Të tjerët për Dr. Rugovën.

[Psikologu]

KALMI-REJ DHE PLASNIK DO TË MARRIN PJESË NË VARRIMIN E KRYETARIT RUGOVA



Vjenë, 23 janar (MIA) - Vdekja e kryetarit të Kosovës, Ibrahim Rugova, ka lënë zbrazëti të madhe dhe shumë çështje të hapura, ka thënë të hënën në Vjenë shefja e diplomacisë zvicerane Mishelin Kalmi-Rej pas takimit me ministren e Punëve të Jashtme austriake, Ursula Plasnik.

Siç njofton Kosovapresi, në një konferencë për media, Kalmi-Rej ka shprehur shpresën dhe bindjen se bisedimet rreth statusit të Kosovës do të vazhdojnë dhe do të përfundojnë me një zgjidhje të kënaqshme.

Kalmi-Rej është shprehur për pavarësinë e Kosovës, ndërsa ka shtuar se çështja e statusit duhet të zgjidhet shpejt, sepse situata në Kosovë nuk është stabile.

Ajo njëkohësisht u shpreh se zgjidhja finale duhet të arrihet përmes dialogut ndërmjet Prishtinës dhe Beogradit.

Ndërkaq, Plasnik tha se pas vdekjes së Rugovës është me rëndësi që delegacioni kosovar të fillojë bisedimet.

"Kemi besim në elanin e kosovarëve për të ruajtur tash stabilitetin dhe për të vazhduar procesin politik", ka thënë ajo.

Plasnik dhe Kalmi-Rej thanë se me siguri do të marrin pjesë në varrimin e kryetarit Rugova të caktuar për 26 janar, ditë e enjte.