Kampionati botëror Brazil 2014

[Zero Cool]

Sot nis Kampionati botëror ‘Brazil 2014’







Kampionati Botëror ‘Brazil 2014’ do të nisë sot me ndeshjen hapëse mes Brazilit dhe Kroacisë. Kjo përballje do të paraprihet nga një ceremonia madhështore e hapjes së këtij turneu.
Kampionati Botëror ‘Brazil 2014’ do të nisë sot, derisa 32 përfaqësuese do të luajnë për një vend në finalen e madhe në Rios, e cila zhvillohet më 13 korrik.

Yjet nga e gjithë bota do të parakalojnë një nga një duke i bërë të gjithë të ëndërrojnë për topin për një muaj të tërë.

Kurse, ndeshja, e cila do të zhvillohet në orën 22:00 ndërmjet Brazilit dhe Kroacisë, do të paraprihet nga një ceremonia madhështore e hapjes së këtij turneu. Seleçao cilësohet nga të gjithë si kombëtarja favorite për fitimin e Botërorit.

Por, pengesa ballkanase nuk do të jetë e lehtë për ta, ashtu siç nuk ishte e lehtë dhe në 2006, kur u nevojit një gol i Kakas, për të mundur Kroacinë, që arritjen e saj më të madhe në një botëror e ka regjistruar në Francë 1998.

Megjithëse na ndajnë vetëm pak orë nga starti i këtij kompeticioni madhështorë, jo gjithçka është në rregull. Përveç protestës së punëtorëve të metrosë në Sao Paulo, punonjësit e tre aeroporteve në Rio de Janeiro kanë bërë thirrje për një grevë 24 orësh, duke kërkuar rinovim të kontratave të punës.

Por, Presidentja e Brazilit, Dilma Rousseff, tha se vendi i saj është gati për të pritur Botërorin. Në një dalje televizive, ajo tha se pesimistët janë mundur nga vendosmëria e popullit brazilian.