PDK shënon 12 vjetorin e themelimit

[Llapi]

PDK shënon 12 vjetorin e themelimit



Publikuar: 15.10.2011 - 15:12Prishtinë, 15 tetor - Partia Demokratike e Kosovës filloi shënimin e 12 vjetorit të aktiviteteve në skenën politike të Kosovës. Në një takim me Këshillin drejtues të partisë, anëtarët e Kryesisë dhe kryetarët e komunave të drejtuara nga PDK-ja, lideri partiak Hashim Thaçi tha se në 12 vjetët e kaluar PDK-ja është dëshmuar si subjekt i organizuar politik, me kapacitete shtet-formuese dhe e aftë që të ballafaqohet me sukses me të gjitha sfidat në ndërtimin e shtetit të Kosovës.

Duke iu drejtuar pjesëmarrësve të këtij tubimi festiv, të parin në vargun e aktiviteteve të shënimit të këtij përvjetori, Thaçi tha se kjo parti që nga themelimi mori pjesë në bashkëqeverisje në periudha të ndryshme të ndërtimit të shtetit të Kosovës, duke qenë si pjesë e pozitës ashtu edhe e opozitës konstruktive.

Sipas Thaçit, gjatë mandateve për drejtimin qeverisë së vendit, PDK-ja gjithnjë kishte si synim shtetndërtimin e Kosovës dhe afirmimin e saj ndërkombëtar, si dhe përfshirjen në mekanizmat integrues euro-atlantik.

Ndër sukseset e qeverise së PDK-së, lideri i kësaj partie veçoi edhe ndryshim e gjendjes së status kuos 12 vjeçare në pjesën veriore të vendit pas 25 korrikut dhe shtrirjen e ligjit e të sovranitetit edhe në këtë pjesë të vendit, raporton RTV21.

Aktivitetet festive në shënimin e këtij përvjetori të PDK-së do të vazhdojnë në ditët në vijim në shumë mjedise të Kosovës.