Çfarë është parfumi për ju dhe ç’përfaqëson ?

[Jana]

Pse na pëlqen një parfum? Ndoshta sepse na kujton diçka. Ndoshta sepse na përfaqëson, na shpreh, na plotëson. E vështirë përgjigjja. E vërteta është se parfumin e zgjedhim me të njëjtin kriter që zgjedhim dhe njeriun e zemrës, d.m.th. duke u bazuar tek kimia.

Roli i parfumit është të përcjellë informacion dhe identitet për atë që e përdor. Shqisa e të nuhaturit është ajo që ka ndërhyrje të menjëhershme tek kujtesa jonë duke patur një influencë të fuqishme tek emocionet e njeriut dhe psikologjia e tij.


Gjeni parfumin e përshtatshëm për ju
Pjesa më e mirë e ditës për të zgjedhur parfumin e duhur, është mëngjesi pasi atëherë hunda është më “e freskët”. Mos përdorni produkte kundërdjerse ose krem trupi atë ditë, pasi nuk duhet tju ngatërrojë asnjë lloj ere tjetër.
Filloni duke nuhatur parfume në letra të posacme dhe përdorni në kycin e dorës, vetëm ndonjë që ju tërheq vëmendjen. Zgjidhni duke patur parasysh edhe sezonin e vitit. Gjate verës evitoni parfumet e rënda (extrait, eau de parfum) dhe preferoni një eau de toilette.

Tre gjërat që nuk duhet të bëni kurrë
- Mos i fërkoni kurrë kycet me njëri-tjetrin kur përdorni parfum, pasi temperatura që krijohet nga fërkimi ndryshon aromën e vërtetë të parfumit.
- Mos provoni shumë parfume njëkohësisht. Pas tre-katër provash, nuhatja juaj nuk do të jetë në gjendje të dallojë saktë.
- Mos vendosni menjëherë. Lëreni parfumin të paktën 15 minuta në lëkurën tuaj që të kuptoni se si “sillet” dhe cfarë ndikimi ka tek psikologjia juaj kur e nuhasni.


Mbrojeni parfumin tuaj
Mos e lini të hapur shishen. Mbylleni gjithmonë kapakun.Mos e lini shishen e parfumit në diell dhe afër dritares, pasi drita dhe ndryshimi i temperaturës janë armiku i tij. Nëse keni një parfum shumë të vjetër (psh. të mamit) dhe doni ta ruani gjatë, mund ta vendosni në frigorifer.


Ku është më mirë të përdoret
“Aty ku doni t’ju puthin”, thoshte e paharueshmja Coco Chanel. Kryesisht në pjesën e pasme të qafës, por jo prapa veshëve. Pasi të jeni veshur, hidhni pak parfum tek flokët dhe tek dy supet.
Mos harroni se duke përdorur produktet shoqëruese të parfumit (krem trupi, kundërdjersë, shampo trupi, pudër etj) rrisni shumë shanset për të mbajtur për më shumë kohë “gjallë” erën e parfumit tuaj.