Shqipëri - zgjedhjet 2013

[Shpati]

Maqedonia duhet të mësojë nga Shqipëria!



Dorëheqja e Sali Berishës nga posti i kryetarit të Partisë Demokratike është vlerësuar si akt i lartë moral nga deputetja e BDI-së Ermira Mehmeti.

“Dorëheqja e z. Sali Berisha nga posti i Kryetarit të Partisë Demokratike, si një vendim dhe akt moral pas rezultatit të zgjedhjeve të 23 qershorit, është edhe një shembull i mirë për atë se çfarë duhet bërë një lider me përgjegjësi dhe burrështetas i vërtetë, pasi të ketë dëgjuar verdiktin e popullit”, deklaroi Mehmeti.

Më tej Mehmeti ka theksuar se politika në Maqedoni duhet të mësojë leksionin e demokracisë që vjen nga Shqipëria.

“Në kohëra të dekadencave të rënda politike, kur duket se nuk dimë fort mirë të dallojmë shapin nga sheqeri, kur vija ndarëse mes idealeve dhe interesave konjukturale në veprimin politik duket se është zbehur shumë, vendimet e këtilla politike na vijnë si një apel dhe përkujtim- se politikanët nuk janë pushtetarë të përhershëm. Por ama, si demokratë të vërtetë, ata janë shërbyes të përhershëm të vullnetit të sovranit! Uroj që të gjithë ta mësojmë leksionin e demokracisë që na vjen sot nga Shqipëria”, theksoi Mehmeti. /albeu.com/