Në pritje të 16 Shtatorit 2011

[Zero Cool]

EULEX-i vepron në përputhje me mandatin e vet





21:37 / 17.09.2011

Maja Kocijancic, zëdhënësja e Përfaqësueses së lartë të BE-së për politikë të jashtme, Catherine Ashton, ka deklaruar se EULEX-i në dy pikat kufitare në veri të Kosovës vepron në përputhje me mandatin e vet.
"EULEX-i nuk i ka tejkaluar kompetencat e veta dhe vepron krejtësisht në përputhje me mandatin e vet”, ka thënë Kocijancic për Tanjug në një bisedë telefonike.

Kocijançiq nuk është pajtuar me pohimet e zyrtarëve në Beograd se marrëveshja për vulat doganore nuk ka pasur të bëjë me zgjidhjen çështjes së vendkalimeve Bërnjak dhe Jarinje.

"Ky është implementim i marrëveshjes (së Beogradit dhe Prishtinës) për vulat doganore të 2 shtatorit”, ka thënë ajo duke shtuar se për BE-në është me rëndësi që është zgjidhur çështja e vulave dhe se ajo tash vetëm mund të implementohet.

[Zero Cool]

Të shtëna me armë zjarri në veri





22:13 / 17.09.2011

Serbë të armatosur të shtunën në mbrëmje kanë sulmuar shqiptarët në fshatin Çabër, në rajonin e Zubin Potokut në veri të vendit- bëjnë të ditur burime të portalit LajmeShqip.
Sipas këtyre burimeve, serbët kanë sulmuar me rafalë automatikësh katër automjete të shqiptarëve në këtë fshat.

Po ashtu, thuhet se një veturë tjetër e një shqiptari, ka shpëtuar për fat të mirë, pas një sulmi të drejtpërdrejtë me armë nga serbët, te barrikada e betonuar në fshatin Kelmend.

[Zero Cool]

Rexhepi: Zhbllokimi i rrugëve s’është përgjegjësi e jona





11:36 / 18.09.2011


Zhbllokimi i rrugëve që të çojnë në pikat kufitare 1 dhe 31 nuk është përgjegjësi e autoriteteve kosovare të policisë, ka thënë ministri i Punëve të Brendshme, Bajram Rexhepi.
“Sa i përket barrikadave, përsëris se kjo mbetet përgjegjësi e KFOR-it dhe EULEX-it. Por, nëse kërkohet edhe përfshirja e policisë sonë, nuk ka problem. Ata kanë rrugë alternative për furnizim, e nëse bëhen pengesë për KFOR-in, barrikadat do të hiqen”, shprehet Rexhepi në një intervistë për “Top Channel”.

Në këtë situatë, pa ndonjë plan për mundësimin e lëvizjes së lirë, ministri ftoi qytetarët serbë që në vend që të qëndrojnë në barrikada të fillojnë përgatitjet për sezonin e vjeshtës e të dimrit.

“Është më mirë që ata serbë që rrinë në barrikada të përgatiten për vjeshtën e dimrin se sa të qëndrojnë aty. Por, kjo është çështja e tyre”..

Ministri mohoi informacionet se doganierët serbë kanë refuzuar të shkojnë në pikën 1 dhe 31.

“Nëse ata pengohen nga barrikadat duhet të lajmërojnë, por nëse refuzojnë të kthehen në punë do të shkarkohen nga detyra”.
Ministri Rexhepi përjashtoi mundësinë që veriu të bëhet pjesë e bisedimeve me Serbinë.

“Kjo është çështje e brendshme e Kosovës dhe nuk do të ketë bisedime me Serbinë”.

[Zero Cool]

Veriu me një refren: Qetë por me tensione





11:49 / 18.09.2011

Situata e sigurisë në veri të Kosovës, në ditën e dytë pas vendosjes së doganierëve dhe policëve kosovare në vendkalimet kufitare me Serbinë, në Jarinë dhe Bërnjak, vlerësohet të jetë e qetë, por me tensione.
Zëdhënësi Policisë së Kosovës për rajonin e Mitrovicës, Besim Hoti, tha për Radion Evropa e Lirë se gjendja edhe të dielën është e qetë dhe se nuk është shënuar ndonjë incident.

Mirëpo, sipas Hotit gjatë natës në rajonin e komunës së Zubin Potokut janë dëgjuar disa të shtëna armësh .

“ Kemi marr informacion për të shtëna armësh diku në regjionin e fshatrave të Zubin Potokut, përkatësisht në zonat e fshatrave Zupç dhe Koshtovë. Nga kjo zonë kemi ankesat dhe shqetësimet e banorëve, si atyre serbë ashtu edhe atyre shqiptarë, të cilët pretendojnë se të shtënat kanë ardhur nga drejtimi i kundërt. Policia nuk ka mundur të regjistrojë më saktësisht lokacionin se nga kanë ardhur të shtënat”, ka thënë Hoti.

[Fshatari]

Postimi origjinal është bërë nga Zero Cool

Veriu me një refren: Qetë por me tensione





11:49 / 18.09.2011

Situata e sigurisë në veri të Kosovës, në ditën e dytë pas vendosjes së doganierëve dhe policëve kosovare në vendkalimet kufitare me Serbinë, në Jarinë dhe Bërnjak, vlerësohet të jetë e qetë, por me tensione.
Zëdhënësi Policisë së Kosovës për rajonin e Mitrovicës, Besim Hoti, tha për Radion Evropa e Lirë se gjendja edhe të dielën është e qetë dhe se nuk është shënuar ndonjë incident.

Mirëpo, sipas Hotit gjatë natës në rajonin e komunës së Zubin Potokut janë dëgjuar disa të shtëna armësh .

“ Kemi marr informacion për të shtëna armësh diku në regjionin e fshatrave të Zubin Potokut, përkatësisht në zonat e fshatrave Zupç dhe Koshtovë. Nga kjo zonë kemi ankesat dhe shqetësimet e banorëve, si atyre serbë ashtu edhe atyre shqiptarë, të cilët pretendojnë se të shtënat kanë ardhur nga drejtimi i kundërt. Policia nuk ka mundur të regjistrojë më saktësisht lokacionin se nga kanë ardhur të shtënat”, ka thënë Hoti.

Shqiptaret nuk pretendojne kurgjo hiç : te shtenat kane ardhe nga tyta e kriminelve serbe.
Shqetesimet nuk jane te banorve serbe po vetem shqiptare.
Dhe per perfundim, dihet saktesisht se nga cili lokacion vijne te shtenat e milicise se tadiçit; madje dihen edhe emnat e shtazevet qe po gjuejne me arme zjarri...nuk ka as pretendime (trillime) as paqartesi...

[Zero Cool]

Veriu, në duar të kriminelëve serbë





12:55 / 18.09.2011

Veriu i Mitrovicës dhe i Kosovës mbeten në duart e grupeve kriminale serbe, të cila kanë mbështetje të Qeverisë së Serbisë. Të gjitha rrugët që të shpien për në veri të Kosovës mbesin të bllokuara, ndërsa është betonuar barrikada në fshatin Kelmend, në hyrje të fshatit Rudare të Komunës së Zveçanit.
Betonimi në Kelmend është kryer pak para mesnatës të së premtes. Grupet serbe kanë përforcuar edhe barrikadën në urën kryesore mbi lumin Ibër, si dhe atë në afërsi të udhëkryqit të shkollës teknike, duke shtuar sasinë e rërës dhe të zhavorrit.

“Koha Ditore” shkruan se betonimi i barrikadës në hyrje të fshatit Kelmend është bërë me rreth 25 metra kub beton të derdhur në rrugë, ndërsa operacioni i betonimit është kryer me kamionët e njërit prej krerëve të krimit të veriut të Kosovës, Zvonko Veselinovic.

Situatë e rëndë është edhe në magjistralen e Adriatikut, rrugë kjo që të shpie për në pikën kufitare Bërnjak. Grupe serbësh kanë bllokuar tërësisht rrugën, 200 metra mbi fshatin Çabër, ndërsa aksi rrugor nga barrikada deri në hyrje të fshatit Koshtovë kontrollohet nga tri makina: një “Toyota” e bardhë kamionetë, një “Golf 2” i bardhë, si dhe një “Golf 3” i zi. Në këtë aks rrugor, mbi fshatin Zupç, vërehet një grup serbësh të armatosur.

Pas hyrjes në këtë pjesë të një makine me gazetarë shqiptarë, serbët kanë intervenuar. “Koha Ditore” shkruan se në pikëkontrollin e KFOR-it, i cili është në hyrje të rrugës për në fshatin Çabër, serbët të udhëhequr nga Mirko Velimirovic - i njohur me nofkën Pajo - kanë kërcënuar gazetarët shqiptarë dhe pjesëtarët e KFOR-it gjerman.

“Nanën e hitlerave, nuk duam t’ju shohim këtu”, u ka thënë Pajo ushtarëve.

Ushtarët gjermanë të KFOR-it, me urdhër të prerë i kanë urdhëruar serbët që ta vazhdojnë rrugën. Të revoltuar, serbët iu kanë afruar një makine të policisë së Kosovës të Zubin-Potokut dhe me fjalë kërcënuese e kanë detyruar të largohet nga aty. Viktimë e Pajos dhe e shoqërisë së tij ka rënë edhe një makinë e pjesëtarëve të policisë së EULEX-it, e cila është detyruar të largohet nga fshati Zupç.

Se gjendja e sigurisë në këtë pjesë të Kosovës është e rëndë, dëshmon edhe fakti se ndërrimi i pjesëtarëve të KFOR-it në pikën e Zupçit bëhet përmes rrugës së vjetër, nëpërmes fshatrave shqiptare të pjesës veriore të lumit Ibër.

[Zero Cool]

Serbët me uniforma te ura e Ibrit





15:57 / 18.09.2011

Nata e mbrëmshme ka kaluar nën tensione, përderisa bllokadat kanë vazhduar të mbesin në rrugë. Mbrëmë janë dëgjuar edhe të shtëna armësh në disa fshatra të veriut, si në Çabër, Kelmend e Kushtovë.
Më e tensionuar ka qenë situata tek ura e Ibrit, ku në anën jugore kanë qëndruar forca të mëdha të KFOR-it, Policisë së Kosovës dhe EULEX-it, ndërsa gjatë gjithë natës matanë urës kanë qëndruar dhjetëra serbë me uniforma të zeza.

Në orët e hershme të mëngjesit, në afërsi të urës janë ofruar 6 furgonë të cilët janë ndalur për një kohë pranë urës së Ibrit, nga kanë zbritur disa serbë të veshur me uniforma të zeza.

Ekipi i KTV-së tek tre rrokaqiejt ka parë disa serbë duke bllokuar rrugën kryesore, e cila është mbajtur ashtu për disa orë rresht.

Banorët e shqetësuar të lagjes së tre rrokaqiejve kanë bërë rojë gjatë gjithë natës.

[Zero Cool]

Përgjigjja e Beogradit


Serbia ka dhënë përgjigjen e saj për vendosjen e doganierëve dhe policëve në kufij. Përforcoi barrikadat në veri dhe kërkoi që për Jarinjën dhe Bërnjakun të diskutohet në raundin e ardhshëm të dialogut në Bruksel, në fund të shtatorit. Kërkesa u refuzua nga Prishtina. Edita Tahiri tha se ky kapitull është mbyllur njëherë e përgjithmonë.


Nga Shpend Limoni më 18 shtator 2011 në ora 08:05
Zyrtarët e lartë në Beograd kanë qëndruar larg mediave të premten, kur në Kosovë po zhvillohej operacioni i vendosjes së kontrollit në pikat kufitare në pjesën veriore.

Një ditë pasi EULEX’i dhe KFOR’i arritën bashkë me doganierë dhe policë kosovarë në atë pjesë, autoritetet serbe kanë kërkuar që kjo temë të bëhet pjesë e bisedimeve në Bruksel gjatë raundit të ardhshëm, të caktuar për datën 28 shtator.

Në tërë këtë muhabet, fjalën kryesore sërish e ka marrë kryenegociatori serb Borko Stefanovic, i cili të shtunën në veri ka shpalosur propozimin e ri serb.

Shefi i delegacionit serb ka thënë se propozimi i Beogradit, siç ka thënë ai, për zgjidhjen e krizës në Kosovës është dërguar në Bruksel dhe se ofron mundësi që çështja e dy pikëkalimeve kufitare të zgjidhet në atë mënyrë që të jetë e pranueshme për të dyja palët.

Ai ka thënë se Beogradi është duke pritur përgjigjen e Brukselit ndaj kësaj iniciative, duke thënë se një gjë e tillë pritet të ndodhë shumë shpejt, sipas tij, edhe para raundit të ardhshëm të bisedimeve, që është caktuar për 28 shtator.

Negociatori serb ka theksuar se gjatë takimit të ardhshëm në kryeqytetin europian nuk duhet të jetë temë çështja e energjisë elektrike dhe e telekomit.

Nëse nuk diskutohet për dy pikat kufitare, Stefanovic ka thënë se ka mundësi që raundi i ri të mos zhvillohet fare.

Stefanovic ka thënë se propozimi serb nuk parasheh praninë e doganierëve kosovarë në veri.

“Propozimi i Beogradit në asnjërin element nuk përmban praninë e doganierëve dhe policëve të Kosovës”, ka thënë ai.

Stefanovic ka deklaruar se prania e doganierëve kosovarë në Jarinje dhe Bërnjak nuk është diskutuar asnjëherë dhe se as Dogana e Kosovës nuk ka funksionuar ndonjëherë atje.
Ai ka thënë se pret përgjigje nga Brukseli për iniciativën e Beogradit dhe mundësinë që kjo çështje të zgjidhet duke u pranuar nga të dyja palët.
Duke folur për operacionin në veri, Stefanovic ka thënë se një gjë e tillë është bërë me qëllim që të bëhet me dije se ky është realiteti i ri dhe se situata nuk mund të ndryshojë.

“Ata kanë krijuar një iluzion të pabesueshëm dhe dy ishuj të izoluar me nga 200 m2 që janë iluzione të Hashim Thaçit se këtu mund të kontrollojë diçka”, ka thënë Stefanovic. Kërkesën e palës serbe për përfshirjen e dy pikëkalimeve kufitare në bisedime e ka konfirmuar edhe Ministri i Brendshëm serb, Ivica Dacic.

“Çështja se kush do të jetë në pikëkalime dhe se ku do të shkojnë mjetet që mblidhen aty nuk ka qenë pjesë e dialogut. Ne pajtim me këtë, ne kemi kërkuar nga BE që këto çështje të diskutohen menjëherë, ndoshta qysh në raundin e ardhshëm të dialogut”, ka thënë ai.

Ai ndërkaq ka bërë edhe një paralajmërim për mundësinë e bllokimit të rrugëve që shfrytëzohen, siç ka thënë ai, më së shumti nga shqiptarët.

Pikëkalimi ku më së shumti ka qarkullim mes Kosovës dhe Serbisë është kufiri në Merdarë dhe te Dheu i Bardhë.

Kërkesa e re e Beogradit është komentuar të shtunën nga udhëheqësja e delegacionit të Kosovës, Edita Tahiri, e cila e ka hedhur poshtë mundësinë e bisedimeve për këtë temë.
Ajo ka thënë se Kosova asnjëherë nuk do të bisedojë për çështjen e pikave doganore në veri dhe se kjo çështje është kapitull i mbyllur njëherë e përgjithmonë.

“Në bazë të propozimit të ndërmjetësit të BE’së, Cooper, takimi i radhës është paraparë më 27 dhe 28 shtator dhe ne si Qeveri e Republikës së Kosovës, si palë në këto bisedime, kemi konfirmuar se jemi të gatshëm.

“Në fakt qëllimi i këtij dialogu është i karakterit teknik. Kjo ka qenë edhe arsyeja kryesore pse ne si Qeveri e Kosovës e kemi pranuar dialogun, prandaj edhe dialogu do të bëjë fjalë për temat praktike, jo për çështje politike”, është shprehur Tahiri.

[Zero Cool]

Veprimet në përputhshmëri me Rezolutën 1244






Në kuadër të vizitës zyrtare në SHBA, të dielën në Neë York, kryeministri Hashim Thaçi, është takuar me Sekretarin e përgjithshëm të OKB-së, Ban Ki-moon, në selinë e Kombeve të Bashkuara.
Gjatë takimit, Thaçi theksoi se veprimet e Republikës së Kosovës në veri janë plotësisht në përputhshmëri të Rezolutës 1244 të Këshillit të Sigurisë, si dhe ligjeve dhe Kushtetutës së Republikës së Kosovës. Ai vlerësoi se veprimet e Qeverisë në pjesën veriore të Kosovës, vetëm se e fuqizojnë parimin themelor që garantohet edhe me rezolutën 1244 se Kosova është një njësi doganore.

Kryeministri theksoi se Qeveria e Kosovës është e përkushtuar që në Kosovë të luftohet krimi dhe dukuritë tjera negative, të cilat fatkeqësisht që 12 vite janë toleruar në pjesën veriore të Kosovës.

Në takim u bisedua edhe për dialogun në mes të Republikës së Kosovës dhe Republikës së Serbisë. “Dialogu me Beogradin është i rëndësishëm, sepse Kosova është shtet që dëshiron të zhvillojë marrëdhënie të mira fqinjësore me Serbinë dhe se zgjidhja e problemeve praktike është jetike”, është shprehur kryeministri.

Sipas tij, është jetike që marrëveshjet e arritura të respektohen nga Serbia, dhe Kosova është e përkushtuar ta implementojë pjesën e saj të përgjegjësive që dalin nga marrëveshjet, ndërsa të njëjtën gjë duhet ta bëjë edhe Serbia.

[Zero Cool]

Përpjekje e kotë






I pafuqishëm të ndalë vendosjen e autoriteteve kosovare në doganat në Veri dhe funksionalizimin e tyre, Beogradi kërkon shpëtim në Bruksel. Borko Stefanovic thotë se doganat do të jenë temë në dialog. Por kjo nuk ka gjasa të ndodhë. Për futjen e një temë në dialog duhet të ketë pajtim nga dy palët. Ndërkaq, Brukseli thotë se ajo që po ndodh në Veri është zbatim i marrëveshjes për vulat doganore.
Pas dështimit që të pengojë planin e Qeverisë për vendosjen e kontrollit në dy vendkalimet kufitare në Veri, Serbia po e mashtron opinionin serb se ende ka mundësi të kthejë procesin prapa, shkruan Express.

Disa ditë para 16 shtatorit, zyrtarët më të lartë serbë, duke filluar nga presidenti Boris Tadic, vazhdimisht kanë paralajmëruar se kanë plane për të mos lejuar vendosjen e doganierëve dhe policëve kufitarë të Kosovës në Veri, por nuk doli gjë nga kjo.

Me ndihmën e KFOR-it dhe EULEX-it, doganat në Bërnjakë dhe Jarinje janë bërë sërish pjesë sistemit doganor të Kosovës.

As thirrja e seancës së jashtëzakonshme të Këshillit të Sigurimit, me ndihëm e Rusisë, nuk i mundësoi Serbisë të ndalë KFOR-in dhe EULEX-in që të ndihmojnë autoritetet kosovare për të marrë doganat.

Megjithëkëtë, zyrtarët serbë kanë lansuar një opsion tjetër përmes të cilit do të bëjnë përpjekje që së paku doganierët e Kosovës të largohen nga dy pikat doganore në Veri.

Shefi i delegacionit serb, Borko Stefanovic, por edhe zyrtarë të tjerë të Beogradit, kanë bërë të ditur se i kanë dërguar një letër Bashkimit Evropian, përkatësisht Zyrës së Baroneshës Ashton, me të cilën propozojnë që “zgjidhja për funksionimin e pikave kufitare në Veri dhe doganave” të kërkohet në takimin e radhës në dialogun mes Kosovës dhe Serbisë.

Letra me propozimin serb ka mbërritur në Bruksel, të premten pasdite, por asnjë zyrtar i BE-së nuk është marrë me të.

“Jemi të gatshëm të presim sa të jetë e nevojshme”, ka thënë ai.

[Zero Cool]

Pritet marrëveshje Thaçi-Tadic






Vizita e kryeministrit Hashim Thaçi në New York për të marrë pjesë në margjinat e Asamblesë së Përgjithshme të OKB-së, përveç përpjekjeve lobuese, mund të realizojë edhe një marrëveshje të rëndësishme për veriun e Kosovës.
Të paktën kështu besojnë përfaqësues të misioneve ndërkombëtare të akredituar në Kosovë.

Burime të gazetës Zëri brenda këtyre misioneve deklarojnë se vizita e Thaçit në New York mund të rezultojë me një marrëveshje për heqjen e barrikadave nga rrugët në veri.

Kjo marrëveshje, sipas tyre, do të mund të realizohet pas një takimi që do të zhvillohet me presidentin e Serbisë, Boris Tadic dhe përfaqësuesit të lartë të Bashkimit Evropian dhe atyre të SHBA-së.

“Barrikadat do të largohen, mirëpo duhet të ketë siguri fillimisht. Për të pasur një ambient të qetë për largimin e barrikadave pa pasoja duhet të ketë një marrëveshje mes palëve dhe kjo marrëveshje ka gjasë që të arrihet në New York”, ka qartësuar ky burimi ndërkombëtar.

Madje, sipas të njëjtit burim, arritja e një marrëveshjeje të mundshme ka qenë arsyeja kryesore që kryeministri Thaçi ka shkuar në SHBA, pikërisht në kohën kur veriu i Kosovës është bllokuar nga ekstremistët serbë në përpjekje për të parandaluar ligjshmërinë në këtë rajon.

[Zero Cool]

KFOR-i dhe EULEX-i heshtin për barrikada





KFOR-i dhe EULEX-i kanë vendosur t’i përcjellin me heshtje deklarimet e ministrit të Punëve të Brendshme, Bajram Rexhepi për çështjen e përgjegjësisë së heqjes së barrikadave të vendosura nga serbët lokalë në veri të Kosovës.
Gazeta Koha Ditore shkruan se të dielën është munduar të marrë një qëndrim nga KFOR-i dhe EULEX-i, por një gjë e tillë ka qenë e pamundur.

Një ditë më parë, në një intervistë për televizionin Top Channel, Rexhepi ka thënë se lirimi i rrugëve që çojnë në pikat kufitare me Serbinë, 1 dhe 31 nga bllokadat e vendosura nga serbët, nuk është në fushën e përgjegjësisë së institucioneve të Kosovës.

“Sa u përket barrikadave, përsëris se kjo mbetet përgjegjësi e KFOR-it dhe EULEX-it”, ka thënë Rexhepi. “Por nëse kërkohet edhe përfshirja e policisë sonë nuk ka problem. Ata kanë rrugë alternative për furnizim, e nëse bëhen pengesë edhe për KFOR-in, barrikadat do të hiqen”, ka thënë ai.

Ndryshe, serbët në veri të Kosovës në vend të heqjes së barrikadave nëpër rrugë, të dielën ata i kanë shtuar ato, kanë bërë të ditur burime të gazetës.

[Zero Cool]

Ivanovic: Bllokadat nuk do të qëndrojnë gjatë!






“Situata aktuale dhe bllokada e veriut të Kosovës nuk mund të zgjasin shumë. Gjithçka varet se kur përfaqësuesit e BE-së dhe të NATO-s do të kuptojnë se fjala është për luftën të cilën paraprakisht duhet ta humbin”, ka thënë i ashtuquajturi sekretar për Kosovën në qeverinë serbe, Oliver Ivanovic.
“Me popullin i cili është i paarmatosur ata (BE dhe NATO) nuk kanë asnjë përparësi”, thotë Ivaniovic, sipas të cilit është në interesin e të gjithëve “në këtë lojë”, përfshirë shqiptarët e Kosovës, që çështja e pikave kufitare të zgjidhet sa më shpejtë.

Sipas tij, deri në fund të javës do të ketë një zgjidhje, dhe si skenarë të mundshëm, siç thotë ai, “përmend ftesën e Prishtinës që gjithçka të zgjidhet përmes bisedimeve ose të arrihet një marrëveshje në nivelin lokal”.

“As kjo nuk përjashtohet, sepse përfaqësuesit e komunave kanë autorizime në këtë aspekt dhe ata mund të kërkojnë që kjo çështje të zgjidhet. Kërkesa e tyre fillimisht do të jetë tërheqja e doganierëve dhe që EULEX të ketë ingerencat të cilat i kishte më herët, e që pastaj gjithçka të rregullohet me bisedime”, shton Ivanovic, transmetojnë mediat beogradase.

Ai thotë se Prishtina më nuk do të vë embargo ndaj produkteve të Serbisë, dhe se “fjala është vetëm për frikësim”.

“Reagimi i njëjtë i Beogradit bllokadë me bllokadë, vetëm se do ta komplikonte jetën e shqiptarëve dhe të të gjithëve në rajon... Mund ta marrë me mend se si do të ishte po ta bllokonim Konçulin, Dheun e Bardhë, apo Merdaren. Atëherë shqiptarët do të drejtoheshin në Maqedoni dhe Shqipëri, gjë që nuk do të ishte mirë”. /Telegrafi/

[Zero Cool]

KFOR: Barrikadat jashtë-ligjore - do t'i heqim


Me helikopterë mbi kokat e tyre, KFOR-i ka shpërndarë mesazhe për serbët në barrikada. Ata kanë gjuajtur pamlfete në të cilat shkruante se KFOR-i e pranon të drejtën për protesta paqësore, porse barrikadat janë të jashtëligjshme.





19 shtator 2011
Aty thuhet se KFOR-i në bazë të rezolutës 1244 e ka për qëllim të kthejë lirinë e lëvizjes, raporton indeksonline.

Autoritetet kosovare kanë thënë se është përgjegjësi e KFOR-it të zhbllokojë veriun, por KFOR-i duket se po pret ngadalë dhe po i lutë serbët që t’i heqin vetë barrikadat.

[Zero Cool]

Anëtarët e komisionit mbështesin veprimet e Qeverisë


Gjendja aktuale e sigurisë në Republikën e Kosovës, me theks të veçantë në veri të vendit, ishte temë diskutimi në mbledhjen e Komisionit për Punë të Brendshme, Siguri dhe Mbikëqyrjen e Forcës së Sigurisë së Kosovës, të kryesuar nga Ahmet Isufi, kryetar i komisionit.






19 shtator 2011
Ekonomisti
Me këtë rast anëtarët e Komisionit duke vlerësuar gjendjen në veri, si dhe hapat që duhet t’i ndërmarrë Qeveria e Kosovës, përkatësisht Ministria e Punëve të Brendshme, konfirmuan se u japin mbështetje institucioneve vendore dhe atyre ndërkombëtare që të jenë prezent në veri të vendit më gjithë mekanizmat e tyre, në mënyrë që të ketë një funksionim të jetës normale edhe në këtë pjesë të vendit dhe zbatim të rendit dhe ligjit.
Duke theksuar se zbatimi i Kushtetutës në gjithë territorin e vendit është obligim institucional, anëtarët e komisionit vlerësuan se institucioneve relevante duhet t’u jepet kohë për të përmbushur pritjet e qytetarëve të vendit.

Anëtarët e komisionit njëzërit kërkuan që të bëhen hapa tjerë nga institucionet e vendit që të mundësohet lëvizja e lirë e qytetarëve duke hequr barrikadat në veri të vendit.

“Të funksionalizohen gjykatat në veri me të gjithë resorët e ministrive. Të veprohet në mënyrë të planifikuar për gjashtë muajt e ardhshëm, sipas planit të paraparë nga faktori ndërkombëtar dhe vendor”, theksuan anëtarët e komisionit.

Disa nga anëtarët e komisionit vlerësuan se situata në veri pos që është e tensionuar, atje ekzistojnë edhe probleme tjera të mëdha, si çështja e kufirit, prezenca ilegale e institucioneve të Serbisë, etj, duke shtuar se grupe të ndryshme kriminale vazhdojnë ta terrorizojnë popullatën serbe dhe shqiptare në këtë pjesë.

Në vijim të mbledhjes, anëtarët e komisionit kanë shqyrtuar propozim-vendimin e Qeverisë së Republikës së Kosovës lidhur me përcaktimin e përgjegjësive dhe procedurave të zbarkimit të Forcës së Sigurisë së Kosovës jashtë vendit, e cila mori mbështetjen e anëtareve të komisionit, dhe mund të procedohet më tej.

Anëtarët e komisioni kanë shqyrtuar në parim edhe Projektligjin për sistemin e adresave, me ç‘rast formuan një grup pune.

Më tej anëtarët e komisionit shqyrtuan dhe miratuan propozim-amendamentet e Projektligjit për Agjencinë Kosovare të Forenzikës.