[Urata]

Nëse ndërkombëtarët kanë ditur për SHIK-un, a thua kanë ditur dhe pse lejuan vrasjet politike?!

Dhe në këtë prelud të vdekjes për së gjalli të njeriut dardan, pyetja hamletiane e Kadaresë do të ishte: A janë fajet e përbashkëta në këtë atmosferë detyrimi për të heshtur?! Athua o Zot, kombi i ri kosovar, vërtetë është një popullsi e tërë hamletësh?! Nesër, kur të bëhet vija ndarëse në mes të punës e mospunës, të bërave e të pabërave, në mes të atyre që e duan atdheun dhe atyre që e zhvatin…a thua kënd do ta vrasë ndërgjegja?! E shikon z. President si është shndërruar Kosova në një tokë njerëzish pa vizion, pa dinjitet, pa strategji e qëllim zhvillimi, ecje para dhe krijim hapësirash për punë e jetë në mirëqenie?! Ju e shihni nga atje përtej kësaj bote se si burokratët e post epokës tande vjedhin në pikë të ditës, ata mëngjes e mbrëmje vjedhin, krijojnë e zhvillojnë dyshime, mënyra bashkëkohore mbytjeje, shpërndajnë terr e mjegull, krijojnë e përtypin psikoza e shpallin trathtarë të shtetit…?! Kjo nuk është kështjella që e nisëm, këta nuk janë më qytetarët e saj! Tëhuajësimi ka kapluar poret e shoqërisë, tek institucionet ka dikush që do të sundojë me frikë. Është krijuar pas Epokës tande një vend ku gjaksorët nuk i frikohen mallkimit, aty nuk ka lutje sikur që Xhema bëri për Prishtinën, nuk ka kritikë siç Enveri bënte në funksion të lirisë, asaj që po mungon aq shumë edhe në sofrat shqiptare, edhe në odat e madje edhe në biseda intime?! Sikur gjatë komunizmit z. President, tashmë historia po na vjen sikur atë kohë që ty e le mbrapa. A thua mos gjithnjë do jemi të detyruar të mësojmë tradhtarët për patriotë dhe këta të fundit për armiq lirie e shteti që i mungojnë Kosovës si drita e buka?! Qe sa vjet është përkthyer Sofokliu në gjuhën e bukur shqipe dhe asnjëherë nuk e mësuam që nuk është mirë të kqinjtë të merren si të ndershëm, e të ndershmit si të këqinj! Konica ka pohuar se aty ku falet krimi, i hapet rrugë barbarit. Çka nëse Nazim Bllaca thotë një të vërtetë?! Kush na udhëheqë qe sa?! Nëse kryeministri pranon se ka pasur SHIK i cili sipas tij, ka bashkëpunuar ngusht me ndërkombëtarët dhe se paska pas punuar në interes të lirisë e shtetit të Kosovës, si doli të krijohej lista e likuidimit qysh më 1997/1998. A thua dikush nga ata që donin ta merrnin udhëheqjen ushtarake me çdo kusht dhe në çdo mënyrë, ka shpallur armik lëvzijen që i prije z. President?! Pse Enveri u vra në çastet kur po bënim përpjekje për përafrimin e faktorit politik me atë ushtarak në Llap e Kosovë?! A thua kush përveç atyre që jepnin udhëra për vrasje të intelektualëve shqiptarë të Kosovës e të lëvizjes për pavarësi, përfitonin nga likudimi?! Çfar është ky mëkat të cilin s’do ta pranojë as toka, as drita, as shiu i shenjtë?! Nëse ndërkombëtarët kanë ditur për SHIK-un, a thua kanë ditur dhe pse lejuan vrasjet politike?! Koha po ikë që institucionet vendore ta thonë një të vërtetë të madhe, kurse faktori ndërkombëtar, SHBA dhe BE do të duhej të sqaronin popullin e Kosovës për “bashkëpunimin” me SHIK, sepse mbi 60% e qytetarëve atë krijesë demoniake e shohin si gogolin e lirisë dhe pengesë zhvillimi të përgjithshëm! Ambasada amerikane dhe ambasadat e BE-së, moralisht kanë obligim ta thonë fjalën e vet lidhur me pohimin skandaloz të kryeministrit aktual…Ai që ka mbjellur terr, frikë, urrejtje, varfëri e plumba, pranverë e ngrohtë do ta presi…!