Lajme Aktuale.... - Page 15

Lona · 19-09-08, 10:49

Mali i Zi do të përmbahet gjatë votimit në Nju Jork për Kosovën

Podgoricë, 19 shtator - Përfaqësuesit e Mali të Zi sipas të gjitha gjasave do të përmbahen me rastin e votimit në Asamblenë e Përgjithshme të Kombeve të Bashkauar për propozimin e Serbisë që të kërkohet mendimi i Gjykatës Ndërkombëtare të Drejtësisë për legalitetin e shpalljes së pavarësisë së Kosovës. Një burim nga kreu i lartë shtetëror malazez ka thënë për gazetën "Republika" të Podgoricës se kjo çështje është shumë delikate për Malin e Zi dhe se janë të vetëdijshëm që çdo zgjidhje do të kritikohet. "Po t'i kishim thënë 'po' kërkesës së Serbisë do të na shihte për të madhe Perëndimi, po të themi 'jo' na sheh për të madhe Serbia, andaj të përmbajturit në këtë moment është opsioni më i mirë", ka thënë bashkëbiseduesi i gazetës në fjalë, duke shtuar se do të përcjellin me vemendje reagimet e shteteve perëndimore dhe të SHBA-ve për nismën e Serbisë. Ndërkaq gazeta tjetër malazeze "Vijesti" pohon se Presidenti i Malit të Zi Filip Vujanoviq dhe kryeministri Milo Gjukanoviq "po fshehin taktikën për Nju Jork". Ata në deklarata të veçanta iu kanë shmangur përgjigjeve direkte se si do të shprehet Mali i Zi në Asamblenë e Përgjithshme të KB në Nju Jork për propozimin e Serbisë.

Harland: Dallimet mbi Kosovën do vazhdojnë

Beograd, 19 shtator - Zëvendëshefi i UNMIK ut Dejvid Harland ka deklaruar se vendimi i Gjykatës Ndërkombëtare të Drejtësisë për Kosovën ka krijuar një problem të veçantë në sistemin ndërkombëtar, ndërsa dallimet mes vendeve më të fuqishme për këtë çështje do mbesin pa marrë parasysh vendimin eventual të Gjykatës. Ai i ka thënë të përditshmes beogradase "Veçernje Novosti" se për shkak të iniciativës së Serbisë që të kërkojë mendimin e GJND se për lishgjshmërinë e shpalljes së pavarësisë së Kosovës, çështja e Kosovës do të komplikojë marrëdhëniet edhe në periudhën e ardhshme. "Duhet të përpiqemi që ta zgjidhim situatën në plan aftagjatë dhe kjo është e mundur vetëm me ndihmën e BE së", ka thënë Hartland. Ai ka kujtuar se mandati i UNMIK ut vjen nga Këshilli i Sigurimit OKB së, por se misioni ndërkombëtar derisa nuk merr instruksione të qarta nga KS i OKB së, do të bashkëpunojë në mënyrë pragmatike me EULEX in. Ai ka shfaqur shpresën se Beogradi dhe Brukseli do të arrijnë marrëveshje mbi misionin e EULEX it.

Griboski: Mekejn dhe Obama do të përkrahin pavarësinë e Kosovës si akt të kryer

Uashington, 19 shtator - Presidenti i Institutit për religjion dhe politikë publike Xhozef Griboski thotë se që të dy kandidatët presidencialë amerikanë "do të përkrahin pavarësinë e Kosovës si akt të kryer". Mekejn dhe Obama nuk do të bënin kurrfarë kufizimesh në statusin e pavarur të Kosovës, "megjithë faktin se në Kosovë duhet garantuar të drejtat fundamentale të minoriteteve dhe mbrojtjen e tyre të përgjithshme", tha Griboski për "Zërin e Amerikës". Ndërkaq sa i përket Serbisë Griboski është i mendimit se asnjëri nga kandidatët nuk do t'i kushtojë "vemendje të madhe Serbisë". Senatori Merkjn në të kaluarën nuk ka shfaqur interesim të veçantë, ndërsa Obama nuk ka ka qenë në skenën kombëtare mjaft të gjatë që të dihet diçka më tepër për të.

Ashpërsohet gara presidenciale Mekein Obama

Uashington, 19 shtator Kur kanë mbetur më pak se 50 ditë deri në zgjedhjet e 4 nëntorit, gara presidenciale midis republikanit, Xhon Mekein dhe demokratit, Barak Obama, duket shumë e ashpër. Analistët thonë se javët e fundit të fushatës duket se do të jenë intensive dhe të mbushura me sulme partiake dhe reklama negative në televizion. eklamat e mbushura me sulme transmetohen kudo, në televizion, radio dhe në internet. Disa reklama janë krijuar brenda pak orësh.Një reklamë nga fushata e zotit Mekein e sulmon senatorin Barak Obama në lidhje me problemin e taksave. Fushata e zotit Obama u përgjegj me një sulm mbi senatorin Mekein dhe lidhjeve të tij me lobistët. Por, për të dy palët që sulmojnë njëra tjetrëm me reklama negative, ekspertët thonë se është e vështirë të kuptosh nëse njerëzit janë duke u kushtuar vëmendje ose janë duke u ndikuar më shumë. Analistët politikë thonë se debatet presidenciale të këtij viti do të jenë vendimtare për të ndihmuar votuesit të vendosin mbi këtë garë shumë të ngushtë.Janë caktuar tre debatet presidenciale, duke filluar nga 26 shtatori në Universitetin e Misisipit. Përveç këtyre, do të ketë një debat midis kandidatëve për nënpresidentë, republikanes, Sara Pejlin dhe demokratit, Xho Bajden.

Mininistrat e NATO s mblidhen në Londër

Londër, 19 shtator Ministrat e mbrojtjes të vendeve anëtare të NATO s janë mbledhur në Londër për të diskutuar për reformimin e Aleancës, Afganistanin dhe marrëdhëniet me Rusinë, në dritën e konfliktit të muajit gusht në Gjeorgji. Sekretari i Përgjithshëm i NATO s, Jp de Hup Shefer, i tha BBC së se vazhdon shqyrtimi i mundësisë për anëtarësim në Aleancë i Gjeorgjisë dhe Ukrainës, pavarësisht kundërshtimit të Rusisë dhe zhvillimeve në Kaukaz. Me gjithë ftohjen aktuale të marrëdhënieve mes NATO s e Rusisë, bisedimet mes tyre duhet të vazhdojnë, tha Shefer.

Rajs kritikon ashpër politikën ruse

Uashington, 19 shtator Sekretarja amerikane e shtetit, Kondoliza Rajs, kritikoi ashpër politikën ruse. Në politikën e brendshme Rusia gjithnjë e më shumë po tregohet autoritare ndërsa në politikën e jashtme gjithnjë e më agresive, tha Rajs në një fjalim të mbajtur në Fondacionin "German Marshall Fund". Për dallim presidenti rus, Dimitrij Medvjedev, ka përdorur tone pajtuese në zënkat me Shtetet e Bashkuara të Amerikës për konfliktin e Kaukazit. Medvedev tha në Moskë se marrëdhëniet bilaterale mund të riparohen nëse arsyeja e shëndoshë njerëzore ngadhënjen ndaj mentalitetit të Luftës së Ftohtë.

Lona · 23-09-08, 11:34

Mustafaj: Aventurë e dëshpëruar e diplomacisë serbe

Londër, 23 shtator - Ish ministri i Jashtëm shqiptar, Besnik Mustafaj, e quajti iniciativën serbe që Gjykata Ndërkombëtare e Drejtësisë të vlerësojë ligjshmërinë e pavarësisë së Kosovës si një aventurë të dëshpëruar të diplomacisë dhe politikës serbe. Mustafaj për BBC-në tha se pavarësisht nëse Gjykata Ndërkombëtare do ta quajë legale ose ilegale pavarësinë e Kosovës, mendimi do të ketë vetëm vlerë konsultative, pa asnjë ndikim as mbi të sotmen e as të ardhmen e Kosovës.

Në raportin e Agjencisë ndërkombëtare antikorrupsion Kosova nuk figuron fare

Berlin, 23 shtator Agjencia ndërkombëtare për luftën kundër korrupsionit, Transparency Internantional, sot e ka publikuar listën e vendeve të radhitura sipas indeksit të perceptimit të korrupsionit. Në krye të listës, që do të thotë vendet me më së paku korrupsion, janë Danimarka, Zelanda e Re dhe Suedia. Në listën prej 180 vendeve nuk gjendet Kosova, ndërsa prej vendeve të tjera ballkanike, Maqedonia është e 74 me indeksin 3.6, ndërsa, Serbia, Mali i Zi dhe Shqipëria radhiten në vendet 85, 86 dhe 87. Shqipëria ka shënuar ngritje në krahasim me vitin e kaluar, pasi sivjet indeksi i saj është 3.4, ndërsa vjet atë e kishte 2.9. Bosnjë Hercegovina radhitet e 93 me indeksin 3.2. Në vendet e fundit, prej 178 e deri në të 180, janë Iraku, Birmania dhe Somalia.

Vujanoviq: Mali i Zi do të shprehet për Kosovën gjatë tetorit

Podgoricë, 23 shtator - Mali i Zi para tetorit nuk do të shprehet për nismën e Serbisë që Gjykata Ndërkombëtare e Drejtësisë të shqyrtojë legalitetin e shpalljes së pavarësisë së Kosovës ka deklaruar mbrëmë Presidenti malazez Filip Vujamoviq. "Duke ndjekur atë që është qëndrim i përgjegjshëm dhe i vemendshëm të qeverisë malazeze ndaj kësaj çështjeje, kam shprehur bindjen se nuk duhet bërë të ditur më herët qëndrimet shtetërore të Malit të Zi dhe se duhet pritur kohën e duhur", ka thënë Vujanoviq mbrëmë për TV e Malit të Zi pas takimit me kryesuesin e Asamblesë së Përgjithshme të Kombeve të Baahkuara Migel d'Eskot Brokman. Vujanoviq konsideron se duhet pritur që kjo temë (Kosova) të vehet në rend dite në gjatë tetorit. "Ne atëherë edhe do të bëjmë të ditur qëndrimin tonë", ka thënë Vujanoviq.

Nga tajfuni në Filipine vdesin 3 vetë dhe 13 minatorë mbesin të ngujuar në minierë

Hong Kong, 23 shtator - Nga tajfuni, që sot (e martë) ka goditur Detin e Kinës Jugore dhe është drejtuar për Hong Kong, pas kalimit nga pjesa veriore e Filipineve, ku kanë vdekur tre njerëz, ndërsa janë ngujuar në minierën e arit 13 të tjerë, njofton Rojter. Ekipet shpëtimtare bregdetare kanë shpëtuar 21 njerëz nga barka transportuese dhe peshkatare, të cilat janë fundosur nga tajfuni.

SHBA të e mbështesin anëtarësimin e Ukrainës në NATO

Nju Jork, 23 shtator Sekretarja amerikane e shtetit, Kondoliza Rajs, ka premtuar mbështetje të fuqishme për synimet e Ukrainës për anëtarësim në NATO, përkundër kundërshtimeve të Rusisë. Gjatë një takimi me ministrin e jashtëm të Ukrainës, Volodimir Ohrizko, në selinë e Kombeve të Bashkuara, Rajs, tha se Shtetet e Bashkuara qëndrojnë në përkushtimin e paraqitur në samitin në Bukuresht, gjatë muajit prill, që Ukraina t'i bashkohet Planit aksional, që është hapi i parë për anëtarësim në NATO.

Lona · 23-09-08, 15:12

Partitë shqiptare në Maqedoni të bëjnë më shumë për njohjen e Kosovës

Kryetari i Kuvendit të Kosovës, Jakup Krasniqi ka drejtuar gishtin te faktori politik shqiptar në Maqedoni në kërkim të arsyeve pse ky shtet fqi ende nuk e ka njohur pavarësinë e Kosovës.

Shkupi ka konsumuar edhe datën e 23 shtatorit, të shumëpërfolur për deklarimin e Kosovës nga ana e Maqedonisë, duke zgjedhur heshtjen në vend të njohjes së paralajmëruar. I pyetur nga ALSAT se ku i sheh arsyet pse nuk nuk ka ardhur ende njohja e Kosovës nga Maqedonia, Krasniqi është shprehur se faktori politik shqiptar në Maqedoni duhet të bëjë më shumë në këtë çështje. Sido që të jetë, ai thotë se nuk ka nevojë që raportet politike Shkup- Prishtinë të tensionohen për këtë arsye.
"Ne nuk kemi nevojë t'i tensionojmë raportet. Por arsyet e mosnjohjes i shoh te mosuniteti i faktorit politik shqiptar në Maqedoni. Mendoj që ata duhet të mendojnë edhe për vete, edhe për të ardhmen tonë të përbashkët në përgjithësi", ka deklaruar kryetari i Kuvendit të Kosovës jakup Krasniqi.

Rice: Statusi është pavarësia, legjitimiteti i panevojshëm

Çështja e statusit të Kosovës tashmë ka përfunduar dhe rikthimi i saj në tryezat e bisedimeve të çfarëdo niveli është i panevojshëm. Kështu ka vlerësuar të hënën sekretarja amerikane e Shtetit, Condoleezza Rice, gjatë takimit që ka pasur me sekretarin e përgjithshëm të Kombeve të Bashkuara, Ban Ki-Moon.

Rice dhe Moon kanë biseduar për Kosovën, në kontekst të nismës serbe në Kombet e Bashkuara, për të kërkuar mendimin e Gjykatës Ndërkombëtare të Drejtësisë në hagë, lidhur me legjitimitetin e shpalljes së pavarësisë së Kosovës.

Ky qëndrim i Ricet është shprehur edhe nga përfaqësuesi i SHBA-ve në Komitetin e Përgjithshëm me rastin e shqyrtimit të kërkesës së Serbisë. Po ky qëndrim pritet të shprehet edhe gjatë sesionit të 63-të të Asamblesë së Përgjithshme të Kombeve të Bashkuara, kur do të jenë në rend të ditës kërkesa e Serbisë.

Ban Ki-Moon do të përgatisë një raport të ri për Kosovën deri në fund të këtij muaji, të cilin më pas, në tetor, do ta diskutojë Këshilli i Sigurimit.

Pritet që raporti i sekretarit Ki-Moon të përfundojë para se të deklarohet asambleja e Përgjithshme e OKB-së për nismën e Serbisë.

Cili politikan në Maqedoni ka fajin më të madh për vonesën e njohjes së pavarësisë së Kosovës

Maqedonia shkeli edhe një “dead line” për njohjen e pavarësisë së Kosovës. Në opinion janë paraqitur shumë variante për shkaqet e mosnjohjes së pavarësisë, por mbetet fakti se kreu i Kosovës nuk udhëtoi në Asamblenë e Përgjithshme të Kombeve të Bashkuara me aktin aq të nevojshëm të njohjes së pavarësisë nga ana e shtetit fqinj.

Lona · 24-09-08, 11:51

Petriç: Kosova, pjesë e tensioneve ndërmjet Perëndimit dhe Lindjes

Nju Jork, 24 shtator - Ish ambasadori i Austrisë në OKB, Volfgang Petriç (Wolfgang Petrich), thotë se nisma serbe për vlerësimin e ligjshmërisë së shpalljes së pavarësisë së Kosovës, do të shtyjë për një afat më të gjatë procesin e integrimit të rajonit të Ballkanit në BE. Sipas Petriçit, Serbia me këtë nismë ka humbur politikisht, duke rrezikuar anëtarësimin e saj në BE. Petriç tha për BBC-në se vendimi i Gjykatës Ndërkombëtare të Drejtësisë, kurdo që të merret, nuk do të jetë i kënaqshëm as për Serbinë, as për Kosovën. Ish ambasadori austriak në OKB ka thënë se çështja e Kosovës është bërë pjesë e tensioneve ndërmjet perëndimit dhe lindjes dhe ajo, së bashku më Ukrainën dhe Gjeorgjinë, do të vazhdojë të jetë pjesë e këtyre përshkallëzimeve. Ambasadori Petriç ka shprehur, siç ka thënë, zhgënjimin e tij me Uashingtonin që nuk e ka ndihmuar më shumë Prishtinën në procesin e njohjeve dhe ka shfaqur drojën e tij se me tensionet në skenën botërore do të jetë më e vështirë të vazhdohet dhe të arrihet mbështetja për pavarësinë e Kosovës.

Sarkozi: Shtyrja e njohjes së Kosovës nuk është për të mirën e rajonit

Prishtinë, 24 shtator - Presidenti francez Nikola Sarkozi ka deklaruar se shtyrja e njohjes së pavarësisë së Kosovës nuk do të ndikojë për të mirën e rajonit. "Çdo shtyrje e njohjes së pavarësisë së Kosovës, nuk do të ndikonte për të mirën e paqes dhe të stabilitetit në rajon", është shprehur Sarkozi në një konferencë shtypi në selinë e OKB së në Nju Jork, njofton KTV. Duke komentuar kërkesën e Beogradit për dërgimin e pavarësisë së Kosovës para Gjykatës Ndërkombëtare të Drejtësisë, Presidenti francez ka thënë: "Dua të theksoj se Franca ka qenë një ndër shtetet e para që e ka njohur pavarësinë e Kosovës", ka thënë Sarkozi duke shtuar se Serbia duhet ta ketë në mendje se edhe ajo e ka vendin në Bashkimin Evropian.

Hyseni: Kemi bërë thirrje që shteti i Kosovës të njihet sa më shpejt

Nju Jork, 24 shtator - Ministri i Jashtëm i Kosovës, Skënder Hyseni, thotë se në rast të miratimit të nismës serbe në OKB, në një afat të shkurtër do të ketë një ndikim negativ në procesin e njohjes, por në një afat të gjatë ajo nuk prodhon asnjë efekt juridik për Kosovën. Në një intervistë për BBC-në ai se nisma e Serbisë është kundër interesave dhe paqes në rajon dhe gjithashtu kundër interesave dhe marrëdhënieve ndërmjet Kosovës dhe Serbisë. Ministri i Jashtëm i Kosovës dhe presidenti, Fatmir Sejdiu, kanë filluar, në dy ditët e para të punimeve të Asamblesë së Përgjithshme, një fushatë kundër nismës serbe në OKB në Nju Jork dhe kanë takuar një numër të përfaqësuevse të vendeve anëtare në organizatën botërore. "Në të gjitha këto takime shqetësim kryesor është njohja e mëtejme e shtetit të Kosovës dhe njëkohësisht edhe nisma serbe për ta dërguar çështjen e Kosovës, aktin e shpalljes së pavarësisë së saj, në Gjykatën Ndërkombëtare të Drejtësisë. Pa përjashtim në të gjitha takimet, madje duke e përfshirë edhe një takim krejt të rastësishëm me ministrin e Jashtëm të Spanjës, Moratinos, kemi shfrytëzuar që të bëjmë thirrje dhe kërkesë që shteti i ri i Kosovës të njihet sa më shpejt", theksoi Hyseni. Sipas Hysenit akti i votimit për nismën serbe mund të mos ndodhë gjatë Asamblesë së Përgjithshme dhe ai mund të shtyhet për më vonë.

Halimi vë në pikëpyetje pjesëmarrjen e tij të mëtejshme në parlamentin serb

Novi Sad, 24 shtator - Deputeti i vetëm shqiptar në Kuvendin e Serbisë dhe lideri i PVD, Riza Halimi, ka vënë në pikëpyetje pjesëmarrjen e tij të mëtejshme në parlamentin serb, për shkak të qëndrimit të qeverisë së Serbisë ndaj problemeve të shqiptarëve në Luginën e Preshevës. "Për fat të keq është fakt se për shkak të qëndrimit që qeverisë së Serbisë ndaj problemeve të shqiptarëve të komunave të Medvegjës, Bujanovcit dhe Preshevës, me të drejtë shtrohet pyetja se a ka kuptim që unë të jem vetëm dekor në Kuvendin Popullor, të jem fikus (lule) me të cilin pushteti aktual do të lavdërohet në takimet me përfasqësuesit e bashkësisë ndërkombëtare", ka thënë Halimi për gazetën e Novi Sadit "Dnevnik". Mirëpo sipas tij, një vendim i tillë i madh, siç është dalja nga parlamentii, duhet të merret në Kuvendin e shqiptarëve të Luginës së Preshevës, ku janë të përfaqësuara të gjitha partitë shqiptare. Një nga problemet që i ka zemëruar shqiptarët e Luginës së Preshevës është edhe vendimi i qeverisë serbe që të mos njohë diplomat me vulat UNMIK-ut të Universitetit të Prishtinës. Halimi pohon se megjithëse ka kërkuar takime me Presidentin dhe Kryeministrin e Serbisë, por liderët "proevropian" serbë e kanë injoruar fare kërkesën e tij. Edhe lideri i Lëvizjes për Progres Demokratiik Jonuz Musliu ka deklaruar se partia e tij si partner e koalicionit me partiëne Halimit, ka kërkuar rishqyrtimin e pjesëmarrjes së mëtejshme të deputetit Riza Halimi në punën e Kuvendit të Serbisë. Musliu thotë se "ngrirja" e pjesëmarrjes së Halimit në punët e parlamentit do tregojë qartë pakënaqësinë e shqiptaarëve për shkak të sjelljeve ksenofobike të qeverisë serbe ndaj popullit shqiptar në Luginën e Preshevës dhe përmbajtjes shoveniste të vendimit të saj për mosnjohjen e diplomave me vulën e UNMIK-ut.

Në Asamblenë e OKB së, Ban kërkoi krijimin e një udhëheqjeje botërore

Nju Jork, 24 shtator - Në Asamblenë e përgjithshme e OKB së, Sekretari i përgjithshëm, Ban Ki Mun, kërkoi krijimin e një lloj udhëheqje botërore, e cila do të kujdesej për menaxhimin e krizave. Ndërkaq, presidenti amerikan, Xhorx Bush, tha se organizatat multilaterale tani janë më të nevojshme se kurrë më parë, për luftimin e terrorizmit dhe ekstremizmit botëror. "Vendet e kësaj organizate duhet të jenë të bashkuara në luftën kundër terrorit dhe terrorizmit gjithandej në botë. Duhet të punojmë në zbatimin e plotë të Rezlutës 1540, të KS të OKB, e cila parashikon edhe vendosjen e sanksioneve kundër Koresë së Veriut dhe Iranit. Nuk duhet të ndalemi deri sa njerëzit nuk janë të sigurt prej kësaj forme kërcënimi të civilizimit", theksoi Bush. Ndërkaq, udhëheqësi i BE së, presidenti francez, Nikola Sarkozi është i mendimit se duhet krijuar hapësirë e përbashkët, ku do të përputheshin interesat ekonomike të Evropës dhe Rusisë. Në Nju Jork gjendet edhe presidenti dhe ministri i jashtëm i Kosovës, Fatmir Sejdiu dhe Skender Hyseni. Ata do të kenë rreth 50 takime të ndryshme ku do të kërkohet mospranimi i iniciativës serbe dhe vazhdimi i procesit të njohjes së pavarësisë.

Shtainmajer për zgjidhje politike të krizës në Lindjen e Mesme

Nju Jork, 24 shtator - Ministri i jashtëm gjerman Frank Valter Shtainmajer ka kërkuar prej palëve që konflikti në Lindjen e Mesme të zgjidhet me mjete paqësore. Pas takimit me presidentin palestinez, Mahmud Abaz, të zhvilluar në kuadër të Asamblesë së përgjithshme të OKB së, ministri i jashtëm gjerman e quajti të domosdoshme heqjen dorë nga dhuna dhe përfundimin e ndërtimeve izraelite. Shtainmajer është takuar edhe me homologun e tij sirian, Valid al Mualim. Sipas bindjes së ministrit të jashtëm gjerman, pa Sirinë nuk është e mundur vendosja e paqes në këtë rajon. Ministri i jashtëm gjerman në OKB, foli edhe për raportet mes Evropës dhe Amerikës, në veçanti në kuadër të fushatës elektorale amerikane.

Nga një shpërthim i një mine tokësore, vriten 3 policë

Kabul, 24 shtator - Nga një shpërthim i një mine tokësore, të vënë nga kryengritësit talebanë në një vendroje policore në kryeqytetin afgan, Kabul, janë vrarë sot (e mërkurë) tre policë, ka bërë të ditur një zyrtar policie, njofton Rojter. Shpërthimi ndodhi kur një grup zyrtarësh policie po hetonin vrasjen e tre policëve të tjerë të vrarë gjatë natës në një sulm të talebanëve. Në këtë shpërthim janë plagosur disa policë, ndër të cilët edhe një oficer i lartë i qytetit, Ali Shah Paktiaval. Talebanët nuk e kanë komentuar incidentin.

Lona · 24-09-08, 12:23

Së pari Greqia, pastaj Maqedonia

Një ofertë joshëse ka ardhur nga Uashingtoni për tejkalim të kontestit rreth emrit mes Greqisë dhe Maqedonisë, por edhe për evitimin e ngecjes në procesin e njohjes së pavarësisë së Kosovës nga ana e Shkupit dhe Athinës zyrtare. Këtë ofertë e ka plasuar edhe Greqia. Diplomacia greke, për të evituar situatën e krijuar rreth njohjes së Kosovës dhe shantazhimet që ia kanë bërë Prishtinës zyrtare për të mos lidh marrëdhënie diplomatike me Shkupit me emrin kushtetues, ka ndërmarr një iniciativë për tejkalim të dallimeve, duke shpresuar se negociatat përfundimtare për zgjidhjen e emrit kontestues të Maqedonisë, do të rezultojnë pozitivisht për grekët. Burime diplomatike për “Lajm”, me kusht anonimiteti, kanë thënë se vendimtare ka qenë ndërhyrja e diplomacisë amerikane, e cila ka kërkuar me urgjencë të përmbyllet kontesti rreth emrit kushtetues të Maqedonisë dhe sa më shpejt Shkupi dhe Athina të njohin pavarësinë e Kosovës. “Në New York do t’u bëhet me dije presidentit të Maqedonisë dhe shefes së diplomacisë greke se kontesti greko-maqedonas rreth emrit duhet të përfundojë deri kah mesi i tetorit, ndërsa më pasa duhet që Greqia dhe Maqedonia të njohin Kosovën”, tha ky diplomat. Jozyrtarisht merret vesh se SHBA-të kanë bërë presion ndaj Athinës dhe Shkupit për t’u arritur marrëveshje dhe se Maqedonia do të kërkojë nga Asambleja e Përgjithshme e OKB-së të votojë për përfundimin e marrëveshjes kohore të arritur në vitin 1995 dhe me këtë do të përfundonte roli ndërmjetësues i OKB-së.
Po ashtu gjatë qëndrimit në New York, në mbledhjen e 63 të Asamblesë së Përgjithshme të OKB-së, ekziston mundësia që, nën drejtim të sekretares amerikane të shtetit Kondoliza Rajs, të zhvillohet një takim ku do të merrnin pjesë presidenti i Maqedonisë, Branko Cërvenkovski, shefja e diplomacisë greke Dora Bakojani dhe presidenti i Kosovës, Fatmir Sejdiu, dhe do të jepeshin agjendat konkrete të veprimit diplomatik të Athinës, Shkupit dhe Prishtinës.
Varianti që së pari Athina të njeh pavarësinë e pastaj Shkupi, i është përmendur presidentit dhe kryeministrit të Kosovës nga përfaqësuesi i Zyrës greke në Prishtinë, Dimitris Moscopoulos. Mësohet se edhe presidenti Sejdiu dhe kryeministri Thaçi, pas telefonatave që kanë realizuar me partnerët e koalicionit qeverisës në Maqedoni – Ali Ahmeti dhe Nikolla Gruevski, janë dakorduar për shtyrje të njohjes së Kosovës nga ana e Shkupit zyrtar.
Ndërkohë të dielën mbrëma në Shkup janë takuar urgjentisht kryeministri Gruevski dhe Ali Ahmeti, kryetar BDI-së, partisë shqiptare në pushtet. Qeveria e Maqedonisë ka ripërsëritur qëndrimin se mbetet në pozicionin e njëjtë për sa i përket njohjes së Kosovës. Por, para shpalljes së pavarësisë, Shkupi zyrtar pohonte se do ta përcjell qëndrimin e SHBA-ve dhe BE-së, ndërsa Maqedonia e para e njohu Planin e Ahtisaarit, ku parashihej edhe përshkrimi i vijës kontestuese kufitare, proces që përfundoi të hënën, dhe ishte një kusht i vënë i Qeverisë së Shkupit për njohje të Kosovës.

Prishtina pret njohjen
Prishtina zyrtare deri më tani është e përmbajtur në reagime të mosnjohjes nga Shkupi zyrtar. Zëvendëskryeministri Hajredin Kuçi ka thënë se nuk është në dijeni për një ofertë të Greqisë, që e para të njoh Kosovën e më pas të vijojë Maqedoni.
Dhe, derisa së fundi kryeministri Hashim Thaçi është shprehur se njohja e pavarësisë nga Maqedonia do të ndikonte në bashkëpunimin ndërmjet dy vendeve, sipas kryetarit të Kuvendit të Kosovës, Jakup Krasniqi, zvarritja e njohjes nga Maqedonia është pasojë e mos unitetit të faktorit politik shqiptar atje. “Mendoj se ata duhet të mendojnë edhe për vete edhe për të ardhmen tonë të përbashkët në përgjithësi. Ne nuk jemi të interesuar të kemi kurrfarë tensionimi të raporteve”, tha të martën Krasniqi.

uliksi31 · 08-10-08, 00:05

Sekretari Gejts mbërrin në Ohër për një takim të ministrave të mbrojtjes të Europës Juglindore
Zëri i Amerikës
07-10-2008

Sekretari amerikan i Mbrojtjes, Robert Gejts ndodhet në Ohër të Maqedonisë, ku do të marrë pjesë në një takim të ministrave të mbrojtjes të Europës Juglindore.
Ai shkoi në Maqedoni pas një vizite të shkurtër sot në Kosovë ku ritheksoi mbështetjen e Shteteve të Bashkuara për shtetin e ri dhe deklaroi se trupat amerikan do të qendrojnë atje të paktën deri në fund të vitit 2009.
Ai është zyrtari më i lartë amerikan që viziton Kosovën që kur ajo shpalli pavarësinë nga Serbia më 17 shkurt.
Zoti Gejts, i cili bisedoi me zyrtarët më të lartë të Kosovës, tha se qëllimi i tij kryesor ishte të takohej me trupat amerikane. Shtetet e Bashkuara kanë rreth 1,500 trupa në Kosovë, si pjesë e forcës paqeruajtëse të NATO-s.
Zoti Gejts tha se trupat amerikane do të qendrojnë atje deri të paktën nga fundi i vitit 2009. Ai ritheksoi zotimin që Presidenti Bush u ka dhënë shqiptarëve të rajonit se Shtetet e Bashkuara kanë hyrë së bashku me aleatët në Kosovë dhe do të largohen së bashku.
Zoti Gejts tha se nuk beson që ndarja e Kosovës është pjesë e zgjidhjes tani apo në të ardhmen. Shtetet e Bashkuara tha ai, mbështesin tërësinë tokësore të Kosovës.
Të enjten dhe të premten zoti Gejts do të marrë pjesë në një takim të NATO-s në Hungari.

Honesty^uk. · 08-10-08, 18:30

18:00/08.10.08 - Asambleja e OKB voton pro kerkeses serbe per Kosoven

Asambleja e përgjithshme e OKB-së ka aprovuar një kërkesë të Serbisë për t'i kërkuar një gjykate ndërkombëtare të OKB të vendosë nëse shpallja e pavarësisë së Kosovës ishte e ligjshme.
Kjo lëvizje sipas disa shteteve perëndimore do të ngadalësojë integrimin e Kosovës në komunitetin botëror.

Pritet që Gjykata Ndërkombëtare e Drejtësisë në Hagë të kërkojë dy vjet që të nxjerrë opinionin e vet.

Beogradi thotë se marrja e një këshille neutrale juridike do të ndihmojë në ulje të tensioneve në rajon, por përkrahës të Kosovës thonë se do të ngadalësojë integrimin e Prishtinës në komunitetin ndërkombëtar.

Gjykata Ndërkombëtare e Drejtësisë do të japë vetëm një opinion i cili nuk është i detyrueshëm për t'u zbatuar.

Shtatëdhjetë e shtatë vende votuan pro, gjashtë kundër dhe 74 abstenuan.

Pjesa më e madhe e vendeve të BE-së abstenuan. Britania e cilësoi kërkesën e Serbisë si politike.

Por BE ishte e ndarë me Rumaninë, Slllovakinë, Spanjën, Greqinë dhe Qipron që votuan në favor.

uliksi31 · 09-10-08, 08:15

OKB: Asambleja e Përgjithëshme voton pro kërkesës së Serbisë

Margaret Beshir, Nju Jork

Zëri i Amerikës
08-10-2008

Asambleja e Përgjithëshme e Kombeve të Bashkuara miratoi kërkesën që Gjykata Ndërkombëtare e Drejtësisë të japë opinionin e saj, nëse shpallja e pavarësisë nga Kosova përputhet apo jo, me të drejtën ndërkombëtare.

Rezultati i votimit sot në Asamblenë e Përgjithshme ishte 77 vota pro, 74 abstenime dhe 6 vota kundër.
Shumë nga vendet që abstenuan apo që votuan kundër rezolutës për t'ja referuar çështjen Gjykatës, thanë se e bënë këtë, pasi Serbia po i kalonte një organi juridik një çështje që në thelb është politike.

Gjykata Ndërkombëtare e Drejtësisë me seli në Hagë është organi kryesor juridik i Kombeve të Bashkuara.

Shtetet e Bashkuara ishin një prej 6 vendeve që votuan kundër rezolutës. Përfaqësuesja amerikane Rozmari DiKarlo tha se kërkimi i opinionit të gjykatës për këtë çështje do të ishte "i panevojshëm dhe i dëmshëm", dhe ajo shtoi se Shtetet e Bashkuara kanë besim se njohja e pavarësisë së Kosovës nga një numër gjithnjë e më i madh vendesh është në përputhje me ligjin ndërkombëtar.
"Nga pikëpamja praktike, pavarësia e Kosovës është e pakthyeshme. 48 vende e kanë njohur Kosovën si një shtet të pavarur, përfshirë 22 nga 27 vendet e Bashkimit Evropian,"- tha zonja Di Karlo.
Por Afrika e Jugut, që votoi pro rezolutës, tha se vetëm njohja nuk mjafton. Ambasadori Dumisani Kumalo:
"Ndërsa është e vërtetë që 48 vende e kanë njohur Kosovën, po ashtu është e rëndësishme që 144 vende të tjera anëtare të OKB-së nuk kanë marrë ende një vendim."
Britania abstenoi nga votimi dhe më pas, ambasadori Xhon Sojers tha se ndërsa qeveria e tij e mbështet gjykatën ndërkombëtare, ajo është skeptike përsa i takon qëllimit të të kërkuarit të një vendimi, që nuk ka fuqi ligjore, për këtë çështje.
"Për ne nuk ka kuptim kërkesa e bërë nga Serbia. Opinioni këshillues nuk mund të jetë në vetvete përcaktues për statusin e Kosovës,"- tha ai.
Ministri i Jashtëm i Serbisë Vuk Jeremiç e paraqiti rezolutën në Asamble, duke thënë se votimi kundër saj do të thoshte se asgjë nuk mund të bëhet ndaj gjithë atyre që kërkojnë shkëputje dhe argumentojnë se rasti i tyre është i veçantë.
Javën e kaluar, Ministri i Jashtëm i Kosovës Skënder Hyseni u tha gazetarëve në OKB, se miratimi i rezolutës, do të dëmtonte marrëdhëniet në të ardhmen mes Kosovës dhe Serbisë dhe do të ngadalësonte procesin e njohjes së vendit të tij.
Analistët thonë se vendimi i Gjykatës Ndërkombëtare të Drejtësisë mbi këtë çështje do të marrë nga një deri në dy vjet. Disa diplomatë shprehën shqetësim se një vonesë e tillë nuk është në interes të stabilizimit të Ballkanit të jugut.

Dilaver · 09-10-08, 18:35

Edhe një tullë i shtohet pavarsisë së Kosovës.

Mali i zi e ka njohur pavarsinë e Kosovës në mbledhjen e sotme, edhe pse kishte kundërshtime nga opozita.

Njoftimi zyrtar pritet shpejt sipas të gjitha gjasave sonte, ose ...

Llapjani_HH · 09-10-08, 18:44

Mali i Zi vendi i 49 që njohu pavarësinë e Kosovës

Qeveria e Malit të Zi e ka njohur Kosovën si shtet të pavarur, njoftoi ministri i jashtëm, Milan Rochen. "Qeveria njëzëri ka vendosur ta njohë Republikën e Kosovës", u tha ai reporterëve. Pas vendimit të Podgoricës numri i vendeve qe kanë njohur Republikën e Kosovës arrin në 49. Sonte pritet që edhe Maqedonia ta njohë zyrtarisht pavarësinë e Kosovës.
Pak minuta pas njohjes, Ferhat Dinosha, duke përshkruar atmosferën në Mal të Zi pas njohjes së Kosovës, ka thënë se gjithsesi shqiptarët po festojnë, mirëpo ka theksuar se edhe ato forca të cilat e kanë njohur pavarësinë e Kosovës po dëshmojnë se janë për forcimin e sigurisë në rajon dhe se po punojnë në drejtim të integrimeve euroatlantike.

Përfaqësuesit e opozitës malazeze,e cila është kryekëput proserbe, nuk kanë arritur ta bindin kryeministrin Gjukanoviq që të heqë dorë nga qëllimi që Qeveria e tij ta nxjerrë vendimin për njohjen e pavarësisë së Kosovës. Këtë ua kanë pohuar gazetarëve përfaqësuesit e opozitës, pas takimit me kreun e shtetit, diç pas orës 18:00, dhe më pastaj ka vazhduar mbledhja e Qeverisë ku në rendin e ditës është marrja e vendimit për njohjen e pavarësisë së Kosovës.

Më herët lideri i Partisë Popullore Serbe, Andrija Mandic, i ka deklaruar Tanjug-ut se opozita kurrë nuk do ta pranojë një vendim të tillë dhe se do t’i nxjerrë njerëzit në rrugë dhe do të kërkojë që vendimi të verifikohet në referendum dhe se deri atëherë do t’i bojkotojë të gjitha organet shtetërore, njoftojnë mediat serbe.

s.b & RTK

Honesty^uk. · 09-10-08, 22:06

Edhe Maqedonia njohu pavarësinë e Kosovës

Po sot në orët e mbrëmjes edhe Kuvendi i Maqedonisë ka votuar rezolutën për njohjen e Kosovës – shtet të pavarur e sovran. 85 deputetë të Kuvendit kanë votuar pro njohjes së pavarësisë së Kosovës dhe vetëm një votë ka qenë kundër.

Fillimisht, me shumicë votash është hedhur poshtë propozimi i partive opozitare maqedonase që të ndërpritet seanca dhe projekt-rezoluta të futet për debat të komisioneve parlamentare dhe më pas të arrijnë në debatin parlamentar.
| s.b & RTK staff |
09 tetor 2008 - 21:55:46

Llapjani_HH · 13-10-08, 17:28

Kosovarët ndodhen nën tri protektorate, Unmik, ICO si dhe EulexBerlin, 13 tetor

Fondacioni gjerman "Fridrih Ebert", ka botuar analizën "Kosova pas pavarësisë", në të cilën autorët e saj, Vedran Xhihiq dhe Helmut Kramer, analizojnë qëllimet e paarritura, shpresat e humbura dhe rolin e komunitetit ndërkombëtar në Kosovë. Ata mendojnë se komuniteti ndërkombëtar ka arritur vetëm suksese të pjesshme në Kosovë dhe se gjendja e kosovarëve nuk është përmirësuar vërtet. "Kosovarët kanë pritur shumë prej pavarësisë. Tani ndryshimi i planifikuar i kontrollit ndërkombëtar nga Unmik në Eulex nuk është bërë ose ka marrë formë kaotike. Aktualisht tani kosovarët ndodhen me tre protektorate, Unmik, ICO si dhe Eulex. Të gjitha zhvillimet që përmban plani i Ahtitaaarit janë shtyrë", tha Kramer. Sipas tij, "pika tjetër është se njërezit në Kosovë kanë kanë pritur me shumë durim përmirësimin e situatës ekonomike, por ajo vazhdon të jetë katastrofale". Ai kritikon BE sepse siç thotë problemi nuk është marrë në dorë për tu zgjidhur, por dërgohen në Kosovë 2 mijë policë, miliona euro dhe kërkush nuk merren me çështjet ekonomike, infrastrukturën dhe sektorët e tjerë. Në liberalizimin e vizave nuk ka ndryshuar asgje. Në shumë vende ndihet pakënaqësia në rritje e popullsisë, dhe komuniteti ndërkombëtar rri me duart kryq para një situate të tillë, tha për DV njëri nga autorët e analizës Helmut Kramer . Gjithahstu Kramer mendon se "komuniteti ndërkombëtar, në këtë rast me shumë BE nuk e ka arritur qëllimin kryesor, atë të sigurimit të mos ndarjes së Kosovës", duke shtuar se "një zhvillim negativ është ndarja de facto e vendit në veriu, dhe qendër dhe jug".

QIK-u

Dilaver · 13-10-08, 22:41

Në kryeqytetin e Malit të Zi Podgoricë ka përfunduar me përleshje protesta e sotme kundër njohjes së pavarsisë së Kosovës. Protestat u organizuan nga partit proserbe (PPop.Serbe, P.Popullore, PDem.S dhe Lista Serbe).
Protesta ishte e dhunshme dhe si pasojë lendime kanë pësuar 34 vetë prej të cilëve 23 polic, ndërsa 28 të tjerë janë arrestuar.

uliksi31 · 14-10-08, 08:29

Proteste ne Mal te Zi,per ate qe e prenuan Kosoven te Pamvarur

Protestet ne Mal te Zi u organizuan nga disa parti pro serbe,ne kryeqytetin e Malit te Zi (Podgorice),ishin te bashkuar protestantit,te cilet protestuan per ate qe Mali i Zi vendosi ta prenoj Kosoven te pamvarur.

Sic bejn te ditur mediat malazeze,ne proteste erdhi tek shum incidente,ku u lenduan shum njerz dhe polici.Kur protestuesit shkuen tek parlamenti i Malit te Zi,erlli deri tek konflikti ne mes te Policise dhe protestanteve.
Organizatoret e keti mitingu kerkuan qe Mali i Zi deri mbas neser me 15.10 deri ne ora 11:00 ta anuloj vendimin mbi prenimin e Kosoves.Dhe qe Parlamenti te formoj zgjedhjet ku populli do te votoj a do ta prenoj Kosoven apor jo.

Proteste ne Mal te Zi,

Skyfter · 14-10-08, 13:42

Citim:

Postimi origjinal është bërë nga uliksi31-jr.

Proteste ne Mal te Zi,per ate qe e prenuan Kosoven te Pamvarur

Protestet ne Mal te Zi u organizuan nga disa parti pro serbe,ne kryeqytetin e Malit te Zi (Podgorice),ishin te bashkuar protestantit,te cilet protestuan per ate qe Mali i Zi vendosi ta prenoj Kosoven te pamvarur.

Sic bejn te ditur mediat malazeze,ne proteste erdhi tek shum incidente,ku u lenduan shum njerz dhe polici.Kur protestuesit shkuen tek parlamenti i Malit te Zi,erlli deri tek konflikti ne mes te Policise dhe protestanteve.
Organizatoret e keti mitingu kerkuan qe Mali i Zi deri mbas neser me 15.10 deri ne ora 11:00 ta anuloj vendimin mbi prenimin e Kosoves.Dhe qe Parlamenti te formoj zgjedhjet ku populli do te votoj a do ta prenoj Kosoven apor jo.

Proteste ne Mal te Zi,

Ka asi njerz qe kur te fundoset anija ankohen se i ka lag uji!