Agim Gashi

[Urata]

KËNGË PËR YLFETE HUMOLLIN
Kjo Kosovë po tokë arbnore
Ju ka lëshu ni valë mizore,
Me na e marr´ çdo gja kombëtare,
Prej fillores në universitare,
Po na ban çdokend anmik
Profesorë e akademik.
Me masakër e me dhunë
Na´i ndalen mësim e punë,
Kanë qit helm e municion
N´trupa t´njomë të gjitha ranë.
Që dhjetë vjet n´Kosovë jetojmë,
Me dhunë e vrasje, terror shtetnor,
Tu´ na vra n´shkolla e n´shtëpi
Njerëz ma t´mirë n´burgje tui shti
Nxanës, studentë tuj i përjashtu´,
Papunësinë, po tu´ e shtu´
Tu´ na qujtë nacionalista,
Terrorista, kanibalista
Me nai kthy mbiemnat n´viçe,
Naj qu´jnë nanat,lavatriqe.
Mos me hy ma thell´ n´mendime,
Po I këndojmë ni vashës trime
Që jeta e saj ju fal këtij trolli
Ish shqiptarja Ylfete Humolli.
Me nji shurt po agoi dita
E milicët kanë zanë prita,
Me vra shqiptarë që qojnë dy gishta
Që kërkojn demokraci,
Që s´durojnë dhunë, kërkojnë liri,
Si gjithkund në Kosovën trime
Që po vuen n´vaj e idhnime
N´Lupç të Poshtëm u derdh gjaku
Aty ku lindi Adem Demaçi,
Volli zjarr automatiku
Vashës s´re jetën ja fiku.
O atë mëngjes atë ditë me diell
Stinë e dimnit po ishte verë,
E Ylfetja ishte zgju´,
Po në shkoll´ ajo me shku´
Dituni për me fitu´,
Per me mësu´ ta urren robninë
Ta kërkon gjithmonë lirinë,
Se kështu jeta e kishte mësu´
Dhunë, terror mos me duru´.
E Ylfetja del n´livadhe
Me shokë t´shkollës rrokë në valle,
Janë rreshtu´ dy e nga dy,
Tu´i ngrit veç dy gishtërij
Tu´ kerku´ demokraci
As me armë e as me topa
Ç´po kërkojmë ka ndi´ bota
E Ylfetja gishtat çon
Si shqiponja qi fluturon
Për liri, demokraci
Qi shqiptarët mos t´rrnojn n´robni.
Dal kadalë janë rreshtu´
Pranë flamurit janë rreshtu´
Të bashkuem për liri,
Tu´ kërku´ demokraci
E Ylfeta në rreshta t´parë,
E rrokë plumbi mu në ballë,
E rrokë plumbi i gjakatarit
E i shtymë edhe prej tradhtarit,
U nda shqiptarja nga kjo jetë,
Për Kosovë kurr´ mos me vdekë,
Nuk do vdesish, oj motra jonë
Për Kosovë ke ra dëshmore,
Se Kosova të ka rritë,
Me gjak t´njom´ me u ujitë.
Nuk mbajme zi, por jem krenar
Ju nderojmë me lule n´varr.

[Urata]

KANGË PËR SHUKRIJE OBERTINCEN

Moj pranverë tet´dhjet´ e nantë
Sa e ngrysun sa e vrantë,
Sa e pa shpirt ti qëllove
Mbar nji popull e tradhëtove.
E shum nana i verbove
E Kosoves lirinë ja more,
Po me tanksa e ushtri
Për me vra vasha e djem të ri!
Me robnu popullin shqiptar
Buk´n e gojës me ja marr,
Me varros çdo gja shqiptare:
Kultur, arsim, lirinë kombëtare…
Porse populli trim shqiptar,
I del hasmit ball´ për ball´,
Djel e vasha , t´njoma,t´reja,
Para tankëve i mblon hareja,
I ka qit nana n´ket jetë,
Me ja fal Kosovës t´shkretë,
Sa shpejtë toka e uji i rrirë
Me gjak Kosova me u ujitë,
E ma t´kuqe lulet me u rritë
Se kur vret hasmi n´Kosovë
Nanat tona lindin “boll´”
Kur vran hasmi fëmi dhjetëvjeç
Nanat lindin katërneq!
Kështu n´mars t´vitit tetëdhjetenantë
Vit i ngrysun dhe i randë,
Kur bota gëzohet në pranverë
N´Kosov´ fillon rrëmuj e skëterë
Po me tankë dhe ushtri,
Na e vodhën atë pak liri.
Por ngriten n´kambë djel e vasha
Nëprotesta e demonstrata
Ushton Kosova, Llapi, Drenica
Si të ishin ngjallë Shote e Azem Galica
Ish me shokë Shukrije Obertinca.
Vajz´ e re gjashtmbëdhjet´ vjeqare
E lehtë e bukur si Sorkadhe,
I vlonte zemra prej dëshirës
T´hy n´protestë n´qendër t´Prishtinës.
Ti ngris lart dy gishtëni
T´kërkoj liri, demokraci,
S´durohet dhuna me tradhëti
S´lejohet të tjerëet t´na e presin fatin
Ma mirë asht me e derdh gjakun.
Lamtumirë babes i thotë
Në Prishtinë unë po shkoj sot
Me u bashku me shoqe t´mia
Na thërret toka dhe liria
Rrugë të mbar baba u ka thanë
E mirë leje u ka dhanë,
Bashkë me motër përshendeten
Pak ma gjat me nanë të veten,
Sa mirë nana i përqafon,
E n´Shukrien dy lot i ranë.
Me autobus rrugën kanë marrë
Në Prishtin sa shpejt kanë ardhë,
Por Prishtina ish blloku:
“Sa shumë milic motër paskan pru”
Të dy motrat si sorkadhe
Kanë fillue me britë me t´madhe,
Me grupe tjera janë ashkangjitë,
Për Kosovë pa pas kurrë frikë
Pa mendue k´tu kush do t´jesë
Tu´ këndue kangen : »Besa-besë… »
N´kët rrëmuj n´kët´ tollovi
Fillun me qit po helm të zi,
E rafalët shqiptar tue gri
Tue vra t´ri edhe trimnesha
Hudhet Shukrija si Luanesha,
Pa mendue,se plumbi shpon
Me gurë tankset i qëllon.
« Para shoqe e shok » i fton!
Në katër anët llahtari
Por shqiptari për liri
I ngreh gishtat proteston,
Se Kosova nanë na fton
Me e derdhë gjakun e lirisë.
Ka nevojë toka e Arbnisë.
Gruppe, grupe, vasha t´reja
Ua kaplon zemrat hareja
Grupe, grupe vasha e t´ri,
Kerkojnë liri, demokraci,
Por kur hynë në rrugë t´pazarit
Villnin zjarr tyta t´tradhtarit,
Villnin zjarr për me shue jetë
E me vra Shukrien e shkretë,
Me dhanë jetë me shumë shokë t´vetë,
Se n´pranverë e kish pagzimin
Me ja ba n´pranverë vorrimin.
Kështu plumbi i gjakatarit,
E rrok Shukrien në lule t´ballit
E rrok motra në prehen t´vet,
E në gjoks kokën ja qet
Gjaku i kuq nga goja i del
I afrohen shokët në ndihmë,
Porse nana nji Shukri lindë,
E këtë vashë ja vrau Serbia
Me ja qu t´vdekun te shpija.
Në vend t´fustanit të nusnisë,
Me i qitë flamur t´lirisë
Në vend t´dasmorve me hare
Mija vetë me e qu n´dhe,
Për Kosovë përsri me le
Se e dha jetën për atdhe
Gjaku i saj u derdh n´këtë dhe
E kjo toka e Arbënisë
Nuk harron kurr gjak t´lirisë.
Moj Shukrije Obertinca
Je trimneshë si Shotë Galica,
Vrasja jote asht nder i vendit
Si i pat dhanë Nora e Kelmendit
Fli e qetë nuse e lirisë
Nuk t´harrojmë per jetë t´Arbnisë.

[Urata]

KANGË PËR VEHBI IBRAHIMIN

Çka ka qielli që gjemon,
Çka kanë detnat që ushtojnë,
Çka kanë kodrat që rënkojnë,
Çka kanë fushat që vajtojnë,
Çka kanë lulet aromë që s´lëshojnë,
E bilbilat që s´këndojnë,
Edhe Drini rrjedhen ndal
Se nji burr shqiptar e vranë,
Vehbi Ibra emnin ia thonë.
Dhjet´ tetor tetdhet´ e nji
Atje larg n´kurbet të zi,
Dorë e UDB-es paska mbrri,
Me vra burrin në tradhëti
Zgjati dorën UDB-a sllave
Për me vra zemra shqiptare
Pa zot shpie mbet nji familje,
Pa nji anëtar po kjo Besëlidhje.
E lotun të shtatë fëmija,
E lotun tanë shqiptaria,
E vajtoj gruja me plumba n´gji,
Se ra deshmor për nanë Shqipni.
Me lot n´sy por me krenari
E kujtojmë vepren e tij,
Se n´protesta e demonstrata
Ishte n´ball me ndjenja t´pastra,
Ja k´ndoj kangen me sharkinë mike
Se ra deshmor për troje etnike.
S´ndalej trimi e s´e ndal turrin
Me Arben Kosovën këtë far´ burri
Te tanë Evropën tuj e shetit,
Kosovën nanë me e qitë n´dritë,
Virtyte t´larta e ideal
E me besë t´popullit shqiptar
Sa i afërt ishte për mikun
Shumë i tmerrshem për anmikun
Fjal´t e tij si lunte topi
Shpirt i tij fuqi baroti,
Hal´ në sy iu ba Serbisë
E i dhanë po zjarr alltisë
T´vdekun n´tokë po tue lanë
Për shqiptar hero e banë.
Për këtë djal e trim bujar
Ngrit ja kanë nji lapidar
Edhe i vdekun e gurbetqar,
Edhe i vdekun në kurbet t´zi
Po pushon sot trupi i tij,
Po do t´vjen e jona liri
Do t´i marrim eshtnat e tij
E I varrosim ne në Arbni
Në vendlindje n´fshatin Uglar
Do t´i ngrisim Lapidar,
Edhe kanga do t´i kendohet n´mote
Se ra deshmor i kësaj toke.
1992-Gjermani

KANGË PËR ALI AJETIN

Më 30 Maj tetdhjet e nandë
Na u hap nji lajm i randë,
Për gjithmonë u shue nji jetë,
N´fushë t´mejdanit, aty mbeti,
Me armë në dorë Ali Ajeti.
Këtë kangë ja fali shpirtit të tij
Se dha jetë për nanë Shqipni.
Gjak rinor e zemër bujare
Me plot ide përparimtare,
Me Fadil Vatën e Afrim Zhitinë,
Me shumë të tjerë dhe Fahri Fazlinë,
Ua këndoj këtë kangë me sharkinë mike,
Se dhanë jetë për troje etnike.
Bir i popullit dhe i kësaj toke,
Qe e kish´ rritë ajo nanë Loke,
Mos me leshue armën prej dore
Amanet shokëve der´ n´fitore.
Për me i këndue brezat e ri
Se ra deshmor Ai për liri.
Sot në Sveqel për këtë djal bujar,
Ngritet lartë nji Lapidar
Me u tregue brezave te ri
Se si vdiset për liri.
E Amanetin n´vend me e qu´
Der´ n´fitore me luftue.
Për këtë trim s´duhet biografi,
Se vetë e shkroi me gjakun e tij,
N´fushë t´mejdanit po kur mbeti
Zemër trimi Ali Ajeti.
Ja falë kangën nëpër mote
Se ra deshmor për liri t´k´saj toke.
1998-Burgu i Mitrovicës

[Urata]

ZAMBAKUT TË LISMIRIT

Lule moj, nana e lume
S´të lë varr nana me kume
Nuk janë kume oj lum-nana,
Por asht gjak i derdhun te thana.
Po pse gjak, oj bi në gji
-Mu ndal rrita nder lajthi
M´ra zaptia me kobure
Për ne, tha, ti sjell ogure.
Lule moj, Lule-Zambak
Vijnë krushq e lypin hak
N´vend të pajës s´nuserisë
T´veshin Flamurin, e lirisë.
Varrin Tand e kemi çerdhe
Lule-moj, mirë se na erdhe
Flij e qetë nëpër jehonë
S´te lë vetem Nana e jonë.

KANGA E TË BURGOSUNIT

Moj hapsane ty t´kalltë furra
Sum´ e gratë nai le pa burra,
Ty t´kalltë zjarri e të baftë hi
Qysh nai dogje djelt´ e ri?
Na i le nanat me du´r n´gji
Na i le motrat pa vëllazni.
Na i dogje shumë vasha t´reja
Në këtë pranverë godit rrufeja.
Ujq të etshëm e të terbu´m ,
Dojshin fëmitë me i coptu´
Tue hy n´çerdhe e shkolla
Tu´ helmu´ vasha t´njoma
Tu´ helmu´ po çikë e djalë
Për me mbetë shqipja pa farë
Por nanës shqipe si çeliku
S´mund t´ja ndalë lindjen anmiku.
Çupëza e vogël agresive
Ajo e don babin pa hile
Gardianit i thot shtrigan,
“Pse s´po më len ta shoh babanë”,
Ty xhelat t´u shoftë fara,
Pse s´na lëshon t´punojm´ në ara
Sa shumë vjet në shpi s´jem kanë
Na merr malli me thirr nanë.
O polic, polici plak,
Ç´e ke ba shufrën me gjak
Ma shumë sjell sesa pushon
Djemt´ e ri po i shkatërron.
Porse ne jemi betu´
Për Kosovë jetë me ndërru´
Tash e di bota mbarë
Se kush asht kombi shqiptar.
Ka traditë, zemrën çelik
S´ka ç´i ban asni anmik.

1996-Burgu i Prishtinës

KANGË PËR JUSUF GËRVALLËN

Me shtatëmbdhjetë Janarit
O tetëdhjet e dy
U hap lajmi në gjithë botën
Për shqiptarë ish zi.
Sepse UDB-eja Jugosllave
Atje n´Gjermani
Në mënyrë mizore e tradhëtare
I vrau tre djem t´ri.
Na e vranë Jusuf Gërvallën
Trimin guximtar
Na e vranë dhe Kadri Zekën
Me Bardhoshin vranë.
Qohu Jusuf shihe Bardhoshin
Ma të voglin vlla,
Qohu e shihe Kadri Zekën
Shok kurrë pa u nda.
Qohu Jusuf shihe Donikën
Që po të rri përbri,
Shih sa duket sot renare,
Lot si sheh në sy.
Qohu Jusuf e shih shokët
T´popullit tand trim-o
Fjala Jote para vdekjes
Na ka dhanë kushtrim.
Janar 1981,Lipjan

[Urata]

O ATDHEU IM; KOSOVË!

O atdheu im, Kosovë,
Mori Pejë edhe Gjakovë,
O ti Llap edhe Gollak,
S´pate frikë as në Pollatë,
Kaçanik, të nderojmë ne,
Na ke falë Kushtetutë t´re.
O Gjilan, ti në Moravë,
Oj Viti, ti e bame varrë,
Suharekë-o në Podrime,
Ti e ke dhe Bllacën trime,
Prizren, ti me Kala,
Edhe nji lidhje kem´ m´e ba.
Moj, Kosovë, mor vendi im,
Sot për ty kam nji kushtrim,
Ne lirinë duhet me fitu´
O me pushkë,ose t´u shkru´
Se Prishtina zemrën çelik,
Me 2 Korrik shpalli Republikë.
Ferizaj, vend historik,
Për atdhe ishe besnik,
Mori Shtime e Carralevë,
Ju luftuet gjithë me nderë,
Plavë, Gusi, Tetovë, Kërçovë...
Për shqiptarin janë Kosovë.

1997-Burgu i Prishtinës

THËRRET KOSOVA OJ NANË SHQIPNI

Th´rret Kosova,oj nanë Shqipni
A ma ndien o zanin Ti,
Tue t´thirrë NANË kam mbet e mjerun
Me za t´dhembshëm e za t´çjerrun?!
Kur at´herë prej teje me ndan
Vajin kurr´ nuk e kam ndalë,
Tue t´thirrë oj nanë Shqipni
Sa shumë gjaku u derdh per Ty.
O moj nanë, nana Shqipni
Shum herë në zjarr kam ra për Ty,
Pa dëshir´ na kan´ coptue
Porse Ty kurr´ s´t´kam harrue.
Oh moj nanë, nana Shqipni
Shum´ e varrë jan´ ba për Ty,
Po më dhambin, kam mbet e mekun,
Pa shpirt n´tokë sikur e mekun.
Ah moj Nanë lule Dukate,
A e sheh kam mbetë bonjake,
Me bonjake gjithkush lun´ ,
Po me sjellin n´buz´ e n´hunë.
Ma kanë kallë zemrën e shkretë,
Shum djel t´mi syrgjyn kanë tretë,
Tjetër kush po na hi n´shpi,
Lujn´ me gra e lujnë me fëmi.
Unë e di nanë që s´je mirë
Por je e pastër dhe e dlirë,
Tash gajretin nanë ta du,
Jam e jotja me më ndihmu.
N´vaj e kuj gati kam tretë,
Loti, lotin s´po ma tretë,
Merre nanë nji faculetë
Edhe fshimi k´to lot´ e shkretë.
A e mban mend kur bashkë ne ishim,
Krenarinë në qiell e kishim,
Me vasha t´bukura e djel të rrallë,
Vritshim krajl e pashallarë
Sot qan Sharri e qan Tomorri,
Kjo keqësi ne na ndodhi,
Qajnë dy drinat i Bardh´ e i Zi,
Si rrinë ndamas nanë e bi.
Ngrite koken nanë Shqipni,
A po e sheh na mbuloi zia
Ngrite kokën nanë njiherë,
Çilma edhe mu nji derë.

[Urata]

VAJI I SHQIPTARIT - EDHE VDEKJA TË GJEN NË KURBET


KU ME LINDE NANË

Linda jasht´ atdheut
Porse jam shqiptare,
Emnin e kam t´lules
Më thonë kurbetqare.
Ah moj Kosovë
Në Ty e kam nji motër
Kurrë nuk e kam pa
Pa Ty s´kam sevda.
Pse më lindi nana
Jasht tokës shqiptare
A ke ikë prej qefit
A nuk pate qare?
Pse s´më merr moj nanë
Me më kthye n´vatan?
Ta shoh motrën time
Edhe ngryk ta marr.
Unë e di moj nanë
Se çka sjellë kurbeti
Edhe gjuhën time shqipe
Nga mendja ma treti.
Nuk po du oj nanë
As gjiun me ma dhanë
M´soma gjuhen shqipe
Të kam shpirt, të kam gjan.
A mendon oj nanë
Me u kthy n´Atdhe,
Kosova ashtë toka ime
Edhe pse jashtë ka le!?
Atje asht dhe motra ime
Ti vetë më ke thanë,
Bashom me gjakun tim
Të kam shpirt, të kam gjan.

(Düren,1993)

SA E BUKUR JE KOSOVË

Sa e bukur, Kosovë, je,
Vend i dashtun ku kam le,
Se në ty lulëzojnë zymbylat,
N´të katër anët këndojnë bylbylat.
Mbi këto male legjendare,
Dhe këto fusha heroike,
Po si zonjë bukuroshe
Shtrihet Kosova e jonë kreshnike.
Mendja më shkon në të kaluemen,
Në histori kurrë s´pate gëzim,
Të kanë plaçkitë, edhe robnu´,
Gjithë në vaj edhe idhnim.
Por gjithmonë ti ke pasë trima,
Si në lufta e n´kuvende
Aq larg ty ta çu´n zanin,
Kah bie dielli e hana endet.
Po kur të shoh sot prapë t´robnueme,
Zemra ime mbushet helm,
Më qan shpirti, më qan zemra,
A do t´vijë pranverë ndojherë?
Minatori n´horizonte,
Ai ma xehe s´po gërmon,
Në fabrika, n´shkolla, n´ara,
Nuk ka gëzim as s´ka jehonë.
Por prapë, Kosovë, e bukur je
Në ty kam lindë, të kam atdhe,
Do t´lulëzojnë gjithmonë zymbylat,
Do t´këndojnë edhe bylbylat.
Minatori n´horizonte,
Xehe tona do t´gërmojë
Në fabrika, n´shkolla, n´ara,
Kanga e lirë do të jehojë.
Okllap,1989.

[Urata]

KTHEHUNI

Jem´ shpernda në t´katër anët
Ja kem´ kthye shpinën NANËS,
S´po këndojmë ma si dyllendyshet
N´çerdhe tona vajtojnë qyqet.
Jo nuk kem´ tjetër Atdhe
Veç Kosovën ku kem´ le,
Kthehuni burra, për liri
Se ende i thonë po Dardani.
Kush nuk kthehet kur bie kushtrimi
Do ta quajmë tradhëtar trimi,
Kush nuk kthehet në Atdhe
I ka ndrrue komb e fe.
Kthehuni burra ju th´rret Shqipnia
Ju th´rret Tetova ju th´rret Gusia
Ju th´rret Presheva e Toplica,
Ju th´rret Sharri, ju th´rret Galica.
Kthehuni burra në Atdhe
Në ato troje ku kemi le,
Kthehuni gra e kthehuni femijë
Se na kanë shkelë k´ta shapkali.
Nuk a kohë të asimilohemi
Erdh´, koha të mbrohemi,
T´kapim pushkën per atdhe
Se s´ka kush me e kap´ për ne.

Bruksel,1993.

KTHEHU TI MOJ RINI

Kah po shkojnë k´ta trena t´zi
Ku po e qojnë gjith këtë rini?
Kah flutrojnë k´ta aeroplan´ ,
Këtë Kosovë po kujt ja lanë?
Kujt ja lanë nanë e babë,
Qe n´pleqni n´shpi i kan´ lanë?
Kthehuni Ju moj rini
Se Kosova nuk asht Serbi.
Kthehuni Ju në vendin tuj,
Se Kosova nuk asht e huej,
Jo kurr´ mor JO!
Nuse t´reja në shtatzani
Në kurbet po lindin fëmijë
Po lindin n´Evropën plakë,
Fëmijë për t´huej e t´pa nafakë,
Mblidhni mendjen motrat tona
Se s´harrohet dot Kosova!
Kthehuni pra gra, pleq, e të ri
Mos ta lamë Kosovën n´Serbi
Kthehuni ju në vendin tuj
Se Kosova s´bahet e huej,
Jo kurr´ mor JO!
Ju kolona me djem te ri
Pse po i bani Kosovës tradhëti
Ju kolona, n´kurbet qe shkoni,
Pse Kosvën po e tradhëtoni.
Kthehuni ju djel të ri
Ta bajmë luften me Serbi,
Kthehuni Ju n´vendin tuej
Se Kosova s´bahet e huej,
Jo kurr´ mor JO!
Kujt ja lini Ju këtë prag
Që shkjau na e lau me gjak,
Kah po shkojnë po vlla e motër
Kujt ja lanë plang e votër?
Kurrë n´Kosovë lule s´çelin ma
Far e gjakut pa u ra,
Lulja n´Kosovë s´mund pip´ me qitë,
Gjak i ri, të mos i ujitë,
Kur kjo tokë sot lëngon
Plis e huta n´shpi i keni lanë.

Kthehuni Ju more të rinj
Ta bajmë luftën me Serbi
Kthehuni në vendin tuej
Se Kosova s´bahet e huej,
JO KURRË MOR JO!

[Urata]

LULJA E BUKUR E SHARRIT

Lulja e bukur e Sharrit,
Ajo me kunorë
Po i ban të fala lules,
Që rritet n´Kosovë.
Rritu, e lulëzo,
Se motër të kemi,
Nji ujë na ujit,
E të nji dheu jemi.
Lulja e bukur e Rugovës,
Ajo që lëshon erë,
Përshëndet lulen kosovare:
Oj, lule, qofsh me nderë.
Rritu e lulëzo,
E shtatin me lëshu´,
Se do të vijë pranvera
Bashkë kem´ me lulëzu´.
Veç lulja n´saksi,
E mbyllun ka mbetë-
S´ka kush e ujit,
Me dorë kush s´e prek.
I humbi aroma,
Që e pat dikur.
Çonju, vllazën, çonju,
Ja qesim pak ujë.
Tani po qajnë lulet,
Të bjeshkës e të fushës,
Për lulet e mbylluna,
Që kurrë s´u banë nuse.
Njana rri n´dritare,
Tjetra këqyr kah dera,
Vesin njana-tjetrën:
Kur do t´vijë pranvera?

Janjevë,1975.

KUR UNË SHKOVA NE KURBET
N´prehen t´grues e lashë qikën
Kur unë shkova në kurbet,
Tash asht rritë e asht ba nuse
Nuk e njeh babën e vet.
Zemra e shpirti mu kanë tha
Syt´ as flokun pa ja pa.
Lidh per djepi e lashë djalin
Kur unë shkova në kurbet,
Ka ba dasmë e ka marrë nuse
Pa nji pushkë të babës t´vet.
Hej ç´mu tha zemra prej mallit
Pa e g´zu dasmën e djalit.
N´kry duvakun ja lashë motrës
Tuj ja prit krushqit në derë,
Pa ja pa unë fëmijt rreth votrës
Mu mbush zemra helm e vner´.
Ç´më dhemb zemra, ma ngrit gjakun
Pa ja puth motrës duvakun.
Në sy nanës ju ngri loti
Në kurbet kur shkova s´pari,
Vdiq e shkreta tuj kqyr udhët
Vorrin tash ja ka mblu bari.
Hej ç´mu tha zemra mu ngri
Pa ja mbjell mbi vorr nji bli.
Unë n´kurbet baba në pritje
Ju ba mjekrra bardh si borë,
Asht qorrun po shkon me krroqe
Pa më prek ma e tija dorë.
Zemra e shpirti mu kanë tha
Edhe nji herë o babë me t´pa.

Vien,1992.

EDHE VDEKJA T`GJEN N`KURBET

Shum´ të zeza haj na ranë në kokë,
Ngryset qielli haj gjemon kjo tokë,
Gjëmojnë fushat, kodrat legjendare,
Të Kosovës haj t´Kosovs´ krenare,
Rrjedhin lotët sikur t´bie shi
Tuj përcjell´ bijt po n´kurbet të zi.
Na ranë t´zezat edhe morëm ikën
Ne dikr kujt s´ja kishim frikën,
Në Kosovë e lamë qiellin, tokën...
Me trastë në krah sot e morëm botën,
Tuj kerkue shpetim prej vdekjes
Tuj i shtue t´zezat e jetës.
Morëm fëmijët nëpër kambë,
Shkollë e banka n´Kosovë tue i lanë,
Morëm vajet dhe kujtimet
Kangë t´kurbetit dhe vajtimet,
Tue i shkrue kujtimet n´letër,
E tuj kërkue ni vdekje tjetër.
Tue ik´ vdekjes morëm malet
Porse vdekja s´mund të ndalet,
Se me vdekun per atdhe
Asht sikur përsëri me le,
E n´kurbet po me ndrru´ jetën
Ajo ka nji emën tjetër.
N´kurbet vdekjen pra me mendue,
Sa t´jem gjall´ vendit me i ndihmue
Për Kosovë çdo gja me dhanë,
Sot, se nesër bahet vonë,
Vendin tonë na me qitë n´dritë
N´dash të vdekun mirë me t´pritë.
Nji kafshat sot kush s´mund me nda
Vend për vorre n´Kosovë nuk ka
Ka me e nemë gjaku i lirisë,
Që u derdh n´lule t´rinisë,
Ka me e nem toka e dheu
As te vdekun s´ka me dashtë atdheu.
Zagreb,1990.

[Urata]

NUK VAJTON ZANA

Po ku je, moj Zana e Malit,
Që s´po del ti me vajtu´
Pse s´ja thu´ edhe njherë vajit,
Siç vajtojshe prru´ më prru´ .
Vaji yt bante me kja,
Lisa, trungje dhe livadhe,
Për çdo t´vramë sa shumë vajtojshe,
Edhe lot´ derdhshe me t´madhe.
More, djalë, ti që po flet
Unë jam nji zanë prej malit,
Kurrë s´vajtoj ma për të gjallë,
Kur vret hasmi bij t´shqiptarit.
Kam vajtu´ unë kurrë pa ndalë,
Lotë e mi kanë rrjedhë pa pra,
Porse djeltë e shqiptarisë,
Ndërmjet veti kur janë vra.
A s´po sheh a s´po t´bajnë sytë
Që sot shqipja ashtë pajtu,
Se dhe zogjtë e çdo shpendi
Me nji çerdhe donë me rrnu´.
Sot i biri i nanës shqipe
Nuk del kurrë ma me vra vëlla,
Kundër hasmit nat´ e ditë-
Me luftue don pa ia da.
Mjaft në jetë ke vajtu´ ,
Lotët tanë po kurrë s´janë ndalë,
Sepse shqipja shumë kohë
Ndërmjet veti na janë vra.
Se ka pa që gjithë anmiku
Na ka shti me u përça,
Mos me ditë çka asht i yti
Tu´u vra vëllau me vëlla.
Sa e çmon sot Zana shqipen,
Se nuk del ma me vajtu´,
Nat´ e ditë do t´knojë e t´qeshi,
Sepse shqipja u bashku´.
E kuptoi i madh shqiptari,
Se përçamja ashtë e hu´j
Do t´jemi gjithmonë t´bashkum,
Të, përçamë ma kurrë e kurrë.
1990-Lubjanë

[Guri i madh]

kam pas rastin me njoft rrapsodin e njohur Agim Gashin e pershendes

[Urata]

VAJI I SHQIPTARIT - NË HAJME TË EVROPËS

(Satirë)
NË KURBET NA DOLËN EDHE VAJZAT

E kem pasë ne gjithmonë nji dert
Kur djemt ma t´mirë shkojshin n´kurbet,
Shum na i merrte kurbeti i zi
Vdiqshin, shkojshin pa u pa me sy.
Tash na erdhi nji tjetër adet
Edhe çikat po shkojnë n´kurbet,
T´u i lanë n´Kosovë shtëpitë të thata,
E në dhe të huj po shkojnë gra e plaka
Po shkojnë nxanës, shkojnë profesoresha,
Nuse të reja edhe studentesha.
Ah! Po e lanë sot Kosovën thatë
Ku ke pa mor n´kurbet me na shkue gratë?
Për arat tona urrë pa u merzitë
Rrugëve t´Evropës tash tuj u shetitë.
Prej që na hyni kjo demokraci
Pak si tepër grat na kan marrë liri,
Se me ba burri me e nguc graninë
Qohen grat shqiptaresha e thirrin milicinë
Shpejt vinë milicia me sirena tu´ fishkllu,
Me nda gruen prej burrit, hajmin me ua ndrru,
Se me u ba nder burrave hiç s´u shkon ndermend,
Burrat rrinë te dera, grat në t´parin vend
Ju qesh fytyra pse burrat rrinë te dera
Tani janë të lira të kenë dhe “shvalera”,
I zgjedhin dashnorët t´zi a ndoj arap
Se janë ma të fort duken si tarak,
Burrit shpesh ja bajnë: çka je ba si morri
Dil pak me shëtitë se vjen “haus-majstori”.
Mori gra shqiptare ju vraftë perëndija
Si humbet k´shtu deri,si humbet njerzia,
S´janë per krejt shqiptaret kto fjalë që po i këndoj
Edhe me kët´ kangë due të kritikoj
Ju lutem të gjithave mos me marrë për veti
Le ti marrin ato që kanë mitë mbas veshi.
Se n´lokale t´natës se ka shqiptaresha vendin
Me shitë nder me pare nuk e kemi rendin.
Kemi mjaft ne çuna, shqiptar djel të ri
Që të lidhet jet´ e të çohet dashuni,
Pastaj, gra të reja me tre-katër fëmijë,
Burrat i lanë n´shpi, vet dalin n´kurvni
Ose i lanë burrat e i lanë fëminë,
Me agjensi të ndryshme marrin arratinë.
Shkojnë e na shkruhen azil n´Gjermani
Diku në Evropë a Skandinavi
Nëpër “hajme” të ndryshme strehohen kto gra,
Ju binë n´dorë mafive sa keq sa hat.
E disa prej tyne s´tregojnë se janë shqiptare
Thonë jemi të Bosnës k´tu kem ardë pa qare
Nuk ju dhimben burrat, nuk ju dhimben fëmija
Që pa gru e nana na kanë mbet të shpija,
Çupëza e vogël thërret: ku je nana ime?
-Üse shkone n´kurbet e më lë jetime,
Edhe çuni vogël nanën e thërret;
-Pse ma ndave gjinin nanë e shkove n´kurbet?
E disa vasha t´reja që s´kanë obligime
Kur vinë në kurbet shumë na bahen trime,
Jemi thonë të pastra si gurra t´Rugovës,
Tuj u martu´ me t´huj i ndihmojmë Kosovës,
Se Kosovën tonë e lamë në mjerim
Tuj i marrë të tjerët po bajmë informim.
Po edhe me e marrë shqiptarin për burrë,
-Vallahi moj motër nuk po ka kulturë,
Merre naj t´Afrikës a naj Italian,
Kanë motër kulturë, për burrë janë taman.
Na lavdojnë n´Kosonë naj bajnë aferim
K´shtu në diasporë bajmë informim,
Nuk të rrahin kurrë e s´shohin me sy
N´dash shko n´kafene e në dash n´kurvni
-Pse erdhët n´kutbet?- ivet, na përgjigjet bija:
-Shuj vllaçko, shuj: m´kan rreh milicija,
E disa gra tjera nga fshati e nga malsija,
Dimitë dymbdhjet´ metra edhe me sargija,
Dymbdhjet´ metra gat´ i kanë leshu ne tokë
E kujt asht´ kjo veshje?-po pyet kjo botë.
Po më tregon nji ditë nji çun i ri
-Ma kanë qitë nanën në fotografi!
Se nana ime, e veshun n´dimija
Asht´ patriote e ka ndjek Serbia,
Vetshin gazetarët:-Këtë veshje kush e mban?
-Jemi të osovës e na thonë Alban!
Por e kontrollun nanën, milicët para fmive,
Dhjet aparata ja gjeten, në palë t´dimive!
Kështu shumë prej neve i ikëm Serbisë,
I tregojmë Evropës dhe Skandinavisë,
Se me vjedhë e me u prishë ndërveti,
Beli ma trima ma smund i gjan n´gjeti.
Por mblidhni mendjen ori motrat tona,
Kultura e huej nuk bahet e jona,
Kujtoi dëshmorët që ranë për liri
Për Kosovën nanë e jo për Gjermani.
Rueni motra nderin e rame moralin,
Me shitë nder e besë nuk na e la i pari,
Kujtoni heroinat që ranë për atdhe,
Vend s´ke në kurbet po atje ku ke le,
Banu motra pilote, këngëtare, balerinë...
Me punë të ndershme madhnoje Shqipninë,
Po erdhe n´kurbet fillo me u shkollu´ ,
Keq e kemi Kosovën duhet me i ndihmu.
Banu shqiponjë mali, fluturo nga Kosova,
Se sot me nder e dije pushtohet Evropa.

[Urata]

N`MAJE T`BJESHKËS M`LINDI NANAN´majë t´bjeshkës m´lindi nana
Baballartë i kam azgana,
Krejt ne shalla e nishana
Janë të pasun e pareli
Veçse janë o pak të zi,
E kam vendlindjen n´Suedi
Edhe shqipen hiq s´e di
Për Kosovë s´kam ndie kurrë
Hiq s´e di çka jam bre burrë.
N´maje t´bjeshkës, n´majë t´botës
Kapuq e shallë që i vnoj kokës,
M´ka thanë nana nuk je vetë,
Tre vllazni n´Kosovë t´kanë mbetë
Veçse janë të bardhë si bora
S´janë të paqtë edhe kanë morra
Po kështu më ka thanë nana
S´janë si ti po janë Albana.
Baba im këtu n´Suedi
Asht i madh e asht i zi
I ka flokët dredha, dredha,
E të forta sikur therra
Asht i urtë si delja rudë,
S´ban pantoll po ban bermude
Po ban kmish e po ban t´lina
Pi veç kola e molina
Kur m´qillon mue baba ngat
Prej kërkuj s´kam frigë aspak,
Une e di që asht arap
A nana i thotë e kam tarak
N´Suedi po nuk jam vetë,
Se kam shokë dy tre mijë vetë,
Unë kam shokë edhe n´Danimarkë,
Norvegji edhe Finlandë,
Po kam shokë edhe n´Gjermani
Po në Zvicër e Austri,
Gjysa t´bardhë e gjysma t´zi
Tjera ngjyra turli, turli,
Vllazni e motra jem përzi
E n´kulturë besa kem hi,

Me shumë baba e t´ni nanës,
I thomë vetit jemi të samës.
Se nuk jemi besa nacista
Edhe kurrë s´jem kanë racista,
Nji familje me shumë ngjyra,
Kjo asht puna ma e mira
Po në Evropë shpejt kemi me hi
Do si sorra do si korba t´zi.
Po qyshë rr´nojmë n´kurbet me ju tregu,
Nëper hajme jemi tubu
E me krejt racat e botës,
Se jem t´Zotit e jem të tokës
Na i binë, Biblat n´gjuhë të botës,
Me turli turki e tartar;
Paj me Rus edhe Bullgar
Të Adis-Abebës e Tunis- Marokit,
Besa t´shnosh si gjylja e topit
Për me hangër e me pi,
Kemi sa t´dush more zotni
Edhe majna pastërti,
Po me rend hajmin tue fshi
Kemi rush e kemi molla,
Na rrinë nanat me Haus-majstora
Nana m´thot lumja unë e mjera
Në kurbet mu ka shtue pjella.
Kur më qet n´gjumë nana mu,
Ajo nisë ninulë me knu
Fli o bir mu bafsh zotni,
Se t´ban nana ty shum vllazni
Edhe motra vjet për vjet
T´rriti n´shtrat e jo në djep
Si i pata rrit tjerët n´djep të drunit
Mu bafsh i shehrit jo i katunit.
E lshum Kosvën erdhëm n´dynja
Po shumë shqiptarë more hata,
Do prej zorit e do prej qefit
Do prej lezeti do prej kijameti
E n´Çeki, n´Pilzen, n´Teplicë,
Na bajnë rrasht e kalanicë,
Aty asht stacioni i parë
Për me dhanë tatim n´shiptarë
Nji mijë marka ti me ia dhanë,
N´Gjermani po ndash me dalë

I jep paret si zotni
Të qojnë malit drejt n´polici.
T´zanë gjermanët e t´kthejnë n´Çeki,
Të bamë rrasht e kalanicë
Si me kanë ne Mitrovicë
E tuj fol shqip sikur n´Drenicë
Po kajnë robët e po kajnë fmija,
Si me t´hy n´shpi policija
Kshtu punon sot shqiptarija.
Na kan´ dal shum patriota
Pareli me ide t´forta
S´don me ndi për Qeveri
Për Kosovë as për Shqipni
Naj kanë ba po shum parti
Kryetar turli-turli,
N´Kosovë punojshin me Serbi,
Për Kosovë nuk pagujnë kurrë,
I thonë vetit unë jam burrë,
Jam ma i meç se Ibrahim Rugova
Djalë si mu nuk ka Kosova.
Por mblidhni mendt more shqiptarë,
T´rrimë si njerëz jo si gomarë
Mos t´ju nemë toka e juej
Mos t´ju nemë ai Skenderbeu
Mos t´ju nemë gjaku i shqiptarit,
Që u derdhë prej shkaut e tradhëtarit
Se dheu i huej s´bahet i yti,
E kurbeti ne na mbyti;
T´mendojmë pak për Kosovë t´mjerën,
Që na lindi e na e dha jetën,
E nanë Kosova na ka rritë
Me i ndihmue kur asht n´rrezik.
(Düren, 1993)

[Urata]

TEZET AZILANTE

Po flasin nji ditë
Nja dy teze t´mia:
-A ke ni moj motër
Po na kthejnë te shpia?!
-Shuj Hajri qyqe!-
Po ia kthen Hata,
Gjermani me Serbin
Kanë llafe të gata.
Çka tha Bratisllava
Jo, nuk paske ni,
Nuk i la shqiptarët
Jo as n´Rumani.
Veç me ba moj motër
Me na kthy n´Kosovë,
Naj prishin lezetin
Që kem´ n´Diasporë.
Këqyri nji herë hejmat
Me djem t´bardhë e t´zi,
Turli afrikani,
Kurdë e turqeli.
O gjithë natën burrat
Raki tuj pi,
Tanë ditën tuj fjetë-
Gratë sallamadi.
Tuj hangër turli mishi
Përditë rrush e molla,
Gue m´gu po rrimë moj
Me Hauzmajstora.
Ani tash me ba
N´Kosovë me na kzhy´,
Qysh m´i desh hellonkat
E me veshë dimi?!
Se n´Kosovë nuk kemi
Kurrfarë afrikani,
Tuj nejtë burrat n´shpi
Tybe bahet nami!
Shuj, Hato, shuj
M´shtine me t´ba be,
Kam me shti Hajdarin
Letra falls me ble!
Le t´i pagujë t´shtrejta
Le t´pagujë me mija,
Veç le të shkruajnë:
-I ka rreh policia!
Ma mirë mori Hato
Me krisë kjameti,
Se m´u kthy n´Kosovë
Me na u prish lezeti.
-Qitma Hajri kafen
Se i bahet qare,
Edhe n´Gjermani azili
P´u blejke me pare.
Avokat Nellesit
Ja jep nja 10 mi´,
Pasaportë gjermane
Ki me shti në gji.
Nuk kthehna n´Kosovë
Kurrë me veshë dimi,
Ma mirë asht moj motër
Me dekë n´Gjermani.

(Köln, 1996)

[Urata]

LETRA E KUNATES

Çoi letër Dudia te Kunata n´Llap
A kujtojshe bijo se mun´ u m´ban zap,
A kujtojshe bijo se të baj në shpinë
Herë me gatu n´magje herë me kqyr baçinë.
A kujtojshe bijo se nuk nrrohet moti
E kam burrë Hakifin s´ka njeri ma i zoti,
A kujtojshe bijo s´muj dal n´Gjermani
Me t´i lanë te shpija bija e vjehrri.
Bija e vjehrri kopengj me t´i lanë
Me mushë ujë me kofe me krah me bajtë sanë,
Tuj i kqyr bullicat përditë tuj gatue
As për ditë t´Bajramit n´opçinë mos me shkue.
N´Gjermani kunatë moj jam sikur n´xhenet
Po rrnoj si gigutka a po t´vjen siklet,
A po t´vjen siklet moj a po t´kris ty zemra
A e din kur t´thojsha s´un vjen as te themra.
Tuj punu Hakifit-o hiç nuk i del dita
Se kur vjen ashami del lun me çibrita
E bjen nji grusht marka do sinxhirë dukati,
I qes kos e fli moj pa u ba sahati.
Pa u ba sahati moj pa u ba dakiki
Dal e përvloj çajin moj fisin s´e koriti,
Dal e përvloj çajin dal e ngjeshi bukën
Fund e kry´ Frankfurtit moj s´ja kemi kuj tutën.
N´dash me ta plasë barkin, o pasha Kuranin,
Si dikur sulltanat e majmë Ramazanin,
Tana punve mirë moj ja u qesim kararin
Me fiq e me hurme e presim iftarin.
Tespitë n´dor Hakifi me do turqeli
Nuk e prish avdesin dek ter n´taravi
Tash moj Kunatë zeza s´po di shka me t´shkrue
Veç nja 100 marka për bukë me t´i çue.

Përgjigje nga Llapi

Pa u ba dakiki moj pa u ba sahati
E rroku kalemin kunata prej Llapi,
Nisi m`i qit shkrolat sikur me tërfurk
Me ja shprazë inatin Dudijes n`Frankfurt.
Ani moj kunatë moj keq ishe mashtrue
Qat letrën me kungja qi ma kishe shkrue,
Qat letrën me kungja n`ta me 100 marka
Që tash n`Podjevë qaq po kushton darka.
Ato buz’t e trasha mos i qaravesh
Edhe këtu farmerkat po i veshim shpesh,
I veshim farmerkat nuk bajnë za vjehrria
Veç ty për kerrname t’ i rujmë do dimia.
Prej luftës e knej s´kemi gajle hiç
Edhe rreth Tetovës tash kem zanë shumë miq,
N’ desh përbej n’Kuran n’desh përbej n’xhami
Ma mirë rrnojnë gratë n`Llap sesa n`Gjermani.
Tana janë me errz te tana me namuz
Si ti nevojtore s`lajnë si me topuz,
Për dollarë e marka kurrë s’e kemi zorin
Mos me pasë shumë gajle n`derë e kemi KFOR-in.
Tybe treqin tybe s`muj me t`pa moj bi
Shpijat e gjermanve me rub n`dorë tuj fshi,
Se prej durve tua s´hahet kurrë ma flia
Kur e di shka ban tug po m´çon gërdia.
Dola me def n`bahqe dola n`fllad t`akshamit
Me ta çu kadal kangën para xhamit,
Me ta çu kadal me pasë shka me ni
Moj qyqe e rremit mos rri n`Gjermani.
Mos rri n`Gjermani moj se naj more ftyrën
Tuj vjedh me Hakifin ja nxore ynyrën,
Kur e ban krej skllotë kur e ban përshesh
N`telefona t`dorës këtu po marrim vesh.

[Urata]

VAJI I SHQIPTARIT - KUR FLISTE BURRI


KANGË PËR ANTON ÇETTËN

Po qajnë malet legjendare,
Po qajnë fushat heroike,
Për profesorin Anton Çettën,
Qan Kosova e jonë kreshnike.
Ditë e premt tre dhetor
Mori dhenë lajmi mortor,
Se dha jetë nji burr´ me orë,
Plak i urtë me shpirt rinor
Qe për komb ora i priu
Si yll n´zemër fort i ndriu.
N´kry t´rinis´ u vu prijetar
Nisi punën fort të mbarë;
Tuj pajtue n´Kosovë gjaqet,
Tue i g´zue, besa, konaqet,
Tue i g´zue votrat e ndryeme,
Tue i çelë zemrat e vyeme,
Me guxim e urti burrit
Rend i zbuste zemrat prej gurit-
I pushtonte burrat e dheut,
Tanë stërnipa t´Skënderbeut,
Që bajshin ballë edhe burrni
Tue deshmu besë edhe trimni
Tue i dhanë fund për jetë gjaksimit
Shtrishin dorën e pajtimit.
Po kur fliste burri n´kuvend
Fjalë prej shpirti e me mend-
I pushtonte ai zemrat rend,
I forconte me fjalë burrnije,
E i ndizte me dritë lumnije,
Mirë i ndizte me orë të bardhë
Fjalët e tij peshonin arë:
-Po ju qofshi faqe bardhë,
që n´ditë t´sodit k´shtu veproni
shpi e fis mirë i nderoni,
E nderoni popllin tuej
Që s´duron sundin e huej-
Me guxim e shpirt bujari
Si zakon na e la i pari
Për me ba punën trimnisht,
Për me falë gakun burrnisht,
Si i ka hije vetëm trimit
Për me shtri dorën e pajtimit;
Me dhanë besën prej shqiptarit
Trashëgim që na la i pari,
Se prej sodit kurrë ma tjetër
S´do të ketë gjaksi të vjetër,
S´kem me u vra, pra, vlla me vlla,
Po me u dhtë em pa ia nda:
Orsi nana qi e don fminë,
Si i don motra vllazninë,
Porsi zogu qi e don qiellin,
Sikur bima qi e don diellin,
Si na m´soi njaj Kastrioti
Për me u dasht-o sa t´jetë moti.
Si rrufeja fjal´t tingëllojshin,
Si n´preanverë zemrat gufojshin,
Shtriheshin duert sa mirë bashkoheshin,
Bjeshkë e fushë përnjiherë gëzoheshin,
Keso valle te trimnisë
S´mbante mend toka e Arbnisë,
Mirë krenohej mbarë Shqipnija,
N´bark të nanës gëzohej fmija
N´rreze t´diellit fort krenare
Sa mirë ndriste ora shqiptare.
E ne sot kur kur me ne sje,
N´zemra tona gjithmonë je
Mbar nji popull të kujton,
Me urtësi tande sot jeton,
Dashuninë që kem për Ty
Si n´Kosovë e si n´Shqipni
N´dhjet milion e kem nda nji emën
Nga nji pjesë e ndrym në zemër,
Do ta ruajmë me xhelozi
Atë kujtim që kem për Ty.
Sa t´jet moti e sa t´jetë jeta,
Sdo t´harrohet o Anton Çetta.

(Düren, 1996)