Lajme Aktuale....

[Lona]

Shpërthen në BDI, rrahje me grushta mes Abdylaqim Ademit dhe Hazbi Likës



Siç mëson portali Shqipmedia nga burime anonime pranë selisë së BDI-së në Reçice të Vogel dy ditë më parë ka ndodhur përleshje fizike mes dy sekretarëve të partisë respektivisht sekretarit administrativ Hazbi Likës dhe sekretarit organizativ gjegjësisht ministrit të Ekologjisë Abdylaqim Ademi.
Rrahja mes dy funksionarëve të partisë vjen si rezultat i raporteve të acaruara gjatë kohë mes këtyre dy funksionarëve të cilët kanë rezultuar para dy ditësh në selinë e BDI-së me konfrotim fizik ku është dashtur intervenimi i personave tjerë në seli për të qetësuar situatën.
Portali Shqipmedia mëson së mes dy sekretarëve të BDI-së që moti nuk ekzistojnë raporte të mira bile shpesh të tensionuara që në kohën kur si zv/kryeministër ishte Abdylaqim Ademi ndërsa Hazbi Lika kryetar i komunës së Tetovës. Shpesh kryetari Ali Ahmeti ka intervenuar që këto dy funksionar mos eskalojnë situatën mirëpo këtë herë edhe Ahmeti nuk ka mundur të bëjë asgjë.
A është kjo një shenjë se në BDI situata ka dalë prej kontrolli nga mosdurimi mes grupeve të interesit pritet të shihet ditët në vazhdim, ku pritet emërimi i rektorit të ri të USHT-së në vend të ushtruesit të detyrës rektor Vullnet Ameti të cilin e përkrah klani i Hazbi Likës ndërsa e kundërshton klani i Abdilaqim Ademit

Izet Mexhiti i dhuron objekt Ansamblit Kulturor “Ibe Palikuqi”


Sot në komunën e Çairit u bë hapja solemne e objektit të ri të Ansamblit Kulturorë “Ibe Palikuqi” .
I cili është ndërtuar me mbështetje financiare nga komuna Çair .
Në këtë eveniment ishin të pranishëm kryetari i Bashkimit Demokratik për Integrim z.Ali Ahmeti,kryetari i komunës së Çairit z.Mexhiti, përfaqësues të institucioneve të ndryshme si dhe shumë zyrtar tjerë të pushtetit ekzekutiv dhe qendror të vendit .
z. Mexhiti theksoi se Ibe Palikuqi si Ansambël Kulturorë ka luajtur rol të rëndësishëm dhe ka një vlerë të madhe kombëtare , sepse edhe atëher kur ishte më vështirë , gjatë sistemit komunsit këtu janë kultivuar pandërprerë vlera kombëtare shqiptare.
” Ne nuk ndalemi këtu ne përveç se investojmë në kulturë , folklor . Ne pak më vonë në muajin nëntorë do të bëjmë edhe hapjen e sallës të klubit të mundjes ”Liria” një institucion tjetër që nga radhët e veta nxori kampion botërorë e olimpik , e që padyshim na nderojnë dhe na bëjnë krenarë neve si shqiptarë.’’
theksoi mes tjerash z. Mexhiti.
Ndërkohë që kryetari i Bashkimti Demokratik për Integrim z.Ali Ahmeti tha :
“Pse detyrë e përhershme mbetet përkrahja e ansambleve folklorike, e ansambleve kombëtare. Mbetet sepse ansamblet kombëtare janë pikërisht ai burimi i freskët i kthjellët ku të gjitha gjëndrat e muzikës pa vajtur tek ai pus, pa vajtur tek ai burim nuk mund të krijojnë asgjë.
Qasja e autoriteteve që kanë marrë përgjegjësi nga populli ka qenë dhe mbetet përkrahja e folklorit, përkrahja e sporteve dhe përkrahja e gjitha aktiviteteve të rinisë.. Mbetet sepse ansamblet kombëtare janë mu ai burimi i freskët i kthjellët ku të gjitha gjëndrat e muzikës pa vajtur tek ai pus, pa vajtur tek ai burim nuk mund të krijojnë asgjë “
Ansambli “Ibe Palikuqi” është themeluar në vitin 1979, ky ansambël numëron rreth 120 anëtarë që gjatë këtyre viteve kanë marr pjesë në qindra festivale të vendit dhe ndërkombëtare ku janë shpërblyer me shumë çmime të para

[Lona]

Rexhepi konfirmoi përgjimin e “Vetëvendosjes”

Prishtinë, 02nëntor - Në mënyrë indirekte, ministri i Punëve të Brendshme të Kosovës, Bajram Rexhepi konfirmoi në Kuvendin e Kosovës se janë përgjuar telefonat e lëvizjes Vetëvendosje në ditën e protestës kundër bisedimeve politike me Serbinë.

I pyetur nga deputetja e kësaj lëvizje, Albulena Haxhiu, për nenin 31 të Ligjit për policinë, i cili ndalon këtë të fundit të mbledhë e të ruajë informata për personat që kanë të bëjnë me bindjen politike, fetare e filozofike, ministri Rexhepi tha se njësitet e inteligjencës marrin informata vetëm për ato çështje që ndikojnë në prishjen e rendit publik.

Debati mes deputetes Haxhiu dhe ministrit Rexhepi vazhdoi edhe për faktin se policia e Kosovës në strukturën e saj ka edhe departamentin e inteligjencës.

Pyetja e deputetes së Vetëvendosjes ishte nëse për këtë është e informuar Agjencia Kosovare e Inteligjencës, Presidenca dhe komisioni parlamentar për siguri.

Ministri Rexhepi konfirmoi se ky njësit ekziston brenda departamentit të hetimeve dhe se oficerë të tij nuk duhet të ngatërrohen me Agjencinë Kosovare të Inteligjencës. Sipas tij, qasja më e re e policisë ishte ajo e udhëhequr nga inteligjenca, raporton TCH.

Ministri shtoi se derisa në të kaluarën policia ka qenë vetëm vepruese, tani është vetë pranuese e informatave dhe në këtë mënyrë parandalon situata të padëshirueshme.


Rastit “Jovic” si shkelje e integritetit

Mitrovicë, 02 nëntor - Hetimet që po bëhen për rrëmbimin e Slavoljub Jovicit në veri të Mitrovicës, po e vërtetojnë involvimin e strukturave shtetërore të Serbisë në këtë akt.

Qeveria e Kosovës po pret version zyrtar që ta denoncojë aktin si shkelje të integritetit të vendit, shkruan “Koha Ditore”.

Kidnapimi i Slavoljub Joviqit në veri të Mitrovicës, të mërkurën në mëngjes, dhe paraqitja e tij disa orë pas këtij akti para një Gjykate Ushtarake në Kralevë të Serbisë, ka lënë shumë paqartësi. Dyshimet se ai është kapur në Mitrovicë nga xhandarmëria serbe, apo mekanizma të tjerë të Serbisë, që operojnë në veri të Kosovës, po vërtetohen në bazë të hetimeve të nisura nga Policia e Kosovës dhe nga EULEX-i.

Megjithatë, Qeveria e Kosovës nuk e ka parë të udhës që ta denoncojë rastin si shkelje e rëndë e integritetit territorial të Kosovës, apo edhe vetë Rezolutës 1244 të OKB-së.


Deputetët mungojnë në seancë

Prishtinë, 02 nëntor - Në mungesë të kuorumit seanca e Kuvendit të Kosovës është shtyrë për ditën e hënë. Udhëheqësi i seancës, Xhavit Haliti, ka thënë se 20 minuta janë pritur deputetët që vijnë në seancë dhe nuk kanë ardhur dhe për këtë arsye shtyhet seanca.

“Pritëm 10 minuta akademikë, nuk erdhën deputetët, tash u bënë 20 minuta dhe prapë nuk janë. Në mungesë të kuorumit shtyhet seanca për ditën e hënë ora 11”, ka thënë Haliti.

Pas një seance të gjatë ditën e djeshme, ku ka qenë si rend i ditës informimi i kryeministrit Hashim Thaçi lidhur me takimin e tij me homologun serb Ivica Daçiq, sot deputetët e Kuvendit të Kosovës në shumicë kanë munguar në seancë.

Ndryshe, në rend të ditës kanë qenë këto pika të rendit, si: shqyrtimi i parë i Projektligjit për kontrollin e duhanit, shqyrtimi i parë i Projektligjit për ekzekutimin e sanksioneve penale, shqyrtimi i parë i Projektligjit për sistemin e pagesave, shqyrtimi i parë i Projektligjit për zonat ekonomike dhe shqyrtimi i dytë i Projektligjit për regjistrimin e pengut në regjistër për sendet e luajtshme, shkruan “Kosovapress”.

Ndërkohë, në rend të ditës ka qenë edhe shqyrtimi i Raportit të Komisionit për Shëndetësi, Punë dhe Mirëqenie Sociale për mbikëqyrjen e zbatimit të Ligjit të Punës, shqyrtimi i Rekomandimit të Komisionit ad hoc për përzgjedhjen e tre anëtarëve në Bordin për Ankesa të Mediave dhe formimi i Komisionit Ad-hoc për përzgjedhjen e anëtarëve të Bordit të Radio-Televizionit të Kosovës.

[Lona]

Vrasja e nënës së Elsa Lilës, rigjykim Agos

Tiranë, 2 nëntor - Gjykata Kushtetuese kthen për rigjykim, Albenc Agon, të akuzuar për vrasjen e Eva Vishajt, nënës së këngëtares Elsa Lila, më maj të vitti 1997.

Sipas Kushtetueses, gjatë gjykimit në shkallët me të ulëta të Gjyqësorit, Agos i është shkelur e drejta për një proces të rregullt ligjor. Në zbatim të vendimit të shpallur dje nga Kushtetuesja, Ago do të rigjykohet në Gjykatën e Apelit, Tiranë. Sipas Gjykatës Kushtetuese, vendimi i Apelit, Tiranë që i dha Agos, 20 vjet burg dhe vendimi i Gjykatës së Lartë që e nuk pranoi rekursin e këtij vendimi ishin antikushtetues, shkruan "Balkanweb".

“Gjykata vlerëson se procesi i zhvilluar në Gjykatën e Apelit Tiranë ka cenuar të drejtën e kërkuesit për një proces të rregullt ligjor dhe si i tillë, ky vendim duhet të shfuqizohet”, thuhej në vendimin e Kushtetueses". Në të njëjtën formë, Gjykata shprehej edhe për vendimin e Gjykatës së Lartë.

Në 23 maj, 1997, Eva Vishaj, e ëma e këngëtares Elsa Lila u gjet e pajetë e qëlluar me një plumb në kokë, në aksin rrugor, Tiranë-Elbasan, pranë kilometrit të 29. Pas rihapjes së hetimeve në vitin 2004, Prokuroria akuzoi Albenc Agon për ngjarjen. Më 1 Dhjetor të vitit 2005, Gjykata e Tiranës e shpalli atë fajtor në mungesë dhe e dënoi me 20 vjet burg. Tre vjet më vonë, Ago u ekstradua nga Italia në vendin tonë. Në maj të vitit 2008, Gjykata e Tiranës pranoi rivendosjen në afat. Ndonëse u bë rishqyrtimi i pjesshëm i dosjes, më 17 Dhjetor, 2008, Gjykata e Apelit la në fuqi vendimin me 20 vjet burg ndaj tij. Ago i bëri rekurs këtij vendimi në Gjykatën e Lartë, por Kolegji Penal vendosi mospranimin e rekursit. Pas këtij momenti, Ago iu drejtua Gjykatës Kushtetuese me kërkesë për shfuqizimin e vendimeve gjyqësore të tri shkallëve të gjykimit duke pretenduar se ato janë rrjedhojë e një procesi jo të rregullt gjyqësor.


DASH publikon ç'u tha në takimin Clinton-Berisha

Uashington, 2 nëntor - Departamenti Amerikan i Shtetit ka zbardhur menjëherë takimin e Sekretares amerikane të Shtetit Hillary Clinton me Kryeministrin shqiptar, Sali Berisha.

Në faqen zyrtare të DASH, Kryeministri Berisha shkruhet të jetë shprehur gjatë takimit me zonjën Clinton se “vizita juaj është vizita me historike, sepse përkon me përvjetorin e madh të Pavarësisë së vendit tim, të kombit tim. Në këtë kontekst unë ju siguroj se prania juaj sot është një xhevahir i vërtetë në kurorën e këtij përvjetori të madh”. Krahas të tjerave Berisha citohet të ketë thënë “shqiptarët janë shumë mirënjohës ndaj SHBA-ve, mirënjohës ndaj jush dhe qeverisë suaj. Kjo është një ditë madhështore për shqiptarët”, shkruan "Shekulli".

Nga ana tjetër, Sekretarja Clinton mësohet të jetë shprehur gjatë takimit se “është një nder i madh që unë jam sot këtu në këtë ditë të parë të nëntorit, në fillim të festimeve për 100-Vjetorin e Pavarësisë. SHBA janë krenare për partneritetin dhe miqësinë që kanë me Shqipërinë teksa ju keni vazhduar që të bëni progres për konsolodimin e demokracisë, për të hapur ekonominë dhe për të ofruar shanse për të gjithë njerëzit në vendin tuaj. Clinton më tej uroi Kryeministrin Berisha për 100-Vjetorin e Pavarësisë dhe dëshirojnë që të vazhdojnë bashkëpunimin për 100 vitet e ardhshme”.


Topi: Mesazhet e Klintonit, sinjal i qartë për politikën

Titranë, 2 nëntor - Krue i FRD-së Bamir Topi deklaroi sot se mesazhet e sekretares amerikane të shtetit Hilari Klinton ishin një sinjal për politikën shqiptare që ajo të bashkëpunojë për qëllimet kombëtare.

Ndërsa ka prezantuar strukturat e partisë, Topi theksoi se programi politik i FRD-së do të bëjë që kjo forcë politike të arritje rezultate në zgjedhjet e 2013-ës.

“Unë shfytëzoj këtë rast të shpreh vlerësimin tim më të lartë të vizitës së sekretares amerikane të shtetit Hilari Klinton e cila jo vetëm me vizitën e saj por sidomos me mesazhet mjaft domethënëse i dha një sinjal të qartë poltikës shqiptare që e ardhmja realizohet vetëm me një mirëkuptim dhe bashkëpunim për qëllimet e madhe, aspak për qëllime meskine që jo pak herë i kemi parë të demonstruara nga politika konfliktuale” tha Topi.


Berisha: Rama të bashkëpunojë. Qëllimi i përbashkët, integrimi

Tiranë, 02 Nëntor - Kryeministri Sali Berisha, një ditë pas vizitës së Sekretares amerikane të Shtetit Hillary Clinton në Tiranë, e vlerësoi këtë ngjarje si tepër të rëndësishme, duke theksuar se kryediplomatja amerikane dha mesazhin e fuqishëm të miqësisë mes dy vendeve, njofton "Top Channell".

Duke theksuar se vizita e Clinton hapi edhe siparin e festimeve për 100-vjetorin e Pavarësisë, Berisha kujtoi kontributin e kahershëm të SHBA-ve për Shqipërinë. Po ashtu Berisha kujtoi ndihmën e jashtëzakonshme që SHBA-të kanë dhënë për Shqipërinë pas ndryshimit të sistemit, ashtu sikurse edhe mbështetjen dhënë shqiptarëve të Kosovës për të ndërtuar vendin e tyre të lirë dhe të pavarur.

"Ky 100-vjeçar ka për arritje më madhore të kombit shqiptar, lirinë. Po ashtu arritje eshte edhe aleanca jonë me SHBA-të. Mesazhi i Clinton për kombin shqiptar ishte për mbështetje te fuqishme edhe vitet që vijnë. Kjo bën krenar cdo shqiptar dhe theksoj se në këto 100 vite, kjo miqësi është një nga arritjet më të mëdha dhe më kryesore në historinë e lirisë së shqiptarëve", tha Berisha.

Duke kujtuar fjalimin e Clintonit në Kuvend, Berisha e konsideroi atë si miqësor dhe të veçantë, si edhe më të bukurin që shqiptarët kanë dëgjuar ndonjëherë në këto 100 vjet.

"Mesazhi i Clinton për shqiptarët në 100-vjetorin e pavarësisë ishte një thirrje frymëzuese që të bashkohen për interesat kombëtare të tyre. Sekretarja e Shtetit theksoi rëndësinë që kanë zgjedhjet e ardhshme. Unë e garantova se zgjedhjet e ardhshme do të jenë të lira, të ndershme dhe brenda standardeve më të mira dhe shpreha bindjen se opozita është e interesuar për zgjedhje të lira dhe të ndershme. Po ashtu kërkova të kemi sa më shumë vëzhgues nga SHBA-të në zgjedhjet e ardhshme", tha Berisha.

Sipas tij, Clinton solli mesazhin e një pune të përbashkët për projektin e integrimit në BE, duke premtuar se Qeveria do të bëjë gjithcka duhet për ta çuar përpara këtë proces që i bën qytetarët shqiptarë më të lirë dhe më të sigurtë.

"Theksoj se janë tre ligje që presin në Parlament. Vetë fakti që nuk po votohen këto ligje që po kërkohen nga KE është i mjaftueshëm për të vënë në dyshim seriozitetin e shqiptarëve në procesin e integrimit. Ne kërkojmë të votohen këto tre ligje demokratike. Unë e ftoj Ramën, te veproje në frymën e mesazhit për bashkëpunim në gjërat që na bashkojnë, siç është integrimi. Qershori është muaji në të cilin do të votohen dallimet. Me të përbashkëtat fitojnë të gjithë, fitojnë qytetarët", tha Berisha.

[Lona]

Çejku: Koalicion mbarëshqiptar për festimet e 100-vjetorit

Shkup, 2 nëntor - Ambasada e Republikës së Shqipërisë në Shkup ka vendosur me të hyrë në muajin nëntor një flamur shqiptar në pjesën frontale të objektit të saj.
Ambasadori shqiptar, Arben Çejku, ka shpallur me këtë rast fillimin e kapitullit të ri të festimeve për 100-vjetorin e Pavarësisë dhe të Flamurit Shqiptar.
Ngjitja e flamurit në pjesën e përparme të fasadës së objektit të Ambasadës shqiptare, siç ka njoftuar ambasadori Çejku, është vetëm një nga aktivitetet që do të vijnë e shpeshtohen në këtë muaj të festimeve, në koordinim me Këshillin Organizativ dhe me institucionet e tjera të pushtetit lokal dhe të sektorit civil.
Diplomati shqiptar, i pyetur lidhur me zërat për një koalicion ndër-shqiptar në zgjedhjet e ardhshme lokale, ka theksuar se Tirana zyrtare mbështet dialogun mes partive politike shqiptare, porse tani vijon një koalicioni panshqiptar i festimeve të 100-vjetorit.
“Kemi një koalicion mbarëshqiptarë në nderim të Flamurit dhe nderim të datës së Pavarësisë. Kjo ka krijuar sigurisht një dimension tjetër edhe për një dialog ndër-politik dhe ne mbështesim vazhdimësi të gjitha përpjekjet që bëhen për promovimin e vlerave të demokracisë, si dhe për mbrojtjen e statusit të shqiptarëve në Republikën e Maqedonisë për avancimin e të drejtave të tyre në rrugë institucionale dhe kjo nuk përjashton asnjëlloj koordinimi dhe bashkëpunimi. Përkundrazi, ne mbështesim çdolloj bashkëpunimi që është i mundshëm ndërmjet partive politike”, ka deklaruar Çejku.

[Lona]

Dënohet me 17 vjet burg amerikani që planifikonte akte terroriste

Uashington, 02 nëntor - Një djalë amerikan është dënuar me 17 vjet burgim, pasi u deklarua fajtor për një plan terrorist për të fluturuar aeroplanë të kontrolluar, të pajisur me eksplozivë, në Departamentin Amerikan të Shtetit në Washington.

Dënimi kundër Rezwan Ferdaus, 27 vjeçar, u dha dje në qytetin e Bostonit.

Ferdaus u patë deklaruar se është fajtor në muajin korrik, pasi kishte provuar që të siguronte material përkrahës për terroristët dhe pasi kishte provuar që t’i dëmtonte dhe shkatërronte ndërtesat federale me një eksploziv.

Ferdaus ishte arrestuar vitin e kaluar nga agjentë të FBI-së.


Rusia njofton se ka pranuar 5000 ankesa për pornografi të fëmijëve

Moskë, 02 nëntor - Rusia thotë se ka pranuar 5000 raporte për pornografi të fëmijëve në internet gjatë 24 orëve të para të hyrjes në fuqi të ligjit të ri që bllokon faqet e internetit që kanë përmbajtje jo të përshtatshme.

Zyrtarët në shërbimin mbikqyrës për komunikim dhe mas media thanë sot se ata janë habitur nga numri i madh i ankesave.

Një zëdhënës tha se prej 10 ofruesve të shërbimeve të internetit është kërkuar që t’i kontaktojnë pronarët e faqeve respektive të interentit, si dhe t’i largojnë përmbajtjet brenda 48 orëve.

Qeveria ruse thotë se ligji ka për qëllim të mbrojë fëmijët nga pornografia dhe ueb-faqet që promovojnë keqpërdorimin e drogave apo vetëvrasje.


Agjenti që ka siguruar Obamën raportohet se ka bërë vetëvrasje

Uashington, 02 nëntor - Nga Washingtoni raportohet se një agjent i shërbimit sekret, i cili e ka mbrojtur presidentin e SHBA-ve, Barack Obama, ka ndërruar jetë pas asaj që duket si vetëvrasje.

Agjencitë e lajmeve Reuters dhe Associated Press citojnë burimet e tyre të kenë thënë se agjenti Rafael Prieto ishte nën hetime se nuk e kishte lajmëruar lidhjen e tij me një qytetare të huaj.

Rregullat e Shërbimit Sekret kërkojnë nga të punësuarit që ta lajmërojnë agjencinë për çfarëdo lidhje me qytetarë të huaj, për tu siguruar se nuk ka asnjë rrezik për sigurinë kombëtare.

Shërbimi Sekret përmes një deklarate tha se “Pietro ka pasur një karrierë të shquar për 20 vjet me Shërbimin Sekret, që është shënuar me dedikim, arritje dhe shoqëri”, dhe se agjenisë i vjen shumë keq për këtë humbje.

Shërbimi Sekret mbronë jetën e presidentit dhe të familjes së tij dhe gjithashtu heton falsifikimin e monedhave dhe krimeve të tjera financiare.



Abbas thotë se nuk ka të drejtë të kthehet në vendlindje

Safed, 02 nëntor - Presidenti i Autoritetit Palestinez, Mahmud Abbas tha se ai nuk ka të drejtë që të kthehet e të jetojnë në vendlindjen e tij të fëmijërisë, që tani është në Izrael.

Duke folur gjatë një interviste për televizionin izraelit, Abbas tha se ai ka të drejtë ta “shohë” qytetin Safed, por jo të jetojë atje.

Ai i kaloi ditët e rinisë së hershme në Safed, në pjesën që tani është në veri të Izraelit, por ai dhe familja e tij e lëshuan vendin gjatë luftës së vitit 1984, për të mos u kthyer më kurrë atje.

Kërkesa e miliona palestinezëve për tu kthyer në tokat që tani janë pjesë e Izraelit ka qenë një bllokadë dhe pengesë e vazhdueshme në bisedimet paqësore në Lindjen e Mesme.

Izraeli e përjashton çdo mundësi të kthimit të tyre.

[Lona]

Lustrohet ish-kryetari i komunës së Strugës

Shkup, 5 nëntor - Komisioni për verifikimin e fakteve në seancën e sotme lustroi ish-kryetarin e komunës së Strugës, i cili, sipas tyre, në periudhën prej vitit 1977 deri në vitin 1987 ka qenë bashkëpunëtor i shërbimeve sekrete.

Bashkëpunimi i lustruar ka pasur pseudonimin "Vihor" dhe sipas dokumenteve të kapshme ai ka bashkëpunuar me shërbimet sekrete nga shkaqet ideologjike-politike dhe ka dhënë informacione për elemente liberale dhe antivetëqeverisëse.

Bëhet fjalë për inxhinier të diplomuar në Ohër, i cili ka punuar në hidrocentrale në pjesën perëndimore të Maqedonisë, e pastaj është bërë edhe kryetar i Kuvendit të komunës së Strugës, funksion i cili është i barabartë me aktualin, kryetar i komunës. "Vihor" është lustruar si ish-funksionar.

Ahmeti takoi mërgimtarët në Bazel të Zvicrës

Kryetari i BDI-së z.Ali Ahmeti

Shkup, 5 nëntor - Unifikimi i votës shqiptare për zgjedhjet e ardhshme lokale është më i domosdoshëm se kur më parë, sidomos në komunat ku shqiptarët nuk kalojën 60 për qindëshin, siç është Struga dhe Kërçova. Kjo ishte edhe njëra nga arsyet që një delegacion i lartë i BDI-së aktivitetet parazgjedhore këtyre ditëve po i zhvillon me mërgimtarët në diasporë për t'i mobilizuar për të votuar në zgjedhjet lokale të marsit.

Me këtë rast lideri i BDI-së, Ali Ahmeti, u shpreh se zgjedhjet duhet shndërruar në festë, dhe le të fitojë ai për të cili populli vlerëson se është më i miri.

"Në Shkup më 25 nëntor është tubimi qendror për 28 nëntorin, aty do të jenë të gjithë të pranishëm, liderët shqiptarë. Tash nuk di a do i japin dorën Edi Rama-Sali Berishës, nuk e di, por unë Menduh Thaçit i shtrij dorën më 28 nëntor, Rufi Osmanit e gjithve. Unë i fal të gjitha vetëm të ecim përpara dhe të vendosim standarde, le të fitojë më i miri, populli nuk gabon", tha Ahmeti.

Ndërkaq, sekretari i përgjithshëm i BDI-së, Abdilaqim Ademi apelon që në komunat ku shqiptarët nuk arrijnë të kalojnë 60 për qindëshin duhet të unifikohemi si subjekte politike në radhë të parë dhe të unifikojmë votën si shqiptarë në përgjithësi, sepse komunat ku nuk e kalojmë 60 për qindëshin si votues dhe si komunitet shqiptarë, rrezikohemi që atë komunë të mos e menaxhojnë shqiptarët në të ardhmen.

Nënkryetari i BDI-së Izet Mexhiti porositi që edhe njëherë të unifikohemi, edhe njëherë t'i bashkojmë forcat që më 2013 të konkretizojmë fitoren e radhës të shqiptarëve në Maqedoni, fitoren e Kërçovës, ku për herë të parë me të drejtë do të respektohet realiteti i Kërçovës dhe aty do të ketë një kryetar shqiptar.

Përfaqësuesit e BDI-së në takimet me mërgimtarët kanë diskutuar edhe çështjen e ish pjesëtarëve të forcave të sigurisë, duke i siguruar ata se miratimi i ligjit do të pamundësohet me 15 mijë amendamentet e paraqitura. Me takimin me mërgimtarët në qytetin e Bazellit, BDI-ja përmbylli aktivitetet e saja në Zvicër, për të vazhduar me tej në Gjermani, Austri dhe Itali. (MIA)

Avokati Ignat Pançevski "Boris Trajkovski u likuidua"

Shkup, 5 nëntor - Avokati dhe përfaqësuesi maqedonas i familjes së ish presidentit, Boris Trajkovski, Ignat Pançevski ka paraqitur pohimin shokues se aeroplani në të cilin vdiq në vitin 2004 presidenti i atëhershëm maqedonas, është rrezuar me projektil nga aeroplani tjetër.

Pançveski thekson se posedon video xhirim satelitor në të cilin shihet se si një avion ushtarak sulmon me raketë avionin e presidentit Trajkovski dhe se si më pas rrëzohet avioni.

"Në Maqedoni janë dorëzuar video materiale se si një avion ushtarak me shenja të një shteti të njohur, me raketë qëllon Kingerin, si është qëlluar krahu i Kingerit, njëkohësisht, si Kingeri bie në tokë, si shpërndahen pjesët gjatë rënies, si kanë ardhur disa makina ushtarake.Në Maqedoni gjenden të gjithë dëshmitë, por nuk ekziston gatishmëri nga organet kompetente që të arrihet përfundimi”, tha Ignat Pançevski.


MPJ-ja greke, sot e mori përgjigjen nga Maqedonia

Athinë, 5 nëntor - Ministria greke e Punëve të Jashtme sot e mori përgjigjen nga Maqedonia për propozim rreth nënshkrimit të Memorandumit për mirëkuptim mes dy vendeve, i cili është dërguar më 3 tetor, kumtoi MPJ-ja greke.

Qeveria greke do ta studiojë përgjigjen e pastaj do të pasojë kumtesë përkatëse, thuhet në publikimin e MPJ-së greke.

Ambasadori Sashko Stefkov, sot në takimin me zëvendësministrin e Punëve të Jashtme të Republikës së Greqisë, Dimitris Kurkulas e dorëzoi letrën nga ministri i Punëve të Jashtme të Republikës së Maqedonisë, Nikolla Poposki, dërguar ministrit të Punëve të Jashtme të Republikës së Greqisë, Dimiitris Avramopulos.

[Lona]

Zgjedhjet në pranverën e vitit 2014

Prishtinë, 06 nëntor - Zgjedhjet e ardhshme parlamentare dhe lokale në Kosovë do të mbahen në pranverën e vitit 2014, kështu janë marrë vesh PDK, LDK dhe AAK.

Sipas Klan Kosovës për këtë janë pajtuar kryetari i Partisë Demokratike të Kosovës, Hashim Thaçi, kryetari i Lidhjes Demokratike të Kosovës, Isa Mustafa dhe nënkryetari i parë i Aleancës për Ardhmërinë e Kosovës, Blerim Shala.

Sipas të njëjtave burime, zgjedhjet lokale të parapara për fundvitin e ardhshëm janë shtyrë për 6 muaj 2014.

Të tre liderët janë pajtuar që presidentja Atifete Jahjaga të qëndrojë në pushtet deri në vitin 2014. Gjithashtu mësohet që është bërë marrëveshja që pasardhësi i Jahjagës të zgjidhet në Kuvend dhe jo me vota të drejtpërdrejta.


Thaçi-Daçiç, të mërkurën takimi i dytë

Prishtinë, 5 nëntor - Pas dy ditësh kryeministrat e Kosovës dhe të Serbisë pritet të takohen sërish në Bruksel. Sipas një komunikate për shtyp të lëshuar nga zyra e Përfaqësueses së Lartë për Politikë të Jashtme dhe Siguri të Bashkimit Europian, Catherine Ashton, qëllimi i këtij takimi është vijimi i dialogut për atë që Brukseli e quan “normalizim” i marrëdhënieve mes dy palëve.

“Përfaqësuesja e Lartë Catherine Ashton ka ftuar Kryeministrin Daçiç dhe Kryeministrin Thaçi në një takim në Bruksel, të mërkurën, më 7 nëntor”, thuhet ndër të tjera në këtë komunikatë.

I ndërmjetësuar nga Brukseli, dialogu i nivelit më të lartë politik nisi me takimin e parë Daçiç-Thaçi, më 19 tetor në Bruksel. Ky takim u cilësua si mjaft konstruktiv nga baronesha Ashton, ndërsa u përshëndet nga presidentja e Kosovës, Jahjaga, Ministria e Jashtme e Shqipërisë dhe faktori ndërkombëtar.


Institucionet nuk dinë shqip

Prishtinë, 05 nëntor - Shumë mbishkrime që vihen nëpër institucione shtetërore, objekte të ndryshme apo emërtime të rrugëve janë të shkruara me gabime të mëdha gjuhësore, nganjëherë janë të pasakta nga përmbajtja, nuk janë të futura në thonjëza, madje disa janë të përziera gjysma në anglisht e gjysma në gjuhën shqipe. Kjo po i ndodh edhe Ministrisë së Kulturës, e cila më se shumti është e thirrur në ketë.

Duke folur për këto probleme, profesori i gjuhësisë, Isa Bajçinca, ka thënë për KosovaPress se disa mbishkrime varen nganjëherë edhe nga vet emërtimi se si janë pagëzuar në ligj nga Kuvendi i Kosovës. Mirëpo për ato mbishkrime të cilat shkruhen nga punonjësit e institucioneve, ai ka thënë se është një imazh shumë i keq për ta, sepse tregon shkallën e kulturës së tyre.

“Është e vërtetë që shumë nga emërtimet në Kosovë nuk janë as gjuhësisht, e nganjëherë as nga përmbajtja nuk janë të sakta. Kjo sidomos kur kemi të bëjmë me përdorimin e nyjave”, ka thënë Bajçinca.

Duke folur për mbishkrimin, i cili është i vendosur para objektit të Muzeut të Kosovës, ai ka thënë se është i shkruar gabim dhe se nuk ka nevojë të shkruhet aq gjatë, sepse këtë mënyrë të mbishkrimeve e gjejmë në gjuhën angleze, pasi që ata kanë probleme me këto çështje dhe për këtë arsye i kanë emërtimet shumë të gjata. Ai ka bërë të ditur se në gjuhën shqipe për një gjë që mbrohet nga dikush duhet të thuhet mbrohet e jo është nën mbrojtje ose është i mbrojtur.

Ai ka theksuar se Institucioni Forcat e Sigurisë së Kosovës është emërtuar gabim me ligj, sepse në gjuhën shqipe do të duhej të quhej Forca e Sigurisë e Kosovës.

Bajçinca ka shtuar se kuvendi duhet të formojë një komision, i cili do të merret me problemet e emërtimeve dhe me formimin e shkrimeve, në mënyrë që njerëzit kur të lexojnë diçka që është e shpallur publikisht ta lexojnë pa gabime. Sipas tij, një tjetër e metë e emërtimeve të institucioneve shkollore dhe të emërtimeve të rrugëve në Kosovë është se ato nuk futen në thonjëza. Ai thotë se mbishkrimet me gabime gjuhësore u japin një imazh të keq në radhë të parë punonjësve të këtyre institucioneve, të cilët merren me këtë punë sepse tregojnë shkallën e kulturës së tyre.

Kurse, Shkëlzen Dragaj, këshilltar në Ministrinë e Kulturës, ka thënë se për shkuarjen e pllakatave nëpër institucionet kulturore, përgjegjës janë institucionet përkatëse, në këtë rast institucionet rajonale të trashëgimisë kulturore. Megjithatë, ai nuk sqaron se kush është përgjegjës nëse këto institucione, që janë të varura edhe nga Ministria e Kulturës shkruajnë gabimisht.


Pavarësia e Kosovës e ka përlotur Dacicin

Prishtin5, 05 nëntor - Më 17 shkurt 2008 kur Kosova e shpalli Pavarësinë, ka qenë një ditë e rëndë për kryeministrin aktual të Serbisë, Ivica Dacic, i cili ka thënë se ka qarë atë ditë.

“Hymë në kolonë, ata shkonin për Prishtinë, e unë për Graçanicë. Bori të makinave, flamuj që valëviteshin, e ndërsa ne ngisnim makinën, shoferi nxori dorën nga makina dhe u tregoi tre gishtërinj”.

“Ka qenë një atmosferë jo-elektrizuese, kishte emocione si nga ana ynë, ashtu edhe nga ana e tyre. Kam qarë. Ishte atmosferë shumë e rëndë”, ka treguar Dacic, ndërsa transmeton Zëri.

[Lona]

Malmstrom: Ndalni azilkërkuesit

Tiranë, 5 nëntor - Komisionerja për Sigurinë në Bashkimin Europian, Cecilia Malmstrom ka vënë në dijeni qeveritë e vendeve të Ballkanit perëndimor, se korrupsioni është në rritje, duke lejuar grupet kriminale të infiltrohen në sektorin publik. Malmstrom kërkoi të sekuestrohen më shumë asete kriminale.

Gjatë fjalës hapëse në sesionin e parë të ministeralit të ministrave të Brendshëm dhe të Drejtësisë që zhvillohet në Tiranë, Malmstrom bëri thirrje që të ndalet shkelja e rregullave të liberalizimit të vizave pasi numri i azilkërkuesve është i lartë.

“Agjencitë e zbatimit të ligjit duhen forcuar. Kapacitet e tyre duhen forcuar për një luftë më efikase kundër krimit të organizuar, korrupsionit dhe krimit transanacional, duke përfshirë këtu edhe hetimet financiare. Përpjekje duhen bërë për konfiskimin e aseteve kriminale.

Korrupsioni është mjaft i përhapur dhe mbetet shqetësues. Ai pengon hetimin dhe luftën ndaj krimit të organizuar dhe lejon infiltrimin e grupeve kriminale në sektorin publik dhe privat. Të ketë dënime më të ashpra kundër krimit të organizuar dhe korrupsionit”, deklaroi Malmstrom, transmeton Top Channel.

Ndërkohë që kreu i qeverisë shqiptare, Sali Berisha ka premtuar në këtë ministerial se Shqipëria do të bëjë një luftë më të ashpër për të penalizuar azilkërkuesit, pavarësisht se Shqipëria ka një numër më të vogël të tyre se Maqedonia apo Serbia.

“Shfrytëzoj rastin t’i përcjell Komisionit Evropian vendosmërinë tonë për të ndërmarrë çdo hap dhe për t’i dhënë përgjigjen më të vendosur këtij fenomeni. Ne jemi të gatshëm të firmosim çdo marrëveshje për rikthimin në vend të personave që abuzojnë me këtë vendim shumë të rëndësishëm dhe fisnik. Mbi bazën e këtij qëndrimi, ne kemi rikthyer nga Mbretëria e Belgjikës, dy herë, grupe shqiptarësh që kishin aplikuar në mënyrë të pamerituar për azil politik. Po përgatitemi ta bëjmë këtë gjë me Dukatin e Luksenburgut dhe jemi të gatshëm ta bëjmë këtë me secilin vend anëtar të zonës Shengen”, deklaroi Berisha.

Në ministerial marrin pjesë shtetet e Serbisë, Maqedonisë, Malit të Zi, Bosnjes dhe Shqipërisë, ku diskutohet në lidhje me reagimin e BE-së për të ndaluar për një afat të pacaktuar ballkanasit perëndimorë për të hyrë pa viza në zonën Schengen.


“Do jemi në Vlorë më 28 Nëntor, por jo për konkurrencë qeverisë”

Tiranë, 5 nëntor - Deputeti i Partisë Socialiste, Pandeli Majko, shprehet se qytetarët duhet të jenë në Vlorë në 28 Nëntor, jo për t’i bërë konkurrencë qeverisë, por për vetë faktet historike të kohës. Në një intervistë për “Top Channel”, ai reagon lidhur me kalendarin zyrtar të festimeve që ka publikuar Ministria e Kulturës lidhur me datat 27 dhe 28 Nëntor.

“Në datën 28 ne do të jemi aty ku kanë qenë gjithmonë paraardhësit tanë. Nuk bëhet fjalë për një kërkesë të strukturave të Partisë Socialiste, për konkurrencë me protokollin e qeverisë. Të gjithë e dinë kush është qyteti i Flamurit”, shprehet Majko. Sipas tij, debati është absurd, por aspak i lehtë për këdo. Ish-kryeministri thekson se në këtë përvjetor duket qartë se jo vetëm është shmangur Vlora, por po tregohet edhe një mangësi e madhe, mosrespektimi i protokollit të shtetit, shkruan "Panorama".

Ai thekson gjithashtu se me rastin e 100-vjetorit, Kryeministri Sali Berisha kërkon sërish të krijojë dy palë përballë njëra-tjetrës dhe më pas të bëhet zot i njërës palë. “Kjo shkelje bëhet edhe më e rëndë në kuadër të këtij përvjetori të madh të 100-vjetorit shqiptar. Do ishte naivitet të mendoje se Sali Berisha është zogist apo që është më pro Tiranës sesa Vlorës.

Ai është një politikan që përpiqet të krijojë dy palë dhe më pas bëhet zot i njërës palë. Deri më sot këtë gjë e ka bërë me shumë sukses”, tha më tej deputeti i Partisë Socialiste. Ai theksoi gjithashtu se shkelja e protokollit nga Partia Demokratike në qeverisje në këtë 100-vjetor të Pavarësisë është vetëm ripërsëritje e të njëjtës histori në këto 7 vite me festën e Çlirimit.

“Nuk mund të ekzistojnë konkurrenca të tilla kaq idiote mes shqiptarësh që nxiten nga politikanë që mendojnë vetëm për zgjedhjet e ardhshme. Mendoj se ky komb meriton ta dojë vendin e tij më shumë sesa politikanët”, thekson Majko.


Berisha fton Ramën për ligjet

Tiranë, 06 nëntor - Kryeministri Sali Berisha, duke i bërë thirrje liderit të opozitës Edi Rama që të votojë tre ligjet e mbetura në Parlament, theksoi se PD është gati të pranojë amendimet dhe sugjerimet për to në përputhje me Kushtetutën.

Në fjalën e tij para deputetëve demokratë, Berisha kujtoi se çdo orë që kalon me mosvotimin e këtyre ligjeve, çon sinjale negative te çdo shqiptar.

"Me votimin e tyre fitojnë të gjitha forcat politike që bëjnë të mundur miratimin e këtyre ligjeve, por mbi të gjitha fitojnë qytetarët", tha Berisha.

Kryeministri theksoi se shqiptarët nuk do të shpërblejnë kurrë bllokimin, ndaj kërkoi kalimin e tre ligjeve që kërkojnë shumicë të cilësuar në Kuvend.

Në fillim të fjalës së tij, Berisha u shpreh se në buxhetin e vitit të ardhshëm, përparësi do të kenë rrogat e ulëta, ndërsa theksoi se rritja e rrogave dhe pensioneve do të vijojë.

Ekonomia shqiptare, sipas Berishës, edhe pse e vogël, ishte dinamike dhe i mbijetoi krizës.

"Ka patur angazhim më të madh te femrave në drejtim të bizneseve", tha Berisha.


Rikthehet në Shqipëri kontigjenti OMLT 2 "Striking Eagles”

Tiranë, 5 nëntor - Kontigjenti OMLT-2 "Striking Eagles", i cili përfundoi misionin e tij në kuadrin e operacionit ISAF të NATO-s në Afganistan, u rikthye në Shqipëri.

Gjatë një ceremonie të organizuar të hënën në Ministrinë e Mbrojtjes, ministri Arben Imami theksoi se "ju kryet një mision aq fisnik në Kabul, monitorimin dhe trajnimin e batalionit afgan në Kabul, duke treguar ato cilësi që forcat tona të armatosura po përpiqen, po arrijnë dhe realizojnë me sukses", shkraun "Panorama".

"Ju ishit ekipi i dytë i këtij lloji, që përfaqësuat seriozisht FA në misionin e vështirë, duke arritur objektivat dhe detyrat e shumta që ishin përcaktuar, por edhe që ju caktoheshin rast pas rasti nga komanda rajonale qendrore e operacionit ISAF, që dhanë rezultate të efektshme në funksionimin e përditshëm në marrëdhëniet me kolegët, eprorët dhe partnerët e batalionit afgan në kryerjen e detyrave luftarake", tha Imami.

Duke shprehur konsideratën e veçantë për kryerjen e përfundimit me sukses të misionit, ministri Imami falënderoi Gardën Kombëtare të Nju Xhersit dhe zyrën e bashkëpunimit ushtrarak me SHBA, në Ministrinë e Mbrojtjes, për ndihmën e tyre të veçantë për përgatitjen e këtij ekipi dhe kryerjen me sukses të misionit.

"Ky mision ka shërbyer si një eksperiencë e mirë për vazhdimin e ekipit të tretë që është nisur. Përvojat e fituara dhe mësimet e nxjerra nga ekipi juaj do të shërbejnë për përgatitjen e mëtejshme dhe konsolidimin e punës së FA në përgatitjen e kontigjenteve dhe ekipeve të radhës", theksoi Imami.
Ministri Imami, duke u uruar suksese në detyrat dhe karrierat e tyre, i garantoi ushtarakët për mbështetjen e qeverisë dhe Ministrisë së Mbrojtjes.

[Lona]

6 nëntor - Amerika voton

Uashington, 6 nëntori është dita e zgjedhjeve në Shtetet e Bashkuara - kulmi i një fushatë që ka zgjatur më shumë se një vit, dhe populli amerikan sot vendos se kush do të shërbejë si president dhe nënpresident i ardhshëm i vendit.

Votimi është një nga të drejtat dhe detyrat më të rëndësishme të qytetarit. Kushtetuta amerikane u rezervon 50 qeverive shtetërore autoritetin për të përcaktuar kualifikimet e votuesve dhe mënyrat e votimit në shtetin e tyre. Kur u miratua Kushtetuta dy shekuj më parë, votimi ishte i kufizuar mes burrave të bardhë dhe në shumë shtete njerëzve u kërkohej të kishin një pronë me vlerë të caktuar për të patur të drejtë për të votuar.

Por ndërsa amerikanët gjithnjë e më shumë filluan të kërkonin të drejtën e votës, qeveritë shtetërore i ndryshuan këto dispozita. Kushtetuta u përditësua në vitin 1870 për të mbrojtur të drejtat e skllevërve të sapo çliruara, duke përfshirë edhe të drejtën e tyre për të votuar. Shtojca e 15 e Kushtetutës thekson se e drejta për të votuar nuk duhet të mohohet për shkak të racës apo ngjyrës së lëkurës.

Në vitin 1920, qeveritë shtetërore ratifikuan Amendamentin apo shtojcën e 19-të për garantimin e votës për gratë. Sepse disa shtete përdornin padrejtësisht listat e taksave, provimet e alfabetizmit dhe kufizime të tjera për të përjashtuar nga votimet pakicat. Kongresi amerikan miratoi Aktin e të drejtës së votës në vitin 1965. Ky akt fuqizoi zyrtarët federalë për të marrë përsipër regjistrimin e votuesve në disa juridiksione ku zyrtarët vendorë kishin diskriminuar votuesit e pakicave.

E drejta e votës u zgjerua më tej në vitet 1970. Mosha ligjore për të votuar në shumicën e shteteve ka qenë 21 vjeç. Amendamenti i 26-të vendosi që mosha ligjore për të votuar në të gjithë vendin të jetë 18 vjeç.

Sot shumica e amerikanëve të cilët mund të votojnë, e të bëjnë këtë. Për shumë njerëz, votimi është një akt i rëndësishëm e gjithashtu i thjeshtë i detyrës qytetare, që merret si e dhënë, por kryhet me krenari dhe seriozitetin e qëllimit. Edhe pse tani të njohura për amerikanët, zgjedhjet demokratike sot ende mungojnë në shumë pjesë të botës.

Demokracitë si kjo e Amerikës, janë themeluar në besimin se njerëzit kanë të drejtë dhe urtësi të vendosin se kush do t'i qeverisë ata. Siç e kanë treguar zgjedhjet e kaluara, pasi vendimi është marrë, amerikanët e respektojnë atë. Zgjedhjeve e vitit 2012 pritet të jenë me rezultat nga më të ngushtët deri më sot, dhe me sfida e probleme të mundshme si ato në votimet e vitit 2000, mund të duhen ditë para se të dalë se kush ka fituar. Por siç ka thënë presidenti Abraham Linkoln, nuk mund të ketë ankesa të suksesshme ndaj një zgjedhjeje të drejtë, përveçse në zgjedhjet e ardhshme.


Kriza dhe përpjekjet për pavarësi në Katalonia

Kriza më e rëndë ekonomike që prej një brezi në Spanjë ka ringjallur interesin tek pavarësia mes banorëve të zonës së pasur verilindore të Katalonias. Zgjedhjet lokale të 25 nëntorit pritet të përforcojnë pozicionin pro-pavarësi të partisë në pushtet dhe mund të çojnë në një referendum për këtë çështje. Korrespondenti i Zërit të Amerikës Al Pessin njofton nga kryeqyteti rajonal, Barcelona:

Buzë brigjeve të Mesdheut, Barcelona është një qytet i bukur dhe i begatë. Por anketat tregojnë se banorët e saj janë gjithnjë e më të pakënaqur që taksat që ata të paguajnë të shërbejnë për të mbështetur pjesë më të varfra të Spanjës dhe mjaft të pyesësh disa njerëz në rrugë dhe këto përfundime vërtetohen.

“Unë e mbështes pavarësinë sepse mendoj se Katalonia do të kishte më shumë para nëse nuk do t’i duhej të dërgonte aq shumë në Spanjë”.

“Po e mbështes pavarësinë e Katalonias për shumë arsye. Arsyeja kryesore është mungesa e njohjes së realitetit katalan për shumë vite”.

“Katalonia i paguan një sasi të madhe taksash kur në të vërtetë këto para duhet të mbeten këtu dhe mund të përdoret për të përmirësuar jetën e Katalonias”.

Kjo ndjesi është e dukshme edhe në shumë ballkone të Barcelonës. Flamuri rajonal është i kuq me vija të verdha, por po të shtosh një trekëndësh dhe një yll bëhet një parullë për pavarësinë. Gjithnjë e më shumë flamurë të tillë po shfaqen në gjithë qytetin, disa herë pranë atij rajonal.

Megjithatë ka shqetësime se shkëputja nga Spanja do të shkaktonte një konflikt të gjatë dhe të hidhur dhe Spanja do të bllokonte dëshirën e Katalonias për të hyrë në Bashkimin Evropian.

Kjo lëvizje vjen në një kohë kur rajone të tjera të Evropës po kërkojnë gjithashtu pavarësinë. Krenaria rajonale dhe kultura janë një faktor i rëndësishëm i lëvizjeve të pavarësisë.

Por profesori i ekonomisë Juan Carlos Conesa në Universitetin Autonom të Barcelonës thotë se ana praktike duhet të luajë një rol më të madh në debat.

“Pikëpamja ime është se do të jetë një situatë humbëse për të dyja palët. Një proces i tillë mbart pasiguri të madhe. Dhe në mes të një krize ekonomike, më shumë pasiguri nuk është një rrugë e mirë për të dalë nga kriza”.

Por pranë zyrës së tij, disa nga studentët e tij nuk janë të një mendjeje.

“Në të ardhmen e afërt mund të shkaktojë disa probleme. Por ndoshta shkëputja do të ndihmonte edhe katalanasit, edhe spanjollët”.

“Elita politike në Madrid por përpiqet të konsolidojë një shtet qendror dhe në thelb ata përdorin paratë nga rajonet e pasura si Katalonia”.

“Në një shoqëri më pluraliste në Spanjë ne mund ta gjenim vendin tonë pa probleme. Por jo ashtu siç është situata tani”.

Profesor Conesa u thotë atyre se askush nuk e di se cilat do të ishin pasojat e një lëvizjeje serioze ndaj pavarësisë katalanase. Ai beson se e vetmja gjë e sigurt është pasiguria ndoshta dëmtuese që do të shkaktonte një lëvizje e tillë. (VOA)


Nju Jorku në krizë të strehimit të banorëve

Nju Jork, 05 nëntor - Guvernatori i shtetit të Nju Jorkut, Andrew Cuomo, ka thënë se mijëra njerëz që nuk kanë energji elektrike, si pasojë e uraganit Sandy, duhet të strehohen përkohësisht në vendbanime të tjera, për shkak të temperaturave të ulëta.

Majori i Nju Jorkut, Michael Bloomberg, ka thënë se rreth 40,000 njerëz vetëm të këtij qyteti do të duhet të strehohen përkohësisht.

Bloomberg ka thënë se i ftohti është “sfida më e ngutshme” si pasojë e stuhisë.

Të paktën 111 njerëz kanë humbur jetën nga Sandy në Shtetet e Bashkuara, përfshirë 41 në qytetin e Nju Jorkut.

Dhjetëra mijëra njerëz mbeten pa shtëpi ose vazhdojnë të jetojnë pa energji elektrike.

Sandy ka goditur bregun lindor të Shteteve të Bashkuara javën e kaluar.


Afganistani kritikon ICG-në për raportin e fundit

Kabul, 05 nëntor - Qeveria e Afganistanit është duke konsideruar ndërmarrjen e veprimeve kundër Grupit Ndërkombëtar të Krizave (ICG), me bazë në Evropë.

Aimal Faizi, një zëdhënës i presidentit, Hamid Karzaim tha sot veprimet e ICG-së në Afganistan kanë qenë të motivuara politikisht dhe se vlerësimet e tyre për situatën në vend nuk janë të besueshme.

Grupi Ndërkombëtar i Krizave muajin e kaluar lëshoi një raport kritik ndaj Karzait, duke thënë se kryeministri afgan është më i interesuar në mbajtjen e fuqive të tij personale sesa në krijimin e një stabiliteti afatgjatë në vend. Raporti gjithashtu thotë se shteti afgan mund të bie në kolaps dhe se një luftë civile mund të pasojë pas tërheqjes së trupave të NATO-s në vitin 2014.

Andrew Stroehlein nga ICG i tha Radios Evropa e Lirë se grupi nuk ka marrë asnjë fjalë direkte lidhur me këtë çështje nga autoritetet afgane.


Siri, sulm kamikaz, 50 të vdekur

Damask, 5 nëntor - Një grup i aktivistëve sirianë thotë se një veturë vetëvrasëse me bombë ka lënë sot të vrarë të paktën 50 ushtarë të qeverisë siriane dhe luftëtarë besnikë të presidentit Bashar al-Assad, në provincën qendrore të Hamas.

Rami Abdul Rahman, udhëheqës i Observatorit Sirian për të Drejta të Njeriut, tha se një luftëtar i një grupi të frymëzuar nga Al-Qaeda e hodhi veten në ajër në afërsi të një postblloku të ushtrisë.

Grupi gjithashtu njoftoi sot për luftime të ashpra në Damask, të cilat, sipas tyre, filluan pasditen e së dielës dhe ishin të përqendruara në lagjen jugore të Tadamonit dhe kampet e refugjatëve të Yarmoukut. Observatori njofton gjithashtu për një sulm ajror, që ka lënë të vrarë sot të paktën 20 luftëtarë në provincën veriperëndimore të Idlibit.


Arrestohet një person që gjuajti në drejtim të zyrës së Erdoganit

Ankara, 05 nëntor - Agjencitë e lajmeve turke njoftojne se policia ka arrestuar një person që ka gjuajtur në drejtim të zyrës së kryeministrit turk, Rexhep Taip Erdogan, në Ankara.

Televizioni privat turk NTV thotë se tri gjuajtje janë dëgjuar sot në afërsi të njërës prej hyrjeve të zyrës.

Incidenti ndodhi pasi ministrat u mblodhën për një takim kabineti me Erdoganin. Ende nuk është e qartë nëse dikush është lënduar nga ky incident.

[Lona]

Obama rizgjidhet president i Shteteve të Bashkuara të Amerikës

Uashington, 07 nëntor - Barack Obama rizgjidhet president i Shteteve të Bashkuara të Amerikës, në zgjedhjet që janë konsideruar të jenë më të ngushtat në historinë amerikane.

Rezultatet paraprake tregojnë se Presidenti Barak Obama ka mundur rivalin e tij republikan Mit Romney duke siguruar 303 vota kundrejt rivalit të tij Mitt Romney i cili ka marrë 203 vota.

Mësohet se Obama ka siguruar fitore në mbi 20 shtete si dhe në kryeqytetin e vendit Uashington. Ai fitoi në shtete të rëndësishme si Ajova dhe Pensilvani ndërsa Romney siguroi fitore në shtetin e lëkundur të Karolinës së Veriut dhe në Indiana.

Obama: Më e mira për Amerikën do të vijë

Presidenti i SHBA-së Barack Obama ka mbajtur fjalimin para mbështetësve të tij ndërsa ka falenderuar të gjithë amerikanët për mbështetjen.

“Ne kemi arritur deri këtu falë jush. Kemi mbijetuar ndaj luftrave dhe i kemi dhënë këtij vendi një vrull të madh shprese duke besuar tek ëndrra jonë e përbashkët. Udhëtimi ynë ka qënë i gjatë por ne arritëm një fitore dhe ne e dimë që më e mira për Amerikën do të vijë. Dua të falenderoj çdo amerikan që ka marrë pjesë në zgjedhje. Zëri juaj u dëgjua dhe ju bëtë diferencën kur zgjodhët mes Obamës dhe Romneyt. Unë bisedova me Romney dhe e falenderova për fushatën që kreu” tha Obama.

“Ne e duam shumë këtë vend. Unë dua të falenderoj miqtë dhe partnerët, zëvendëspresidentin Joe Biden. Unë s`do të isha njeriu që jam sot pa ju që më zgjodhët 4 vjet më parë. Nuk ju kam qënë kurrë kaq krenar . Ju dua kaq shumë ashtu siç dua edhe Zonjën e parë, dhe vajzat e mia. Përpara syve tanë ju do të rriteni dhe unë jam krenar për ju të gjithë për fushatën më të mirë në histori. Disa prej jush janë së fundi pranë meje por pavarësisht asaj që bëni ne duhet të punojmë bashkarisht”.

“Ne duam që gjithësecili të jetojë i sigurtë, por edhe një vend që pavarësisht situatën konfliktuale të ndajë paqen. Ne besojmë në parimet e Amerikës, në fuqinë e Amerikës, në ëndrrën amerikane”.

“Pavarësisht progresit të arritur ka ende punë për të bërë, ndonjëherë lëvizet me hapa të ngadaltë. Duhet të zgjidhim të gjitha problemet tona por duke pasur kompromis për të ecur përpara. Ekonomia po rimëkëmbet. Një fushatë e gjatë tashmë ka përfunduar, beteja ka përfunduar”.

“Unë e kam dëgjuar zërin tuaj dhe unë kam besuar tek ju dhe ju më keni bërë një president më të mirë. Unë do të kthehem në Shtëpinë e Bardhë për një të ardhme më të mirë. Sot ju votuat dhe më bëtë që unë të fokusohem tek puna juaj dhe jo tek e imja”.

“Do të përmirësojmë sistemin e emigrimit, çështjen e taksave. Ne kemi punë për të bërë. Kjo nuk do të thotë që puna juaj ka përfunduar këtu. Në Amerikë ajo që ka rëndësi është ajo çfarë duhet bërë nga ne”.

Mitt Romney pranon humbjen

Ndërkohë kandidati republikan, Mitt Romney, në daljen e tij para mbështetësve, ka pranuar humbjen në zgjedhjet presidenciale.

“Ju falenderoj të gjithëve për mbështetjen. I kam telefonuar Presidentit Obama për ta uruar, familjen dhe zgjedhësit e tij. Kjo është një kohë sfidash për Amerikën dhe unë lutem që Presidenti të ketë sukses në rrugën e tij në drejtim të vendit tonë”, tha Romney.

Ai ka theksuar se shpreson që të mos i kishte zhgënjyer mbështetësit e tij. “Kombi ynë, jeton një moment kritike dhe ne nuk mund të rrezikojmë duke mbajtur qëndrimin e gabuar. Unë besoj tek Amerika dhe tek populli amerikan”, tha Romney.

Senati fitohet nga demokratët ndërsa Dhoma e Përfaqësuesve nga republikanët

Ndërkohë, Presidenti i ardhshëm i Shteteve të Bashkuara do të duhet të punojnë me një Dhomë të Përfaqësuesve të kontrolluar nga republikanët.

Kjo do të thotë që ligjvënësi republikan John Boehner nga shteti i Ohajos ka të ngjarë të mbajë postin e tij si kryetar i Dhomës së Përfaqësuesve, ndërsa ligjvënësi Eric Cantor nga shteti i Virxhinias pritet të mbetet udhëheqësi i shumicës.

Nga 435 vendet e Dhomës së Përfaqësuesve demokratëve do t’u duhej të fitonin 25 vende për të marrë kontrollin.

Disa gara kyçe për në Senatin e SHBA ende janë pa rezultat, edhe pse demokratët korrën disa fitore kyçe në Massachusetts, Ohajo dhe Indiana.

Zgjedhësit votuan për 33 vende në Senatin prej 100 vendesh të kontrolluar aktualisht nga Partia Demokratike. Republikanëve do t’u duhej të fitonin 4 vende për të marrë kontrollin e Senatit.

[Lona]

Liderët botërorë urojnë Obamën

Evropë, 07 nëntor - Kryeministri britanik David Cameron ka qenë ndër udhëheqësit e parë ndërkombëtarë që ka mirëpritur rizgjedhjen e presidentit amerikan Barack Obama për një mandat të dytë katërvjeçar.

Duke shkruar në Twitter, Cameron e përshkroi Obamën si një “mik” dhe tha se ai mezi pret që të “vazhdojnë të punojnë së bashku.”

Në Bruksel, presidenti i Bashkimit Evropian Herman Van Rompuy tha nëpërmjet Twitter se ai është “shumë i lumtur” për rizgjedhjen e Obamës.

Anders Fogh Rasmussen, sekretar i përgjithshëm i aleancës ushtarake të NATO, ka shprehur “urime të ngrohta”, duke lavdëruar atë që ai e quajti “udhëheqje të shquar” të Obamës në ruajtjen e marrëdhënieve euro-atlantike.

Në Moskë, ligjvënësit në Dumën Shtetërore të Rusisë gjithashtu përshëndetën fitoren e Obamës ndaj sfiduesit republikanë Mitt Romney, duke e quajtur rezultatin si “alternativë më të mirë” për Rusinë.

Ligjvënësit shprehën shpresën se udhëheqësi amerikan do të vazhdojë “rivendosjen” e marrëdhënieve mes Moskës dhe Uashingtonit.

[Lona]

Exclusive: Të jesh MVP e mos të jesh në reprezentacion

http://zhurnal.mk/data/news/1-alaudinPREJE.jpg

Shkup, 7 nëntor - Të jesh MVP i kampionatit (2011/12) dhe mos të ftohesh në reprezentacionin e Maqedonisë (U18) kjo është për tu çuditur. Një gjë e tillë i ka ndodh basketbollistit të talentuar shqiptar i cili i mbron ngjyrat e NBA ÇAIR, Alaudin Mustafa. Ai ka vazhduar me lojërat e mira edhe në sezonin e ri, ku deri tani janë zhvilluar shtatë xhiro kurse në ndeshjen e fundit ndaj MZT-së shënoi hiq ma pak se 50 pikë. Sipas talentit shkupjan e gjithë kjo padrejtësi që po i bëhet atij ka gisht edhe politika.

“Arsyeja për mos ftesën time në reprezentacion është se jam shqiptar, prandaj edhe dikush po mundohet ti fsheh kualitetet e mija. Ndoshta po të njëjtit edhe çmimin MVP nuk do të ma jepnin po të kishin mundësi, por fatkeqësisht deri te kjo nuk ka mundur të vij pasi flasin statistikat e mija”, zbuloi Mustafa për gazetën “Zhurnal Plus”. Ndryshe, në bisedën që zhvilluam me këtë talent të radhë, ai u shpreh i dëshpëruar pasi assesi nuk po mundet ti tregoj vlerat e tij jashtë vendit. “Për të depërtuar jashtë vendin duhet patjetër që dikush te të ri pas, por edhe paraqitja në fanellën e reprezentacionit do të ishte i mirëseardhur pasi ndeshjet tona do ti shikonin nga menaxher të ndryshëm. Jam i dëshpëruar pse nuk jam pjesë e seleksionit më të mirë dhe shumë jam duke menduar që në të ardhmen nëse nuk më fton Maqedonia atëherë të luaj për ndonjë reprezentacion tjetër”, tha Alaudin Mustafa.

Nga ana tjetër, u munduam të kërkojmë përgjigje nga seleksionuesi i Maqedonisë për grupmoshat U-18, mirëpo për momentin ky post ka mbetur bosh dhe emërtimi i trajnerit të ri pritet të zgjidhet në ditët në vijim. Njëri prej atyre që mund të merr këtë detyrë është edhe trajneri i MZT-së, Nebojsha Gjukoviç i cili për gazetën “Zhurnal Plus” tha se nëse ai do të zgjidhet, Alaudin Mustafa e ka vendin e sigurt. “Në fund të muajit pritet të bëhet grumbullimi i ardhshëm i lojtarëve por deri atëherë do të zgjidhet edhe selekstori i ri. Kandidat jam edhe unë, kështu që premtoj se nëse zgjidhem atëherë Mustafa do ketë ftesën time. Ai është një lojtar i shkëlqyer që mendoj se ka një të ardhme të shndritshme”, tha Gjukoviç. Ndryshe, Alaudin Mustafa me sportin e basketbollit merret që katër vite, ai luan në pozitën 2 dhe 3, ndërkohë që ana e tij e fortë është loja atraktive që zhvillon në parket.

Alaudin Mustafa ka mbet edhe pa bursë

Për të qenë gjithçka tragjike është përkujdes edhe Federata e basketbollit të Maqedonisë që nuk i ka dhënë atij dritë jeshile për të pranuar bursë nga Agjencia për Rini dhe Sport. Sipas këtij institucionit ai nuk ka përmbush kriteret për të fituar këto të holla. A thua sa pik duhet që ky lojtar të shënoj? A thua sa kampionate ai duhet ti fitoj apo ndoshta edhe MVP i sezonit është pak?!

[Lona]

Mblidhet parlamenti i Malit të Zi

Podgoricë, 06 nëntor - Parlamenti i ri i Malit të Zi është mbledhur sot për herë të parë që nga mbajtja e zgjedhjeve më 14 tetor, derisa nominimi i kryeministrit pritet të bëhet në ditët e ardhshme.

Partia Demokratike e Socialistëve e liderit shumëvjeçar malazias Milo Gjukanoviq, që ka qeverisur shtetin pa ndërprerje për më shumë se dy dekada, do ta formojë sërish qeverinë.

Kjo parti dhe partnerja e saj tradicionale, Partia Social-Demokratike kanë nënshkruar një marrvëshje me përfaqësuesit shqiptarë, boshnjakë dhe kroatë, duke i dhënë koalicionit kontrollin e 45 ulësve nga 81 sa janë tërësisht në Kuvend.

Nuk është e qartë, nëse Gjukanoviq, që ka dhënë dorëheqje nga posti i kryeminstrit dy vjet më parë për të udhëhqur biznesin privat, por mbetet krytar i partisë, do t’’i kthehet postit në ekzekutiv.


Një aeroplan humbë rrotën gjatë lëshimit në Vjenë

Vjenë, 06 nëntor - Një aeroplan pasagjerësh me 80 njerëz në bord u ul në mënyrë të sigurt në kryeqytetin austriak, Vjenë, pavarësisht se e kishte humbur një rrotë gjatë lëshimit.

Austrian Airlines tha se asnjë pasagjer nuk është lënduar apo rrezikuar gjatë lëshimit të aeroplanit, që u realizua pasditen e djeshme.

Kompania tha se aeoplani e kishte humbur njërën nga dy rrotat e anës së djathtë gjatë këtij incidenti.

Fluturimi realizohej nga Florenca e Italisë, për në Vjenë të Austrisë.

Aeroplani po inspektohet për shkaqet që kanë mundur të çojnë deri në humbjen e rrotës.


Izraeli, gati të sulmojë Iranin

Tel Aviv, 06 Nëntor - Kryeministri i Izraelit, Benjamin Netanyahu, deklaroi se është i gatshëm që të urdhërojë një goditje ndaj Iranit, nëse sanksionet ndërkombëtare nuk do të arrijnë të ndalojnë programin bërthamor.

”Pa dyshim, jam i gatshëm që të shtyp butonin e luftës, nëse kjo do të jetë e nevojshme”, deklaroi Netanyahu në një televizion vendas, duke shtuar se Izraeli kishte kapacitetet e mjaftueshme dhe se është i gatshëm të sulmojë edhe i vetëm.

Qeveria e Tel Avivit, nuk ka arritur të marrë aprovimin e deritanishëm të Uashingtonit, për të realizuar një goditje ndaj reaktorëve bërthamorë të Iranit.

Megjithatë, sipas ekspertëve, Netanyahu vendosi të priste fillimisht rezultatin e zgjedhjeve në SHBA, me Romneyn që është i preferuari i Izraelit, për retorikën e ashpër anti-iraniane që ka përdorur gjatë fushatës.

Njëkohësisht, parashikohet se Obama mund të jetë më i lirshëm gjatë mandatit të tij të dytë, duke mbështetur kërkesat e Izraelit.

Sipas raportimit të televizionit “Channel Two”, që prej vitit 2010, ushtrisë izraelite i është dhënë urdhër që të përgatisë një plan të detajuar sulmi mbi Iranin dhe ushtria mund të vihet në lëvizje brenda disa orëve pas dhënies së urdhërit.

Në përshkrimin e tij, kanali e cilësoi këtë plan sulmi si “më të detajuarin dhe më të afërtin me një sulm mbi Iranin ndonjëherë”.

[Lona]

Puerto Riko drejt bashkimit të plotë me SHBA-në?

San Juan, 07 Nëntor - Puerto Riko mund të shndërrohet në shtetin e ri amerikan, pasi shumica e banorëve të ishullit të Karaibeve shprehen pro heqjes dorë të protektoratit, duke u shndërruar “de facto” në shtetin e 52-të.

Rezultatet e deritanishme janë pjesë e një referendumi, rezultati i te cilit do te jete jourdhërues dhe mbështetja duket solide, pas numërimit të më shumë se një të tretave të votave.

Kjo është hera e katërt që Puerto Riko voton për statusin e tij shtetëror në 45 vitet e fundit.

Referendumi është kundërshtuar nga guvernatori Alehandro Garsia Padija, i cili shpreson në ruajtjen e “status-quo”-së aktuale.

Aktualisht, Puerto Riko është një territor amerikan, i cili përdor dollarin dhe pasaportat amerikane. Shteti i ka deleguar Uashingtonit politikën e tij të jashtme dhe mbrojtjen, por vetqeveriset, nuk dërgon senatorë apo kongresmenë dhe përfaqësohet në Uashington nga një delegat pa të drejtë vote.

Referendumi i mbajtur në ishull i kërkoi banorëve të zgjidhnin midis dy pyetjeve, nëse duan të forcojnë më shumë marrëdhënien me SHBA-në apo të kundërtën, forcimin e autonomisë.

53% e popullsisë, janë shprehur deri tani pro forcimit të marrëdhënies me Uashingtonin, duke u shndërruar në një shtet amerikan me të drejta të plota.


Sulmohet ambasada e Lituanisë në Minsk

Minsk, 07 nëntor - Lituania njoftoi sot se do të paraqesë një protestë formale, pasi individë të paidentifikuar gjuajtën me koktej molotovi në ambasadën e këtij shtetit në Minsk, kryeqytetin e Bjellorusisë, gjatë një sulmi të vonshëm natën e mbrëmshme.

Ministria e Jashtme e Lituanisë tha se do ta thërrasë të dërguarin e Bjellorusisë në Vilnius dhe do t’ia paraqesë notën e protestës, lidhur me këtë incident.

Ambasadori i Lituanisë në Bjellorusi, Linas Linkevicius tha sot se “ishte fat i madh që iu shmangën dëmtimit, sepse pasojat do të mund të ishin shumë më të këqija”.

Të dyja vendet kanë marrëdhënie të lëkundura diplomatike, pavarësisht lidhjeve të tyre tregtare.


Trupat turke bastisin rebelët kurdë në Irak

Ankara, 07 Nëntor - Televizioni privat turk, NTV, raportoi sot se komandot turke kryen një bastisje në Irak për t’i sulmuar rebelët kurdë.

NTV tha se bastisja ishte një operacion dy-ditor, që përfshinte dy batalione të përkrahura nga aeroplanë luftarakë.

Trupat kishin shënjestruar bazat e Partisë Kurde të Punës, të vendosura rreth pesë kilometra larg kufirit me Turqinë.

Duke cituar burime anonime, NTV tha se bastisja përfshinte një shkallë të ngushtë, por ishte efektive.


Merkel kërkon nga Britania që ta nxisë integrimin e BE-së

Bruksel, 08 nëntor - Kancelarja gjermane, Angela Merkel ka bërë thirrje për një bashkëpunim më të ngushtë brenda Bashkimit Evropian dhe ka kërkuar që Britania ngurruese të vazhdojë të jetë zemra e BE-së.

Gjatë seancës së sotme në Parlamentin Evropian, Merkel insistoi se BE-ja duhet të lëvizë përpara, pavarësisht krizës ekonomike. Ajo gjithashtu shtyu përpara propozimet e saj për t’i dhënë më shumë fuqi selive të BE-së.

Merkel dëshiron që samiti i dhjetorit i BE-së të sjellë një afat kohor dy apo tre vjeçar, për t’i siguruar bllokut më shumë fuqi për të intervenuar në buxhetet kombëtare.

Ajo tha se do të bëjë gjithçka që është e mundur që ta mbajë Britaninë e Madhe në Bashkimin Evropian si një partner të mirë.


NATO do të vendosë raketa në Turqi

Bruksel, 7 nëntor - Ministri i Punëve të Jashtme i Turqisë, Ahmet Davutoglu tha sot se NATO është duke u përgatitur që të vendosë raketa në tokën e këtij vendi. Këto deklarata Davutoglu i dha për gazetarët turq në Bruksel, transmeton Rel.

Më herët gjatë ditës, një zyrtar i lartë i Ministrisë së Jashtme turke tha se Turqia është duke planifikuar që t’ia bëjë një kërkesë të “shpejtë” NATO-s, që raketat të vendosen përgjatë kufirit turko-sirian.


Legjitimojnë Mbrojtjen Civile serbe në veri

Mitrovicë, 08 nëntor - Djemtë e të ashtuquajturës Mbrojtja Civile e bëjnë ligjin në veri të Kosovës, por kjo shihet si një ‘e keqe e domosdoshme’, nga autoritetet vendase dhe ndërkombëtare të sigurisë.

Zëdhënësi i EULEX-it, Blerim Krasniqi ka deklaruar për “Tribuna Shqiptare”, se janë në dijeni se strukturat serbe të sigurisë kanë qenë të pranishme, por jo persona të uniformuar.

Ndërsa, ministri Bajram Rexhepi, ka thënë se ata që flasin për prani të këtyre personave, nuk e kanë zbuluar Amerikën, pasi që ai vazhdimisht ka thënë se ka struktura paralele të sigurisë, të njohura si MUP e BIA.

[Fshatari]

Gati gjysma e britanikëve do të donin të dilnin nga BE-ja
Pothuajse gjysma e britanikëve do të votonin në referendum për daljen e Britanisë nga Bashkimi Evropian, ndërsa çereku i tyre për të qëndruar brenda bllokut.
Kërkimet e agjencisë YouGov po ashtu kanë treguar se 17 për qind e të anketuarve janë të pavendosur.
Kryeministri britanik, David Cameron, është nën presion të fuqishëm nga anëtarët radikalë të Partisë së tij Konservatore për të marrë një qëndrim më të fuqishëm ndaj Brukselit gjatë Samitit të Bashkimit Evropian për buxhetin.
Cameron ka deklaruar më herët se mund të përdorë veton ndaj buxhetit për vitet 2014-2020, i cili është propozuar të jetë 1 trilion euro, sepse, sipas tij, buxheti bën thirrje për rritje në shpenzime.
Ai ka thënë se dëshiron shkurtime të buxhetit, apo të paktën në nivelet aktuale.
Të mërkurën, në Londër ka qëndruar kancelarja gjermane, Angela Merkel, e cila i ka bërë thirrje Cameronit që të mos i kthejë shpinën BE-së.
_________________________________________
http://www.evropaelire.org/content/news/24765382.html
______________________________________________
Popull i mençur shumë eshte populli britanik.
Nuk i kuptoj disa debil qe insistojnë te integrohen(shkrihen) ne kete union ne vend qe te ndjekin shembullin e Britanise e te largohen para se te shkrihen(zhduken) ne te.