Lëvizja Vetëvendosje nuk më donin për President

[Llapi]

Lëvizja Vetëvendosje nuk më donin për President



Nuk më donin për President






PDK kishte përkrahur idenë që Adem Demaçi të zgjidhej President i Republikës në kohën kur Behgjet Pacolli u detyrua ta lëshojë këtë post.

Por, Lëvizja Vetëvendosje refuzoi ta mbështesë atë.

Adem Demaçi, në një prononcim për Express, thotë se partia e Albin Kurtit humbi një shans të mirë.

Adem Demaçit i ka mbetur hatri në Lëvizjen Vetëvendosje.
Kjo parti, thotë se u bë pengesë që të mos bëhej President i Kosovës, pasi që Behgjet Pacolli braktisi zyrën më të rëndësishme në vend.
Simboli i rezistencës kosovare ishte propozuar për këtë pozitë nga një grup qytetarësh që jetojnë në Amerikë dhe kishte marrë pëlqimin e Partisë Demokratike të Kosovës, por këtë mbështetje nuk ia ofroi partia opozitare që udhëhiqet nga Albin Kurti.
“Këta kanë qenë pengesë dhe nuk kanë propozua asgjë. Ata që kanë propozu, kanë kërku që unë të jem President. Dhe ata (Vetëvendosje) kanë refuzu dhe e kanë fitu kontestin, e u bë qysh deshën ata”, thekson Demaçi për Express.
Megjithatë, ai nuk flet shumë për këtë çështje duke thënë se kjo i takon historisë dhe se me këtë Vetëvendosja e ka humbur shansin të hyjë në pushtet.
Për këtë çështje ka folur më gjerësisht të mërkurën në një debat televiziv në Klan Kosova Kryetari i Grupit Parlamentar të PDK’së, Adem Grabovci. Sipas tij, PDK e ka pranuar që Demaçi të drejtojë shtetin. Madje shpjegoi detaje të bisedave që ishin bërë në atë kohë mes zyrtarëve të kësaj partie dhe kandidatit të mundshëm për këtë pozitë.

Shkrimin e plotë mund ta lexoni në Express...

http://www.gazetaexpress.com/?cid=1,13,65957

[Llapi]

Demaçi dhe Kurti u prishen për Thaçin






Publikuar: 29.10.2011 - 15:14Prishtinë, 29 tetor - Kundërshtimi i veprimtarit Adem Demaçi që pas zgjedhjes eventuale në postin e presidentit të vendit t’i thotë “jo” nominimit të Hashim Thaçit për kryeministër dhe në këtë formë ta “pensionojë” nga pushteti liderin e Partisë Demokratike të Kosovës (PDK), ka bërë që ai t’i prishë raportet me lëvizjen “Vetëvendosje”.

Gjithçka kishte ndodhur pas zgjedhjeve të fundit parlamentare, kur kërkohej që partitë politike të arrijnë konsensus për ta votuar një kandidat për president, ndërsa drejtuesit e “Vetëvendosjes” ishin të interesuar që nëpërmjet presidentit të ardhshëm ta pamundësojnë nominimin e Thaçit për kryeministër.

Burime të “Zërit” brenda kësaj lëvizjeje thonë se gjatë bisedimeve me Demaçin, anëtarët e lëvizjes i kanë ofruar atij kandidimin për president, por gjithashtu e kanë kushtëzuar atë.

“I kanë thënë Demaçit se ne mund të të mbështesim për president, por me kusht që ti të mos e propozosh Hashim Thaçin për kryeministër, e më pas Demaçi është nxehur shumë dhe na ka thënë se ju jeni të vegjël të më qitni kushte mua”, ka thënë burimi i gazetës që ka folur në kushte anonimiteti.

Sipas këtij burimi, kjo ka bërë që të ftohen raportet mes veprimtarit Adem Demaçi dhe ish-bashkëpunëtorit të ngushtë të tij, liderit të “Vetëvendosjes”, Albin Kurti.

Rreth dështimit për t’u bërë president, një ditë më parë është prononcuar vetë Demaçi, i cili ka fajësuar anëtarët e lëvizjes “Vetëvendosje” që nuk e kanë mbështetur për këtë pozitë. Por, ai nuk ka treguar pse nuk e kanë mbështetur ata.

“Këta kanë qenë pengesë dhe nuk kanë propozuar asgjë. Ata (një grup qytetarësh shqiptarë që jetojnë në SHBA) që kanë propozuar, kanë kërkuar që unë të jem president. Dhe ata (“Vetëvendosje”) kanë refuzuar dhe e kanë fituar kontestin, e u bë qysh deshën ata”, ka deklaruar ai për mediat e vendit.

Për çështjen në fjalë disa ditë më parë ka folur edhe shefi i Grupit Parlamentar të Partisë Demokratike të Kosovës (PDK), Adem Grabovci. Ai ka thënë se kjo parti e ka mbështetur Demaçin për president dhe këtë ia ka thënë atij nëpërmjet një “mësiti”, i cili lajmin në fjalë ia ka kumtuar Demaçit në banesën e tij.

Por, nuk ishin vetëm anëtarët e PDK-së që kishin trokitur në derën e Demaçit.

Anëtarët e “Vetëvendosjes” pasi kanë dëgjuar se Demaçi do të bëhet president, e kanë vizituar atë dhe ia kanë bërë me dije se “Pacolli nuk është problem, por problem për Kosovën është Thaçi”.

“Kur i kanë thënë kështu, Demaçi është bindur se s’ka asnjë mundësi për bashkëpunim me anëtarët e kësaj lëvizjeje. Ai më pas ka thënë se nëse e rrëzojmë Thaçin, kë do ta biem në vend të tij. Pastaj ka thënë se duke më lënë pa pozitën e presidentit, po mbeteni edhe ju pa pushtet”, tregon personi i afërt me Demaçin.

Ndërkaq, analisti politik dhe autori i librit për biografinë e Demaçit, Shkelzen Gashi, thotë se sipas informatave të tij, kushti i udhëheqësve të “Vetëvendosjes” për Demaçin ka qenë që ai si president i ardhshëm të mos e kandidojë Thaçin për kryeministër dhe t’i ndërpresë menjëherë bisedimet me Serbinë.

“Është normale që ‘Vetëvendosja’ ka qitë kushte, sepse si parti duhet të shikosh nëse presidenti ta zbaton programin politik ose jo, por Demaçi ka refuzuar të flasë për kushte”, shprehet Gashi.

Ai thotë se Adem Demaçi që nga viti 2008 është afruar jashtëzakonisht shumë me Hashim Thaçin, prandaj nuk ka pranuar ta “shkatërrojë” atë afërsi.

“Një ditë para shpalljes së pavarësisë janë takuar këta dy (Thaçi e Demaçi) dhe Thaçi i ka premtuar që do t’ia plotësojë disa kushte, do t’i japë shofer, veturë, pension kombëtar edhe shtëpinë e tij ku ka funksionuar zyra e UÇK-së në Prishtinë do ta shpallë muze. Përjashtuar shtëpinë, këto tjerat ia ka plotësuar”, thotë Gashi, duke shtuar se premtimi kryesor i Thaçit për Demaçin ka qenë që në të ardhmen PDK-ja do ta kandidojë atë për president të Kosovës.

Drejtuesit e lëvizjes “Vetëvendosje” të premten nuk janë treguar të gatshëm të merren me “çështjen Demaçi” dhe as me akuzat e tij. Zyrtari për informim në këtë lëvizje, Erzen Vraniqi, ka thënë se kanë marrë vendim që të mos prononcohen për këtë çështje. “Kemi marrë vendim që mos të merremi me këtë çështje, nuk do të prononcohemi fare”, ka thënë ai nëpërmjet telefonit.

[Llapi]

Kritikucët e Demaçit dhe të Qosjes

Kritikucët e Demaçit dhe të Qosjes nuk janë emra që i njeh opinioni, dhe të tillë mund të gjenden me bollëk në forumet e pista të shumë portaleve, por fakti se ata flasin në emër të partive që i përfaqësojnë është brengosës, jo për Demaçin e Qosjen, por për ata vetë dhe për partitë e tyre, sidomos për Lëvizjen “Vetëvendosje”, e cila është ngritur duke e shfrytëzuar emrin, mundin, kapitalin politik e kombëtar dhe meritat e pakontestueshme të Adem Demaçit



tetor 2011 - Shkrimet në medie, të disa zyrtarëve partiakë, drejtuar kundër Adem Demaçit dhe Rexhep Qosjes riciklohen dhe marrin hov sidomos pas deklaratave të tyre publike, ku ata shprehin hapur bindjet e tyre, pavarësisht kundër kujt drejtohen ato. Në raste të tilla, mendjet zevzeke dhe gjithnjë shërbëtore të interesave partiake, që ata i përfaqësojnë, i shtrojnë detyrë vetes të kundërvihen, duke na ofruar jo fakte, por fjalë e thashetheme dhe jo me qëllim të zbardhjes së ndonjë të vërtete, apo opsioni, por me qëllim të diskreditimit të vlerave kombëtare e njerëzore, që bartin, sidomos këta dy emra të nderuar të kombit - Adem Demaçi, për rezistencën e tij të pashembullt historike kundër pushtuesve, dhe Rexhep Qosja, veçmas për fjalën e tij të lirë, shkrimet dhe qëndrimin e tij të guximshëm në mbrojtje të interesave të kombit e Atdheut.
Kjo kundërvënie, duke bërë përpjekje për ta ulur besimin që Demaçi dhe Qosja gëzojnë në popull, ka një prapavijë, e cila, sado e sofistikuar, zbulohet nga vetë kritikuesit që tekefundit kanë për detyrë partiake të kundërvihen sapo u apostrofohet partia apo kryepari i saj. Në këtë aspekt, ata janë zëdhënës kujdestarë në mbrojtje të partisë nga ato që i konsiderojnë sulme edhe kur nuk janë të tilla. Çuditërisht, sapo u botua intervista që Adem Demaçi ku ai tregon se e kishte përkrahur idenë që të zgjidhej në postin e kryetarit të Kosovës, në kohën kur Pacolli u detyrua ta lëshonte këtë post, duke sqaruar se propozimi për pozitën e kryetarit është bërë nga një grup qytetarësh shqiptarë që jetojnë në Amerikë, ndërsa e kishte marrë edhe pëlqimin e PDK-së, mirëpo një mbështetje të tillë nuk e gjeti nga “Vetëvendosja” e Albin Kurtit, dhe përnjëherë sulmohet me një shkrim nga një sejmen i “Vetëvendosjes”, i cili ia “përkujton” Adem Demaçit kohën kur ai paska thënë “Rreshtohuni pas Rugovës, sepse ky është njeriu i duhur që duhet t’i prijë popullit”. Dhe sipas tij, Bacës iu paskan dashur rreth 5 vjet që ta kuptonte se Ibrahim Rugova nuk ishte njeriu i duhur që t’i printe popullit. Ja cili na qenka “mëkati” i Adem Demaçit, sipas një skribi të “Vetëvendosjes”, i cili qenka zhgënjyer në Demaçin, sapo ky zbardhi publikisht një fakt për mosdhënien e pëlqimit nga Lëvizja “Vetëvendosje” lidhur me kandidimin e tij në postin e kryetarit të Kosovës.
Ky shkronjës komentesh me asnjë fjalë nuk tregon se ishte pikërisht emri i Adem Demaçit, me të cilin identifikohej dhe rritej Lëvizja “Vetëvendosje”. Dhe pikërisht kur ajo fitoi një pjesë të elektoratit dhe nga Lëvizje u bë parti, ashtu si LDK-ja e dikurshme, atëherë kreu i “Vetëvendosjes” e anashkaloi Demaçin, sepse rrezikonte portin e të parit të “Vetëvendosjes”.
Demaçi, ashtu sikur e njohim ne, kurrë nuk e ka pranuar as e pranon luftën brenda shqiptarëve. Në raste të tilla, ai gjithnjë ka lëshuar pe, sepse ai me veprën e tij jetësore në shërbim të kombit e atdheut ka arritur të radhitet me mendjet më të ndritura, jo vetëm të kombit, por edhe të njerëzimit. Shembulli i tij i qëndresës dhe i heroizmit është shembull unikat në historinë tonë, por edhe në historinë e përbotshme të luftës kundër despotizmit, krimit dhe shkeljes të të drejtave njerëzore. Për këtë qëndrim ka marrë edhe mirënjohje ndërkombëtare.
Përpjekjet e herëpashershme, të individëve apo të grupeve të ndryshme që mbrojnë interesa meskine politike, për ta përbaltur këtë emër të përveçëm të historisë së kombit shqiptar janë përpjekje të mjera, të ulëta, djallëzore e pse jo edhe idiotike për synimet që pretendojnë t’i arrijnë me sulme të tilla, të cilat gjithsesi do t’u kthehen bumerang.
Kohët e fundit, ngjashëm është vepruar edhe me shprehjen e urrejtjes dhe të egërsisë uloke kundër akademikut të nderuar, Rexhep Qosja.
Një javë më parë, në një intervistë akademiku Qosja, duke komentuar zhvillimet në veriun e vendit dhe duke u shprehur pro qëndrimeve e veprimeve të Qeverisë së Kosovës, i ftoi LDK-në e “Vetëvendosjen” që, nëse janë të gatshëm dhe nëse shfaqin gatishmëri të njëmendtë, le ta tregojnë trimërinë e tyre në veri të Kosovës, përderisa nuk pajtohen me aksionet e Qeverisë, KFOR-it dhe EULEX-it. U desh vetëm ky konstatim realist i profesor Qosjes dhe përnjëherë filloi të derdhet mllefi e urrejtja kundër tij. Pa vonuar, në një konferencë shtypi të grupit të “ekspertëve” për ekonomi të LDK-së duke marrë shkak, për sikur thuhet shpenzimet që paska bërë Qeveria për botimin e kompletit të veprave të akademikut Qosja, një zyrtar i mjerë i kësaj partie nuk pati turp të thotë se vepra e Qosjes nuk paska madje as vlera shkencore. Si duket, ky shpirtrob nuk e kupton dot fjalën shkencë. Sa për vlerat e pakontestueshme të veprave të profesor, doktor Rexhep Qosjes flasin më së miri vetë veprat e tij të botuara në Kosovë, Shqipëri, Maqedoni e në vende të tjera, me tirazhin më të madh dhe që kapërcejnë qindfishin e lexuesve në krahasim me lexuesit e veprave të Ibrahim Rugovës, veprat e të cilit, po ashtu, janë financuar nga Buxheti i Kosovës.
Për këtë kontestim, qoftë edhe verbal, të veprave të akademikut, Rexhep Qosja, do të duhej të kërkonte falje vetë kreu i LDK-së, po të kishte seriozitet, maturi dhe përgjegjësi në këtë parti politike, sepse nuk mund t’i lejohet një mendje-robi të japë gjykime të tilla kur flet në emër të partisë, meqë besojmë se jo të gjithë në LDK pajtohen me konstatime të tilla paushalle.
Krijimtaria e shkëlqyer e profesor doktor Rexhep Qosjes gjithnjë ka rrezatuar dhe rrezaton frymëzim, dije, korrektësi, gjuhë komunikuese, pozitë të qartë dhe të shëndoshë kombëtare, afinitet, vullnet dhe talent në trajtimin e të gjitha problemeve, me të cilat është marrë dhe merret aktualisht, qoftë në kritikën letrare, në krijimtarinë e mirëfilltë artistike dhe në mbrojtje të fuqishme të të drejtave të lirive të shqiptarëve dhe të realizimit të aspiratave të natyrshme të tyre për çlirim dhe bashkim kombëtar.
Kritikucët e Demaçit dhe të Qosjes nuk janë emra që i njeh opinioni, dhe të tillë mund të gjenden me bollëk në forumet e pista të shumë portaleve, por fakti se ata flasin në emër të partive që i përfaqësojnë është brengosës, jo për Demaçin e Qosjen, por për ata vetë dhe për partitë e tyre, sidomos për Lëvizjen “Vetëvendosje”, e cila është ngritur duke e shfrytëzuar emrin, mundin, kapitalin politik e kombëtar dhe meritat e pakontestueshme të Adem Demaçit.
Nuk fitohet dot lufta kundër Demaçit dhe Qosjes, andaj edhe përpjekjet për t’i përbaltur këto dy figura të ndritshme të kombit janë përpjekje ogurzeza të shpirtvegjëlve mendje-robër, të cilët në punën e tyre sizifiane mundohen ta fshehin diellin me shoshë dhe shpeshherë “fluturojnë” symbyllur, ashtu sikur flutura, e cila i turret dritës dhe digjet në dritën e qiririt.

http://www.gazetalajm.info/opinione/...he-Qosjes.html

[Llapi]

Fitou: Aktivistët e Vetëvendosjes, fashistë




Prishtinë – Ambasadori i Francës në Republikën e Kosovës, Zhan Fransua Fitu, e ka quajtur fashizëm një aksion të lëvizjes Vetëvendosje derisa ai dhe ministri i Brendshëm, Bajram Rexhepi, po mbanin

një ligjëratë në institutin privat ISPE.


Aktivistë të lëvizjes Vetëvendosje e kanë ndërprerë sot një ligjeratë për liberalizimin e vizave të ministrit të Brendshëm Bajram Rexhepi dhe ambasadorit të Francës, Zhan Fransua Fitu, para studentëve të Institutit për Studime Evropiane. ISPE. Pas fjalimeve të ministrit dhe ambasadorit, një aktivist i Vetëvendosjes e ka akuzuar ministrin Rexhepi për mosprani në veri të vendit dhe më pas disa aktivistë të tjerë kanë fishkëlluar dhe hedhur pamflete në sale.
“Ti flet për veriun e vendit si spectator… ti ke thënë se një ditë do t’i vijë fundi i durimit të KFOR-it, d.m.th. t’i flet si zëdhënës i KFOR-it, d.m.th. mungesa e veprimit ty të bën si zëdhënës i KFOR-it e kurrsesi ministër”, i kanë thënë Rexhepit, aktivistë të Vetëvendosjes.
Ka reaguar menjëherë ambasadori i Francës, Zhan Fransua Fitu, duke e quajtur fashizëm veprimin e aktivistëve të Vetëvetendosjes.
“Gjëja e parë që duhet të bëni është të mos silleni si bandat fashiste. Ne jetojmë në një vend demokratik dhe mendimet e ndryshme për dialogun, për Evropën etj., pranohen. Por, të vish në një takim, ta fyesh ministrin e të flasësh banalitete, më falni, por kjo është Evropa e vitit 1943. Kjo është fashizëm. Dhe këto veprime vendi im dhe të tjerët do t’i kundërshtojnë”, ka thënë menjëherë ambasadori francez.
Ndërkaq ministri Bajram Rexhepi tha se deklaratat dhe veprimet e tilla bëhen për qëllime politike dhe se ai ka qenë disa herë i pranishëm në veri të vendit.
“Mua nuk më bëjnë shumë nervoz disa fëmijë të lazdruar që sillen rrugëve. Bash janë fëmijë të lazdruar. Se deri ku lëvizë Ministri i Punëve të Brendshme, unë i ftoj në veturën personale e jo në Suhodoll e në Lagje të Boshnjakëve, por shumë më thellë, por ata duhet të përgatiten psiqikisht, sepse mund të kenë frikë”, tha Rexhepi.
Policia e Kosovës arriti menjëherë pas incidentit.
Në një komunikatë për media, Lëvizja Vetëvendosje bën të ditur se janë 10 aktivistë të saj të arrestuar pas aksionit të sotëm. (LajmeShqip.com)

[Llapi]

Fitu: Aksioni i djeshëm i VV-së, shembull i fashizmit Kanë vazhduar edhe sot polemikat mes ambasadorit të Francës, Zhan Fransua Fitu dhe akvitistëve të Lëvizjes Vetëvendosje.... Postuar: 03:13:43 / 25.10.2011
Ambasadori i Francës në vendin tonë Zhan Fransua Fitu ka mbrojtur qëndrimin e tij se aksioni i djeshëm i Lëvizjes Vetëvendosje është fashizëm. Gjatë një debati me të rinj rreth pjesëmarrjes së tyre në vendimarrje, ambasadori francez tha se debati publik në Kosovë është shumë i politizuar dhe në këtë aspekt ai tha se Kosova qëndron me keq sesa Afganistani.
”E kam përdorur fjalën fashizëm sepse e kujtova një shkrimtar italian i cili thoshte se fashizëm nuk është vetëm dhuna por fashizmi fillon aty ku nuk është i mundur debati”, tha Fitu.
Edhe në këtë debat të pranishëm ishin aktivistitë të Vetëvendosjes. Aktivisti Rron Gjinovci tha se qëndrimet e ambasadorit francez ndaj popullit të Kosovës janë raciste.
Ndërkaq njëri ndër udhëheqësit e Vetëvendosjes, Glauk Konjufca që është edhe nënkryetar i Kuvendit të Kosovës pas mbledhjes së kryesisë bëri të ditur se subjekti i tij do t’i drejtohet edhe shtetit francez rreth deklaratave të ambasadorit Fitu.
”Mendoj që është e udhës që t’i drejtohemi edhe shtetit francez sepse mendoj se kemi pasur të bëjmë me një sjellje të ambasadorit e cila në thelb nuk i përfaqëson vlerat e shtetit të cilin ai e përfaqëson. Gjuha e tij nuk ka qenë aspak diplomatike. Mendoj se nuk është fashizëm e drejta e njerëzve dhe qytetarëve për të protestuar”, tha Konjufca.
Por ambasadori Fitu në debatin e organizuar nga ambasada franceze rreth pjesëmarrjes së të rinjve në vendimmarrje theksoi se ekziston një dallim i madh i demonstrimit në rrugë dhe pengimit të një personi që të shpreh mendimin e tij.

[Llapi]

Janë edhe fashistë

30 Tetor 2011 12:31, Nga Arben IdriziAjo që e bën Vetëvendosjen, përtej ideologjisë, reprezentim të së Keqes si të tillë, është përqafimi i dhunës si mjet për arritjen e qëllimeve

Këtyre ditëve ndër debatet që shpërthyen në opinion, është edhe ai rreth fashizmit, si nocion në përgjithësi dhe si veprim konkret në veçanti.
Së pari, Ambasadori francez, Fitou, i quajti veprimet e Vetëvendosjes fashiste, kur pjesëtarë të kësaj të fundit u përpoqën ta ndalojnë një prezantim të tij dhe të Ministrit Rexhepi. Pastaj, lideri i Vetëvendosje, z.Kurti i shkroi një letër publike ambasadorit, duke i “urdhëruar”, mbi të gjitha, të kërkonte falje. Ndërkohë, një pjesë e medieve botoi në shqip një intervistë të shkrimtarit serb Svetisllav Basara, i cili, edhe pa e fshehur qëndrimin e vet fashist ndaj të tjerëve, jep një definicion, besoj të saktë, mbi fashizmin, përkatësisht lindjen e tij. Sipas Basara-s, bazat nga ku lind fashizmi janë trullosja, provincializmi dhe shpirtngushtësia. Me fjalë të tjera, fashizmi lind nga Kiçi.
Gjetja duket e saktë, ama unë dua të ngjitem më lart në kohë, aq sa më mundësojnë leximet e mia, që të gjejë një autor tjetër që ka reflektuar më thellë dhe më në esencë të një problematike të tillë. Claudio Magris, në ‘Danubio’, duke folur për Kiçin e të Keqes, ka marrë si shembull mjekun Josef Mengele, njërin nga kasapët e Auschwitz-it. Sipas Magris-it, aktet që ai mjek i bën, përveç mizore, janë një budallëllëk i skajshëm, janë akte që do të mund t’i bënte çdonjëri dhe që ai, në injorancën e tij të verbuar nga Kiçi, mendon se përkundrazi, janë aksione të rezervuara për pak veta të zgjedhura.
Prej vitesh sa shkruaj në këto faqe gazete, i kam cilësuar veprimet dhe qëllimet e Vetëvendosjes edhe fashiste.
Ilustrimet krahasuese që sjellim shpesh bëjnë të tingëllojmë të ashpër dhe ndoshta të padrejtë në gjykimet tona. Por, në fund, besoj, ato shërbejnë për të mundësuar të kuptohet mesazhi që mund të japë një veprim i caktuar dhe pasojat që mund t’i sjellë. Pastaj, ato ilustrime nuk është se na adresojnë vetëm te një ideologji e caktuar, si fashizmi, mund të na adresojnë të disa sish. Veprime të caktuara të cilësuara fashiste, në të njëjtën kohë mund cilësohen fare mirë edhe ndryshe.
Që të mbetemi te termi që po e përdorim tashmë: cilat janë pikëpamjet dhe veprimet e Vetëvendosjes që mund të cilësohen edhe fashiste?
Fillimisht, vetë diskursi i lëvizjes është përgjithësisht i një modeli edhe fashist. Thirrja në emër të popullit, identifikimi i të gjithë kundërshtarëve politikë si armiq dhe shitës të vendit – janë disa nga karakteristikat e një qëndrimi ideologjik fashist.
Në kuadër të kësaj, edhe akte të tilla si ai kur kjo lëvizje i vesh vetes të drejtën gjithmonë dhe gjithkund, në emër të popullit, t’i pengojë të tjerët, të gjykuar nga ta si armiq të popullit dhe vendit, ta ushtrojnë të drejtën e lirisë së fjalës. Është qëndrim edhe fashist ta pengosh tjetrin në mënyrë të dhunshme, për shkak të mospajtimit politik ose ideologjik, në detyrën ose nevojën e tij për të folur.
Veprimet fizike, pastaj, si dëmtimi i pronës publike dhe private, rrëzimi i kamionëve së fundmi, në emër të popullit, në bazë të “doktrinës” së ekonomisë nacionaliste, kanë një konotacion të pastër edhe fashist.
Ata që i bëjnë këto gjëra: janë të trullosur, provincialë, shpirtngushtë? E keqja më e madhe në tërë këtë është se ata, të verbuar nga Kiçi, mendojnë se ata dhe vetëm ata janë të zgjedhurit që ta bëjnë këtë. Ata nuk e bëjnë këtë sepse ndihen se janë provincialë apo inferiorë. Ata e bëjnë këtë sepse ndihen të jenë të zgjedhur. E në esencë, aq skajshmërisht budallenj janë sa harrojnë se ato veprime mund t’i bëjë secili, edhe fëmija. Aq mendjetredhur janë sa harrojnë se edhe secili nga ne që s’e bëjmë atë, do të mund ta bënim, megjithatë nuk e bëjmë. Secili nga ne do të mund të mendonte për veten se është i zgjedhur, por nuk e mendojmë këtë. Secili nga ne do të mund të thirrej në emër të Shtetit për ta shtrirë sovranitetin me dhunë, por nuk thirremi. Secili nga ne do të mund ta etiketonte kundërshtarin tradhtar, por nuk e etiketojmë. Secili nga ne do të mund t’i ulërinte Kurtit në vesh si kafshë kur ai flet, por nuk e bëjmë këtë. Secili nga ne do të mund t’i hidhte Kurtit një kovë ngjyrë teksa dërdëllit në emër të popullit, por nuk e bëjmë këtë. Secili nga ne do të mund t’ia thyente xhamat e shtëpisë, por nuk e bëjmë këtë. Secili nga ne do të mund të futej në konferencat ose tubimet e Vetëvendosjes dhe të përpiqet t’ua mbyllë gojën, t’i përqeshë, pra t’i pengojë në të drejtën e tyre. Nëse Vetëvendosje me rreth 13 për qind të elektoratit mendon se është e zgjedhur t’i pengojë të tjerët, çfarë do të mund të mendonin dhe të bënin pjesa e mbetur? Secili nga ne do të mund të mendonte se është i zgjedhur t’i bëjë ato gjëra, por nuk e mendon as nuk i bën. Sado që mund ta kemi kundërshtar politik ose ideor. S’e bëjmë, ngase, nëse për asgjë tjetër, e dimë se duhet dhe duam t’i respektojmë disa vlera dhe parime njerëzore e demokratike.
E Keqja nuk kërkon të zgjedhur. Mund ta bëjë secili. E sidomos secili që, i mjeruar nga injoranca dhe ligësia e vet, mendon se është i zgjedhur ta bëjë. Nuk kërkon të zgjedhur as e Mira. Jemi ne ata që zgjedhim. Ne zgjedhim të Mirën dhe të Keqen. Dhe duhet të mbajmë përgjegjësi për zgjedhjet që i bëjmë. Jo vetëm para të tjerëve, por edhe para vetes.
Pra, ajo që e bën Vetëvendosjen, përtej ideologjisë së caktuar, reprezentim të së Keqes si të tillë, është përqafimi i dhunës si mjet për arritjen e qëllimeve. Vetëvendosje është e zhytur thellë në llumin e Kiçit të së Keqes. Nuk është duke e shpëtuar nga kjo as kushti parimor i një sistemi demokratik: prania e saj në Parlament – aty ku do të duhej që në mënyrë institucionale të kërkonte zgjidhje për problemet.


http://www.gazetaexpress.com/?cid=1,883,66099

[Llapi]

Demaçi: “Axhamitë” e VV-së fyen mikun francez




Publikuar: 31.10.2011 - 12:33Prishtinë, 31 tetor - Reagimin e ambasadorit francez në Prishtinë, në aksidentin me aktivistët e Lëvizjes “Vetëvendosje”, Adem Demaçi e cilësoi si fjalor të një njeriu të mllefosur me të drejtë. Mirëpo, sa përket Vetëvendosjes, ai mendon se “axhamitë” e këtij subjekti politik reaguan në mënyrë skandaloze dhe në kundërshtim me mikpritjen shqiptare.

I njohur për 28-vjetët e kaluar në burgjet e ish-Jugosllavisë për lirinë e popullit të vet, veprimtari Adem Demaçi thotë se do të mund t’i hynte garës për president nëse këtë do ta kërkonte populli. Por, mohon kategorikisht se do të mund të ishte kandidat i ndonjërës

prej partive aktuale politike.

Thotë se aksionet e Qeverisë dhe të institucioneve të sigurisë në veri shkuan në dobi të

thyerjes së amullisë që e kishte kapluar këtë pjesë.

Në një intervistë për “Tribuna Shqiptare”, që e transmeton Indeksonline, Adem Demaçi, varësinë e institucione të vendit nga institucionet ndërkombëtare e sheh si fat të pashkruar të popujve të vegjël, të cilët qëllimet e të drejtat e veta t’i arrijnë hap pas hapi. E për t’i marrë këmbët, përveç tjerash, Demaçi propozon themelimin e të ashtuquajturit “Fondi Kombi”, i cili do të grumbullonte “eurot e imta” të kursyera nga qytetarët në hapësirën shqiptare dhe në mërgatë.

[pinto]

Normal qe s'te duan per president.

Kisha admirim per z. Demaçin, por se fundi, e teproj duke adaptu nje fjalor te nje servili standard te nje politikani shqipfoles.

[GURI SYLAJ]

Bacen duhet rrespektu cfardo qe thot dhe cfardo qe bene !
Por , kete Fatin e pashkruar, Baca eshte dasht me e dite edhe atehere kur ishte, kategorikisht, kunder Marreveshjes se Rambujese!!?
Baca ka bagazhin e tij atdhetar te cilin nuk do te ishte mire me i fale askujt ,as edhe Hashim Thaqit apo ketyre "miqeve" nderkombtare.
Baca provoj gjithecka dhe krejt cka korri eshte nje rroge ,nje banese dhe shume rrespekt!!


Per Qosjen ,kesaj radhe, asgje..... hiq, ashtu sikur qe eshte vet !!

[sherri]

Postimi origjinal është bërë nga pinto

Normal qe s'te duan per president.

Kisha admirim per z. Demaçin, por se fundi, e teproj duke adaptu nje fjalor te nje servili standard te nje politikani shqipfoles.

Mos u ben qesharak more ti "geniallc" shpalle person Non-grata edhe u kry puna.Nime po te duket vetja qe gjithcka sillet rreth teje!? me ka pelqy s'me ka pelqy,ma bre se po na lige qeshtu

Demaci ka problem me djalin Albinin,kurgja kerkujt. Ndreqen skan ku e qojn njani tjetrin se baba e djal jan,...ata thmia cka ju kallxon baba kur jan vetun dalin e thojn edhe jashte,..mesohen dema(c)gogji edhe ata

[pinto]

Postimi origjinal është bërë nga sherri

Mos u ben qesharak more ti "geniallc" shpalle person Non-grata edhe u kry puna.Nime po te duket vetja qe gjithcka sillet rreth teje!? me ka pelqy s'me ka pelqy,ma bre se po na lige qeshtu

Demaci ka problem me djalin Albinin,kurgja kerkujt. Ndreqen skan ku e qojn njani tjetrin se baba e djal jan,...ata thmia cka ju kallxon baba kur jan vetun dalin e thojn edhe jashte,..mesohen dema(c)gogji edhe ata

Vec hatri qatyne 28 vjet burg, se po.

[Arb]

A e keni fjalen per kete Demacicin qe propozonte Rada Trajkovicin per Presidente te Kosoves?