Lobimet për njohjen e Kosovës

[Zero Cool]

Mediet në Egjipt nxisin autoritetet që ta njohin sa më parë Kosovën






Nga Express më 18 shtator 2011 në ora 18:43
Vizita e Ministrit të Punëve të Jashtme të Republikës së Kosovës, Enver Hoxhaj në Egjipt, është përcjellur me interesim të madh nga mediet e shkruara dhe elektronike të këtij shteti.

Gazetat egjiptiane kanë përcjellur vizitat dhe takimet e shumta të Ministrit Hoxhaj me personalitetet politike dhe përfaqësuesit e shoqërisë civile dhe bashkësive fetare në Kajro, si dhe kanë botuar editoriale, opinione dhe reportazhe të ndryshme, e përbashkëta e të cilave ishte apeli i medieve egjiptiane që ky shtet ta njohë sa më parë shtetin e pavarur dhe sovran të Kosovës.

“Ministri i Jashtëm i Kosovës, Enver Hoxhaj, ka arritur në Kajro, në vizitën e parë të një zyrtari kosovar që nga shpallja e pavarësisë në vitin 2008. Hoxhaj, ka nisur vizitën e tij treditore, me vizitën në Sheshin Tahrir. Hoxhaj tha se Sheshi Tahrir tani është bërë vlerë e gjithë botës, dhe jo vetëm e arabëve. Ai tha se ky shesh përfaqëson lirinë dhe luftën, duke shtuar se liria dhe lufta që e ka bërë populli egjiptian në këtë shesh, ka frymëzuar popullin e Kosovës dhe gjithë botën me mënyrën e protestave paqësore e civilizuese, si dhe këmbënguljen për të arritur të drejtat dhe liritë e veta”, thuhej në njërën prej gazetave egjiptiane, ku shpalosej agjenda e Ministrit Hoxhaj gjatë vizitës në këtë shtet.

Një gazetë tjetër e Kajros në shkrimin e saj thotë se Ministri i Jashtëm i Kosovës, Enver Hoxhaj, në konferencën e organizuar nga Sindikata e Gazetarëve të Egjiptit me titull “Pavarësia e Kosovës”, ka thënë se qëllimi i vizitës në Egjipt është njohja e pavarësisë së Kosovës nga Egjipti. Ai ka falënderuar mikpritjen e Egjiptit, e veçanërisht njohjen e shtetit të tij nga të Rinjtë e Revolucionit.

Hoxhaj ka konfirmuar se shteti i tij është njohur nga shumë shtete, por synon shtimin e njohjeve dhe anëtarësimin në Kombet e Bashkuara. Hoxhaj ka shtuar se Sheshi Tahrir nuk është simbol i lirisë vetëm në Egjipt, por i lirisë në gjithë botën arabe. Ai ka përmendur mosnjohjen e Kosovës nga shtetet arabe, pavarësisht se 95 % e banorëve të saj janë myslimanë, ndërsa vetëm 10 shtete arabe nga 22 sosh kanë njohur Kosovën.

“Stabiliteti politik në Kosovë ka ndihmuar zhvillimin e lartë ekonomik. Hoxhaj ka kërkuar nga Egjipti i ri që të ndjek politikë të re ndaj Kosovës, dhe kjo politikë duhet të jetë njohja e pavarësisë. Por, vendimi i njohjes është vendim sovran që i takon Egjiptit e jo Kosovës, dhe ka shprehur interesimin për bashkëpunim në fushën ekonomike, turizmit e shkëmbimit kulturor. Hoxhaj ka shtuar se ndryshimi në shoqërinë egjiptiane ka qenë i domosdoshëm, por kjo duhet të ndodhë edhe në të gjitha shtetet arabe”, thuhej në artikull.

“Kryetari i Partisë al-Wafd, Sayyid al-Badawi, ka deklaruar se do të ketë rol të madh në thellimin e marrëdhënieve ekonomike midis Kosovës dhe Egjiptit, dhe ka propozuar mbajtjen e një konference të biznesmenëve nga të dy vendet për të udhëhequr nismën për njohjen e Kosovës. Ai ka rikonfirmuar njohjen e Kosovës nga partia e tij, dhe ka shtuar se do të mbështesë njohjen përmes Aleancës Demokratike, pjesë e së cilës janë 35 parti (ndër të cilat edhe partia e tij)”, thuhej në gazetë tjetër egjiptiane.

Hoxhaj ka përshëndetur njohjen e Kosovës nga Partia al-Wafd në muajin maj, dhe ka përshëndetur rolin e kësaj partie në njohjen e Kosovë, kurse përfaqësuesit e kësaj partie kanë thënë se gjatë vizitës që do të kenë në Libi më 23 shtator, do të ngrisin çështjen e njohjes së Kosovës gjatë takimit me Këshillin Transitor të Libisë.

“Gjatë takimit që Ministri i Jashtëm i Kosovës, Enver Hoxhaj, pati me kryemyftiun e Egjitpt, Ali Gomaa, e falënderoi këtë fundit për mbështetjen që i është dhënë institucioneve fetare në fushën e thirrjes islame. Hoxhaj ka konfirmuar thellësinë e marrëdhënieve historike midis Egjiptit dhe Kosovës, duke shtuar se Egjipti me Az’harin është lidere e botës arabe dhe islame. Ai ka kërkuar nga qeveria egjiptiane që të njohë sa më shpejt shtetin e Kosovës”, thuhej në një gazetë tjetër prestigjioze egjiptiane.

[Zero Cool]

Haxhinasto, vëmendje të veçantë lobimit për Kosovën





Nga Express më 19 shtator 2011 në ora 12:16
Zëvendëskryeministri dhe ministri i Jashtëm i Shqipërisë, Edmond Haxhinasto ka udhëtuar për në SHBA, për të marrë pjesë në Sesionin e 66 të Asamblesë së Përgjithshme të OKB-së.

Një vëmendje të veçantë, gjatë punimeve të Asamblesë së Përgjithshme, do t’i kushtohet Kosovës dhe lobimit për rritjen e njohjeve ndërkombëtare të saj.

Zyra e shtypit e MPJ-së së Shqipërisë bëri të ditur se gjatë punimeve të Sesionit të 66 të Asamblesë së Përgjithshme, kryediplomati shqiptar, do të zhvillojë një sërë takimesh të nivelit të lartë, si dhe do të marrë pjesë në disa aktivitete të rëndësishme, si Forumi i Parë i Investimeve Shqipëri SHBA.

[Zero Cool]

Pacolli në Nju York rimerr premtim për njohje nga Tanzania


Në kuadër të angazhimeve lobuese për njohjen e Republikës së Kosovës, zëvendëskryeministri i parë i Qeverisë së Kosovës Behgjet Pacolli po qëndron në Nju Jork të SHBA-së, ku po zhvillohen punimet e Asamblesë së Përgjithshme të OKB-së.






19 shtator 2011
Ekonomisti

Pacolli ka zhvilluar një takim të shkurtër me presidentin e Tanzanisë Jakaya Kikwete dhe ministrin e Punëve të Jashtme të këtij shteti Bernard Membe. Edhe në këtë takim, Pacolli i është rikonfirmuar se njohja nga Tanzania do të ndodhë në një të ardhme shumë të afërt. Po ashtu Pacolli ka marrë garanci nga presidenti Kikwete se Tanzania do të angazhohet që Kosova ta ketë njohje nga të gjitha shtetet anëtare të SADC (komuniteti zhvillimor i vendeve të Afrikës Jugore), në të cilën bëjnë pjesë 14 shtete.
Pacolli, në ditët në vijim do të zhvillojë takime të shumta me udhëheqës të shteteve që ende nuk e kanë njohur Kosovën.

[Zero Cool]

Ahtisaari shprehet i shqetësuar për njohjet






Presidentja e Republikës së Kosovës, Atifete Jahjaga, gjatë qëndrimit në New York, i shoqëruar nga ambasadori i Republikës së Kosovës në SHBA, Avni Spahiu, u takua me ish-ndërmjetësin e OKB-së për statusin e Kosovës, Martti Ahtisaari. Presidentja Jahjaga e falënderoi ish-presidentin finlandez për punën dhe mbështetjen e tij për Kosovën dhe tha se vendi ka shënuar përparime të mëdha në veçanti në zbatimin e planit të hartuar prej tij.
Presidentja Jahjaga tha se Plani Ahtisaari ka ofruar mundësi të mëdha për komunitetin serb dhe theksoi rëndësinë e shtrirjes së tij edhe në pjesën veriore të Kosovës, me qëllim të integrimit të plotë të komunitetit serb që jeton atje. Ajo tha se shpërbërja e strukturave ilegale serbe në veri do të mundësonte edhe zhvillimin ekonomik për këtë pjesë të Kosovës dhe komunikimin më të lirë dhe të drejtpërdrejtë të qytetarëve serbë në veri me institucionet e Kosovës.

Presidentja Jahjaga tha se Kosova është shtet sovran dhe pavarësia e saj është e pakthyeshme dhe e njohur ndërkombëtarisht. Ajo tha se Kosova dhe Serbia kanë synim integrimin në strukturat euroatlantike dhe ato duhet që ta ndihmojnë njëra-tjetrën në këtë rrugë. Presidentja Jahjaga tha se Kosova ka nevojë për marrëdhënie kontraktuale me BE-në që të thellojë reformat e brendshme dhe të përshpejtojë procesin e përafrimit me strukturat euroatlantike.

Ish-presidenti finlandez Ahtisaari e përgëzoi Presidenten për punën e saj dhe vlerësoi të arriturat e Kosovës në kohët e fundit. Ai tha se është i gatshëm që të ndihmojë Kosovën në përpjekjet e saj në skenën ndërkombëtare por theksoi se është i shqetësuar me procesin e ngadalshëm të njohjeve të pavarësisë së saj.

Ish-presidenti Ahtisaari tha se mosnjohja e Kosovës nga pesë vende të BE-së e ka vështirësuar rrugën e saj dhe theksoi se BE-ja duhet të dërgojë porosi të qarta për gjithë rajonin dhe për Kosovën në veçanti për proceset integruese. Ai tha se duhet të qartësohen të gjitha pengesat që po i bëhen Kosovës që ajo të vazhdojë zhvillimin e saj në të gjitha fushat. Ish-Presidenti Ahtisaari tha se shpreson për ndryshim të gjendjes në veri të Kosovës dhe për integrimin e serbëve të kësaj pjese. /Telegrafi/

[Zero Cool]

Brunei drejt njohjes së Kosovës







Kryeministri i Republikës së Kosovës, Hashim Thaçi dhe ministri i Punëve të Jashtme Enver Hoxhaj, kanë zhvilluar takime me përfaqësues të vendeve anëtare të Ligës Arabe dhe Organizatës për Kooperim Islamik ku kanë marrë premtime për njohje të pavarësisë së Kosovës nga disa shtete anëtare të këtyre dy organizatave.
Kryeministri Thaçi dhe ministri Hoxhaj po ashtu kanë takuar Princin e Sulltanatit të Bruneit, Al-Muhtadee Billah Ibn. Princi, gjatë takimit i ka konfirmuar kryeministrit dhe ministrit të Jashtëm të Kosovës, se shteti i tij është në proces të vendimmarrjes për njohjen e Kosovës, shtet sovran dhe i pavarur.

Kryeministri Thaçi e ka falënderuar Princin Al-Muhtadee Billah Ibn dhe ka theksuar se pas vendosjes së marrëdhënieve diplomatike mes dy vendeve, Republika e Kosovës është e interesuar të zhvilloj marrëdhëniet ekonomike, arsimore dhe kulturore me Brunein.

Po ashtu, kryeministri dhe ministri kanë zhvilluar takime me përfaqësues të vendeve anëtare të CARICOM-it, ku kanë marrë premtime nga këto shtete për njohjen e Republikës së Kosovës në një të ardhme të afërt.

Në një tjetër takim, Hoxhaj ka takuar ministrin e Drejtësisë të Zelandës së Re, i cili kryeson delegacionin e këtij shteti në Asamblenë e Përgjithshme të OKB-së. Ata kanë biseduar për intensifikimin e marrëdhënieve e gjithanshme bilaterale mes dy shteteve.

Ministri Hoxhaj po ashtu ka takuar disa përfaqësues të vendeve që shtrihen në ishujt e Pacifikut. Hoxhaj ka kërkuar nga udhëheqësit e tyre që sa më shpejtë të marrin vendimin për njohjen e shtetit të pavarur dhe sovran të Kosovës, vendim që do të ndikonte në stabilitetin e rajonit.

Po ashtu, gjatë kësaj dite, ministri i Jashtëm dhe homologu i tij nga Malta, Tonio Borg, kanë nënshkruar marrëveshjen për vendosjen e marrëdhënieve diplomatike mes Republikës së Kosovës dhe Republikës së Maltës.

“Po ashtu jemi marrë vesh që disa diplomatë të rinj nga MPJ e Kosovës do të avancojnë përgatitjet profesionale në këtë shtet”, bëri të ditur Hoxhaj.

Gjatë ditës, Kryeministri Thaçi dhe Ministri Hoxhaj kanë zhvilluar një takim edhe me Emirin e Katarit, Sheikh Hamad bin Khalifa al-Thani, i cili ka premtuar se do të vazhdojë ta mbështesë Kosovën në procesin e njohjeve të reja ndërkombëtare. /Telegrafi/

[Zero Cool]

Njohje pa letra


9:24 / 24.09.2011


Gaboni, Nigeria dhe Bregu i Fildishtë numërohen si tri vendet e fundit që e kanë njohur Kosovën, por asnjëra prej tyre nuk është dëshmuar me nota verbale. Behgjet Pacolli thotë se nuk i interesojnë letrat. Krejt këtë punë, Skënder Hyseni e quan tregti me njohje.
Në faqen zyrtare të MPJ-së deri më tani janë regjistruar 81 shtete që kanë njohur pavarësinë e Kosovës, derisa Santa Lucia figuron si vendi i fundit që ka njohur Kosovën, më 19 gusht 2011.

Zëvendëskryeministri Behgjet Pacolli thotë se Ministria e Jashtme është duke gabuar që nuk po e ndryshon numrin e njohjeve në faqen zyrtare.

“Eh valla, Ministria e Jashtme ka bërë gabim shumë se nuk i ka shënuar këto njohje të reja. Shumë gabim ka bërë”, ka thënë Pacolli për “Express”.

Në Ministrinë e Jashtme pajtohen se Kosova është njohur nga 84 shtete, por ky dikaster ende nuk i ka futur tri njohjet e fundit në listën zyrtar. Zëdhënësi Artan Behrami ka thënë se pret që notat verbale të arrijnë shpejtë në këtë Ministri.

Ditëve të fundit të gjithë akterët që merren me politikën e jashtme të vendit ndodhen në New York, ku po zhvillon punimet Asambleja e Përgjithshme e OKB-së. Nga atje, kryeministri Hashim Thaçi, zëvendëskryeministri Pacolli dhe ministri i Jashtëm Enver Hoxhaj kanë njoftuar për premtime të shteteve për njohje të Kosovës.

Ndryshe, njeriu i parë që ka udhëhequr Ministrinë e Punëve të Jashtme të Kosovës, Skënder Hyseni, thotë se e ka paralajmëruar më herët mungesën e një adrese të saktë të diplomacisë.

“Është gabim elementar paralajmërimi i procesit të njohjeve”, ka thënë Hyseni, i cili e cilëson tregti atë që është duke ndodhur me procesin e njohjeve. /Telegrafi/

[Zero Cool]

Boshnjakët kosovarë ndihmojnë procesin e njohjes


20:46 / 28.09.2011

Kryeministri i Republikës së Kosovës, Hashim Thaçi, ka shprehur bindjen se komuniteti boshnjak në Kosovë do ta ndihmojë njohjen e shtetësisë së vendit nga Sarajeva zyrtare.
“Dëshiroj të theksoj se institucionet e Kosovës besojnë se komuniteti boshnjak gjithashtu do të jetë një urë lidhëse e fuqishme e bashkëpunimit të shtetit të Kosovës dhe Bosnjë e Hercegovinës, dhe gjithashtu do të ndihmojë apo lehtësojë Sarajevën për të njohur Kosovën si shtet të pavarur dhe sovran”, kas deklaruar kryeministri Thaçi.

Këto komente kreu i ekzekutivit kosovar i ka bërë në ceremoninë e organizuar në Prizren me rastin e shënimit të 28 Shtatorit - Ditës së Boshnjakëve. /Telegrafi/

[Zero Cool]

Pacolli bën biznes në Nigeri, ngec si diplomat





S’ka mundur t’ia siguronte njohjen Kosovës nga shteti më me ndikim në Afrikë, ndonëse prej se e ka marrë postin e zëvendëskryeministrit, pesë muaj më parë, një kohë të gjatë e ka kaluar atje. Por, ka nënshkruar një memorandum që garanton investim prej 1.4 miliardë dollarësh në këtë vend.


Behgjet Pacolli kurrë në Kosovë nuk ka folur publikisht për këtë. Ministri i Tregtisë dhe Investimeve i Nigerisë, Olusegun Aganga, ka dhënë informatën zyrtare për investimin në vendin e tij që do ta bëjë konsorciumi “Seagas Services Limited” dhe “Oceanmar Services Limited”, i përfaqësuar nga Pacolli.

Aganga dhe Pacolli kishin vënë firmat në memorandum, mbrëmjen e 19 shtatorit, në Abuja.

Pacolli ka thënë të premten ta ketë nënshkruar memorandumin që garanton investime në Nigeri, sa për ta “betonuar” njohjen nga ky vend. Nuk e ka publikuar një kopje të memorandumit, por ka thënë se Kosova do të përfitojë nga kjo.

Në një bisedë për “Koha Ditore”, ai ka treguar se si zëvendëskryeministër i parë i ka shanset zero për të takuar përfaqësues të këtyre shteteve.

“Por më duhet me improvizu”, ka thënë ai.

Pacolli shton ta ketë kontaktuar Odën Ekonomike të Kosovës, por edhe ta ketë vënë në dijeni kryeministrin Hashim Thaçi dhe ministren e Tregtisë, Mimoza Kusari, me memorandumin që ka nënshkruar dhe me ato që ai i ka quajtur “përfitime që mund të ketë Kosova nga kjo”.

Safet Gërxhaliu, drejtor i Odës Ekonomike të Kosovës, ka thënë se pos një bisede telefonike ku Pacolli ka përmendur përpjekjet për të hapur tregun në Nigeri dhe për mundësinë që firmat kosovare të marrin pjesë aty, asgjë zyrtare nuk i është premtuar.

“Zyrtarisht nuk kemi kurrgjë” ka thënë Gërxhaliu.

Gërxhaliut ia ka përmendur Pacolli “investimin” e Kosovës në Nigeri në vlerë prej 1 miliard eurosh. Nëpërmjet telefonit i ka thënë gazetës gjysmë miliardë euro, e në zyrën e tij këtë vlerë e ka rritur edhe për 100 milionë euro.

Pacolli ka vënë firmën në memorandum në cilësinë e zëvendëskryeministrit dhe si përfaqësues i dy kompanive evropiane.

“Me këtë ia bëjmë të njohur opinionit publik në Nigeri, se kjo vjen prej Kosove”, ka thënë Pacolli. /Telegrafi/

[Zero Cool]

Thirrje myslimanëve


Ministri i Jashtëm i Kosovës iu ka bërë thirrje shteteve myslimane që ta njohin Kosovën. Në një intervistë për gazetën egjiptiane, “En-Nour”, Hoxhaj ka përsëritur kërkesën për njohje nga Egjipti, të cilin e ka quajtur shtet lider të botës arabe dhe islame.


Nga Express më 02 tetor 2011 në ora 08:43

Ministri i Punëve të Jashtme i Kosovës, Enver Hoxhaj në një intervistë për gazetën egjiptiane, “En-Nour” ka thënë se ky vend pas revolucionit është shtet i ri dhe duhet të ndjekë politika të reja karshi njohjes së Kosovës.

“Ne vihemi në pozitë të vështirë kur pyetemi se pse shtetet arabe e islamike nuk ju njohin, veçanërisht kur një pjesë shumë e madhe e shteteve nga i gjithë globi deri tani kanë njohur pavarësinë e Kosovës. Ajo për të cilën ndjej keqardhje është fakti se shumica e shteteve islamike e arabe nuk e kanë njohur akoma shtetin e Kosovës me popullatë shumicë myslimane. Për këtë, isha në Kajro, si mik, për të kërkuar njohjen nga Egjipti, si lider i botës arabe e islame, veçanërisht për shkak të lidhjeve historike e kulturore midis dy vendeve tona. Të gjithë e dinë se Mehmet Ali Pasha, themelues i Egjiptit modern, ka qenë shqiptar dhe ndajmë identitetin, kulturën e qytetërimin e njëjtë. Ne ndajmë aspiratat e përbashkëta për liri, demokraci e prosperitet, si dhe marrëdhëniet e shkëlqyera midis dy popujve”, ka thënë Hoxhaj.
I pyetur për revolucionin në Egjipt, ministri ka theksuar se populli i Kosovës ka simpatizuar dhe ka mbështetur Revolucionin egjiptian që nga momenti i parë dhe i dëshiron popullit egjiptian stabilitet, zhvillim dhe prosperitet.

“Mendoj se Revolucioni ka qenë i pashmangshëm dhe ky revolucion ka qenë i rëndësishëm për gjithë botën arabe. Jam i bindur se Egjipti do të ketë të ardhme të ndritur pas Revolucionit dhe Kosova e mbështet Egjiptin e popullin e tij, i cili ka luftuar njësoj si populli im për liri”, ka shtuar ai.

Ministri Hoxhaj ka folur edhe për vizitën që i ka bërë “Sheshit Tahrir”, i cili sipas tij, është bërë simbol i lirisë, krenarisë, dinjitetit dhe prosperitetit, jo vetëm të Egjiptit, por për të gjitha shtetet arabe e islamike.

“Gjatë vizitës në “Sheshin Tahrir”, kam ndjerë luftën e popullit egjiptian për liri, ashtu siç ka luftuar populli kosovar për 20 vjet për arritjen e pavarësisë e lirisë së tij, si dhe luftën paqësore për liri e sovranitet. Kjo luftë për liri ka frymëzuar popullin e Kosovës, ashtu siç ka frymëzuar gjithë botën për vendosmërinë dhe mënyrën paqësore e kulturore të protestimit për të realizuar të drejtat dhe liritë”, ka theksuar Hoxhaj.

[Zero Cool]

Diplomacia, mundi po shkon huq


Pavarësisht nga aktiviteti i shtuar diplomatik i Qeverisë së Kosovës për të shtuar numrin e njohjeve, ky proces po ecën me hapa të ngadaltë.
Ndonëse ekzekutivi i vendit është duke shpenzuar mjete dhe kohë në fushën e lobimit, për tetë muaj të qeverisjes “Thaçi 2”, Republika e Kosovës është njohur vetëm nga gjashtë shtete, shkruan gazeta Zëri.

Njohjet, ndërkaq, sipas partive opozitare dhe analistëve, janë duke shkuar në shpërpjesëtim me intensitetin e lobimit, pavarësisht faktit se në këtë fushë është i angazhuar zëvendëskryeministri Behgjet Pacolli, ministri i Jashtëm Enver Hoxhaj dhe herë pas here edhe kryeministri Hashim Thaçi dhe presidentja Atifete Jahjaga.

Madje, sipas opozitës, Prishtina zyrtare po shfaq një joseriozitet në çështjen e lobimit edhe për faktin se në një proces janë të angazhuar gjithë lidershipi, duke shkaktuar përplasje të brendshme diplomatike.

ps: Cfare mendoni ju, cfare duhet bere per te rrite numrin e shteteve qe njohin Kosoven ? A eshte opcion ndonje person tjeter ne diplomaci, apo... ?

[Zero Cool]

Njohja nga Kuvajti në ditët e afërta





Kryetari i Asamblesë Nacionale të Kuvajtit, Jassem Mohammad Al Kharafi, në krye të një delegacioni parlamentar, ka arritur të shtunën në një vizitë dyditëshe në Kosovë, me ç’rast është pritur në një takim nga kryetari i Kuvendit të Kosovës, Jakup Krasniqi.


“Ne në fakt themi se Kuvajti e ka njohur Kosovën, por se këtë duhet të formalizojë Qeveria e Kuvajtit që presim të bëjë së shpejti për të hapur edhe më tej udhët e bashkëpunimit”, ka thënë kryekuvendari Krasniqi në një prononcim për gazetarë.

Al Kharafi, nga ana e tij, ka theksuar se kryeministri i Kuvajtit e ka njoftuar se udhëzimet e Princit të Kuvajtit kanë qenë dhe janë drejt njohjes së Kosovës dhe “në ditët e caktuara, të ardhshme, do të jetë edhe njohja e Kosovës zyrtarisht”.

“Shpresoj që të kemi dobi të dyja vendet, para njohjes, edhe pas njohjes. Shpresoj që të mos humbim kohë, si dy vende, që praktikisht të fillojmë me hapa konkretë, drejt zhvillimit të marrëdhënieve ndërmjet dy vendeve. Ne biseduam me kryetarin e Kuvendit edhe për bashkimin ndërmjet anëtarëve të të dy parlamenteve, dhe po ashtu kemi biseduar që anëtarët e të dy parlamenteve duhet të nxitojnë që ta kompensojnë kohën e kaluar para njohjes së Kosovës, në mënyrë që këto marrëdhënie të forcohen, menjëherë pas njohjes”, theksoi kryeparlamentari kuvajtian, duke shtuar se shumë shpejt pas njohjes së Kosovës duhet të pasojnë edhe vizitat reciproke nga udhëheqjet e të dy vendeve për të kompensuar atë që është humbur.

Në pyetjen se kur pikërisht do të ndodhë njohja, ai u përgjigj se në ditët e afërta do të ndodhë njohja, ndërsa dita e saktë e njohjes i mbetet Qeverisë së Kuvajtit.

[Zero Cool]

Shqipëria i kërkon Pakistanit të njohë Kosovën





Kryeministri Sali Berisha ka kërkuar nga Pakistani të rimarrë të rishqyrtojë çështjen e Kosovës, për ta njohur atë. Këtë kërkesë kreu I qeverisë shqiptare ia ka bërë Kryetares së Asamblesë Parlamentare të Pakistanit, Fehmida Mirza e cila prej dy ditësh ndodhet në një vizitë zyrtare në Tiranë.

“Pakistani të marrë në konsideratë e të shqyrtojë çështjen e pavarësisë së Kosovës, duke e konsideruar njohjen e pavarësisë së shtetit më të ri të Evropës, si një kontribut të rëndësishëm për paqen, stabilitetin dhe bashkëpunimin në rajon”, tha kryeministri Berisha. Nga ana e saj, kryetarja e Asamblesë Parlamentare të Pakistanit siguroi se kjo çështje po shqyrtohet me seriozitet dhe se parlamenti do luajë rol aktiv në këtë drejtim. Gjatë takimit me kryeparlamentaren e Pakistanit kreu i qeverisë foli dhe për vendosmërinë e dy vendeve për të zgjeruar bashkëpunimin në fushën e kulturës, trashëgimisë kulturore, arsimit, shkëmbimeve ekonomiko-tregtare, si dhe në nxitjen e investitorëve pakistanezë për të shfrytëzuar potencialet, që ofron Shqipëria.

Kryeparlamentarja pakistaneze vlerësoi kontributi që Shqipëria ka dhënë dhe vijon të japë në Koalicionin ndërkombëtar në Afganistan në ndihmë të një populli mik, i cili po bën përpjekje të jashtëzakonshme për ndërtimin e demokracisë dhe konsolidimin e institucioneve, si dhe u shpreh angazhimi i të dy vendeve në luftën kundër terrorizmit, në kuadër të bashkëpunimit në koalicionin ndërkombëtar kundër terrorizmit, si në Afganistan ashtu edhe më gjerë. Kryeministri Berrisha shprehu kënaqësinë për takimin me znj. Mirza, si Kryetaren e parë femër në historinë e Parlamentit pakistanez, çka tregon përpjekjet e këtij vendi për të konsoliduar një shoqëri demokratike bazuar në parimet e barazisë gjinore dhe liritë dhe të drejtat e njeriut. Po sot kryeparlamentarja e Pakistanit është pritur dhe nga zv/kryeministri dhe ministry i jashtëm Edmond Haxhinasto.

Zyra e shtypit e MPJ-së bëri të ditur se ministri Haxhinasto vlerësoi potencialet e bashkëpunimit që ekzistojnë midis dy vendeve, veçanërisht në fushën ekonomike. Në këtë kuadër, ai theksoi nevojën për organizimin e Komisionit të Përbashkët Dypalësh, i cili do të shërbejë për njohjen konkretisht të këtyre mundësive, sidomos në fushën energjetike, të bujqësisë, por dhe në fusha, si arsim, kulturë etj, duke nënvizuar rëndësinë e afrimit dhe bashkëpunimit mes dy komuniteteve të biznesit. Ministri Haxhinasto sugjeroi dhe një takim të përfaqësuesve të Dhomave të Tregtisë mes dy vendeve për të nxitur investimet e biznesit respektiv. Duke vlerësuar kontributin e Shqipërisë në Afganistan, kryetarja e Parlamentit të Pakistanit theksoi se pa paqe në Afganistan, nuk ka paqe në gjithë rajonin. Më tej ajo nënvizoi rëndësinë që Pakistani i kushton zhvillimeve në Afganistan si dhe luftës kundër terrorizmit. Lidhur me ketë betejë, ajo shtoi se Pakistani kërkon mbështetje ndërkombëtare, raportoi Koha.

[Zero Cool]

Së shpejti edhe dy njohje ?


Në kuadër të angazhimit institucional për shtimin e numrit të njohjeve për Kosovës, zëvendëskryeministri i parë i Qeverisë, Behgjet Pacolli, dielën në Paris ka zhvilluar një takim me kryeministrin e Republikës Demokratike të Sao Tomesë, Patrice Trovoada.

"Gjatë këtij takimi, zoti Pacolli edhe njëherë ripërsëriti kërkesën për njohjen e Kosovës si shtet të pavarur dhe sovran, duke i garantuar atij se vendimi i shpejtë i njohjes së Kosovës, do të përbënte respektim të plotë të vullnetit të qytetarëve kosovare, dhe opinionit këshilldhënës të Gjykatës Ndërkombëtare të Drejtësisë.

Në anën tjetër, kryeministri z.Patrice Trovoada, e garantoi z.Pacolli se njohja e Kosovës nga Sao Tome është në shqyrtim e sipër, dhe gjithqka do të përmbyllet shumë shpejt", thuhet në njoftim të zyrës së Pacollit, transmeton Express.

Ndërkaq, të shtunën zëvendëskryeministri Pacolli në Paris ka takuar përfaqësues të partisë më të madhe në Tunizi, “Ḥizb al‐Nahḍah”, që është edhe partia që ka marrë mandatin për të formuar qeverinë e përkohshme që do ta pregatisë vendin për zgjedhjet e reja, të lira dhe demokratike.

"Pacolli, pas një bisede të gjatë dhe miqësore u akordua me përfaqësuesit e kësaj partie që në një kohë sa më të shpejtë, pas zgjedhjeve që do të zhvillohen në Tunizi, ky shtet të procedojë me njohjen e republikës së Kosovës si shtet të pavarur dhe sovran.

Një premtim për njohje të menjëhershme pas zgjedhjeve, zoti Pacolli e kishte marrë edhe gjatë vizitës në Tunizi në gusht të këtij viti, nga z. Rashid al-Ghannushi, lider i kësaj partie. Pacolli po ashtu, është dakorduar që shumë shpejt të zhvillojë edhe një vizitë tjetër në shtetin e Tunizisë", thuhet me tej në njoftim.

Zëvendëskryeministri Pacolli, të shtunën në mbrëmje, ka zhvilluar një takim edhe me pjestarë të organizatës së Afrikës Juglindore, të cilëve u ka shtruar kërkesën për njohjen në bllok të Republikës së Kosovës. Në këtë organizatë, bëjnë pjesë shtete të fuqishme si Tanzania, Ruanda, Burundi, Mozambiku, Sëaziland, Malawi, Zambia, dhe Zimbambwe.

[Zero Cool]

Një tjetër vend pritet ta njohë Kosovën


Pas Kamerunit, zëvendëskryeministri Behxhet Pacolli ka vizituar shtetin e Sao Tome nga autoritetet e të cilit ka marrë konfirmim për njohje të pavarësisë së Kosovës.




Në kuadër të angazhimeve institucionale për lobim, zëvendëskryeministri i parë i Kosovës, Pacolli, është takuar në Sao Tome me kryeministrin e këtij shteti Dr.Patrice Emery Trovoada si dhe me ministrin e Punëve të Jashtme, Manuel Salvador Dos Ramos.

Sipas një komunikate për media të dërguar nga kabineti i Pacollit, ben te ditur KosovaTimes, gjatë këtij takimi, ai e ka informuar edhe njëherë kryeministrin Trovoada me arritjet demokratike që Republika e Kosovës ka shënuar që nga shpallja e pavarësisë në vitin 2008.

Në këtë kontekst, zëvendëskryeministri Pacolli, ripërsëriti kërkesën për njohjen e Republikës së Kosovës dhe fillimin e bashkëpunimit diplomatik, ekonomik dhe kulturor mes dy vendeve.

[Zero Cool]

Spanja mund ta njohë Kosovën


Pas zgjedhjeve spanjolle, në të cilat ka fituar partia e djathtë e qendrës, Partia Popullore e Mariano Rajoy, Spanja mund ta njohë Kosovën.





Ignacio Mollina, analist i lartë për Evropën në Institutin Mbretëror Eclano, organizatë e njohur për studime në marrëdhëniet ndërkombëtare, shpjegon se kishte disa arsye për refuzimin spanjoll.

Ditë më parë, në një bisedë për Gazetën JNK, Mollina kishte vlerësuar se zgjedhjet mund të ndryshojnë qasjen spanjolle, transmeton QIK-u njoftimet.

Së pari, deklarata e pavarësisë së Kosovës ishte ndërlidhur me kohën e zgjedhjeve parlamentare të kaluara në Spanjë, pastaj Madridi kishte problem në vazhdimësi pasi ishte deklaruar se ndërhyrja e aleatëve në Irak më 2003 ishte kundër të drejtës ndërkombëtare, problemet me nacionalizmin në rajonet katalunase dhe baske si dhe negociatat e Qeverisë me organizatën separatiste ETA.

"Rol kanë luajtur edhe lidhjet personale të Ministrit të Jashtëm Miguel Anhel Moratinos (i cili ishte në këtë pozitë deri më 21 tetor 2010) me diplomatët serbë", tha Mollina për Gazeta JnK. "Ai kishte qenë në fillim të karrierës së tij diplomatike në Serbi".
Mollina, i cili ishte i pranishëm në konferencën "EU talks Kosovo" të organizuar nga Qeveria e Kosovës dhe British Council, thotë se megjithatë tash Spanja është më pragmatike me Kosovën pas vendimit të Gjykatës Ndërkombëtare të Drejtësisë (ICJ) më 2010.

Ai shton se në kuptim afatgjatë, Spanja do ta njohë Kosovën. Po ashtu dihet se Anhel Moratinos ishte një mik dëshmuar i Serbisë. Ai është shpallur edhe qytetar nderi i Beogradit.