Lobimet për njohjen e Kosovës

[Zero Cool]

Tajlanda drejt njohjes së Kosovës






Prishtinë, 02.05.2012 10:03

Tajlanda pritet që shumë shpejt ta njohë Republikën e Kosovës, si shtet të pavarur dhe sovran. Dhe kjo falë lobimit të fuqishëm që është duke e bërë për Kosovën, zëvendëskryeministri i parë i Kosovës, Behgjet Pacolli, së bashku me princeshën, pasardhësen e familjes mbretërore tajlandeze Mom Luang Rajadaraski Jayankura.

Kështu ka thënë për gazetën “Zëri”, Jetlir Zyberaj, këshilltar politik i zëvendëskryeministrit Pacolli.

“Kontaktet e para dhe interesimi i princeshës Rajadarski për Kosovën, kanë nisur në dhjetor të vitit të kaluar, gjatë ceremonisë gala të ndarjes së çmimit të paqes, “Gusi Peace Prize International”, që iu dha zëvendëskryeministrit të Kosovës, Behgjet Pacollit, në Filipine, i cili çmim atij iu dorëzua nga vetë princesha”, sqaron këshilltari Zyberaj.

Sipas tij, pas një kohe të shkurtër, me propozimin dhe insistimin e zëvendëskryeministrit Behgjet Pacolli, princesha Rajadarasri është nderuar me titullin Konsulte e nderit e Republikës së Kosovës, në Tajlandë, e cila menjëherë pas nominimit të saj, ka hapur në Tajlandë, zyrën e Republikës së Kosovës, të cilën siç thotë Zyberaj, e financon vetë ajo.

“Kështu kontaktet mes zyrës së zëvendëskryeministri dhe princeshës zhvillohen në baza ditore. Që në fillim kur është hapur zyra jonë në Tajlandë, nga princesha Rajadarasri, kemi asistuar në furnizim me materiale të ndryshme si, informacione rreth Kosovës, rreth historisë, rreth ekonomisë sonë me qëllim të nxitjes së investimeve etj. Gjithashtu e kemi furnizuar me flamuj, me hartat e Kosovës të punuara me gurë të çmuar etj.

Megjithatë, gjithë kostoja e funksionimit të zyrës sonë në Tajlandë, që është zyrë e Kosovës për gjithë rajonin, mbulohet nga princesha. Këtu përfshihen edhe disa makina, dhe më shumë se pesë punëtorë që punojnë në administratë”, ka thënë Zyberaj.

E kontaktuar nga “Zëri”, vetë princesha e Tajlandës ka rrëfyer përshtypjet e para për Kosovën, kur kishte marrë informacionet për të kaluarën dhe të tashmen e vendit të vogël në Ballkan.

“Unë isha ftuar që të ndaja çmimin prestigjioz “Gusi Peace prize”, në Filipine. Laureati i këtij çmimi ishte ish-presidenti i Kosovës, Behgjet Pacolli. Fillimisht më ka bërë përshtypje humanizmi i tij dhe angazhimi që e ka pasur në Afganistan në lirimin e pengjeve. Ishte fat i madh që unë isha caktuar që t`ia dorëzoja çmimin, dhe pata rastin që ta njoh nga afër presidentin Pacolli”, u shpreh Rajadaraski, duke shtuar se posa është e informuar për historinë e Kosovës i kishte premtuar Pacollit ndihmë për të ardhmen e popullit të Kosovës.

“Pastaj, kur u informova në detaje për historinë e Kosovës, për vuajtjet e popullit të Kosovës dhe për përpjekjet për të ndërtuar shtetin isha thjesht e emocionuar. I premtova presidentit Pacolli se do të jem në krahun e tij që të punojmë bashkë për të ardhmen e popullit të tij”, tha princesha.

Si femër me ndikim jo vetëm në Tajlandë, por edhe në shtetet përreth, princesha Rajadaraski, siç njofton zyra e zëvendëskryeministrit, tashmë është duke zhvilluar aktivitete të ngjeshura me udhëheqës shtetesh të vendeve të Azisë Juglindore.

“Në koordinim me zëvendëskryeministrin Pacolli, princesha Rajadarasri, zhvillon një aktivitet të ngjeshur, në baza ditore me udhëheqës shtetesh të vendeve të Azisë Juglindore si: Tailanda, Kina, Mianmar (ish-Burma), Singapori, Laos, Indonezi, Bhutan, Kamboxhia (është këshilltare e kryeministrit tani), Vietnam, Nepal, Brunei etj”, ka thënë këshilltari Jetlir Zyberaj, duke shtuar se pikërisht Brunei, ishte një nga rezultatet e punës së princeshës.

Po ashtu Zyberaj tregon se tashmë princesha Rajadaraski, përmes zyrës së saj për Kosovën, ka arritur që kosovarëve të interesuar t’iu sigurojë lëvizje pa viza. Ndërsa këtë vend tashmë do ta vizitojë edhe ministri i Punëve të Jashtme, Enver Hoxha.

“Për shkak të agjendës së zotit Pacolli, Tajlandën do ta vizitojë ministri Hoxha, bashkë me këshilltarin e tij, Lulzim Pllana. Princesha do të kujdeset për mbarëvajtjen e vizitës prej aeroportit e deri në përfundim të vizitës”, bëri të ditur Zyberaj.

[Zero Cool]

Hoxhaj paralajmëron tri njohje për Kosovën


Prishtinë, 28.05.2012

Kosova brenda pak ditësh do të njihet edhe nga tri shtete, të cilat tashmë kanë marrë vendim për këtë. Lajmin e ka bërë të ditur ministri i Jashtëm Enver Hoxhaj. Duke u përgjigjur rreth kritikave të kolegut të tij të partisë, Fatmir Limaj, rreth orientimit të gabuar të politikës së jashtme, vetëm në njohje, ministri Hoxhaj e ka mohuar këtë, duke thënë se absolutisht nuk është e vërtetë se politika e jashtme e Kosovës është orientuar vetëm në njohje.

“Politika e jashtme është prioritet i Kosovës, por ajo nuk ndryshon shpejt, jo vetëm në Kosovë, por në asnjë vend të botës. Kosova është duke bërë një politikë të jashtme shumë aktive, jo vetëm në njohje, edhe pse njohjet e reja janë prioritet për të”, ka thënë Hoxhaj në një intervistë për gazetën “Lajm”.

Ai ka folur edhe për zgjedhjet brenda PDK-së, duke thënë se personalisht nuk e ka për synim kreun e partisë, por shprehet PDK, duhet të vazhdojë për freskohet me kuadro të rinj.

Për kreun e PDK-së, kryeministrin Hashim Thaçi, Hoxhaj thotë se është një lider dhe profil përtej Kosovës i politikanit, dhe se lidershipi i tij e ka fuqizuar PDK-në.

Ndërsa aderimin e Kadri Veselit në PDK, e vlerëson si lajm të mirë, që e fuqizon PDK-në dhe Kosovën.

Ndërsa, për vendimin e qeverisë për aplikimin e vizave për disa shtete, Hoxhaj thotë se nuk do të ketë asnjë ndikim te njohjet e reja.

[Neferta]

Togo pritet të njoh nesër Kosovën




Kosova do të njihet nga shteti i Togos.
Klan Kosova raporton se ky vendim do të bëhet publik nesër në Nju Jork ku presidenti i Togos Faure Gnassingbé pritet t’i dorëzoj notën verbale të njohjes presidentes Atfete Jahjaga.

[Zero Cool]

Thaçi: Edhe unë doja 100 njohje, por nuk ia arritëm

Kryeministri i Republikës së Kosovës, Hashim Thaçi tha të enjten se edhe ai ka dashur të arrihen 100 njohje të shtetit të Kosovës, por nuk ia kanë arritur.
Thaçi në interpelancën për diplomacinë e Kosovës që është kërkuar nga Lidhja Demokratike e Kosovës tha ka pasur premtime për njohje, por procesi është ngadalësuar.

“Edhe dua që t’i kemi 100 njohje, por nuk po mund t’i arrijmë. Është e vërtetë që na kishin premtuar por ato njohje ngadalësuar...”, tha Thaçi, duke shprehur qëndrimin se asnjë njohje nuk vjen për shkak të ndonjë individi në Kosovës, por për shkak të aspiratave të popullit të Kosovës.

Ai tha se edhe me shtetet e BE-së që nuk e kanë njohur shtetin e Kosovës kanë raporte korrekte të bashkëpunimit.

[Zero Cool]

Hoxhaj: Procesi i njohjeve është i pandashëm

Ministri i Punëve të Jashtme i Republikës së Kosovës, Enver Hoxhaj në interpelancën e thirrur nga Lidhja Demokratike e Kosovës, ka thënë se politika e jashtme është mishërim i politikës së brendshme dhe reflektim i unitetit politik.
Sipas Hoxhajt, Kosova është shtet i pavarur dhe procesi i njohjeve është i pakthyeshëm dhe i pandalshëm.

“Prandaj, askush nuk mund të ndalë rrjedhën e historisë së njohjes së plotë të Republikës së Kosovës. Kosova e pavarur është pjesë e peizazhit të shteteve sovrane, demokratike të Ballkanit perëndimorë dhe Evropës. Ajo përfaqëson një realitet politik dhe juridik dhe një fakt gjeopolitik në Evropë dhe botë”, tha Hoxhaj.

Kryediplomati kosovar ka theksuar se për herë të parë, lobimin, krahas qendrave multilaterale është vendosur edhe në rrafshin bilateral - shtet me shtet.

“Gjatë tërë kësaj kohe, unë kam pas një plan konkret të punës dhe të matshëm, një agjendë javore, mujore dhe vjetore, të shoqëruar me një qasje të menduarit mirë strategjik dhe me analiza të detajuara për secilin shtet. Duke u bazuar në këtë strategji, unë kam vizituar mbi 42 shtete që ende nuk e kanë njohur Republikën e Kosovës. Rezultatet janë të matshme. Brenda këtyre 17 muajve Republikën e Kosovës e kanë njohur 17 shtete sovrane, anëtare të Organizatës së Kombeve të Bashkuara. Për çdo muaj kemi arritur të sjellim nga një njohje, në një përudhë shumë të vështirë, ku sigurimi i njohjes është i kushtëzuar nga rrethana të veçanta gjeopolitike”, ka shtuar Hoxhaj.

Ai ka theksuar se njohjet janë të rëndësishme dhe do të mbesin prioriteti politikës së jashtme, derisa Kosova do të bëhet anëtare e plotë e OKB-së. Mirëpo, sipas tij, politika e jashtme nuk guxon të reduktohet vetëm në njohje.

Ministri Hoxhaj ka pohuar se për një vjet e gjysmë ai ka zhvilluar mbi 150 takime bilaterale.

“Ne në këtë vit e gjysmë ne kemi dyfishuar numrin e shteteve, me të cilat kemi lidhur marrëdhënie diplomatike. Tani jemi në proces të nënshkruajmë marrëdhënie diplomatike edhe me shtetet e mbetura. Ne kemi nënshkruar 105 marrëveshje bilaterale në mes Republikës së Kosovës dhe shteteve tjera, janë 10 marrëveshje multilaterale dhe 9 marrëveshje ndërkombëtare”, ka shtuar ai.

Në seancën plenare të Kuvendit të Kosovës, politika e jashtme e udhëhequr nga ministri Enver Hoxhaj është kritikuar nga deputetë të opozitës.

[Zero Cool]

Kosova po i pret shtatë njohjet e Hoxhajt


Fushata lobuese dhe premtimet e shefit të diplomacisë kosovare për shtimin e numrit të njohjeve janë bërë “bozë” kohëve të fundit. Madje për analistët politikë dhe opozitën kosovare, deklarata për njohje të shpejtë dhe mosrealizimi i tyre, janë bërë fushatë demagogjike dhe qesharake.

Ish-ministri i Punëve të Jashtme, Skender Hyseni, tha se ministri Enver Hoxhaj po premton njohje vetëm për konsum të brendshëm politik, ndërsa lëvizja Vetëvendosje konsideron se Hoxhaj nuk ka as vizion, e as diplomaci. Ndërsa analistët politikë kanë shkuar më tutje duke e akuzuar ministrin Enver Hoxhaj, dhe zyrtarët e tjerë shtetërorë, se po vazhdojnë të duken qesharakë kur përmes informatave që marrin nga miqtë e Kosovës, nga diplomacitë e shteteve të forta, tentojnë të krijojnë famë politike për veten e tyre.

Mirëpo me të gjitha këto akuza nuk është pajtuar këshilltari i ministrit Hoxhaj, Artan Behrami, i cili ka thënë se akuzat e ish- ministrit Hyseni janë jo të sinqerta.

“Me akuza të tilla Hyseni po mundohet që politikën e jashtme ta shndërrojë në politikë të brendshme. Zoti Hyseni e ka pasë rastin të dëshmohet në diplomaci, por këtë nuk e ka bërë. Por siç ka thënë Jakup Krasniqi, sa ka qenë ministër ai, e ka bë fet”, ka thënë Behrami, shkruan gazeta "Zëri".

Ai tha se ministri Hoxhaj asnjëherë nuk ka paralajmëruar njohje. Kjo, sipas tij, është bërë vetëm atëherë kur ka pasur pyetje dhe insistim të gazetarëve. “Ministri Hoxhaj më parë kishte paralajmëruar njohje nga Timori Lindor, ajo ka ndodhur, ka paralajmëruar njohje nga Saint Kitts dhe Nevis, ajo ka ndodhur, ka paralajmëruar nga Çadi dhe ajo ka ndodhur, ka paralajmëruar nga Fixhi dhe ajo ka ndodhur, ka paralajmëruar nga Papua new Guinea dhe ka ndodhur. Së fundi ai kishte paralajmëruar një njohje në mars, dhe Guajana njohu Kosovën. Por, mendoj se më shumë se kjo simbolikë, e rëndësishme është që kemi dyfishim të numrit të njohjeve në krahasim me vitin 2010”, ka thënë Behrami.

Ku mbetën njohjet, o Enver?

Ish-ministri i Punëve të Jashtme, i cili vjen nga LDK-ja, Skënder Hyseni, thotë se ministri Hoxhaj ka premtuar që brenda dy javësh do të vijnë ato 5 apo 7 njohje. “Dy javë kanë kaluar qysh moti, kështu që s’kam asnjë koment”, ka thënë Hyseni. Ai nuk ka ditur se si t’i quajë këto deklarata të ministrit Hoxhaj, për faktin se siç shprehet ai, është lodhur me komentime të “margaritarëve të Hoxhajt”. “Është tejkaluar çdo masë e deklarimeve. Meqë ministri i di datat dhe shtetet që do të na njohin, pse nuk na thotë por po na lë varur. Është gabim i skajshëm dhe i rrezikshëm me paralajmëruar njohje”, ka thënë Hyseni, duke shtuar se deri në këtë shkallë është degraduar procesi i njohjeve. Ai ka thënë se çështjen e njohjeve është munduar ta bëjë debat publik, megjithatë nuk ka mundur. “Madje as përgjigjet në pyetjet e drejtuara ministrit Hoxhaj gjatë raportimit të tij para Komisionit për Punë të Jashtme nuk ka mundur t’i marrë”, ka thënë Hyseni duke shtuar se nuk ka përgjegjësi publike për faktin se ministri Hoxhaj ka deklaruar publikisht për këto njohje.

Anëtarja e kryesisë dhe drejtuesja e Komitetit për Punë të Jashtme në Lëvizjen Vetëvendosje, Puhie Demaku, ka thënë se është e qartë që ministri Hoxhaj nuk ka as vizion e as strategji për politikën e jashtme. “Çdo veprim dhe çdo deklaratë e tij është “ad hoc”, pa pasur asnjë bazë e argument dhe i arsyeton ato me "të qenit i matur". Politika e jashtme e Kosovës, e për pasojë edhe imazhi i saj vuajnë dhe pësojnë nga mungesa e vizionit, jo vetëm të ministrit, por të komplet qeverisë”, ka thënë Demaku.

Madje, sipas saj, ministri Hoxhaj nuk e di as numrin e saktë të njohjeve që Kosova i ka tani, pra ai nuk është në gjendje të japë numra faktik e lëre më të bëjë parashikime të njohjeve që do të vijnë. “Deklaratën për 5 njohje të reja që do të vijnë e ka dhënë më 27 shkurt 2013, pra saktësisht një muaj më herët. Nuk saktëson as emra shtetesh e nuk jep as data, ngase ka frikë nga llogaridhënia dhe përgjegjësia”, ka deklaruar Demaku.

Njohjet, meritë e shteteve mike

Drejtori ekzekutiv i Klubit për Politike të Jashtme (KPJ), Ylli Hoxha, shprehet se njohjet e Kosovës ndodhin në masë të madhe si meritë e lobimit të shteteve tona mike siç janë SHBA-ja, Britania, Franca etj. “Roli i diplomacisë kosovare në këtë proces nëse nuk është fare relevant, atëherë është thellësisht i subordinuar”, ka thënë Hoxha. Ai konsideron se deklaratat e paralajmërimit të njohjeve nga një zyrtar i Qeverise sonë është keqpërdorim i informatave që atij i janë dhënë nga diplomatë të shteteve mike, më parë se sa meritë e tij në këtë proces.

“Pra Enver Hoxhaj, dhe zyrtar të tjerë të lartë shtetërorë të Kosovës, vazhdojnë të duken qesharakë kur përmes informatave që marrin nga miq tanë nga diplomacitë e shteteve të forta, tentojnë të krijojnë famë politike për veten e tyre”, konsideron drejtori i KPJ-së, Ylli Hoxha.

[Oqeani]

Prit e prit Skenderin, prit e prit Hoxhen ....

Nime mos po mendojne keta te jahsmit se Skenderbeu apo Enver Hoxha jan ba Ministra e po iu frigohen !!!

Hajt mos po na del naj - ZOG - e ..... !

Besa ket ministri e kisha - shly- vetem po han si kali ne grazhd !

U se harrova nime - ketu nuk ka tendere !!! :)


"Mbyllur per momentin " !!! Punojme pas ores 20h00 diku ne naj resto !!!

[Zero Cool]

Kqyri magjupt.


Rumania ndryshon qëndrimin ndaj Kosovës


Bukuresht, 19.04.2013

Rumania paralajmëron qëndrim tjetër karshi Kosovës. Pas miratimit të rezolutës së Parlamentit Europian, ajo ka bërë një hap drejt njohjes së Kosovës, raportojnë mediet.

Kryeministri i këtij vendi, Victor Ponta citohet nga mediat e ndryshme evropiane të ketë thënë se Rumania ka lëvizur nga qëndrimi i saj i mëparshëm për Kosovën, ndërkaq lëvizjet e shtetit rumun kanë ardhur pas takimit të Pontas me raportuesen për Kosovën në PE, Ulrike Lunacek.

Kryeministri Ponta edhe më parë kishte treguar dispononim më të mirë për njohjen e Kosovës, ndërkaq thirrja e Parlamentit Evropian që pesë vendet e BE-së ta njohin Kosovën vetëm i ka ndihmuar kësaj klime.

[Zero Cool]

Gabelistan.


Kryeministri rumun favorizon njohjen e Kosovës


Bukuresht, 03.06.2013

Kryeministri i Rumanisë, Victor Ponta, ka thënë se është në favor të njohjes më të shpejtë të pavarësisë së Kosovës, raportojnë mediat serbe.

Ponta dhe ministri i tij i Jashtëm janë takuar sot me dy komisionet kryesore parlamentare, për të diskutuar nëse Rumania duhet të ndryshojë pozicionin e saj dhe të lëvizë drejt njohjes së Kosovës.

Ponta ka thënë se personalisht konsideron se Rumania duhet të përputhë qëndrimin e saj ndaj statusit të Kosovës me partnerët evropianë, marrë parasysh se 22 anëtare të BE-së tashmë kanë njohur pavarësinë e Kosovës.

Ai po ashtu ka thënë se do të formohet një grup pune, i përbërë nga përfaqësues të diplomacisë rumune dhe deputetë, për të shqyrtuar zhvillimet e reja që lidhen me statusin e Kosovës, transmeton REL raportontin e B92.

“Nuk bëhet fjalë për asnjë vendim. Jemi pajtuar të formojmë një grup të punës, i cili do të merret me këtë çështje. Jemi pajtuar që kjo temë nuk është tabu, por duhet të merremi edhe me të”, ka thënë Ponta.

Në pyetjen nëse Rumania pret që Serbia të njohë e para Kosovën, Ponta ka thënë se “do të ishte pak qesharake po qe se Rumania mbetet prapa Serbisë”.

Rumania, ashtu si edhe katër anëtare të tjera të Bashkimit Evropian – Greqia, Sllovakia, Spanja dhe Qiproja – nuk e kanë njohur ende pavarësinë e Kosovës, të shpallur më 17 shkurt, 2008

[Zero Cool]

Majlinda Bregasi



Israel, mos i thuaj ‘JO’ Kosovës!



Vetëm para pak vitesh, e tërhequr nga historitë e hebrejve gjatë LIIB në tokat shqiptare, e nxitur nga ekspozita e Norman Gersham-it, Besa: Një kod nderi /Myslimanët shqiptarë që shpëtuan hebrejtë, punova dokumentarin Kodi i Jetës. Ndoshta unë isha subjektive gjatë realizimit të tij, por vlerësimi i filmit në festivalin e URTI-së në Paris, si edhe kërkesa për transmetim nga gjithë televizionet publike të Europës Juglindore, përveç Serbisë dhe Bullgarisë, më çliruan. Kisha arritur të dokumentoja sado pak një histori të fshehur për mbi 45 vite të popullit tim. 2000 hebrejtë që shpëtuan në Shqipëri u ndihmuan edhe nga dhjetëra familje shqiptare të Kosovës, si Rezniqi, Xërxa, Iljazi etj, të cilët i strehonin e pastaj i përcillnin për Shqipëri gjithë ata që iknin nga Serbia. Shkurt, Kosova qe kthyer në vend tranziti vendimtar për ta.

Për çudi këto fakte ishin fshehur për kaq vite. Propoganda serbe për identifikimin e shqiptarëve të Kosovës si bashkëpunëtorë të fashizmit e nazizmit, kishte funksionuar për mrekulli. Në kushtet e mbijetesës ku ndodhej Kosova si edhe nën diktaturën e Hoxhës në Shqipëri, nuk mund të pritej që ne ta rrëfenim historinë tonë. Por historia nuk vdes, edhe pse mund të shtrembërohet.
Populli shqiptar i ka ruajtur historikisht hebrejtë.

Në Sarandë gjenden rënojat e sinagogës që mendohet të jetë më e vjetra në rajonin e mesdheut, gjë që dëshmon për harmoninë e bashkëjetesës sonë. Mizoria mesjetare e dëbimit të hebrejve nga Portugalia e Spanja e shndërroi Shqipërinë në portin e tyre mikpritës, aq sa Vlora u bë qendra e dytë më e madhe hebraike në Ballkan. Më 1831 Mehmet Ali Pasha, pashai shqiptar që pushtoi Palestinën, lejoi ngritjen e vendbanimeve të para hebraike në Israelin e sotëm.

Megjithatë Israeli nxitet të mos e njohë Kosovën, duke mosnjohur njëkohësisht edhe një pjesë të historisë së vetë. Israeli nxitet të mos e pranojë holokaustin tonë, dëshmitë e Ana Frankut tonë, duket që nuk po shkojnë deri atje, pasi më parë po mbërrin propoganda serbe, shtet i cili publikisht ka pranuar që do heqë dorë nga bllokimi i Kosovës në proceset e integrimit. Në shkrimin e tij në The Jerusalem Post, 10/07/2013, Say ‘no’ to Kosovo (Thuaj Jo Kosovës), Michael Freund, tregon arsyet pse Israeli nuk duhet ta njohë Kosovën, këtë provincë renegate, sipas tij.

Që nga marrëdhëniet shumë të mira me Serbinë, që mund të rrezikohen nëse Israeli njek Kosovën, arsyet ekonomike, mbi një bilion euro investim nga Israeli në Serbi, trefishimin e turizmit serb atje që se u hoqën vizat më 2009 dhe, mbi të gjitha, Freund jep arsyen e fortë historike, sepse Kosova është zemra e kombit për Serbinë, sikurse Judea dhe Samaria janë për hebrejtë, “vendi ku filloi çdo gjë”. Dhe vërtetë që aty filloi çdo gjë. Filloi konflikti shekullor mes serbëve dhe shqiptarëve, ish-aleatë të mohuar kundër pushtimit ottoman.

Ndërtimi i historisë mbi mite, aq më tepër mbi mite të shtrembëruara, sikurse është ai i Kosovës për Serbinë, ka dëshmuar se pjell vetëm urrejtje e luftë. Që koha i përket vetëm vetvetes e nuk mund të jetojë jashtë saj (Strauss, 1967) kjo u mësohet fëmijëve europianë që në shkollë të mesme, e si shembulli më i freskët merret pikërisht lufta e fundit e Kosovës. E nëse do të argumentonim sipas logjikës së Freund-it, pse paska më tepër të drejtë historike Serbia mbi Kosovën, bazuar në 800 vjetët e fundit, ndaj trashëgimtarëve të vetë dardanëve, banorëve antikë të zonës? Serbët me të drejtë i kthejnë kishat mesjetare, në monumente, pasi atyre u mungon antikiteti, u mungon rrënja në Ballkan.
Por argumenti kyç i autorit është pasoja që do kish Israeli nga njohja e mundshme e Kosovës “Pse palestinesët në Jude apo arabët israelitë mos ta kishin një të drejtë të tillë?” Arsye e njëjtë që përdor Spanja e Greqia, në paaftësi për të zgjidhur problemet e tyre të brendëshme, refuzojnë të pranojnë analogji të tjera në botë, duke bllokuar proceset e zhvillimit e integrimit të banorëve të një shteti të tërë, të cilët mezi i mbijetuan holokaustit të fundit europian.

Ndërkohë që arsyeja e fundit e Freund-it, rritja e ekstremizmit islam vehabist në Kosovë nuk qëndron. Instrumentalizmi i faktit se tre të katërtat e popullatës janë myslimanë, pra le t’i quaj “ekstremistë të mundshëm”, është një propogandë famëkeqe. Kosova është vendi me më shumë misionarë kristianë në botë dhe myslimanizmi kosovar është po aq europian sa edhe besimet e tjera që ka Europa moderne. Argumenti i autorit nuk qëndron as për vetë faktin se nuk na ka pranuar shumica e shteteve islame në botë, ndërkohë që na ka pranuar shumica e shteteve kristiane, falë të cilave arritëm edhe lirinë.

Ne qytetarët e Kosovës, jemi më të interesuar se kushdo të jetojmë më mirë, ekstremizmi është nocion i ri në shoqërinë tonë që po na imponohet nga jashtë. Të izoluar si kemi mbetur, një geto në zemër të Ballkanit, nuk na ndihmon as ta luftojmë e as ta shijojmë lirinë. Nëse i hiqni duart prej nesh, të paktën mos na sulmoni. Jemi nipërit e mbijetuar te atyre myslimanëve që rrezikuam jetën për të shpëtuar njerëz në nevojë, se kështu thotë kodi ynë i nderit. Sot jemi vetë në nevojë, duam të dalim nga getoja.

Botuar te Koha Ditore, 16. 08. 2013

[Zero Cool]

Shqipëria kushtëzon Gjeorgjinë me njohjen e Kosovës



Tiranë, 12.06.2014

Shqipëria thotë se e mbështet anëtarësimin e Gjeorgjisë në NATO, por ta njohë Kosovën e pavarur. Deklaratën e bëri ministrja e Mbrojtjes, Mimi Kodheli gjatë vizitës në Gjerogji. Ministrja Kodheli tha Kosova nuk ka krahasim as në Kaukaz apo tjetërkund dhe se përbën precedent të vetëm i së drejtës ndërkombëtare.






Gjatë një takimi të veçantë me presidentin e vendit, Glorgi Margvelashvilli dhe kryetari i parlamentit, David Usupashvili ministrja Kodheli kërkoi nga autoritetet gjeorgjiane njohjen e shtetit të Kosovës, duke theksuar se shpallja e pavarësisë së Kosovës është një precedent unik në të drejtën ndërkombëtare.

Sipas Kodhelit, çdo përpjekje për ta përdorur precedentin e Kosovës në situata separatiste në rajonin e Kaukazit është tendencioze dhe nuk i përgjigjet realitetit ndërkombëtar.

[Zero Cool]

Lunaçek: Serbia bëri gjenocid në Kosovë







Bruksel, 15.12.2014

“As një qeveri nuk ka vepruar me minoritetet ashtu siç ka bërë Millosheviqi në Kosovë, ku ka vrarë, dëbuar dhe ka ushtruar gjenocid“.

Kështu ka deklaruar në një intervistë për televizionin e parë publik gjerman ARD, zëvendëspresidentja e Parlamentit Evropian dhe raportuesja për Kosovën Ulrike Lunaçe, e cila ka ftuar edhe njëherë pesë vendet anëtare të BE: Spanjën, Rumaninë, Qipron, Greqinë dhe Sllovakinë të njohin shtetin më të ri evropian, Republikën e Kosovës.

Zëvendëspresidentja e Parlamentit Evropian dhe raportuesja për Kosovën Ulrike Lunaçek, ka ftuar pesë vendet anëtare të BE: Spanjën, Rumaninë, Qipron, Greqinë dhe Sllovakinë të njohin shtetin më të ri evropian, Republikën e Kosovës. Në një intervistë për televizionin e parë publik gjerman ARD, Lunaçek ka deklaruar se e kuptonte hezitimin e këtyre vendeve për shkak të problemeve që kanë me minoritetet në vendet e tyre, por ata duhet ta dinë se “as një qeveri nuk ka vepruar me minoritetet ashtu siç ka bërë Millosheviqi në Kosovë ku ka vrarë, dëbuar dhe ka ushtruar gjenocid ndaj popullatës shqiptare“.

Lunaçek ka përshëndetur qeverinë e re në Kosovë: “Tani ka një koalicion të madh së bashku me minoritetet”. Por kjo qeveri, ka thënë Lunaçek, tani duhet të merret me problemet ekzistuese të vendit. Gjendja ekonomike në Kosovë po keqësohet gjithnjë e më shumë ka shtuar ajo, ndërsa ka nënvizuar se po rritet edhe numri i azilkërkuesve në vendet evropiane, që nga Kosova po kalojnë përmes Serbisë dhe Hungarisë. Kjo është një shenjë se gjeneratat e reja kanë pak shpresë se do të ndryshojë diçka. Kjo gjendje, ka thënë Lunaçek i ka hapur tani mundësinë e manipulimit me të rinj vetëm grupeve islamiste.

Për sa i përket korrupsionit brenda EULEXit, Lunaçek ka deklaruar se kjo e ka dëmtuar shumë Misionin. Akuzat, tha ajo, duhet të sqarohen shumë shpejt dhe fajtoret duhet të dënohen. “Nuk guxon të ketë pardon në rastin e korrupsionit në EULEX” ,tha Lunaçek.

Ndërkaq, për sa i përket dialogut Kosovë – Serbi, ajo tha se problem është tek zbatimi i marrëveshjeve. “Është bërë pak në zbatimin e këtyre marrëveshjeve” tha Lunark për ARD.Ajo ka potencuar se për pasojë Kosova ende nuk ka kodin e saj telefonik. Në Kosovë, ka thënë Lunaçek, duhet të bëhet më shumë edhe për përmirësimin e të drejtave të homoseksualëve.