Lajme Aktuale....

[legjionari]

Musliu pranoi se është përfshirë në dosje
Shpërndaje
Postuar: 9:00 / 24.11.2010

Komente: 0
Ish-zyrtari i shërbimit sekret të Maqedonisë, Hisen Musliu, i arrestuar parmbrëmë në shtëpinë e tij në Tetovë, ka pranuar para organeve të rendit se është i përfshirë në aferën e dosjeve kundër kreut të BDI-së, Ali Ahmeti.

Në njoftimin zyrtar të Ministrisë së Punëve të Brendshme (MPB) thuhet se, pas bisedës informative me të arrestuarin Hisen Musliu, ky i fundit ka pranuar se materialet ende pa u publikuar dhe ato i janë dhënë nga kryesia më e ngushtë e PDSH-së.

"Motivi për involvimin e tij, siç ka bërë të ditur në bisedën informative, ka qenë që kjo parti ta kundërshpërblejë ate me pozita të caktuara pas kthimit të saj eventual në pushtet”, ka thënë zëdhënësi i MPB-së, Ivo Kotevski.

Sipas tij, Musliu ka deklaruar se me personin, të cilit i ka bërë pagesat nëpërmjet transfertave bankare, është njohur që në vitin 1979, dhe pas disa viteve i kanë përtërirë kontaktet. Sipas dyshimeve të shprehura, nga periudha maj e deri në tetor në katër raste janë paguar 4.500 euro.

Policia me arrestimin e Musliut në shtëpinë e tij ka konfiskuar dy kompjuterë personal, dy kartela memorike USB, disa telefona mobil dhe dy fletëpagesa me të cilat janë paguar sasi parash nëpërmjet Ëestern Union në adresë të Bozhidar Spasiq, ish-zyrtar i lartë i UDB-së, që kishte dëshmuar në disa raste dokumente që kishin të bëjnë me kreun e BDI-së.

MPB-ja bëri të ditur se pas analizave të bëra dhe bisedës informative në stacionin policor në Shkup, në kompjuterët e tij janë gjetur katër dosje të fabrikuara, por edhe materiale që gjoja mund të kenë origjinë nga shërbimi sekret gjerman BND, në të cilat sigurisht do të duhej të bëheshin intervenime.

“Gjithashtu janë gjetur edhe materiale të tjera të shkruara në gjermanisht, por edhe në gjuhën serbe, në font tjetër dhe me gabime drejtshkrimore. Gjithashtu është gjetur edhe një fotografi në të cilën ishte tentuar që të bëhej një fotomontazh me liderin e BDI-së dhe të ashtuquajturin Bozhidar Spasiq”, ka thënë Kotevski.

Lidhur me këtë rast, MPB kumtoi se po shqyrton mundësitë që në bazë të ligjeve të Kodit penal dhe ligjeve të tjera për falsifikim dhe lustrim të ngrejë kallëzime penale kundër Hisen Musliut. /INA/


marrë nga http://www.telegrafi.com/?id=79&a=64

Britania cakton kuotë për imigracionin


Nga Express më 24 nëntor 2010 në ora 15:06
Britania ka njoftuar se do të ulë numrin e punonjësve të kualifikuar që do të lejohen të hyjnë në Britani nga vendet jashtë Bashkimit Evropian.
Kjo kuotë përbën një ulje prej 55 mijë punonjës të kualifikuar nga vendet jashtë BE-së, që hynë në Britani vitin e kaluar.

Kufizimet nuk prekin ata punonjës që kanë rroga relativisht të larta, e që janë të transferuar në Britani nga punëdhënësit e tyre.

Sekretarja e Brendshme britanike, Theresa May, njoftoi se numri i vizave për punonjësit e kualifikuar jashtë vendeve të BE-së do të shkonte në 21.700 në vit, duke filluar nga viti i ardhshëm.

"Migracioni i kontrolluar ka qenë me përfitime për Britaninë, si nga ana ekonomike ashtu edhe nga ana sociale, por kur ai del jashtë kontrollit përbën një barrë të madhe për shoqërinë, ekonominë dhe shërbimet sociale", tha May.

"Nuk mund të vazhdojmë më kështu", tha ministrja e britanike në parlament, duke sqaruar se kërkesat për të marrë viza do të ishin të atilla që do të lejonin vetëm ata imigrantë që ishin më me përfitim ekonomik për Britaninë.

Gjatë fushatës zgjedhore të zgjedhjeve të këtij viti, udhëheqësi konservator, David Cameron, premtoi të vendoste një kufi mbi numrin e imigrantëve që hyjnë në Britani.

Enver Sekiraça
Sekiraça në Irlandë, Kosova s’lyp ekstradim


Nga Express më 26 nëntor 2010 në ora 14:35
Enver Sekiraça, i kërkuar edhe për vrasjen e një polici në Kosovë, jeton në juglindje të Irlandës. Por ai nuk mund të ekstradohet, sepse nuk ka marrëveshje ekstradimi mes të Republikës së Irlandës dhe Kosovës, shkruan në numrin e sotëm e përditshmja Irish Times.

Sekiraça ndodhet në listën e personave të kërkuar të Interpolit. Ai dyshohet se është përfshirë në krimin e organizuar për shumë vite.

Nga ana tjetër, autoritetet e Kosovës, deri më tani nuk kanë bërë asnjë kërkesë, për kthimin e tij në Kosovë, ku do të gjykohej për disa vepra, përfshirë vrasjen e policit Triumf Riza.

Zyrtarë të lartë nga Departamentit për Punë të Jashtme dhe Departamentit të Drejtësisë kanë qenë në bisedime me zyrën e Prokurorit të Përgjithshëm në një përpjekje për të sajuar një mekanizëm ligjor për të kthyer atë në Kosovë për gjykim.

E përditshmja Irish Times thotë se autoritetet irlandeze janë të vetëdijshëm për praninë e Sekiraçës në Republikën e Irlandës dhe janë të vetëdijshëm se ai është i kërkuar në Kosovë, raporton RTK.
Shpërndaje artikullin:

[Guri i madh]

Thaçi me premtimet shkel Marrëveshjen me FMN-në

Publikuar: Sot, më 30 nëntor 2010


Artikuj të ngjashëm

Prishtinë, 30 nëntor - Premtimet e kryeministrit në largim, Hashim Thaçi, për rritje të pagave për të gjithë sektorët e punës, janë në kundërshtim me Marrëveshjen e nënshkruar nga dora e tij me Fondin Monetar Ndërkombëtar. Në Marrëveshjen me FMN-në, në të cilën, përveç kryeministrit, nënshkrimin e hodhën edhe ministri në largim i Ekonomisë dhe i Financave, Ahmet Shala, dhe ish-guvernatori Hashim Rexhepi, specifikohet që komplet shpenzimet për paga gjatë vitit 2011 nuk guxojnë të tejkalojnë shumën prej 7.4 për qind të GJDP-së së Kosovës. Sipas kësaj Marrëveshjeje, Kosova nuk guxon të shpenzojë më shumë se 300 deri 350 milionë euro për paga dhe rroga.
Të hënën, Thaçi u ka premtuar rritje të pagave edhe minatorëve të pensionuar. Ditë më parë ai u ka premtuar paga prej 50 për qind më të larta mësimdhënësve parauniversitarë, dhe punëtorëve të administratës publike rritje prej 30 për qind të pagave. Brenda vitit nga buxheti i shtetit shpenzohen rreth 300 milionë euro në paga. Kur kësaj shume të shpenzimeve i shtohen shpenzimet nga premtimet për rritjen e pagave më 2011, vlera totale vjetore e shpenzimeve në paga nga buxheti i shtetit kalon në afro 400 milionë euro. Ky shpenzim e tejkalon shifrën prej 7.4 për qind të lejuar nga FMN-ja në shpenzimet e pagave në sektorin publik.
Në Marrëveshjen e arritur në korrik të këtij viti me Fondin Monetar Ndërkombëtar, krerët e Qeverisë janë zotuar se nuk do të premtojnë rritje të pagave për asnjë sektor që paguhet nga arka e shtetit për vitin 2011. Rritjet e pagave në sektorin publik nuk kanë qenë të parapara as në Kornizën Afatmesme të Shpenzimeve për vitet 2011-2013, dokument zyrtar qeveritar në bazë të të cilit kalkulohen shpenzimet e mundshme në ndonjërin sektor publik. Premtimet e fundit të pagave nga ana e kryeministrit nuk janë të kalkuluara në asnjë dokument zyrtar.
“Ne ju sigurojmë se fatura e pagave të sektorit publik nuk do të ketë rritje mbi 7.4 për qind të GJDP-së në vitin 2011”, ka qenë zotimi i Qeverisë së Kosovës i publikuar në “Stand-by” marrëveshjen me FMN-në.
Megjithatë, zëdhënës i Qeverisë në rënie, Memli Krasniqi, ka thënë se premtimet për rritje të pagave janë bërë në kuadër të hapësirës që lejon Marrëveshja me FMN-në. Sipas tij, rritjet e pagave të premtuara nga Hashim Thaçi nuk e shkelin marrëveshjen me këtë fond ndërkombëtar.
“Të gjitha këto shpenzime janë të planifikuara në buxhetin që pritet të miratohet. Kosova ka mundësi buxhetore që t’i përmbushë këto kërkesa”, ka thënë Krasniqi të hënën. “Marrëveshjet për rritje të pagave kanë ekzistuar para idesë për mbajtjen e zgjedhjeve këtë vit”, ka theksuar ai, duke saktësuar se premtimet për rritje të pagave nuk po përdoren në kuadër të para fushatës për zgjedhjet parlamentare të 12 dhjetorit. Ai nuk ka dhënë shifra se sa milionë euro do të shpenzohen nga rritja e pagave të premtuara për fillimin e vitit 2011.
“Për shifrat kontaktoni me zyrtarët e Ministrisë së Ekonomisë dhe të Financave”, ka thënë Krasniqi.
Por, në Ministrinë e Ekonomisë dhe të Financave nuk është dhënë asnjë detaj mbi shpenzimet e mundshme në rritjen e pagave. Zyrtarë të lartë të kësaj ministrie kanë kërkuar nga gazeta që “të mos i fusin ata në këso telashe”, meqë, sipas tyre, kjo mund t’i fusë në bela me kreun qeveritar.
Kryeministri në dorëheqje, Hashim Thaçi, nuk ka reshtur së premtuari rritje edhe ditën e hënë. Në listën e tij për rritje të pagave, pas punëtorëve të arsimit dhe shërbyesve civilë, janë futur edhe policët, zjarrfikësit dhe pensionistët e parakohshëm.

[Guri i madh]

haçi vazhdon me premtime

Publikuar: Sot, më 30 nëntor 2010

• Thaçi vazhdon me premtime

Prishtinë, 30 nëntor - Një ditë para nisjes së fushatës zgjedhore, kryeministri në dorëheqje e ka shfrytëzuar për të takuar përfaqësues sindikatash të ndryshme. Hashim Thaçi ka bërë sot premtime të tjera, që ai i ka quajtur vendime e jo premtime, raporton KTV. Përfaqësuesve të universiteteve private u ka thënë se do t’i lirojë nga TVSH-ja, ndërsa në takim me përfaqësues të SBASHK-ut ka rikonfirmuar marrëveshjen për rritje pagash të mësimdhënësve për 50 % dhe të policëve për 100 %. Të gjitha këto ka thënë se do të realizohen që nga janari i vitit që vjen, duke qenë i bindur se ai do të jetë përsëri kryeministër i Kosovës. “ Unë kam bërë investime kapitale në qeverisjen e kaluar dhe në mandatin e ardhshëm këto investime do t’i tërheq në mirëqenien e qytetarëve “ – ka thënë kryeministri në dorëheqje , pas takimeve maratonike këtë mëngjes në Qeverinë e Kosovës.

[Llapjani_HH]

Diaspora jashtë regjistrimit

Akad. Hivzi ISLAMI

Regjistrimi i popullsisë është një projekt i madh dhe shumë kompleks statistikor, profesional e teknik, me rëndësi të posaçme shoqërore, ekonomike, politike dhe kombëtare.

Mirëpo, këtu nuk do të flasim hollësisht as për rëndësinë e tij, as për metodologjinë, as për definicionet e klasifikimet përkatëse, as për Ligjin dhe programin e aktiviteteve, as për kapacitetet profesionale-kadrovike dhe organizative të Entit Statistikor të Kosovës, as për koncepcionin mbi bazë të të cilit do të realizohet operacioni, ku do të dëmtohet më së shumëti popullata shumicë.

Për të gjitha këto do të bëjmë fjalë në një rast tjetër.

Shkas për këtë reagim janë deklaratat e ministres në dorëheqje të Ministrisë së Administratës Publike, e cila e ka marrë me shumë zallahi e pompozitet operacionin e regjistrimit të popullsisë (sikurse edhe një ish-ministre zhurmëmadhe e këtij dikasteri në vitet 2005-2007), mbase edhe për motive personale elektorale.

Ministrja jonë këto ditë, në raste të ndryshme, përsëriti pandërprerë se regjistrimi do të mbahet në prill të vitit 2011, duke prejudikuar suksesin e tij me “zgjidhjen” e dy çështjeve, deri tash problematike: përfshirjen e serbëve në regjistrim dhe përfshirjen e shqiptarëve në diasporë.

Është për ta admiruar ministren që nuk shfaq asnjë dozë frike se ky regjistrim mund të dështoj fare lehtë, pikërisht pse serbët ka shumë mundësi që ta bojkotojnë operacionin, në një anë, dhe duke mbetur pa u përfshirë në të shqiptarët në diasporë, në anën tjetër.

Përmes të ashtuquajturës “listë komplementare”, ku pjesëtarët e popullatës shumicë nuk do të përfshihen në popullsinë e përgjithshme të Kosovës nëse nuk jetojnë në Kosovë më shumë se një vit (zbatimi i koncepcionit të “popullsisë së pranishme” e jo të koncepcionit të “popullsisë rezidenciale”), tentohet të krijohet një mjegullirë, me prapavi të qartë.

Regjistrimi i popullsisë është shtyer me vite të tëra pikërisht pse serbët nuk u pajtuan që t’i përgjigjeshin operacionit.

Ministrja jonë dhe faktori i jashtëm tash janë optimistë se serbët nuk do ta bojkotojnë regjistrimin, ndërsa shqiptarët në diasporë do t’i mashtrojnë me premtimin se do të përfshihen në regjistrim.

“Lista komplementare”: një mashtrim ordiner i diasporës

E ashtuquajtura “Lista komplementare” është një mashtrim i llojit të vet, që konsiston në fshehjen e reagimit të shqiptarëve të Kosovës me bojkotim të regjistrimit pse do të mbesin jashtë përfshirjes në regjistrim ata të cilët, për shkaqe të dhunës ekonomike, politike, policore, ushtarake, etnike, racore etj., të konceptuar mirë nga pushteti fashisoid serb për një kohë të gjatë, gjenden në botën e jashtme me status të ndryshëm qëndrimi dhe kohëzgjatje mbi një vit.

Në fakt, “lista komplementare”, e rezervuar për shqiptarët, është dinakëria e të huajve që përmes saj në regjistrim të përfshihen serbët, të cilët e kanë braktisur Kosovën pas sulmeve të NATO-s dhe çlirimit të Kosovës në qershor të vitit 1999, pra para 12 vjetëve, për ta bërë Kosovën me dhunë multietnike!

Faktori ndërkombëtar nuk preokupohet me gjendjen strukturore demografike dhe sociale të Kosovës, por i intereson vetëm pasqyra e tillë etnike, ku shqiptarët do të dalin në numër më të vogël dhe serbët në numër sa më të madh!

Deri tash, me zbatimin e kriterit “lidhja e personit me vendbanimin” dhe pengesave të tjera, të paktën rreth 300.000 shqiptarë në diasporë (mbi 18 vjet) nuk u përfshinë në listat e votuesve në Kosovë dhe më tepër në regjistrimin civil (mbi 16 vjet), të organizuar nga OSBE-ja pas luftës, duke u shkelur e drejta e tyre për të zgjedhur dhe për t’u zgjedhur dhe për të poseduar dokumente identifikimi.

A ka logjikë që këto 12 vjetët e pasluftës të thuhet zyrtarisht se Kosova ka rreth 2 milion banorë, kur shtimi natyror, me gjithë dobësitë në përfshirjen e ngjarjeve vitale (nënregjistrimi), sillet midis 27.000 dhe 30.000 veta mesatarisht në vit! Ndërsa, tash një vit, në zgjedhjet komunale, lista e votuesve numëronte mbi 1.5 milion votues (!).

Për këtë numër, duke marrë parasysh moshën e popullatës, Kosova duhet të kishte së paku 2.7 milion banorë. Këto ditë KQZ-ja e shpalli listën prej 1.630.636 votuesve (!), që nënkupton minimum 3 milion banorë. Shtrohet pyetja: a është përfshirë në këtë numër edhe diaspora?

Me “listën komplementare” (Formulari S1) nuk përfshihen në popullsinë e përgjithshme të Kosovës personat që gjenden jashtë Kosovës mbi 12 muaj.

Këta persona nuk përfshihen as në pyetësorin individual (Formulari R3), ku edhe shënohet se për personat që jetojnë jashtë Kosovës “nuk plotësohet pyetësori individual” (R3), ndërsa vetëm personat nga Formulari individual përfshihen në popullsinë e përgjithshme të Kosovës dhe trajtohen si persona rezidencialë në Kosovë.

Mashtrimi do të shkojë deri në atë shkallë sa që as që do të përpunohen të dhënat nga “lista komplementare” (Formulari S1), e cila eshe ashtu do të jetë me plotë defekte sa i përket përfshirjes!

Të luhet me diasporën tonë, që dha kontribut të madh në ndërkombëtarizimin e çështjes së Kosovës, në dhënien e ndihmave financiare për veprimtaritë vitale të shqiptarëve dhe në rezistencën e armatosur kundër okupatorit serb, është e pandershme dhe e turpshme.

Më e ndershme është t’i thuhet diasporës sonë se do të mbesë jashtë procesit të regjistrimit, sepse këtë nuk po e lejojnë të huajt!
Për dëmtimin e popullatës shqiptare, nesër të huajt nuk bartin përgjegjësi. Atë e bartin vendorët: shteti, ministrat, Enti i Statistikës, shoqëria civile, ekspertët etj.

Për këto 7-8 vite faktor i jashtëm dhe të gjitha instancat relevante vendore kurrë nuk kanë menduar si të ngritet niveli profesional-kadrovik dhe organizativ i Entit Statistikor në mënyrë që të përgatitej një regjistrim gjithëpërfshirës dhe cilësor, sikundër që nuk është penguar as menaxhimi i keq i këtij institucioni dhe keqpërdorimet financiare.

Për këto vite, kapacitetet e Entit kanë stagnuar, madje kanë rënë me pensionimin e kuadrove profesionale ose edhe ndjekjen e tyre nga përgjegjës të instancave përkatëse qeveritare në vitet 2004-2007, me drejtorë të regjistrimit të popullsisë që nuk ishin në gjendje ta drejtonin as një zyre të ofiçarisë në një vendbanim të vogël rural, përfshirë Drejtorin e sotëm të regjistrimit, i cili madje nuk di t’i nxjerrë as përqindjet, por e ka mbështetjen e fuqishme politike!

Është detyrë e mediave që të kërkojnë nga njeriu më përgjegjës i tërë projektit (drejtori), të intervistohet lidhur me regjistrimin e popullsisë, në mënyrë që të shihet kush është njeriu kryesor i këtij operacioni dhe pastaj të gjykohet për rezultatet e tij.

vazhdon-->

[Llapjani_HH]

vazhdimi--->

Inferioriteti ndaj të huajve

Është e vërtetë se ministrja jonë e ka gjetur një situatë, të cilësuar si “fait accompli” lidhur me regjistrimin e popullsisë, ose thënë më thjesht i ka mbetur në dorë “patatja e nxehtë”, sepse disa vjet përpara janë kryer “pazaret” për mënyrën e regjistrimit dhe veçanërisht për koncepcionin dhe përkufizimin e “popullsisë rezidenciale” nga të cilat varet sa banorë do të ketë Kosova dhe çfarë përbërje etnike.

Ama ministrja nuk bëri as më të voglën përpjekje për të ndërruar bile diçka.

Enti Statistikor i Kosovës është shndërruar në më pak se një argat: të gjithë pyetësorët (Formularët R1, R2, R3 dhe S1) dhe materiali tjetër për regjistrimin e vitit 2011 janë përgatitur nga të huajt dhe janë një përkthim mekanik në shqip (me shumë gabime gjuhësore e kuptimore), ku nuk guxohet të ndërrohet asnjë germë e vetme.

Kurajimi dhe pompoziteti i ministres sonë në dorëheqje vijnë nga mbështetja që isntancat ndërkombëtare po i japin realizimit të kësaj ndërmarrjeje.

E vërteta është se ka 7-8 vjet që regjistrimi i popullsisë, nga instancat profesionale dhe politike, ndërkombëtare dhe vendore, është dizajnuar ashtu që të shkojë në dëm të shqiptarëve dhe në favor të pakicave dhe, më komkretisht, të serbëve.

Që në vitin 2005 UNMIK-u kishte hartuar planin për formimin e qendrave të veçanta në Serbi dhe Mal të Zi për regjistrimin e serbëve, ani pse kishin kaluar 6 vjet nga shpërngulja e tyre.

Ndërkaq për të tjerët vlente kriteri se nëse mbi një vit gjenden jashtë Kosovës, nuk do të përfshiheshin në regjistrim!

Ky kriter diferencues, me tendencë të aplikimit të kamufluar, do të vlejë në regjistrimin e vitit 2011!

Po mbushen tashmë 12 vjet që faktori kosovar nuk e ka kundërshtuar pothuajse në asnjë rast faktorin ndërkombëtar atje ku ka pasur shumë të drejtë, të mbështetur në fakte më bollëk.

Është për ta përshëndetur reagimin e ashpër, të argumentuar, të ministrit tonë të brendshëm dr. Bajram Rexhepi dhe ministrit të Integrimeve Evropiane Besim Beqaj lidhur me kushtet shtesë për liberalizimin e vizave për qytetarët kosovarë, ku menjëherë u zbut toni i evropianëve.

Instancat e huaja, në biseda me shqiptarët, veçanërisht në bisedat ku është vendosur statusi politik-konstitucional i Kosovës, çfarë janë p.sh. bisedimet e Vjenës në vitet 2005-2007, dhe më herët e më vonë -, kurrë nuk ka pasur versione dhe plane rezervë, çfarë kanë pasur me Serbinë dhe serbët.

Plani i M. Ahtisarit (decentralizimi) është përpiluar mbi bazë të të dhënave të Serbisë (shifrat për numrin e banorëve, përbërjen etnike dhe sipërfaqen e vendbanimeve dhe komunave të reja serbe; çështjet kadastrale etj.) dhe kërkesave të saj.

Delegacioni i Kosovës ishte shndërruar në një karnaval, ku shpeshherë shkohej në Vjenë me 50-60 veta, pa profesionistë! Ky delegacion, si “zemërgjerë dhe fleksibil”, vështrohej me simpati nga bashkësia ndërkombëtare, duke u lavdëruar për konstruktivitet, sepse ofroj më shumë se sa prisnin të huajt dhe vetë Beogradi zyrtar!

Kështu me shumë lehtësi doli plani 5+1 komuna të reja serbe, me privilegje të papara në Evropë dhe në botë, ku kufijtë komunalë u bënë dhe kufij ndërkombëtarë!

Për këto 11-12 vjet pas çlirimit janë bërë shumë eksperimentime në përpjekjet për të zbatuar modele të huaja në fusha të ndryshme.

Në rrethanat tona specifike, asnjë model nuk ka gjetur zbatim në terren. Më së keqi ka kaluar dhe po kalon sistemi i arsimit, veçanërisht ai shkollimit të lartë.

Një kundërshtim i tillë nuk ndodhi as me problemin e regjistrimit të popullsisë, operacion që ka rëndësi jo vetëm statistiko-demografike dhe është bazë për planifikimin e zhvillimit ekonomik dhe social, por është edhe çështje politike, komponent që e anashkalon ministrja jonë, gjë që është një miopi politike.

Jemi dëshmitarë që fakti etnodemografik dhe statistik, bile në rastin e Ballkanit Perëndimor e Qendror, veçanërisht të Kosovës, është bërë dhe çelës i zgjidhjes së raporteve politike dhe etnike. Është i njohur fakti se në Serbi në regjistrimin e vitit 2002 janë përfshirë edhe serbët e Kosovës, por shifra nuk është kumtuar, sepse e mbajnë për ta përdorur si shantazh në momentin e duhur. Regjistrimi i vitit 2011 në Kosovë mund të jetë rast i përshtatshëm për ta përdorur këtë shifër
QIK-u

PolitikëShoqëriBallkan&Botë

Gecaj: Në burg, është ushtruar dhunë ndaj Dedës


B. Kalaja | 30-11-2010 18:09 CET
Familja Gecaj nga Gjakova ishin mbledhur të martën përpara ambasadës së Zvicrës në Prishtinë në një protestë paqësore lidhur me rastin e Dedë Gecajt, i cili në rrethana të pasqaruara vdiq në burgun e ST. Galenit në Zvicër derisa pritej që të fillonte gjykimi i tij. Rreth 200 familjarë dhe të afërm të Dedë Gecajt, protestuan dhe kërkuan nga organet kompetente vendore dhe ndërkombëtare zbardhjen e vdekjes së të afërmit të tyre.
Ata kanë hedhur dyshimet e tyre se Gecaj nuk ka bërë vetëvrasje, por është vrarë, pasi po të mbahej një proces gjyqësor do të merrej vesh rasti i vrasjes së mësuesit të vajzës së tij për të cilën akuzohej Gecaj.
“Mirëpo, në vend të trajtimit të tij sipas ligjeve dhe të drejtës ndërkombëtare, i ndjeri Dedë Gecaj, për shumë javë me radhë ishte mbajtur i prangosur me zinxhirë në duar dhe në këmbë”, tha i kushëriri Pjetër Gecaj. Ai tha se Dedë Gecaj për dy muaj të qëndrimit në burg i kishte njoftuar familjarët e tij për kushtet e këqija që i ishin ofruar atij.
Avokati i Dedë Gecajt, Kolë Krasniqi, ka njoftuar se mbrojtja ka parashtruar kërkesë dhe është lejuar që Ministria e Drejtësisë së bashku me autoritetet zvicerane do të jenë pjesëmarrës në superekspertizë.
“Më vjen mirë që autoritetet zvicerane kanë pranuar këtë çështje edhe për faktin se ne kemi shumë informacione, kemi shumë prova materiale, të cilat dëshmojnë se vrasja e Dedë Gecajt është kryer në një formë shumë të përsosur dhe me veprime të koordinuara afatgjate, të cilat kanë shkaktuar vdekjen e tij”, tha Krasniqi.
Avokati ka treguar se si Gecaj në kundërshtim me të gjitha konventat ndërkombëtare është mbajtur i prangosur me zinxhirë në këmbë e në duar e se si buka e tij në një shtet të tillë autoritativ siç është Zvicra i ka shkuar përherë e mykur dhe tejet bajate. Madje Gecaj sipas Krasniqit është ankuar se si atij i është ndalur edhe ajri në qeli.
“Ne kemi kërkuar që të formohet një komision ndërkombëtar dhe të hetohet nëse eventualisht në qelinë e tij ka pasur mundësi teknike të ndalet ajri, kur kihet parasysh efektet e tmerrshme të kësaj çështjeje”, tha ai.
Institucionet e Kosovës sipas tij e kanë tradhtuar Gecajn, e kanë tradhtuar familjen e tij dhe në kundërshtim edhe me Kushtetutën e Republikës së Kosovës, në kundërshtim dhe pa ekzistuar aspak marrëveshje ndërshtetërore për ekstradim.
“Kemi parasysh se vendimet që i kanë marrë institucionet kosovare janë bazuar në një marrëveshje private të realizuar në vitin 2007, mirëpo në vitin 2008 është ndaluar me vendim të plotëfuqishëm të Gjykatës Supreme të Kosovës, ekstradimi i Dedë Gecajt në Zvicër dhe ajo gjykatë nuk ka qenë nacionale, por ka qenë e UNMIK-ut”, tha Krasniqi.
Ai ka thënë se përpjekjet për të zbardhur këtë rast nuk do të mungojnë as në të ardhmen. “Pavarësisht vendimeve gjyqësore, të cilat do t’i marrin gjykatat e ndryshme të vendit rruga jonë është në Strasburg”, tha ai.
Më 11 nëntor autoritetet zvicerane patën njoftuar se 52-vjeçari Dedë Gecaj kishte vdekur. Ata nuk patën dhënë më shumë detaje se si ka ndodhur që i burgosuri në fjalë ka ndërruar jetë. Ministria e Drejtësisë e Kosovës ka ekstraduar më 2 shtator të këtij viti për në Zvicër shtetasin e Kosovës, Dedë Gecaj, nga fshati Janosh i Gjakovës.
Gecaj kërkohej nga autoritetet zvicerane për dyshimin e kryerjes se veprave penale të vrasjes.

• Currently 4.57/5
• 1
• 2
• 3
• 4
• 5

Nota: 4.6/5 (7 votë/a)





Foto: Driton Bublaku

[Guri i madh]

Sulmohet ambasada e Kosovës në Paris Sulmohet Ambasada e Republikës së Kosovës në Paris. Ngjarja ka ndodhur mbrëmë kur disa huliganë e kanë dëmtuar pllakën zyrtare të ambasadës, duke shkruar simbole dhe parulla serbe. ...

[Guri i madh]

Miliarderët pa fakultet

Publikuar: Sot, më 05 dhjetor 2010





Londër, 5 dhjetor – Se pasuritë e mëdha jo gjithmonë ndërlidhen me arsimime të larta flet shembulli i disa prej njerëzve më të pasur të botës, të cilët kurrë nuk e kanë dashur shkollën. Në mesin e atyre që nuk e kanë të përfunduar fakultetin është, për çudi, edhe njeriu më i pasur i globit, transmeton Reuters.

Kështu, Bill Gates, themeluesi i gjigantit “Microsoft” dhe njeriu më i pasur i botës, nuk e ka të përfunduar fakultetin dhe megjithatë në arkën e tij ka hiq më pak se 54 miliardë dollarë. Ai ka nisur studimet në Harvard, mirëpo i ndërpreu në momentin që filloi të merrej me biznes. “I admiroj studentët e sotëm, të cilët shkojnë në mënyra shumë më direkte drejt diplomave të tyre”, ka thënë Gates. “Për sa më përket mua, më vjen mirë që më quajtën studentin më të suksesshëm të Harvardit, i cili ka braktisur studimet. Sikur të ekzistonte një departament imi special në fakultet, supozoj se do të isha ai që në fund lexon përgjigjen... Në çdo rast, jam më i miri nga ata që kanë dështuar”, pranon Gates.

Nga ana tjetër, shefi i kompanisë “Oracle”, Larry Elison, është edhe një pasanik që ka braktisur studimet, në Universitetin e Chicagos. Të vetmin kualifikim akademik e ka titullin e ndërmarrësit të vitit, të cilin më 1990 e ka marrë nga Fakulteti i Ekonomisë në Harvard.

Amansio Ortega, shefi i industrisë së modës “Zara” dhe i kompanisë “Insitex”, nuk ka arsimim të lartë, ama posedon 25 miliardë dollarë. Megjithatë, shumë shkolla të biznesit në mbarë botën kanë adoptuar modelin e tij të biznesit të aplikuar në “Inditex”.

Edhe pronarja e zinxhirit tregtar “Wall Mart”, Cristy Wolton, është njëra prej pasanikeve që ka mbushur arkën e saj me 24 miliardë dollarë pa kryer shkollim të lartë. Kjo gjë nuk e ka ndalur megjithatë që pjesën më të madhe të parave ta dhurojë për fondacionet bamirëse të familjes Wolton, e cila financon studentët nga Meksika dhe Amerika Jugore në studimet e tyre nëpër kolegjet amerikane.

[Guri i madh]

Gjermania kërcënon me tërheqje nga euroja

Publikuar: Sot, më 05 dhjetor 2010





Berlin, 5 dhjetor - Kancelaria gjermane, Angela Merkel paralajmëroi se Gjermania mund të tërhiqet nga eurozona dhe të rikthejë ish-valutën e saj kombëtare, markën gjermane.

Ndonëse është një nga qendrat kryesore të eurozonës, Berlini megjithatë po e shqyrton mundësinë për të braktisur eurozonën. Ky paralajmërim vjen si pasojë e krizave financiare të Greqisë dhe Irlandës dhe ndihmave shumëmiliardëshe të siguruara nga BE-ja.

Kancelarja gjermane paralajmëroi se në rast se nuk ka zgjidhje afatgjatë për krizat financiare te vendet anëtare që mund të paraqiten në të ardhmen, atëherë ajo paralajmëroi tërheqjen e mundshme të Gjermanisë.

Gjermania ka pasur disa propozime lidhur me formimin e një mekanizmi stabilizues evropian në kuadër të BE-së, por qëndrimet e saj ishin kundërshtuar nga ana e disa vendeve anëtare.

Merkel kishte propozuar që vendeve që janë të papërgjegjshme në planin financiar t’iu hiqet e drejta për votim. Problemet e fundit financiare dhe të kolapsit ekonomik në Portugali kanë bërë që të shtohen shqetësimet brenda vendeve anëtare, pasi që do të duhet të sigurohen miliarda euro edhe për këtë vend anëtar.

[Guri i madh]

Kosova i humb 20 milionë euro ndihma nga BE-ja

Publikuar: Sot, më 07 dhjetor 2010





Bruksel, 7 dhjetor – Kosova nuk e ka pasur aq lehtë të bëhet anëtare e Fondit Monetar Ndërkombëtar, ndërsa tash, për shkak të situatës politike dhe fushatës zgjedhore, rrezikon keqësimin e raporteve me këtë organizatë dhe si rrjedhojë edhe ndihmën financiare makroekonomike që Bashkimi Evropian ka ndarë për Kosovën. Burimet nga BE-ja i kanë thënë “Kohës Ditore” se tashmë janë të njoftuar me premtimet e mëdha që po jepen në fushatën zgjedhore në Kosovë, për realizimin e të cilave Kosova nuk ka mjete, por nuk duan të prononcohen publikisht rreth kësaj, duke mos dashur të përziheshin në fushatën zgjedhore. Megjithatë, ajo që në BE pohojnë pa ndonjë rezervë është se Kosova me mospërmbushjen e Marrëveshjes me Fondin Monetar Ndërkombëtar do të humbë këstin e dytë të ndihmës makrofinanciare të BE-së prej 20 milionë eurosh dhe në të ardhmen vë në dyshim edhe asistencën tjetër eventuale nga Bashkimi Evropian.
“Komisioni Evropian ka mbështetur shumë zhvillimin ekonomik të Kosovës dhe të gjitha përpjekjet për të arritur një politikë fiskale të parashikueshme dhe të qëndrueshme. Komisioni kishte mirëpritur marrëveshjen me Fondin Monetar Ndërkombëtar gjatë verës dhe, pasi Kosova kishte përmbushur të gjitha kriteret, kishte dhënë këstin e parë prej 30 milionë eurosh nga asistenca makrofinanciare e BE-së në fillim të shtatorit”, përkujton Angela Filote, zëdhënëse e Komisionit Evropian e ngarkuar për çështje të zgjerimit. Ajo më tej thotë se nuk i ka përmbushur kushtet për të marrë këstin e dytë të kësaj ndihme nga BE-ja.
Në shpjegimin me shkrim dërguar “Kohës Ditore”, pas sqarimeve nga Komisioni Evropian, Angela Filote sqaron: “Për shkak të zhvillimeve të fundit politike buxheti për vitin 2011 nuk është aprovuar nga Kuvendi. Si pasojë, FMN-ja nuk e ka kompletuar shqyrtimin e parë të Stand – By aranzhimit dhe nuk e ka dhënë këstin e dytë të kredisë së FMN-së, siç ishte parashikuar fillimisht për në fund të nëntorit. Në këto rrethana Komisioni Evropian nuk mund të vlerësojë se marrëveshja e Kosovës me FMN-në mbetet në fuqi. Prandaj kushti kyç për lirimin e këstit së dytë të asistencës makrofinanciare të BE-së (20 milionë euro) për Kosovën tash për tash nuk është plotësuar, duke pamundësuar në këtë mënyrë dhënien e asistencës, e cila skadon me 11 dhjetor të vitit 2010”.
Komisioni Evropian po ashtu tërheq vërejtjen se edhe ndihma eventuale makrofinanciare për Kosovën nga BE-ja do të varet nga respektimi i marrëveshjes me Fondin Monetar Ndërkombëtar. “Komisioni do të rishqyrtojë nevojat financiare të Kosovës, bazuar në kornizën e shpenzimeve afatmesme 2011-2013, që duhet ta paraqesin autoritetet kosovare në fillim të vitit 2011, në bashkëpunim të ngushtë me FMN-në, dhe nëse Kosova vazhdon në mënyrë të kënaqshme të zbatojë programet e FMN-së, do të shqyrtojë se a janë përmbushur kushtet që t’i drejtohet Këshillit të BE-së dhe Parlamentit për një operacion të ri të asistencës makrofinanciare. Për këtë është me rëndësi kruciale që Kosova në mënyrë strikte të zbatojë Marrëveshjen me FMN-në”, thotë zëdhënësja e Komisionit Evropian, Angela Filote.

[Guri i madh]

KE-ja e pakënaqur me përpjekjet antikorrupsion të Qeverisë

Publikuar: Sot, më 08 dhjetor 2010





Prishtinë, 8 dhjetor - Komisioni Evropian nëpërmjet një letre dërguar Qeverisë së Kosovës ka kritikuar përmbajtjen e Ligjit të ri të prokurimit publik, duke e cilësuar atë si një hap në drejtim të gabuar. Mekanizmi nga i cili Qeveria e Kosovës kishte kërkuar ndihmë për hartimin e një ligji të prokurimit, i cili do të forconte llogaridhënien dhe do të shërbente si përkrahje për luftimin e korrupsionit ka vlerësuar se ligji i ri për tenderët publik nuk paraqet përpjekje për të përmirësuar problemet e përmendura në Raportin e progresit të vitit të kaluar. “Ne kemi investuar kohë dhe përpjekje të konsiderueshme në përgjigje të kërkesës suaj dhe pavarësisht prej afateve të caktuara kohore ne kemi dërguar një Draftligj të prokurimit publik, i cili do të adresonte të gjitha problemet e përmendura në Raportin e progresit të vitit të kaluar. Ne jemi të befasuar që ligji i adaptuar nuk i reflekton këto përpjekje”, thuhet në shkresën e Komisionit Evropian dërguar në fillim të këtij muaji në adresë të Qeverisë së Kosovës. Sipas KE-së, shkruan sot “Koha Ditore”, ligji që rregullon fushën e kontratave publike përmban një numër të madh të provizioneve që duheshin të shmangeshin për të qenë në koordinim me kriteret e Bashkimit Evropian.
“Draftligji ynë në mënyrë eksplicite donte t’i shmangte disa provizione që kanë të bëjnë me lejimin e oficerëve të prokurimit t’i nënshkruajnë vetë kontratat publike, lejimi i Agjencisë së Prokurimit Publik që të ketë një kontroll të plotë në tenderët njëburimorë si dhe zvogëlimi i fuqisë së Komisionit Rregullativ të Prokurimit Publik në monitorimin e tenderëve”, thuhet në shkresën e Komisionit Evropian drejtuar krerëve të Qeverisë së vendit. Ligji për tenderët publikë, sipas Komisionit Evropian, përveç tjerash lejon dy korporata publike Postë-Telekomin e Kosovës dhe Korporatën Energjetike të Kosovës që të bëjnë prokurime të mëdha pa përdorur ndonjë nga procedurat që zbatohen zakonisht në prokurimet publike. Kjo “vizë”, të cilën nuk duhet ta kishin dy korporatat që japin më së shumti tenderë publikë, sipas KE-së, vlen për kontratat substanciale, vlera e të cilave shkon deri në rreth 5 milionë euro. “Ligji i ri ashtu si është paraqet një numër të konsiderueshëm të moskoordinimeve me “Acqua Comunicitare”, direktivë evropiane e prokurimit publik”, theksohet në këtë shkresë. Tjetër vërejtje e Komisionit Evropian, prej të cilit Qeveria kishte kërkuar ndihmë për hartimin e Ligjit të prokurimit, është edhe mospërfillja e këtij ligji në rastet e dhënies me koncesion të kontratave që kanë të bëjnë me punë ose shërbime.
Neni 3.5 që flet për këtë punë, sipas KE-së, nuk është në përputhje me traktatin e direktivave 2004/17 EC të Bashkimit Evropian. “Si rezultat i kësaj fshirjeje ka një rrezik që një numër substancial i koncesioneve janë lënë jashtë Ligjit të prokurimit publik. Kjo mund të konstituojë në shkelje të Acquis”, thuhet në këtë shkresë. Po ashtu edhe neni 35.2 i Ligjit të ri të prokurimit që flet për procedurat e negociuara pa njoftim kontrate lejon tender njëburimorë në rastet kur ka më pak se dy ofertues të përgjegjshëm. “Kjo do të shkojë përtej rregullave të BE-së derisa ky provizion do të lejohet”, vlerëson Komisioni Evropian. As zv.kryeministri i Qeverisë së Kosovës, Hajredin Kuçi, të cilit i ka shkuar kjo letër e Komisionit Evropian as zëdhënësi i Qeverisë, Memli Krasniqi, të martën nuk kanë gjetur kohë për t’u prononcuar rreth letrës së KE-së.
Ligji i ri i prokurimit ka hyrë në fuqi më datën 1 dhjetor, ndërsa është miratuar në parlament në shtator të këtij viti për t’u dekretuar më 25 tetor nga ushtruesi i detyrës së presidentit të vendit Jakup Krasniqi. Qeveria në Projektligjin e prokurimit publik kishte paraparë që të nënshkruanin tenderë edhe ministrat, pasi një gjë e tillë ishte kërkuar nga Komisioni Evropian. Kjo pjesë e këtij ligji nuk kishte marrë pëlqimin e deputetëve të Partisë Demokratike të Kosovës që udhëhiqet nga kryeministri Hashim Thaçi dhe ishte votuar që kontratat publike t’i nënshkruante vetëm zyrtari i prokurimit.

[Guri i madh]

Prishtinë, 9 dhjetor - Instituti Demokratik i Kosovës (KDI), me rastin e Ditës ndërkombëtare kundër korrupsionit - 9 Dhjetorit, ka lansuar publikimin më të ri “Barometri Global i Korrupsionit 2010” (Global Corruption Barometer).
Ky publikim është përpiluar nga organizata me renome botërore kundër korrupsionit “Transparency International”, ku si partner kryesor ka Institutin Demokratik të Kosovës, të cilit edhe i jep të drejtën e lansimit të këtij raporti për Kosovën.

Merita Mustafa, menaxhere e programit të KDI-së “Transparenca dhe Antikorrupsioni” ka thënë në konferencën për media se “Barometri global është një sondazh i opinionit publik, që realizohet nga organizata Transpareny International, e që i matë perceptimet dhe përvojat e njerëzve të zakonshëm që kanë të bëjnë me korrupsionin.

“Barometri global i Korrupsionit për vitin 2010 reflekton pikëpamjet e më shumë se 91 mijë respondentëve në 86 vende, duke e bërë atë edicionin më të plotë që nga lansimi i tij i parë më 2003. Pra, ky është edicioni i shtatë me radhë, ndërsa hulumtimi është bërë në periudhën kohore 1 qershor 2010 dhe 30 shtator 2010”, ka deklaruar Mustafa.

Nga ana tjetër, Esat Mazreku, nga KDI, ka shpalosur përmbajtjen e raportit, duke thënë se 73% e të anketuarve në Kosovë besojnë se që nga viti 2007 niveli i korrupsionit është rritur, përderisa vetëm 8% mendojnë se korrupsioni është ulur. Sipas tij, ashtu si në gjithë botën, edhe në Kosovë partitë politike shihen si institucionet më të korruptuara në vend, të përcjella nga gjyqësori dhe çuditërisht parlamenti.

“Shihet qartazi se institucionet politike dhe Gjyqësori kanë një imazh tejet negativ tek qytetarët. Prandaj, politikanët dhe gjyqtarët duhet të përpiqen shumë për ta përmirësuar atë, përderisa e tërë përgjegjësia për shkallën e lartë të korrupsionit u vishet atyre”, ka thënë Mazreku.

Perceptimi i të anketuarve sipas tij është se sektorët më pak të korruptuar janë OJQ-të, kleri (institucionet religjioze), mbrojtja dhe policia, institucion ky që prinë në rajon porsa i përket perceptimin mbi nivelin e korrupsionit.

“Dhënia e ryshfetit përbën shqetësim serioz, si në nivel global ashtu edhe në Kosovë. 15% e të anketuarve kanë deklaruar se ata ose dikush nga të afërmit e tyre kanë dhënë ryshfet në forma dhe institucione të ndryshme. Duhet të kihet parasysh se ryshfeti, në të shumtën e rasteve i prekë shtresat më të varfra të popullsisë së një vendi, përfshirë edhe Kosovën”, ka thënë Mazreku në konferencën për media.

Sipas Barometrit Global të Korrupsionit, 61% e të anketuarve mendojnë se masat anti-korrupsion nga ana e qeverisë nuk kanë pasur ndonjë efekt, përderisa 32% mendojnë se masat kanë qenë efektive.

“Në përgjithësi, në nivel rajoni, Kosova qëndron jo mirë për sa i përket perceptimit të korrupsionit me notën mesatare prej 3.5”, ka thënë ai.

Njëkohësisht, në ditën ndërkombëtare kundër korrupsionit - 9 dhjetor, ky publikim lansohet edhe në nivel global.

Për herë e të parë, barometri i këtij viti pyet njerëzit e zakonshëm nëse kanë vullnet të përfshihen në luftë kundër korrupsionit:
Përgjigjet e qytetareve në këtë drejtim kane qenë se; 7 nga 10 respondentët kanë shprehur gatishmëri që të raportojnë për ndonjë rast të korrupsionit, 7 nga 10 respondentët po ashtu kanë deklaruar se njerëzit e zakonshëm mund të bëjnë ndryshime në luftën kundër korrupsionit, ndërsa gjysma e tyre janë shprehur se mund të imagjinojnë veten të përfshirë në luftën kundër korrupsionit.

[Guri i madh]

Petroviç: Presidenti i ardhshëm i Kosovës mund të ishte një serb Presidenti i ardhshëm i Kosovës mund të ishte një serb, në qoftë se dalin të gjithë serbët në zgjedhje, ka thënë Sllobodan Petroviç, kryetar i Partisë së Pavarur Liberale. ... Postuar: 12:33:33 / 10.12.2010
Ai ka llogaritur potencialin e votuesve serbë, që sipas tij do të mund të arrinte të siguronte 30 vende në Parlament, duke pasur parasysh votat e ndara të shqiptarëve nëpër subjektet politike.