na ka pranuar njëkohësisht duke na vendosur në prioritetet e politikes rajonale, pa kushte qytetarizmi që për z.Haxhiu janë edhe kthimet në identitet-fantazmat mesjetare. Të turpërohen ato që mohojnë prindërit dhe jo myslimanët që nuk njihen nga politika e korruptuar, joislame, filo-perëndimore, anti-njerëzore, anti-qytetare, diktatoriale në shume raste, e shteteve të ashtuquajtura Islamike.

Ezani është thirrja melodioze që fton besimtarët në qetësi shpirtërore, etikën fetare, normat e pastrimit të veprimeve tona. Çdo besim ka mënyrën e vet të ftesës. Krishterimi ka zgjedhur kambanat me tingullin e prodhuar nga goditja e metalit. Evropa gumëzhin jo vetëm nga besimtarët që mbushin kishën por nga këto tinguj, jo vetëm në momentet e liturgjisë Kristiane por edhe në pagëzim, krezmin, martesë, vdekje e festa të ndryshme. Imagjinoni sa here në ditë përsëritët kjo thirrje dhe shtoni imagjinatës numrin e lartë të tempujve në çdo shesh, rrugë, madje edhe institucione publike. Gjithashtu Evropa gumëzhin nga zhurma e diskotekave, ndeshjeve të futbollit, kinemave e organizimeve tjera. Kontinenti të cilin mundohemi të majmunizojmë ka "qytetëruar" këto “zhurma”(duke përdorur një etiketë të z.Haxhiu), i ka bërë pjesë të vetvetes dhe trashëgimisë së tij. Ezani (në Evropë) është vështirë të dëgjohet për mungesën e një shtresëzimi social autokton dhe i një tabani kulturorë shekullorë. Islami ne Perëndim etiketohet gjithmonë si sinonim i emigracionit. Ne shqiptarët kemi një realitet të ndryshëm sepse Islamin e kemi trashëgimi kulturore, realitet dhe kemi një shtresëzim social masiv autokton. Është pjesë e jona siç është çdo emblemë kombëtare laike që meriton respekt. Shqipëria vitet e fundit është mbushur me simbologji fetare neper kodra dhe male, me statuja figurash fetare të veshura me një patriotizëm të çuditshëm që as vetë ato nuk e kane zgjedhur sa ishin ne jetë, me emërtime institucionesh gjithashtu nga personazhe fetare joislame dhe së fundmi zbuluam se në Shqipëri kemi më shumë kisha katolike se xhami edhe pse këto institucione janë ndërtuar për vetëm 12% të popullsisë katolike dhe çka është me groteske këto institucione zhurmojnë, shpojnë qiellin me kambanore, respektohen dhe nuk ua kërkon njeri heshtjen! Ashtu siç ka Evropa traditat e saja edhe trojet tona etnike duhet të respektojnë traditat shekullore ndër të cilat është edhe thirrja e myslimaneve. "Haxhilerët" kërkojnë të na mësojnë së kur duhet të falen myslimanet, kur duhet të thërrasin ezanin, si dhe me sa volum, të nisur nga "qytetarizmi" . Nga historiograf, Batoni shndërrohet ne sociolog, arkitekt dhe së fundmi ne teolog. Meqenëse Kontinenti Plak ka këto parametra qytetarizmi dhe lejon zhurmimin e kambanave persë për ne shqiptarët duhen peshore të manipuluara? Batoni i fshatrave të Ballkanit është me qytetarë së vetë Kontinenti të cilit po kërkon t’i imitoje qytëtarizmin?
“...nuk është qytetëruese të bërtasësh për të predikuar fenë...”- shkruan Batoni teolog. “Bërtitja” shtjellohet në dy mënyra. E para është thirrja e ezanit që krahasohet me “bërtitje” dhe kjo na qenka jo qytetare edhe pse dëgjojmë bërtitjet e tjera çdo ditë të cilat përsëritën në zemër të Evropës me gjithë indiferentizmin e sajë. Këtu nuk kuptohet se ku fillon dhe ku mbaron Evropa e autorit. E dyta është “bërtitja” e z.Morina. Deklarata e tij krahasohet me ulërimë. Duhet të jemi kafshë që në asnjë mënyrë të mos “bërtasim” dhe të mbijetojmë, por të fshihemi në errësire të flemë si ariu mundësisht me një letargji të përhershme. Ezani shurdhues, minarja e shëmtuar, xhamitë e kota dhe të shumta në numër, hoxhë që flasin tepër, myslimanë që duhet të turpërohen, qytetaria batoniane…pas këtyre pretendimeve, fjalët që i keni drejtuar z.Morina ne frazën :” liria e fituar në Kosovë është më e rëndësishme sesa feja që Ju predikoni” a vlejnë edhe për juve ? A duhet që liria e fjalës së Morinës, e demonstrimit të identitetit, e fesë dhe e respektimit të kulturës së popullit tuaj të jenë më të vlefshme se teologjia e juaj perverse? E di që nuk vlen koncepti i lirisë kur flitet për Morinën, ajo është liri kufijtë e së cilës duhet t’i përcaktoni ju, por ama, kjo nuk është liria e konceptuar në qytetarizmin Evropian, është vetëm liri e njëanshme. Ato që mohojnë lirinë e fjalës, që urdhërojnë heshtjen nuk kanë të drejtën morale të hyjnizojnë lirinë dhe të jenë akuzues të të tjerëve për mungesë të sajë. Kosova ka përjetuar mohimin e lirisë së fjalës nga serbët, Shqipëria nga Enverizmi, sot është krijuar një mishele e atillë që kërkon t’u tregojë shqiptarëve se “liri” do të thotë ajo çka mendon Baton Haxhiu.
Nuk mjafton vjedhja e përditshme e historisë nga historiograf mercenarë, devijimi i simboleve dhe vlerave kombëtare, tani kërkohet heshtja ose të mësohet ndonjë sure( kaptinë Kuranore) sipas “profetit” Baton, pasi vetëm kështu do të jemi të pranuar në të qenurit shqiptar. Kemi të drejtën tonë të edukojmë fëmijët me normalitetin e thirrjes së ezanit konform realitetit dhe qytetarizmit të zhurmave normale në Evropë, por mbi të gjitha konform traditës shekullore. Është kjo traditë që ju turpëron juve. Pranimi i identitetit është liri, është guxim por jo servilizmi, mashtrimet historike, moralizmat e njëanshme, imponimi dhe haxhillëku i interesave personale.

Shkruar nga Doan Dani