Lajme

[euro]

Braziliani Emerson ka pohuar se dhe mund të largohet nga Roma. "Kam kërkuar të jem gjithmonë i sinqertë. Nëse klubi dëshiron të mbushë arkën për t'i zgjidhur disa probleme të vogla financiare, jam i gatshëm të sakrifikohem. E adhuroj Romën, tifozët dhe të gjithë shoqërinë verdhekuqe, por ndoshta mund t`i shërbej më mirë klubit nëse shitem", ka deklaruar Emerson që ndiqet nga shumë klube.



Rio Ferdinand 8 muaj jashtë fushës së blertë

Menaxheri i kampionit të Anglisë, Mançester Junajtid, Sër Alleks Ferguson nuk mund të pajtohet me faktin që ka humbur njërin prej mbrojtësve standard në ekipin e tij, 25 vjeçarin Rio Ferdinand për pjesën tjetër të sezonës. Ferdinand është suspenduar për 8 muaj nga Federata e Futbollit të Anglisë, pasi nuk i ishte përgjigjur ftesës për doping test më 23 gusht të këtij viti. Për shkak të këtij suspendimi, Ferdinand nuk do të mund t’i shërbejë as përfaqësueses së Anglisë në kampionatin evropian në Portugali.

Ferguson, ndërkaq pas këtij vendimi të Federatës së futbollit të Anglisë, ka thënë se çështja “Ferdinand” mund të zgjidhet në një gjyq civil.

“Ferdinand ka të drejtë të shkojë në gjyq cvil dhe ta mbrojë reputacionin e tij, ndërkaq ne në klub do t’i japim përkrahjen e plotë”, ka shtuar në fund Ferguson.



Ruud Van Nistelrooy ndoshta në Man UTD deri në fund të karrierës

Në rast se do të nënshkruajë kontratë të re me Mançester Junajtedin, sulmuesi holandez, Rud van Nistelroj, do ta përfundojë karrierën në “Old Traford”. Sulmuesi holandez, i cili sivjet është në formë të shkëlqyeshme, në një bisedë për televizionin holandez ka pohuar se bisedimet me drejtuesit e klubit janë në vazhdim e sipër, por ende asgjë nuk është nënshkruar.



Megjithatë, zërat të cilat atë e transferojnë në Madrid, në skuadrën e “yjeve”, ai nuk i ka anashkaluar:

“Natyrisht kam dëgjuar për këto spekulime. Çka të them… në futboll është gjithçka e mundur”, ka pohuar sulmuesi 27-vjeçar, i cili në 124 ndeshje ka shënuar madje 94 gola. Van Nistelroj ka kontratë të vlefshme pesëvjeçare me Mançester Junajtedin, sipas të cilës fiton 40 mijë funta në javë.