Të tjerët për Dr. Rugovën.

[Urata]

Bler: Presidenti Rugova për shumë vjet ishte një forcë e rëndësishme në jetën e Kosovës
Prishtinë, 24 janar - Kryeministri i Britanisë së Madhe Toni Bler, nëpërmjet një mesazhi në adresë të kryeparlamentarit Nexhat Daci, ka shprehur ngushëllime të sinqerta dhe keqardhje të thellë për vdekjen e Presidentit të Kosovës Ibrahim Rugova.
"Po të shkruaj për të shprehur ngushëllimet e mia pas vdekjes së Presidentit Rugova. Mendimet dhe lutjet tona janë me gruan dhe tre fëmijët e tij, gjatë kësaj periudhe kohore të vështirë.
Presidenti Rugova ishte një forcë e rëndësishme në jetën e Kosovës, për shumë vjet. Popullariteti i tij në mesin e popullit të Kosovës dëshmon për mbështetje të gjerë për përpjekjet e tij joviolente për të ardhmen e Kosovës. Jam shumë i lumtur që kam pasur rastin të takohem me të.
Shpreh keqardhje të thellë që vdekja e tij ndodhi në kohën kur sapo ka filluar procesi për statusin final të Kosovës. Puna e palodhshme e presidentit Rugova dhe vendosmëria e tij ka ndihmuar që kjo të ndodh. Pres që të gjithë liderët politik të Kosovës të vazhdojnë të ndërtojnë në përkushtimin e presidentit Rugova për një Kosovë ku të gjithë njerëzit, pa marrë parasysh përkatësinë etnike, racën apo religjionin, janë të lirë të jetojnë dhe të prosperojnë në mënyrë të barabartë.
Kërkoj nga Qeveria e Kosovës dhe ekipi negociator dhe liderët tjerë të Kosovës që të mblidhen për këtë qëllim në negociatat që po i zhvillon presidenti Ahtisari.
Sinqerisht,

Toni Bler

[Urata]

Filozofia e Presidentit Rugova ishte e ndërtuar në ruajtjen e qenies shqiptare

Shterpcë, 24 janar - Dega e LDK-se në Shterpces në mesazhin e saj veç tjerash thekson se data e 21 janarit 2006 do të jetë një ditë e shënuar me të zeza në historinë më të re të Kosovës - Dardanisë Antike. Presidenti Rugova ishte burrë i madh i të gjitha kohërave për shqiptarët, ishte lidhja e dy shekujve për së gjalli. Shekullit që nisi luftën për Lirinë e Kosovës dhe shekullit që ndërtoi Lirinë dhe Demokracinë e Kosovës, ishte vizionari i pavarësisë së Kosovës. E tërë filozofia e Tij politike ishte e ndërtuar në ruajtjen e qenjes shqiptare në Kosovë që me vizionin e tij largëpamës, këmbëngulje, guxim dhe trimëri bëri që Kosova të jetë emër i njohur në institucionet më të larta ndërkombëtare dhe brengë e përkrahjes parezervë gjatë kohës që ishte President i Kosovës. Me vizionin e Tij arrijti që të jetë Njeriu më i dashur për shqiptarët dhe personaliteti më i adhuruar edhe për popujt tjerë të Europës dhe të botës, të jetë model i politikës për shumë personalitete dhe të cmohet me rrespektin më të madh prej Njeriu, intelektuali, politikani dhe burrështeti të kohës”.

[Urata]

Personalitete të letrave shqipe vlerësojnë rolin e Dr. Ibrahim Rugovës

Tiranë, 24 Janar - Personalitete të artit dhe të kulturës shqiptare kanë vlerësuar për agjencitë e lajmeve të Shqipërisë - ATSH-në kontributin shumëplanësh të Presidentit të Kosovës, Dr. Ibrahim Rugova.
Kryetari i Akademisë së Shkencave të Shqipërisë, Prof.Dr. Ylli Popa, u shpreh se "Presidenti Rugova, përveçse ishte një politikan vizionar, ishte dhe një letrar i talentuar. Kjo ka bërë që për veprat e tij letrare, Ai të marrë titullin 'Doctor Honoris Causa', jo vetëm në Shqipëri, por edhe në vende të tjera të Europës".
"Vitin e kaluar në krye të një delegacioni të Akademisë sonë kam patur një takim të përzemërt me të, ku diskutuam për marrëdhëniet shkencore të ndërsjellta me Akademinë e Shkencës dhe Arteve të Kosovës, në fushat e shkencave të albanologjisë, gjuhësisë, historisë, etnokulturës, të ekspeditave të përbashkëta arkeologjike, si dhe për botimet e dypalëshe në kujtim të emrave të njohura si, Lasgush Poradeci, Dhimitër Pasko. Presidenti Rugova më krijoi përshtypjen e një njeriu shumë të komunikueshëm", vlerësoi akademiku Ylli Popa.
Shkrimtari dhe publicisti, Fatos Lubonja, u shpreh se "Rugova do të kujtohet, si intelektuali, profesori i letërsisë, i cili guxoi të vihet në krye të Lidhjes Demokratike të Kosovës, të sapokrijuar në një kohë të vështirë për shqiptarët e Kosovës. Padyshim mund të quhet 'Gandi i Kosovës', simbol i rrugës paqësore drejt fitores së Pavarësisë".
Duke e veçuar figurën e Rugovës, Lubonja tha se "Presidenti Rugova do të kujtohet si politikani që krijoi flamurin e Kosovës të ndryshëm nga ai i Shqipërisë, duke lëshuar me këtë mesazhin se ai kërkonte një shtet të ri kosovar dhe jo bashkimin e Kosovës me Shqipërinë, pa e qartësuar kurrë nëse kjo ishte një strategji e tij apo qëllimi i tij final i vërtetë".
Drejtori i Teatrit Kombëtar të Operës dhe Baletit, Zhani Ciko, vlerësoi ndihmesën e Dr. Ibrahim Rugovës në fushën e kulturës dhe arteve në Kosovë, si pjesë e domosdoshme për konfirmimin e identitetit kombëtar.
"Veprimtaria e tij është e prekshme dhe e ndjeshme në Kosovë, ku në sajë të kontributit të Tij, gjen njëherësh vlerat identifikuese të etnisë dhe trashëgimisë ndërkulturore", vlerësoi z.Zhani Ciko.
Shkrimtarja dhe përkthyesja Mira Meksi vlerësoi kontributin e tij në jetën shoqërore e politike. Sipas saj, "ideologjia politike e Rugovës në pacifizmin dhe pragmatizmin e saj është ndikuar thellësisht nga letërsia".
"Qëndrimet e tij politike, por sidomos deduksionet mbartin frymën e tolerancës, gjë që e frymëzon vetë Letërsia. Pasardhës të Presidentit Rugova do të ketë, por dishepuj që t'i tejçojnë idetë e tij politike si ai, mendoj se nuk ka", theksoi Mira Meksi.
Shezahi Rrokaj, rektor i Universitetit të Tiranës, e cilësoi figurën e Rugovës, si një nga figurat që radhitet në plejadën e kritikëve letrarë. "Me studimet e Tij, sidomos për autorët e vjetër, por edhe bashkëkohorë, ai u bë një nga lëvruesit më të mirë në fushën e tekstologjisë. Dr. Rugova dha në këtë fushë një ndihmesë të vyer jo vetëm për brezin e ri por dhe për kritikën letrare. Rugova ishte një kritik vizionar, gjë për të cilën kombi dhe ne duhet të jemi shumë mirënjohës", u shpreh z.Rrokaj.
Jorgo Bulo, gjuhëtar, cilësoi se "Ibrahim Rugova është protagonisti i historisë moderne të Kosovës. Dr. Rugova la një trashëgimi të çmuar shkencore sepse me studimet e Tij ndriçoi aspekte të zhvillimit kulturor të shqiptarëve. Z. Bulo veçoi në studimet e Dr. Rugovës, studimin fondamental për mendjen universale të Mesjetës Shqiptare, Pjetër Bogdani si dhe Doktoraturën për historinë e zhvillimit të kritikës shqiptare. "Kjo trashëgimi është një pasuri për brezat e rinj të studiuesve dhe në mënyrë të veçantë për metodën bashkëkohore që ka përdorur Dr. Rugova në studimet e Tij", u shpreh z. Bulo.
Seit Mancaku, gjuhëtar, u shpreh se Dr. Rugova ishte një studiues i rrallë i letërsisë dhe i kulturës shqiptare në përgjithësi. Ai ka botuar disa vepra me vlerë të veçantë, për kritikën letrare, historinë e letërsinë, filologjinë dhe kulturën shqiptare. Sipas z.Mancaku. kjo e bën Dr. Rugovën, një nga studiuesit e mirëfilltë shqiptarë në fushën e kritikës dhe kulturës shqiptare në përgjithësi. "Dr.Rugova do të mbetet një figurë akademike e shquar e letrave shqipe" cilësoi Mancaku.
Aktori Ndriçim Xhepa tha se "imazhi emocinal, profesional dhe shpirtëror që kam për këtë figurë është qetësia dhe qytetaria që duhet ta karakterizojë një udhëheqës. Më ka bërë përshtypje se në Kosovë, Dr. Rugovën e duan shumica e popullsisë për atë kompleksitet vlerash që ky njeri mbarti. Sipas Xhepës, "janë pikërisht këto vlera që do ta bëjnë atë të paharrueshëm".

[Urata]

Dr. Ibrahim Rugova përfaqëson shembëlltyrën e figurës më të jashtëzakonshme njerëzore, u tha në Fushë Kosovë

Fushë Kosovë, 24 janar - KK i Fushë Kosovës mbajti një mbledhje komemorative me rastin e vdekjes së Presidentit të Kosovës, Dr. Ibrahim Rugova. Përveç këshilltarëve komunalë, në sallën e KK së ishin të pranishëm edhe shumë qytetarë të Fushë Kosovës të cilët kishin ardhur për të nderuar Presidentin e tyre, punën, jetën dhe veprën e tij madhështore.
Duke folur para të pranishmëve, kryetari i KK së, Skënder Zogaj tha se Dr. Ibrahim Rugova përfaqëson shembëlltyrën e figurës më të jashtëzakonshme njerëzore, që merr përmasën e një njeriu të shenjtë. "Nuk ka dyshim se vepra e Ibrahim Rugovës e plotëson trinomin Skënderbeu Nëna Tereze, që janë tri vlerat më të shkëlqyera të të gjitha kohëve që kapërcejnë kufirin kombëtar dhe i përkasin civilizimit botëror", tha Zogaj, i cili shtoi se sot Kosova dhe mbarë shqiptaria është në ditë zie.
"Shpirti mitik i Rugovës shkëlqen si flakadan në dhembjen tonë që nuk mund ta pranojë se e humbëm orfeun e forcës dhe të dinjitetit, ideatorin dhe misionarin lirisë dhe të Pavarësisë së Kosovës, që më një këmbëngulësi titanike, punoi për realizimin e saj".
Të pranishëm në komemoracion përveç këshilltarëve komunalë, edhe përfaqësues të subjekteve politike dhe të shoqërisë civile, të UNMIK ut, KFOR it, SHPK së, TMK së. Salla e KK të Fushë Kosovës, vazhdon të vizitohet nga një numër i jashtëzakonshëm i qytetarëve për t'u nënshkruar në librin e zisë dhe për të bërë homazhe për Presidentin Rugova.

[Urata]

Kosova ka humbur një lider historik, vlerësojnë personalitetet e huaja politike

Prishtinë, 24 janar - Personalitete të ndryshme evropiane e botërore vazhdojnë të vlerësojnë figurën e Presidentit Rugova dhe të shprehin ngushëlllimet e tyre.
Kryetarja e delegacionit të Parlamentit Evropian për Europën Juglindore, Doris Pak, është shprehur e tronditur nga vdekja e Presidentit të Kosovës. "
E njihja që nga viti 1989. E kam mbështetur gjithmonë për luftën e tij, forcën, qetësinë dhe mënyrën paqësore me të cilën përpiqej për popullin shqiptar, për Kosovën. Ai ka qene një personalitet me një dukje shume delikate, por ne brendësi kishte shume vullnet dhe ishte i vendosur për një Kosove te pavarur" ka thënë Pack në një intervistë për TV Alsat. Ajo ka vlerësuar se zëvendësimi i Rugovës nuk është i lehtë, por beson se vdekja e tij nuk do të ndikojë në procesin e zgjidhjes së çështjes së Kosovës.
"Vazhdimësia e Rugovës s'është e qarte. Kur një njeri si ai largohet nga skena, zëvendësimi nuk është i lehte. Ky është një problem i partisë se tij, i të gjithë shqiptarëve. Ai kishte një autoritet të madh dhe tani mund të shpërthejnë rivalitetet. Unë ia kam frikën kësaj". Pak ka thënë se tash që po fillojnë bisedimet për statusin për të realizuar qëllimin për të cilin Rugova ka luftuar qetësisht për vite të tëra nuk është koha për rivalitet midis shqiptarëve.
Ish-kryeministri suedez Karl Bilt, i cili ka qenë i dërguar i posaçëm për Ballkan i Bashkimit Evropian (BE) dhe Organizatës së Kombeve të Bashkuara (OKB) ka bërë një deklaratë pas vdekjes së presidentit Rugova. "Me humbjen e Ibrahim Rugovës, Kosova ka humbur një person që në kohë kritike ka mundur të bashkojë dhe të moderojë skenën politike shumë të ndarë", ka thënë Bild.
Ministrja e Jashtme suedeze Lajla Frajvalds ka shprehur ngushëllimet e vendit të saj për vdekjen e presidentit Ibrahim Rugova. "Rugova ishte forcë e bashkimit në mesin e shqiptarëve të Kosovës, dhe vdekja e tij është një goditje për negociatat e ndjeshme për pavarësi nga Serbia", citohet të ketë thënë ajo, në mediat suedeze.
Kryeministri i Greqisë Kostas Karamanlis ka shprehur ngushëllime për popullin e Kosovës pas vdekjes së presidentit Ibrahim Rugova. "Mungesa e tij e bën më të vështirë dhe më të komplikuar përpjekjet për të formuar modelin e ardhshëm të qeveris-jes në Kosovës", ka thënë Karamanlis.
Kryetari i Kuvendit të Maqedonisë Lupço Jordanovski i ka dërguar një telegram ngushëllimi kryeparlamentarit Nexhat Daci, në të cilin shpreh ngushëllime për vdekjen e presidentit Ibrahim Rugova.
"Ne shpresojmë që qytetarët dhe autoritetet në Kosovë do të kenë forcë për t'u përballur me këtë humbje të madhe. Ibrahim Rugova ishte person që rae reputacionin e tij të madh dhe mençurinë e tij politike kishte përkrahës të shumtë në Kosovës dhe miq të shumtë në bashkësinë ndërkombëtare", thuhet në telegramin e ngushëllimit. Me largimin e tij nga skena politike, ka thënë Jordanovski, qytetarët dhe autoritetet në Kosovë, si dhe rajoni ka humbur një person konstruktiv që kishte rol të rëndësishëm dhe që ka kontribuar shumë për paqe dhe stabilitet.
"Jam i bindur që autoritet e Kosovës do të vazhdojnë rrugën e trasuar nga Rugova dhe do t'i kontribuojnë procesit të forcimit të stabilitetit dhe sigurisë si dhe ndërtimit të kapaciteteve demokratike të institucioneve të Kosovës", ka thënë ai.
Në emër të Këshilli të Evropës, sekretari i përgjithshme Terri Dejvis ka shprehur ngushëllime të sinqerta për popullin e Kosovës, që, siç ka thënë ai, "ka humbur një lider historik".
"Ibrahim Rugova ishte një politikan i cili besonte në paqe dhe ishte i gatshëm për të rrezikuar për të. Ai vdiq në prag të hapjes së bisedimeve për të ardhmen e Kosovës, që do të çojë në zgjidhje të drejtë, paqësore dhe demokratike për Kosovën dhe të sjellë stabilitet dhe prosperitet për të gjithë qytetarët e saj", ka thënë Dejvis, në telegramin e tij të ngushëllimit.
Edhe shefi i zyrës së Këshillit të Evropës në Prishtinë, Zurab Katçkatishvili ka dërguar një telegram ngushëllimi. "Kam qenë i privilegjuar të takojë presidentin Rugova disa herë dhe e di se sa të forta dhe të thella ishin bindjet e tij që i vuri në shërbim për të ardhmen e Kosovës", ka thënë Katçkatishvili. Vepra dhe përkushtimi i Rugovës, ka shtuar ai, duhet të mbesin gjithnjë si një shembull për ata, të cilët do të kenë përgjegjësi në të ardhmen.
"Këtyre ditëve jam pranë atyre që po mbajnë zi për figurën historike të presidentit të ndjerë Rugova", ka theksuar ai.

[Urata]

Kosovo President Ibrahim Rugova dies at 61
Updated Sun. Jan. 22 2006 7:23 AM ET


Kosovo's President Ibrahim Rugova

CTV.ca News Staff

Kosovo President Ibrahim Rugova, who came to embody the ethnic Albanian struggle to win independence from Serbia, died on Saturday after a battle with lung cancer. He was 61.

He died at his home in Pristina, the capital of Kosovo, surrounded by his family members, his spokesman Muhamet Hamiti said.

Rugova, a chain-smoker until he was officially diagnosed with lung cancer in September 2005, had been undergoing treatment at his Pristina residence.

The Sorbonne-educated literature professor came to prominence in the early 1990s as the leader of the nonviolent ethnic Albanian movement against the policies of former Yugoslavia president Slobodan Milosevic.

Kosovo has been run by the United Nations since 1999 when a NATO bombing campaign drove out Serb forces accused of atrocities against ethnic Albanians during a separatist war.

The United Nations immediately postponed until February the first formal U.N.-mediated negotiations between Serbs and ethnic Albanians to determine whether Kosovo's majority ethnic Albanians should become independent or remain part of Serbia-Montenegro, the union that replaced Yugoslavia.

The talks had been scheduled to begin in Vienna on Wednesday.

Rugova, who was elected Kosovo's first president in 2002, won international respect through the peaceful nature of his opposition to Serb dominance, in contrast to his main rivals, who led the rebel Kosovo Liberation Army that fought Serb troops.

In 2002, Rugova became involved in a series of heated exchanges with Milosevic at his trial for war crimes at The Hague.

"Mr. Rugova, do you think that you personally and the Kosovo Albanians were used as a means of implementing the will of the great powers - yes or no?" Milosevic is quoted as asking.

Rugova responded: "The great powers and the international community came out in our defence, for human rights and against the massacres perpetrated by Belgrade and by you."

In March, 2005, Rugova survived an apparent assassination attempt, the second one within 12 months, after a bomb exploded as his convoy passed through the centre of Pristina.

The head of parliament, Nexhat Daci, is expected to be named acting president until the parliament chooses a new leader.



A Kosovo Albanian woman holds a candle in rememberance of the late Kosovo President Ibrahim Rugova infront of the theatre in Kosovo's capital Pristina on Saturday. (AP / Visar Kryeziu

[Psikologu]

Daci: Kjo ngjarje tragjike do të jetë mobilizim i shumëfishtë që ta forcojmë unitetin
Besim Abazi
22-01-2006



Kryetari i Parlamentit të Kosovës, Nexhat Daci, i cili sipas Kornizës Kushtetuese të Kosovës, trashëgon postin e presidentit, tha sot në një intervistë për Zërin e Amerikës se Prishtina do t’i dëshmojë botës së Kosova është vend i stabilitetit në Ballkan. Në intervistën që i dha Zërit të Amerikës, ai tha se institucionet janë të gatshme t’i përmbushin detyrimet e tyre në pajtim me përgjegjësitë kushtetuese e ligjore.

Zëri i Amerikës: Zoti Daci, ku është Kosova 24 orë pas vdekjes së presidentit Rugova?

Nexhat Daci: Kosova është në rrugën që 16 vite më parë e ka filluar presidenti Rugova. Dhe unë i garantoj shqiptarët jo vetëm të Kosovës por shqiptarët në diasporë, në Shqipëri, në Maqedoni, në Luginë të Preshevës, në Mal të Zi dhe në Evropë, që personaliteti i Rugovës është obligim shpirtëror i qytetarëve të Kosovës, i shqiptarëve në veçanti që ta vazhdojnë atë rrugë që jemi afër finalizimit të saj. Kosova është në dhimbje të thellë për humbjen e personalitetit kryesor të shekullit që kaluam për Kosovën. Por, Kosova është krenare më tepër se gjithkush në Evropë që pati fat ta ketë një personalitet të tillë që të jetë lider jo vetëm shpirtëror por dhe politik edhe krijues dhe janë obligime të mia në institucione, të qeverisë, parlamentit dhe partive politike që të ruajmë një unitet edhe më funksional se sa e krijuam me presidentin dhe janë obligimet e mia në institucione që t’i shtojmë mundin dhe djersën tonë për ta finalizuar atë që presidenti Rugova i thoshte gjithkujt, njohjen formale të pavarësisë së Kosovës. Në të njëjtën kohë do të doja t’i shprehja falënderimet ose të them ngushëllimet për presidentin Clinton dhe madam Albright që aq shumë bënë për idenë e Rugovës, për sjelljen e demokracisë në Ballkan, por edhe NATO-s dhe të gjitha vendeve të Bashkimit Evropian.

Zëri i Amerikës: Vdekja e presidentit Rugova ndodhi në një periudhë shumë të ndjeshme për Kosovën kur kanë filluar edhe bisedimet për zgjidhjen e statusit politik të saj. Si mendoni se mund të reflektohet mungesa e tij në këtë proces?

Nexhat Daci: Unë mendoj duke e njohur mentalitetin e popullit tim, kjo ngjarje tragjike për ne do të jetë mobilizim i shumëfishtë që unitetin e krijuar në institucione pozitë – opozitë jo vetëm ta ruajmë por ta forcojmë edhe më tepër. Të mos bëjmë asnjë hap, asnjë gjest që do të dëmtonte këtë unitet dhe me këtë do t’i tregonim bashkësisë ndërkombëtare që shqiptarët janë faktor i rëndësishëm në Ballkan, faktor stabiliteti, ndërsa Kosova e përgatitur për shtet sovran dhe të pavarur.

Zëri i Amerikës: Ndonëse ka vetëm një ditë nga vdekja e presidentit, tashmë diskutohet për trashëgiminë politike të tij, duke theksuar se ka lënë një zbrazëtirë në udhëheqjen politike të Kosovës. A do të kenë institucionet e saj kurajë të mjaftueshme për të tejkaluar këtë posaçërisht kur bëhet fjalë për trashëgiminë politike të tij?

Nexhat Daci: Unë besoj që kosovarët kanë kapacitet, kanë vullnet, por mbi të gjitha kanë obligim, që atë barkë, atë anije të udhëhequr në mënyrë brilante nga presidenti Rugova, nuk do të mundohemi t’ia ndërrojmë as kursin as ta destabilizojmë. Jam i bindur thellë se ka shumë vullnet në këtë drejtim në LDK (Lidhja Demokratike e Kosovës) dhe në Kosovë dhe institucionet janë të gatshme që obligimet e tyre konform përgjegjësive kushtetuese, ligjore dhe shoqërore t’i kryejnë dhe t’i udhëheqin si duhet.

[Psikologu]

Kosovarët sfidojnë të ftohtin për të nderuar Rugovën


Mijëra vetë bëjnë homazhe megjithë të ftohtin e acartë
Për të dytën ditë me radhë mijëra kosovarë kanë qëndruar në radhë të gjata në të ftohtin e acartë për t'i bërë homazhet e fundit presidentit Ibrahim Rugova, trupi i pajetë i të cilit është vendosur në hollin e Kuvendit të Kosovës.
Gjatë gjithë kohës, në sheshin "Nëna Tereza", ka qarkulluar një autoambulancë dhe automjete që kanë larguar borën nga rruga.

Holli i Kuvendit ka qenë i stërmbushur me burra, gra, pleq e fëmijë.

Këshilli për varrimin e presidentit u ka bërë thirrje qytetarëve që, për shkak të kohës dhe temperaturave shumë të ulta, vetëm të parakalojnë në hap para trupit të pajetë të Presidentit Rugova.

Këshilli ende nuk ka konfirmuar vendin ku do të prehet trupi i zotit Rugova. Zëdhënësi i presidencës, Muhamet Hamiti, ka thënë se presidenti do të varroset të enjten në Prishtinë dhe varrimi i tij do të jetë me karakter kombëtar dhe shtetëror.

Jozyrtarisht njoftohet se varrimi do të bëhet në varrin e familjes Rugova në lagjen Velania, ku ndodhet edhe shtëpia e tij.

Pjesëmarrje ndërkombëtare

Burra shteti dhe figura të njohura botërore kanë filluar të konfirmojnë pjesëmarrjen e tyre në varrimin e presidentit Rugova, përfshirë shefin e diplomacisë evropiane, Javier Solana, kryenegociatorin e OKB-së në bisedimet për statusin, Martti Ahtisaari, komisionerin për zgjerim të BE-së, Oli Rehn, ministren e jashtme të Austrisë, Ursulla Plasnik.

Ka konfirmuar gjithashtu pjesëmarrjen një delegacion i nivelit të lartë nga Tirana i kryesuar nga presidenti Alfred Moisiu.

Pjesëmarrjen e ka paralajmëruar edhe presidenti i Sllovenisë, Janez Dërnovshek, ai i Kroacisë, Stipe Mesiç, i Maqedonisë, Branko Cërvenkovski, kryeministri i Malit të Zi, Milo Gjukanoviq e të tjerë.

Mediat serbe kanë cituar një deklaratë të presidentit serb, Boris Tadiç, se ai do të donte të merrte pjesë në varrimin e presidentit Rugova.

Misioni i OKB-së në Kosovë ka thënë se nuk ka marrë asnjë kërkesë nga presidenti i Serbisë dhe ka shtuar se do të respektojë dëshirën e familjes së presidentit Rugova.

Zyrtarët e UNMIK-ut kanë thënë se është familja Rugova ajo që do të vendosë për ceremoninë e varrimit.

Masa sigurie

Kontrollin për situatën e sigurisë e ka marrë në duar Shërbimi Policor i Kosovës (SHPK), i ndihmuar edhe nga policia ndërkombëtare dhe ushtarët e KFOR-it.

Në shkallë vendi janë shtuar masat e sigurisë, sidomos në kryeqytet.

Komandantin e SHPK-së, kolonel Sheremet Ahmeti, tha se janë marrë masat e sigurisë për mbarëvjatjen e homazheve dhe të ceremonisë së varrimit.

Në sheshet kryesore në qëndrat e Kosovës dhe në ambiente familjare po vazhdon ndezja e qirinjëve, ndërsa Ministria e Shëndetësisë njofton për ngritjen e nivelit të gatishmërisë në institucionet shëndetësore gjatë mbajtjes së aktiviteteve për nder të presidentit Rugova.

Zyrtarë të aeroportit të Prishtinës kanë thënë ndërkaq se me ndihmën e KFOR-it dhe të UNMIK-ut do të jenë në gjendje për të pritur delegacionet që do të marrin pjesë në ceremoninë e varrimit.

Zëvendësdrejtori i aeroportit, Afrim Aziri, tha se nëse aeroporti i Prishtinës nuk do të mund të përballojë numrin e madh të fluturimeve, do të përdoret edhe aeroporti lokal i Gjakovës dhe ai ndërkombëtar i Shkupit.

Zoti Aziri tha se temperaturat e ulta dhe rreshjet e borës që po bien në Kosovë përbëjnë pengesë në ofrimin e shërbimeve në aeroportin e Prishtinës, por shtoi se janë ndërmarrë të gjitha masat e duhura për të siguruar funksionimin normal të fluturimeve.

[Psikologu]

PRISHTINËNë varrimin e presidentit të Kosoves, Ibrahim Rugova, të enjten në orën 13, do të marrin pjesë shumë delegacione të jashtme. Është vendosur që varrimi të bëhet në varrezat e dëshmorëve në Velani të Prishtinës.
Kreadministratori i Kosovës, Petersen ka thënë se çështja e pjesëmarrjes në varrim, të presidentit të Serbise, duhet të vendoset nga ana e familjes Rugova.
Në një deklaratë që i është shpërndarë qytetarëve, KFOR-i shprehu dhimbjen si dhe pikëllimin e përkushtimin e tij që edhe mëtutje të përkrahet nga populli i Kosovës.

[Psikologu]

\VATIKAN/PRISHTINË Papa Benedikti XVI e ka cilësuar presidentin Rugova si frymëzimin e virtyteve të forta njerëzore". Në mesazhin e tij Papa Benedikti i 16-të ka shprehur ngushëllimet e sinqerta për vdekjen e presidentin Rugova dhe ka bekuar popullin e Kosovës.
Ndërkaq ngushëllime për presidentin e ndjerë Rugova, ka shprehur dhe kryeministri britanik Toni Bler, i cili ka thënë se "presidenti Rugova paraqet një forcë të rëndësishme në jetën e Kosovës. Popullariteti i tij në Kosovë tregon për mbështetjen e gjerë, që ai kishte për angazhimet e tij paqësore për të ardhmen e Kosovës.
Telegrami i ngushëllimit të Blerit u publikua nga zyra britanike në Prishtinë.

[Psikologu]

ATHINË
Ministri i Jashtëm i Greqisë Petros Molyviatis tha se vdekja e presidentit Rugova është një vështiresi në negociatat për të ardhmen e Kosovës.
Është një ngjarje e pafat që e ka zbehur proçesin që ka filluar. Është një vështirësi shtesë përsa i përket problemit kompleks të Kosovës."-deklaroi kryediplomati grek pas takimit ministror të Evropes Juglindore.
"Krijimi i një shoqërie multietnike dhe demokratike në Kosovë është një kusht qenësor për të ardhmen evropiane të saj.- tha ministri Molyviatis.

[Psikologu]

PETERSEN: PËR PJESËMARRJEN E TADIQIT NË VARRIM DUHET TË VENDOSË FAMILJA E TË NDJERIT RUGOVA



Albana Isufi, Prishtinë


Në varrimin e presidentit Ibrahim Rugova deri tash është konfirmuar se do të marrin pjesë shumë delegacione shtetërore nga bota dhe rajoni.
Për të diskutuar rreth ceremonive mortore, shefi i UNMIK-ut Soren Jessen Petersen është takuar sot me kryeparlamentarin Nexhat Daci dhe kryeministrin Bajram Kosumi. Ka qenë vetëm Jessen Petersen që është prononcuar pas takimit me Nexhat Dacin. Duke u përgjigjur në pyetjet rreth kërkesës së presidentit serb Boris Tadiq për të marrë pjesë në varrim, Petersen tha:
“Kemi diskutuar për çdo gjë, sepse e njoftova kryetarin e Kuvendit rreth vizitave që do vijnë nga jashtë”, tha Petersen, duke pohuar se UNMIK-u ka marrë kërkesën nga presidenti Tadiq, por për këtë do të vendosë familja e zotit Rugova.
“Kjo, sikur çdo gjë tjetër i përket familjes, të cilët do të vendosin se cila është gjëja më e duhur për këtë fazë”, tha Petersen.
Ndryshe, përfaqësuesi i grupit punues për media në Këshillin Ekzekutiv të varrimit Muhamet Hamiti, tha se ndër personalitetet, që kanë konfirmuar pjesëmarrjen në varrim janë: i dërguari i posaçëm i Kombeve të Bashkuara për statusin Marti Ahtisari, përfaqësuesi i lartë i BE-së për Politikë të Jashtme dhe Siguri Havier Solana, shefi i Komisionit Evropian për Zgjerim Oli Rehn, kryetari i Kroacisë Stipe Mesiq, kryetari i Sllovenisë Janez Dernovshek, ai i Maqedonisë Branko Cervenkoski, Ministrja e Jashtme e Zvicrës Micheline Calmy-Rey dhe një delegacion shtetëror i përbërë nga 30 anëtarë dhe i kryesuar nga kryetari i Republikës së Shqipërisë Alfred Moisiu.
“Grupi që merret me pritjen e delegacioneve të huaja në kuadër të Këshillit Ndërinstitucional për organizimin e varrimit të presidentit Rugova, ka marrë konfirmime nga shumë delegacione të huaja, priten edhe shumë të tjera”.
Ndërkohë, Këshilli Ekzekutiv i Ceremonive Mortore nuk ka bërë të ditur ende vendin e varrimit të presidentit Rugova, ndonëse jozyrtarisht mësohet se ai do të varroset në “Varrezat e dëshmorëve” në lagjen Velania, jo shumë larg rezidencës së tij presidenciale. Muhamet Hamiti thotë se vendimi do merret sot pasdite.
Ceremonia kryesore në ditën e varrimit të enjten më 26 janar do të mbahet në sallën 1 tetori në qendër të Prishtinës.
Këshilli Ekzekutiv i Ceremonive Mortore ka ngarkuar Trupat Mbrojtëse të Kosovës që të bëjnë nderime gjatë homazheve dhe të përcjelljes së funeralit me nderime ceremoniale.
Zëdhënësi i TMK-së Shemsi Syla, thotë se nga e hëna TMK- ja ka nisur të ushtrojë këtë detyrë.
"Më 26 janar, Trupat e Mbrojtjes së Kosovës kanë përgjegjësinë e plotë të përcjelljes së funeralit nga Kuvendi i Kosovës deri te Salla e Sportit “ 1 Tetori” në Qendrën e Studentëve, ku do të bëhet ceremonia e fundit e lamtumirës. Organizimi dhe mbarëvajtja e ceremonisë janë përgjegjësi e Trupave të Mbrojtjes së Kosovës.
Në përfundim të kësaj ceremonie TMK do të përcjellë me nderime arkivolin e presidentit deri në varreza dhe me rastin e lëshimit të trupit në varr do të përcillet me të shtëna nderi.”
Presidenti Ibrahim Rugova ndërroi jetë të shtunën më 21 janar në rezidencën e tij në Velani pas një sëmundjeje të rëndë.

[Psikologu]

IBRAHIM RUGOVA ISHTE POLITIKAN QË DALLONTE SHUMË NGA UDHËHEQËSIT E TJERË TË RAJONIT



Rrahman Paçarizi, Prishtinë


Në fundin e viteve tetëdhjetë Ibrahim Rugova ishte një njeri që bënte kalimin nga disidenca intelektuale në disidencë politike, duke bërë së pari përmbysjen dhe përmbylljen e epokës së komunizmit dhe përcaktimin e orientimit properëndimor të Kosovës, në kohë kur kombet e tjera në ish-Jugosllavi udhëhiqeshin nga diktatorë apo njerëz që bartnin sistemin e kaluar, vlerësojnë dy ndër bashkëpunëtorët e vjetër të Dr. Rugovës, Ibrahim Berisha e Basri Çapriqi, që ishin në mesin e themeluesve të Lidhjes Demokratike të Kosovës, ku Dr. Rugova nisi karrierën politike.
"Ka disa arsye që mund të merren si kyçe për bartjen e veprimtarisë mund të themi si disidencë intelektuale në disidencë politike të Ibrahim Rugovës – një është e kaluara e tij si fëmijë dhe mendoj se profili i tij familjar është si një mesazh që e ka bartur gjithmonë, pavarësisht që nuk e ka shprehur në krijimtarinë e tij," thotë Ibrahim Berisha, sipas të cilit njohja e Dr. Rugovës me një profil kulture shumë të gjerë në Francë dhe me kulturën botërore, si dhe qenia e tij si ndër studiuesit e parë që ka thyer barrierat ideologjike, dha sinjale të qarta se është fjala për një profil disidenti kulturor dhe intelektual, i cili për një moment të caktuar, kur filluan konfliktet e gjera në hapësirën e ish-Jugosllavisë, bëri që ai të pozicionohet hapur në vijë politike si bartës i një mesazhi nacional dhe politik të shqiptarëve, duke luajtur rol të rëndësishëm në formimin e Lidhjes Demokratike të Kosovës.
"Mund të them se ka qenë rol kyç, pasi në vitin 1988/89, kur është themeluar Lidhja Demokratike, tashmë Dr. Rugova kishte ndërtuar një platformë kulturore, nacionale properëndimore liberale me shumë intervista dhe ballafaqime që i kishte me shkrimtarët serbë dhe vijat nacionaliste në ish-Jugosllavi në planin intelektual," thotë Berisha, për të shtuar se ky është një prej momenteve kyçe që disa nga themeluesit e LDK-së, të mos kishin asnjë dilemë, se kush mund të ishte bartës i pozicionit të liderit në LDK si parti që do të ishte thellësisht properëndimore, pro NATO-s, pro BE-së dhe pro Amerikës.
Ndërkaq, bashkëpunëtori tjetër dhe një nga themeluesit e LDK-së, Basri Çapriqi, duke shpjeguar kalimin e Dr. Rugovës nga intelektuali në politikan shprehet:
"Ka qenë një moment kur nuk ka pasur hapësirë për politikanët klasikë, ka qenë një kohë kur në politikë kanë funksionuar më mirë intelektualët sesa politikanët profesionistë. Ka qenë koha e rezistencës intelektuale, e krijimit të imazhit të një rezistencë paqësore intelektuale dhe këtë rol më së miri e kanë luajtur shkrimtarët në krejt Evropën e Lindjes," thotë Basri Çapriqi, duke e parë themelimin e LDK-së si një kundërshtim ideologjik, si përmbysje dhe përmbyllje të një epoke të komunizmit dhe nisje të një epoke tjetër, që Rugova do ta përcaktonte përmes insistimit të tij për shtet të pavarur dhe për demokraci.
"Unë do të thosha se roli madhor i tij ka qenë pranimi i tij që të vihet në krye të kësaj lëvizjeje. Kjo ka qenë shumë simpatike dhe ka krijuar një imazh jashtëzakonisht të pranueshëm për qendrat e mëdha evropiane dhe për Amerikën vënia e një intelektuali në krye të një lëvizjeje nacionale. Kjo ka qenë shumë vendimtare. Ka qenë koha kur intelektualët janë pranuar shumë më lehtë sesa politikanët klasikë".
Sidoqoftë, Ibrahim Berisha mendon se Dr. Rugovën asokohe e dallonte shumë profili i tij, që ishte totalisht i ndryshëm nga liderët e tjerë që ishin krijuar apo po krijoheshin në ish-Jugosllavi.
"Të gjithë liderët në hapësirat e ish-Jugosllavisë ishin ose diktatorë, ose pjesë e transmisionit të ish-politikave, duke nisur nga Gligorovi, Millosheviqi, Tugjmani, Kuçani, pastaj Izetbegoviqi, që ishte me refleksione të hapura të fondamentalizmit islamik. Në Kosovë në të njëjtën kohë krijohet një lider politik, por edhe nacional, me një profil plotësisht liberal properëndimor dhe pa asnjë gjuhë të urrejtjes apo konfliktit ".
Roli i Dr. Ibrahim Rugovës për themelimin e Lidhjes Demokratike të Kosovës, që asokohe funksionoi si lëvizje, është cilësuar i pakontestueshëm nga të gjithë bashkëpunëtorët e tij, të cilët e kanë analizuar në mënyra të ndryshme kalimin e tij nga një shkencëtar me rezultate të konsiderueshme në fushë studimesh në një politikan, pavarësisht nga cilësimi që i bëhej si një njeri paksa i tërhequr, por edhe i qëndrueshëm njëkohësisht.

[Psikologu]

Rugova e ka luajtur me mençuri rolin e vet


Ibrahim Rugova


Intervistë me Adelhajde Failke Timan, ish Kryeredaktore e seksionit shqip të Radios DW, sot e ngarkuar me marrëdhëniet ndërkombëtare në drejtorinë e DW.



Shmid:Zonja Timan, cili ka qenë personaliteti i Ibrahim Rugovës?

Timan: Mendoj, se në radhë të parë, Rugova karakterizohej nga vendosmëria. Ai ka qenë një politikan që në vazhdën e trazirave të mëdha politike ruante me këmbëngulje parimet e tij. Pra ai ishte mjaft rigoroz, një nga të vetmit politikan që kam përjetuar gjatë periudhës kur jam marrë me Evropën Juglindore, i cili praktikisht i ruajti me besnikëri parimet e tij edhe në periudhëm mjaft të tensionuar të paraluftës, por edhe në të gjithë procesin e paqes. Dhe në shumë pika historia i dha të drejtë.

Shmid: Përse mundi Rugova ta luante këtë rol? Në Kosovë ka patur edhe personalitete të tjera që u përpoqën të zhvillonin profilin e tyre, por në fund të fundit, ishte Rugova ai që mbeti në krye të vendit. Përse forcat e tjera politike nuk arritën që ta sfidonin atë?

Tieman: Besoj se kjo ka të bëjë me gjenezën e skenës politike në Kosovë. Lidhja Demokratike e Kosovës dhe e tërë qëndresa kundër regjimit të Millosheviçit, u personifikuan që në fillim të viteve 90-të me figurën e Ibrahim Rugovës. Ai arriti që, nga një kandidat kompromisi i LDK-së, siç ishte në fillim të rezistencës pasive brenda ish-Jugosllavisë, të krijonte një lloj pushteti me të cilin dominoi LDK-në, që ishte partia qëndrore politike në Kosovë. Sigurisht, që kjo ka të bëjë edhe me faktin, që me kalimin e kohës ai ishte i vetmi që mbeti, por edhe me atë, që bashkësia ndërkombëtare gjithmonë e ka ruajtur dhe mbështetur imazhin e tij si partnerin kryesor të bisedimeve. Kjo e ka forcuar atë në planin e brendshëm.

Shmid: Pas vitit 98-të, LDK-ja e humbi pozitën qëndrore? UÇK-ja u krijua, duke e nxjerrë jashtë loje pacifizmin, që kishte propaganduar deri atëherë Rugova. Si arriti Rugova që të zinte vend sërish në politikën kosovare?

Timan: Është e vërtetë, që në konfliktet mbas 98-ës dhe 99-ës, LDK-ja përjetoi pikën e saj më të ulët. Gjatë këtyre viteve të konfliktit LDK-ja ishte mjaft e përçarë edhe nga brenda. E megjithatë LDK mbeti gjithmonë partneri kryesor i bisedimit për botën e jashtme. As UÇK-ja nuk ishte e sistemuar në radhët e saj. Struktura më të qarta u kristalizuan më vonë. Gjatë procesit të negociatave në Rrambuje, u përfaqësuan kampe të ndryshme dhe Rugova ishte padyshim figura politike vendimtare për perëndimin. Besoj se një faktor shumë i rëndësishëm i pozitës së tij të fuqishme kishte të bënte me faktin, që të tjerët ishin edhe më të dobët.

Shmid: A mos vallë luajti Rugova një lojë të dyfishtë: në njërën anë shteti paralel mbante lart flamurin pacifist, por në parim e dinte shumë mirë, që UÇK-ja po përgatitej për konflikt të armatosur. A e dinte këtë zoti Rugova?

Timan: Ky është spekullim. Mendoj, se rrugët e informimit brenda për brenda Kosovës kanë funksionuar më së miri. Sigurisht që ai e dinte fare mirë se ç'po ndodhte. Por në anën tjetër, me anë të qendrimit të tij konstant dhe siç e thamë edhe më parë mostundjes nga parimet, ai nuk e pat mbështetur këtë rrugë. Nuk duhet harruar gjithashtu, që Rugova ishte një politikan që reagonte "kombëtarisht", në kuptimin e vjetër të fjalës. Shkëputja nga Jugosllavia dhe pavarësimi përbënin lajtmotivin kryesor të politikës së tij. Gjatë viteve të fundit, ai arriti që pikërisht qendresën e armatosur, që fillimisht e pati refuzuar, ta integronte në të gjithë politikën e tij në Kosovë dhe ta kthente në anën e tij. Ky nuk ka qenë veprim i thjeshtë. Të gjitha partitë identifikohen sot me historinë e qëndresës.

Shmid: Rugova nuk ka qenë politikan mediash. Në vitin 1999 nuk ishte e qartë strategjia që ai ndiqte në lidhje me UÇK-në. Në fillim ai ishte në Beograd, pastaj shkoi në ekzil në Itali dhe pothuajse nuk doli kurrë para medias. Ishte shumë i tërhequr dhe të gjithë pyesnin, çfarë ka ndodhur me të. Si e keni përjetuar ju si gazetare politikanin Rugova?


Timan: Natyrisht ishte shumë e vështirë, që të arrije të bëje një intervistë me zotin Rugova. Ai dinte fare mirë të heshte në momentin e duhur. Kjo shpjegon edhe mënyrën se si u soll ai në konfliktin e 1999-ës. Në shumë gjëra ai nuk ka pranuar të pozicionohej. Për javë të tëra nuk ka dhënë intervista. Më kujtohet se si në vitin 1999 erdhi në Gjermani, mbas vizitës në Itali, dhe unë e takova atë në Bon. Ai nuk pranoi t'i jepte intervistë Dojçe Veles. Ai thjesht heshti. Nuk pati asnjë deklaratë. Mund të këmbeje me të dy tre fjalë, por në disa momente kritike ai nuk ka pranuar të pozicionohej. Parë nga kohërat e sotme mund të thuhet, se ndoshta ka qenë një reagim i mençur, sepse duke heshtur mund të thuash nganjëherë më shumë se sa të ngatërrohesh nëpër thënie kontradiktore dhe zoti Rugova dinte të thoshte pikërisht vetëm atë, që atij i dukej e padiskutueshme dhe e drejtë edhe në aspektin historik. Pra një politikan, që funksiononte tërësisht në kundërshtim me ligjet e medias së sotme.

Shmid:A ekziston ndonjë frazë historike e tij, me të cilën ai do të mbetet gjithmonë në kujtesë, si për shembull fjalia e Kenedit "Jam berlinez"?

Timan: Frazat e tij ishin shumë të qarta. Ekzistone një formulë, që e dinte përmendësh kushdo që ka bërë intervistë me të, ishte pak a shumë e tillë: "Kosova duhet të bëhet një shtet i pavarur me kufij të hapur me Serbinë dhe Shqipërinë dhe si zgjidhje provizore të jetë nën protektoratin e OKB-së". Këtë formulë ai e përsëriste që në fillim të viteve 90-të. Rugova nuk ishte emocional në biseda. Dhe kam përshtypjen se kjo i irritonte njerëzit: në një kohë eksodi, lufte dhe qorrsokaku në diplomacinë ndërkombëtare, ai të linte përshtypjen sikur e tëra nuk kishte të bënte me të. Mendoj se ai ishte në gjendje t'i mbante emocionet fare mirë nën kontroll dhe kjo e ka bërë figurën e tij deri diku enigmatike. Të pakta ishin momentet kur dilte ndonjë emocion nëpër biseda. Mua më ka mbetur në mend një bisedë që ka bërë Dojçe Velja me të dhe që kishte si subjekt atë si njeri, e aty kishte disa momente që ishin shumë të prekshëm. Ai foli për dashurinë, për familjen për fenë, kishte një lidhje të veçantë me Papa Gjon Pali i dytë, edhe afërsinë me Vatikanin e kishte integruar në konceptin e tij politik, çka është shumë e çuditshme për një politikan që jo vetëm në emrin e tij Ibrahim e tregon që është me prejardhje myslimane. Ai kishte një formim karakteri që përmbante një koncept shumë të qartë moral, pra shtyllat themelore: Familja, nderi, besnikëria, dhe qartësia fetare.

Shmid:Çfarë roli ka luajtur ai në shoqërinë kosovare, atë të bajraktarit, të padronit, të babait, apo më tepër rolin e një politikani?

Timan: Besoj se ai nuk shkon në asnjërën prej këtyre dy kategorive. Ishte tepër i rezervuar për të luajtur rolin e një. Gjithashtu mungesa e taktikës brenda partisë nuk i jep cilësinë e një politikani klasik. Pra ai nuk bën pjesë në asnjërën pre këtyre kategorive. Situata historike e solli që Kosova të prezantohet nga një njeri i tillë, që është tërësisht atipike për një politikan, gjë që ai e bëri me mençuri, sipas mënyrës së vet.

[Psikologu]

Një simbol, por jo aktor politik - Kosova pa Ibrahim Rugovën

Vdekja e presidentit të Kosovës Ibrahim Rugova dhe Kosova pa të është sot një ndër temat që komentohet në shtypin gjerman.

"Frankfurter Allgemeine Zeitung" shkruan: "Nuk është e pamëshirme, kur disa thonë, se vdekja e Rugovës madje mund t´i lehtësojë bisedimet. Eshtë mëse e vërtetë, që burri plot merita me shallin e mëndafshtë në fund u shndërrua në një monument të vetvetes, i ngurtësuar në kërkesën e tij për pavarësinë e Kosovës. Megjithatë edhe ata që kritikojnë ngurtësinë e tij, kurrësesi nuk ofrojnë zgjidhje më të mira. Serbia do ta mbajë Kosovën, por asnjëherë nuk do të jetë e gatshme që të pagujë për këtë çmimin e duhur: pra të pranojë pjesëmarrjen e shqiptarëve në pushtetin e Beogradit. Po aq jorealist është edhe propozimi i hedhur për një konfederatë serbo-malazezo-shqiptare, që ka për qëllim të shmangë pavarësinë e Kosovës", komenton "Frankfurter Allgemeine Zeitung".

Ndërsa e përditshmja "Neues Deutschland" që del në Berlin analizon: "Thuhet një vdekje në kohë të papërshtatshme. Por kur do të ishte koha e përshtatshme? Bisedimet ndoshta do të influencohen në aspektin kohor, por jo në drejtim të klimës e aspak lidhur me përmbajtjen. Ndonëse në Prishtinë tani do të hapet grindja për pasardhësin e burrit me shallin e mëndafshtë, kushdo që të jetë ai pozicionet e serbëve dhe shqiptarëve do të mbeten të pandryshueshme, ashtu si edhe në kohën që jetonte Rugova", nënvizon "Neues Deutschland".

Nga komenti i "Braunschweiger Zeitung" shkëpusim: "Endrra e jetës nuk mundi të realizohet për Ibrahim Rugovën: pavarësia e Kosovës. Me rafinesë ai e ka kufizuar influencën e luftëtarëve të armatosur të UÇK-së duke i orientuar shqiptarët në kursin e tij të paqes. Pavarësisht nga disa suksese Rugova nuk iu afrua shumë zgjidhjes së problemit. Serbët e refuzojnë pavarësinë e Kosovës po aq sa fort e kërkon atë 95% e popullssisë shqiptare në Kosovë. Bashkësia ndërkombëtare nga ana e saj kërkon një kompromis dhe e refuzon ndarjen e Kosovës në bazë të kritereve etnike. Me këtë situatë të bllokuar do të konfrontohet pasardhësi i Rugovës. Por cili do të jetë ai? Rugova e ka lënë pasdore konceptimin e trashëgimisë politike", tërheq vëmendjen "Braunschweiger Zeitung".

"Rhein Zeitung" e Koblencit nënvizon: "Kosovarët nuk do të pranojnë asgjë më pak se pavarësia. Ndaj serbët do të jenë ata që së fundi duhet të lëvizin. Kosova është e humbur për ta - madje qysh tani si protektorat i OKB-së. Ky mendim është i dhimbshëm. Cilido politikan i nivelit të lartë që e shpreh këtë të pashmangshme, mund ta paguajë guximin e tij me dështimin politik. Më e mira që mund të arrijë Serbia është bashkimi i territoreve kufitare të banuara nga serbët. Endrra e Rugovës për një Kosovë të lirë ndërkaq do të jetojë, derisa kosovarët të festojnë themelimin e shtetit. Nëse arrihet deri këtu, atëherë ndoshta nuk do të harrohet trashëgimia e Rugovës. Por më e rëndësishme se një shtet kosovar është bashkëjetesa në paqe e popujve të Ballkanit. Rugova s´do të kish dëshiruar kurrë një Kosovë agresive nacionaliste", shkruan "Rhein Zeitung".

Një citat nga komenti i "Frankfurter Rundschau": "Me vdekjen e presidentit të Kosovës Rugova, nuk është bërë më e lehtë situata për ndërmjetësuesin e OKB-së, Ahtisari, përkundrazi ajo është vështirësuar dukshëm. Problemi që ka përpara diplomati findlandez duket pathuajse i pazgjidhshëm. Në bisedimet e shtyra tani për në shkurt ai duhet të afrojë pozicionet e papajtueshme të serbëve dhe shqiptarëve të Kosovës. Karta evropiane e presionit ndaj Serbisë e Malit të Zi, që për një antarësim në BE duhet të mbahet qëndrim i arësyeshëm ndaj çështjes së Kosovës, ka humbur vlerën qëkurse në kryeqytetet evropiane po debatohet për kufijtë e zgjerimit të BE-së. Sidoqë të jetë zgjidhja pas bisedimeve që do të zgjasin, e qartë është që bashkësia ndërkombëtare, nën drejtimin e BE-së, duhet të përgatitet për një kujdestari afatgjatë në Kosovë", shkruan "Frankfurter Rundschau".

Në artikullin e "Trierischer Volksfreund" lexojmë: "Thëngjilli në fuçinë e barutit Kosovë, që dukej se prej kohësh ishte bllokuar, tani do të japë shkëndija më shumë se kurrë, në rast se nuk gjendet shpejt një kompromis. Ndaj BE-ja, OKB-ja dhe NATO-ja pas vdekjes së Rugovës duhet t´i ulin sa më shpejt në tryezën e bisedimeve palët e armiqësuara", tërheq vëmendjen "Trierischer Volksfreund".

Gazeta e Berlinit "Tagesspiegel" boton një intervistë me Koordinatorin e Paktit të Stabilitetit për Evropën Juglindore, Erhard Busek. Ky i fundit mendon që bisedimet do të kenë një rrjedhë të vështirë. "Parashikoj që në katër ose gjashtë muajt e ardhshëm mund të ketë një krizë të madhe", thotë Busek duke pasur parasysh bisediemt. Busek rolin e Rugovës e përshkruan: "Ai ishte një simbol, por jo një aktor politik", ndaj në bisedimet për statusin Rugova nuk do të kishte qenë negociatori vendimtar", shprehet Koordinatori i Paktit të Stabilitetit Erhard Busek në intervistë për gazetën "Tagesspiegel".